Hulyo 29–Agosto 4

Mga Buhat 22–28

“Usa ka Tigpangalagad ug usa ka Saksi”

Basaha ang Mga Buhat 22–28 uban sa pag-ampo diha sa imong kasingkasing nga ang Espiritu Santo modasig kanimo kon unsay i-focus nga makatabang sa mga sakop sa imong klase. Irekord ang bisan unsang mga ideya nga mosantup sa hunahuna; mahimo nga kini maoy sinugdanan sa imong plano sa pagtudlo.

Irekord ang Imong mga Impresyon

Dapita ang Pagpaambit

Hangyoa ang mga sakop sa klase sa pagsulat sa pakisayran sa kasulatan gikan sa Mga Buhat 22–28 nga nakapadayeg nila karong semanaha. Kolektaha ang ilang mga tubag ug basaha ang pipila sa mga bersikulo. Dapita ang pipila ka sakop sa klase sa pagpaambit kon nganong kini nga mga bersikulo makahuluganon ngadto kanila.

Itudlo ang Doktrina

Mga Buhat 22:1–21; 26:1–29

Ang pagpamatuod usa ka pamahayag sa kamatuoran base sa personal nga kahibalo o gituohan.

• Ang pagpamatuod ni Pablo ngadto nila ni Festo ug Haring Agripa mahimong usa ka oportunidad sa paghisgot kon unsay buot ipasabut sa paghatag og pagpamatuod. Mahimo nimong sugdan pinaagi sa paghangyo sa mga sakop sa klase sa pagribyu sa Mga Buhat 22:1–21 ug 26:1–29. Unsay atong makat-unan gikan sa ehemplo ni Pablo mahitungod sa paghatag og pagpamatuod? Unsa ang dugang nga mga baruganan mahitungod sa paghatag og pagpamatuod ang atong makat-unan gikan sa pamahayag ni Elder M. Russell Ballard diha sa “Dugang nga mga Kapanguhaan”? Ang pagkanta o pagtukar sa himno nga “Testimony” (Hymns, nu. 137) mahimong makatabang sa pagdala sa Espiritu ngadto sa inyong panaghisgutan.

• Ang mga sakop sa klase mahimong nakaangkon og personal nga mga ideya samtang gitun-an nila ang pagpamatuod ni Pablo ngadto nila ni Festo ug Haring Agripa. Dapita sila nga mopaambit. Unsa nga mga pasidaan ang mahatag sa tubag ni Haring Agripa ngadto sa pagpamatuod ni Pablo ngari kanato karon? (tan-awa sa Mga Buhat 26:28). Ang mga sakop sa klase mahimong makahunahuna usab og laing mga pagpamatuod gikan sa mga kasulatan nga nakapadasig kanila. (Ang ubang mga ehemplo naglakip sa Job 19:25–27; 2 Nephi 33:10–15; Alma 5:45–48; ug DP 76:22–24.) O tingali mahimo silang mopaambit og mga kasinatian sa dihang naimpluwensyahan sila sa pagpamatuod sa usa ka tawo.

• Si Propeta Joseph Smith mitandi sa iyang mga kasinatian sa pagpamatuod bahin sa Unang Panan-awon ngadto sa kasinatian ni Pablo sa atubangan ni Haring Agripa (tan-awa sa Joseph Smith—Kasaysayan 1:24–25). Tingali ang mga sakop sa klase mahimong magtrabaho nga magpares sa paghimo og usa ka lista sa mga pagkapareha tali niining duha ka sulugoon sa Dios. Sa unsang paagi nga kining kalihokan makatabang kanato aron masabtan kon unsaon sa pagpaambit sa atong pagpamatuod bisan kon ang pagbuhat sa ingon lisud?

• Bisan kon wala magtinguha si Pablo sa espiritwal nga pagsaksi nga iyang nadawat didto sa dalan paingon sa Damasco, gigahin niya ang nahabilin sa iyang kinabuhi sa pagtrabaho nga mapabilin ug mapanalipdan ang iyang pagpamatuod (tan-awa sa Mga Buhat 22:10, 14–16; 26:19). Ang ehemplo ni Pablo makatabang nga masabtan sa imong klase nga ang pagpamatuod nagkinahanglan og trabaho ug sakripisyo. Sa pagsugod og panaghisgutan mahitungod niini, tingali ang usa ka sakop sa klase mahimo nga mohulagway sa iyang paningkamot nga mahimong usa ka hanas nga musikero, artist, o atleta. Sa unsang paagi nga ang pagpalambo sa maong kahanas susama sa pagbaton ug pagpalig-on sa pagpamatuod? Unsa nga mga paningkamot ang kinahanglan natong himoon aron makabaton ug mapalig-on ang pagpamatuod? (tan-awa usab sa Alma 5:46).

Mga Buhat 26:9–23

Kita adunay responsibilidad sa pagpangalagad sa uban.

• Gitawag sa Ginoo si Pablo aron mahimong “usa ka tigpangalagad” (Mga Buhat 26:16), apan unsa may gipasabut niini nga pulong? Aron matabangan ang mga sakop sa klase nga makapangita og paagi kon unsaon nila sa pagpangalagad sa uban, mahimo nimong isulat sa pisara ang pangutana sama sa Unsa may gipasabut sa pagpangalagad? Dapita ang mga sakop sa klase nga mangita og mga tubag diha sa mosunod nga mga kapanguhaan: Mateo 20:25–28; Mga Buhat 26:16–18; 3 Nephi 18:29–32; “Minister,” scriptures.lds.org. Samtang mopaambit sila sa unsay ilang nakit-an, awhaga sila sa paghisgot og mga paagi nga makapangalagad kitang tanan sa uban, lakip na diha sa atong mga calling sa Simbahan.

• Si Brother David L. Beck naghisgot mahitungod sa mga responsibilidad sa mga naghupot sa priesthood sa pagpangalagad sa uban, ug daghan sa iyang mga ideya ang magamit sa tanan niadtong nagserbisyo sa Simbahan (tan-awa sa “Ang Sagrado Ninyong Katungdanan sa Pagpangalagad,” Liahona, Mayo 2013, 55–57). Pananglitan, unsay matudlo ngari nato sa istorya ni Chy Johnson mahitungod sa pagpangalagad sa uban? Unsa ang ubang mga ehemplo nga mapaambit sa mga sakop sa klase? Hatagi og panahon ang mga sakop sa klase sa paghunahuna bahin sa usa ka tawo kinsa ilang mapangalagaran karong semanaha ug unsaon nila sa pagbuhat sa ingon.

Mga Buhat 27

Kon mopatalinghug kita sa mga propeta sa Ginoo, Siya mogiya ug manalipod kanato gikan sa dautan.

• Ang mga sakop sa imong klase mahimong adunay mga kasinatian sa dihang misunod sila sa direksyon sa mga propeta bisan kon lahi kini sa tambag sa mga eksperto sa kalibutan o sa mga opinyon sa mga tawo nga naglibut kanila. Dapita ang pipila ka sakop sa klase nga motungha sa klase nga andam nga mopaambit sa maong mga kasinatian. Dayon dapita ang mga sakop sa klase sa pagpaambit kon unsay reaksyon sa mga tawo diha sa sakayan sa dihang nanagna si Pablo nga ang sakayan makasugat og “kadaut ug dakong kapildihan” (Mga Buhat 27:10). Sa unsang paagi nga ang mga reaksyon sa mga tawo ngadto sa tambag sa propeta susama sa atong panahon?

• Unsa man ang atong makat-unan gikan sa Mga Buhat 27 mahitungod sa pagsunod sa mga propeta sa Ginoo? Ang kinutlo ni Elder Ronald A. Rasband diha sa “Dugang nga mga Kapanguhaan” naglangkob og mga pangutana nga angayang pamalandungon ug usa ka lista sa mga peligro nga gipasidaan na kanato sa modernong mga propeta. Sa unsang paagi nga kita napanalanginan pinaagi sa pagsunod sa tambag sa buhi nga mga propeta?

Awhaga ang Pagkat-on diha sa Panimalay

Aron matabangan nga madasig ang mga sakop sa klase sa pagsugod og basa sa mga sulat ni Pablo, hangyoa sila sa paghunahuna nga usa ka sakop sa Korum sa Napulog Duha mipadala og personal nga sulat ngadto sa inyong ward. Unsay inyong bation bahin niana nga sulat? Unsa man kaha ang iyang isulti ngari kanato? Dapita ang mga sakop sa klase sa paghunahuna niini samtang magbasa sila sa sulat ni Pablo ngadto sa mga Santos nga taga-Roma.

Dugang nga mga Kapanguhaan

Mga Buhat 22–28

Paghatag og pagpamatuod.

Si Elder M. Russell Ballard naghisgot mahitungod sa pagpamatuod ni Pablo sa atubangan ni Haring Agripa ug nagtudlo kon unsay gipasabut ngari kanato sa paghatag og pagpamatuod:

“Ang atong mga miting sa pagpamatuod [testimony meetings] kinahanglang masentro diha sa Manluluwas, sa mga doktrina sa ebanghelyo, sa mga panalangin sa Pagpahiuli, ug sa mga pagtulun-an sa mga kasulatan. Kinahanglang pulihan nato sa lunsay nga mga pagpamatuod ang mga istorya, mga istoryang pangbiyahe, ug ang mga lektyur. Kadtong gitugyanan sa pagpamulong ug sa pagtudlo sa atong mga miting kinahanglang mobuhat sa ingon uban sa gahum sa doktrina nga madungog ug mabati, mobayaw sa mga espiritu ug makabalaan sa atong mga katawhan. …

“… Samtang maayo gayud kanunay ang pagpadayag og gugma ug pasalamat, ang mao nga pagpadayag wala makahatag sa matang sa pagpamatuod nga makapasiga og kalayo diha sa mga kinabuhi sa uban. Ang paghatag og pagpamatuod mao ‘ang pagsaksi pinaagi sa gahum sa Espiritu Santo; sa paghimo og ligdong nga deklarasyon sa kamatuoran nga gibase sa personal nga kahibalo o pagtuo’ [Giya ngadto sa mga Kasulatan, “Pagpamatuod,” scriptures.lds.org]. Ang klaro nga pamahayag sa kamatuoran makahatag og kalainan sa mga kinabuhi sa katawhan. Mao kana ang makapausab sa mga kasingkasing. Mao kana ang ikumpirmar sa Espiritu Santo diha sa mga kasingkasing sa mga anak sa Dios” (“Lunsay nga Pagpamatuod,” Liahona, Nob. 2004, 41).

Pagbarug uban sa mga lider sa Simbahan.

Si Elder Ronald A. Rasband nagtudlo:

“[Ang atong mga lider], pinaagi sa balaang inspirasyon, gitawag nga motudlo ug mogiya nato ug … nanawagan nato nga maglikay sa mga peligro nga atong giatubang matag adlaw—gikan sa wala kaayoy pagtagad sa adlawng Igpapahulay, ngadto sa mga hulga sa pamilya, ngadto sa pangataki sa kagawasan sa relihiyon, ug gani sa pagsupak sa pinadayag sa ulahing mga adlaw. Mga kaigsoonan, naminaw ba kita sa ilang tambag? …

“Samtang mopadayon kita sa unahan, nagpili sa pagsunod sa tambag ug mga pasidaan sa atong mga lider, mopili kita nga mosunod sa Ginoo samtang ang kalibutan nagpaingon sa laing direksyon. Mopili kita nga mokupot sa kuptanan nga puthaw, nga mahimong mga Santos sa Ulahing mga Adlaw, nga magbuhat sa sugo sa Ginoo, ug mapuno ‘sa tuman nga hingpit nga kalipay’ [1 Nephi 8:12].

“Ang dakong pangutana karon klaro: nagbarug ba mo uban sa mga lider sa Simbahan sa nagkangitngit nga kalibutan aron mapakaylap ninyo ang Kahayag ni Kristo?” (“Nagbarug uban sa mga Lider sa Simbahan,” Liahona, Mayo 2016, 47–48).

Pagpalambo sa Atong Pagtudlo

Pangandam daan. “Samtang mamalandong ka kon sa unsang paagi ang mga baruganan sa ebanghelyo nga imong gitudlo mopanalangin sa mga sakop sa imong klase, ang mga ideya ug mga impresyon moabut sa kada adlaw sa imong kinabuhi—samtang mopadulong ka sa trabaho, magbuhat sa mga buluhaton sa balay, o makig-istorya sa pamilya ug mga higala. Ayaw hunahunaa ang espirituhanong pagpangandam isip usa ka butang nga gahinan nimo og panahon apan isip usa ka butang nga kanunay nimong gibuhat” (Pagtudlo sumala sa Pamaagi sa Manluluwas, 12).