“Agosto 5–11. Mga Taga-Roma 1–6: ‘Ang Gahum sa Dios alang sa Kaluwasan’” Dali, Sunod Kanako—Alang sa Sunday School: Bag-ong Tugon 2019 (2019)
“Agosto 5–11. Mga Taga-Roma 1–6,” Dali, Sunod Kanako—Alang sa Sunday School: 2019
Agosto 5–11
Mga Taga-Roma 1–6
“Ang Gahum sa Dios alang sa Kaluwasan”
Mainampuong mobasa sa Mga Taga-Roma 1–6 nga maghunahuna sa mga sakop sa imong klase. Makatabang kini kanimo nga mahimong sensitibo sa mga pag-aghat sa Espiritu samtang mangandam ka sa pagtudlo.
Irekord ang Imong mga Impresyon
Dapita ang Pagpaambit
Ikonsiderar ang paghatag sa mga sakop sa klase og pipila ka minuto sa pagsiksik sa Mga Taga-Roma 1–6 alang sa bersikulo nga ganahan gayud nila. Dayon mahimo silang mopaambit sa bersikulo nga ilang gipili ngadto sa usa ka tawo nga naglingkod sa duol.
Itudlo ang Doktrina
“Wala ko igakaulaw ang maayong balita [ebanghelyo] ni Kristo.”
-
Nakasulay na ba ang mga sakop sa imong klase og pagbiay-biay tungod sa ilang mga gituohan? Dapita sila sa pagbasa sa Mga Taga-Roma 1:16–17 ug sa paghunahuna og mga higayon gikan sa basahon sa Mga Buhat diin gipakita ni Pablo nga wala niya ikaulaw ang ebanghelyo. Unsa ang pipila ka butang nga nakapahimo nato nga wala ikaulaw nga nahimong mga miyembro sa Ang Simbahan ni Jesukristo sa mga Santos sa Ulahing mga Adlaw? Dapita ang mga sakop sa klase sa pagpaambit og mga kasinatian diin gipakita nila o sa uban nga wala nila ikaulaw ang ebanghelyo ni Jesukristo.
Mga Taga-Roma 1:16–17; 2:28–29; 6:1–11
Ang tinuod nga pagkadisipulo makita diha sa atong kinasingkasing nga pasalig, dili lang sa atong mga lihok.
-
Unsaon nato sa pagtimbang-timbang ang atong kaugalingong pagkadisipulo? Ang tambag ni Pablo ngadto sa mga taga-Roma makatabang nga atong mahinumduman ang pag-focus dili sa pagkompleto sa usa ka checklist sa mga buluhaton apan diha “sa kasingkasing [ug] sa espiritu” (Mga Taga-Roma 2:29). Aron matabangan ang imong klase nga makasabut sa tambag ni Pablo, mahimo nimong isulat ang teksto gikan sa Mga Taga-Roma 2:28–29 diha sa pisara. Pulihi ang pulong nga Judeo og Santos sa Ulahing mga Adlaw ug ang pulong nga sirkunsisyon og ang pakigsaad. Unsa ang madugang niining kausaban ngadto sa atong pagsabut sa mga pagtulun-an ni Pablo? Mahimo usab nga imong hisgutan ang mga ehemplo sa mga butang nga atong gibuhat isip mga miyembro sa Simbahan nga mas makahuluganon ug gamhanan kon buhaton nga “iya sa kasingkasing, espirituhanon” (Mga Taga-Roma 2:29). Pananglitan, tan-awa sa pakigpulong ni Elder Jeffrey R. Holland mahitungod sa home teaching, “Mga Representante sa Simbahan” (Liahona, Nob. 2016, 61–67), o pakigpulong ni Elder Neil L. Andersen mahitungod sa misyonaryo nga buhat, “Usa ka Saksi sa Dios” (Liahona, Nob. 2016, 35–38).
“Diin gani midagsang ang pagpakasala, ang grasya milabi pa hinoon usab sa pagdagaya.”
-
Mahimong adunay mga tawo sa imong klase nga nagkinahanglan og tabang sa pagsabut sa mga pagtulun-an ni Pablo niining mga kapitulo mahitungod sa hugot nga pagtuo, mga buhat, ug grasya (tan-awa usab sa outline karong semanaha diha sa Dali, Sunod Kanako—Alang sa mga Indibidwal ug mga Pamilya ug sa Hubad ni Joseph Smith diha sa Giya ngado sa mga Kasulatan). Unsaon man nimo sa pagtabang kanila nga makakat-on sa usag usa? Ikonsiderar ang pagpresentar sa mosunod nga duha ka sitwasyon aron matabangan ang mga sakop sa klase nga makasabut nga dili kinahanglan natong tan-awon ang atong maayong mga buhat isip usa ka paagi nga mapamatud-an ang atong katakus, ni kinahanglan natong tan-awon ang grasya ni Kristo isip usa ka rason nga ipangatarungan ang atong mga sayop ug mga sala. Dapita ang mga sakop sa klase sa pagsiksik sa mga kamatuoran diha sa Mga Taga-Roma 3:20–31; 5:1–2; 6:1–2, 21–23 nga makatabang nila ni Gloria ug Justin. Unsa ang ubang doktrinal nga mga kamatuoran diha sa “Dugang nga mga Kapanguhaan” ang makatabang nila aron masabtan ang kaimportante sa pagpahigayon sa matarung nga mga buhat ug pagsalig diha sa grasya ni Kristo? Mahimo nimong hangyuon ang mga sakop sa klase sa pagpaambit sa unsay ilang nakit-an o i-role-play ang usa ka panag-istoryahanay.
Sitwasyon 1
Ikaw dunay higala nga ginganlan og Gloria kinsa mibati nga nabug-atan sa iyang mga paningkamot nga mahimong matinud-anon nga disipulo. Naningkamot siya og maayo sa pagbuhat sa tanan nga iyang gibati nga kinahanglan niyang buhaton, apan kasagaran mabalaka siya nga ang iyang mga paningkamot dili igo. “Igo ba ang akong kamaayo?” naghunahuna siya. “Dawaton ba ko sa Ginoo?”
Sitwasyon 2
Ikaw dunay higala nga ginganlan og Justin kinsa wala kaayo mabalaka mahitungod sa paghimo og matarung nga mga pagpili. Nagtuo siya kang Jesukristo, nagtambong sa iyang mga miting sa simbahan, ug usa siya ka mahigugmaong amahan ug buotan nga silingan. Hinoon, mipili siya nga dili motuman sa mga sumbanan nga makapahimo niyang kwalipikado alang sa usa ka temple recommend. Sa dihang ang pamilya ug mga higala misulay sa pag-awhag kaniya nga mangandam alang sa templo, mitubag siya, “Maayo man ko nga tawo. Duna koy pagtuo kang Kristo. Gibayaran na Niya ang bugti sa akong mga sala, ug dili man siguro ko Niya isalikway pagawas sa celestial nga gingharian tungod sa maong ginagmay nga mga problema.”
Awhaga ang Pagkat-on diha sa Panimalay
Aron maawhag ang mga sakop sa klase nga mobasa sa Mga Taga-Roma 7–16, mahimo nimo silang sultihan nga gihulagway ni Pablo ang usa ka gubat sa sulod niya—ug kanatong tanan. Diha sa Mga Taga-Roma 7–16 atong makita kon unsa kana nga gubat ug unsaon sa pagdaug niana.
Dugang nga mga Kapanguhaan
Hugot nga pagtuo, grasya, ug mga buhat.
Samtang kinahanglan kitang maningkamot nga mosunod sa mga sugo, ang bugtong pagkamasulundon sa mga balaod sa Dios dili makaluwas kanato (tan-awa sa Mga Taga-Roma 3:27–31). Bisan inubanan sa atong pinakamaayong mga paningkamot, “nakasala man [kitang] tanan, ug nakabsan sa himaya sa Dios” (Mga Taga-Roma 3:23). Tungod niana nga rason, nagkinahanglan kitang tanan kang Jesukristo, kansang grasya motugot kanato nga mapasaylo sa atong mga sala ug makapahimo kanato sa pagpadayon sa paghimo og maayong mga buhat. Sama sa gitudlo ni Pablo, “Diin gani midagsang ang pagpakasala, ang grasya milabi pa hinoon usab sa pagdagaya” (Mga Taga-Roma 5:20).
Si Presidente David O. McKay mipaambit og usa ka analohiya mahitungod sa usa ka batang lalaki nga nagsugod sa pagkalumos samtang naligo kauban sa iyang mga higala: “Swerte lang, kay ang usa nga wala mataranta ug daling nakalihok, milaksi og usa ka taas nga kahoy gikan sa koral nga hinimo sa tag-as og sanga sa kahoy ug gikuptan ang usa ka tumoy niini paingon ngadto sa nalumos nga bata [kinsa] mibira niini, mikupot og maayo ug naluwas.
“Ang tanang batang lalaki mideklarar nga utang sa adbenturero nga bata ang iyang kinabuhi ngadto sa batang lalaki nga mihimo sa paagi sa pagluwas.
“Kini ang dili malalis nga kamatuoran; ug bisan pa man sa paagi nga gipahigayon alang kaniya, kon ang bata wala mopahimulos niini, kon wala pa niya buhata ang tanang personal nga paningkamot nga iyang mahimo, malumos unta siya, bisan pa man sa bayanihong buhat sa iyang kauban” (David O. McKay, “The Gospel of Work,” Instructor, Ene. 1955, 1).
Ang pagtubag sa pangutana kon kita maluwas ba pinaagi sa hugot nga pagtuo o sa mga buhat, ang Kristiyano nga tagsulat nga si C. S. Lewis misulat: “Kini [morag] alang nako sama ra sa pagpangutana kon hain nga blade sa parisan nga gunting ang labing gikinahanglan” (Mere Christianity, 148).
Sitwasyon 1
-
J. Devn Cornish, “Igo Ba Ang Akong Kamaayo? Makasulod Ba Ko Didto?” Liahona, Nob. 2016, 32–34
“Ang kaluwasan dili makuha pinaagi sa pagkamasulundon; kini gipalit pinaagi sa dugo sa Anak sa Dios [tan-awa sa Mga Buhat 20:28]. …
“Ang grasya usa ka gasa sa Dios, ug ang atong tinguha nga magmasulundon sa matag sugo sa Dios mao ang paghatag sa atong mortal nga kamot sa pagdawat niining sagradong gasa gikan sa atong Langitnong Amahan” (Dieter F. Uchtdorf, “Ang Gasa sa Grasya,” Liahona, Mayo 2015, 109–10).
Sitwasyon 2
-
D. Todd Christofferson, “Magpabilin Kamo sa Akong Gugma,” Liahona, Nob. 2016, 48–51
“Kon ang grasya gasa sa Dios, nan ngano nga ang pagsunod sa mga sugo sa Dios importante kaayo? Nganong maghasol sa mga sugo sa Dios—o sa paghinulsol, tungod lang nianang butanga? …
“Ang atong pagkamasulundon sa mga sugo sa Dios nahimo isip usa ka natural nga resulta sa atong walay katapusang gugma ug pasalamat alang sa kaayo sa Dios. Kini nga matang sa tinuod nga gugma ug pasalamat milagrusong mohiusa sa atong mga buhat sa grasya sa Dios” (Dieter F. Uchtdorf, “Ang Gasa sa Grasya,” Liahona, Mayo 2015, 109–10).
Ang atong padayon nga panginahanglan alang sa grasya.
“Agig dugang sa panginahanglan og grasya alang sa imong kaluwasan sa katapusan, nagkinahanglan ka niining makatabang nga gahum matag adlaw sa imong kinabuhi. Samtang magpaduol ka sa imong Langitnong Amahan diha sa kakugi, kamapainubsanon, ug kaaghup, Siya mobayaw ug molig-on kanimo pinaagi sa Iyang grasya (tan-awa sa Mga Proverbio 3:34; 1 Pedro 5:5; DP 88:78; 106:7–8). Ang pagsalig sa Iyang grasya makapahimo kanimo nga mouswag ug motubo diha sa pagkamatarung” (Matinud-anon sa Tinuhoan: Usa ka Pakisayran sa Ebanghelyo, 44).
Pagpalambo sa Atong Pagtudlo
Ang imong tawag dinasig. Isip usa ka magtutudlo, ikaw gitawag usab sa Ginoo sa pagpanalangin sa Iyang mga anak. Gusto sa Ginoo nga molampus ka, mao nga samtang magpakabuhi ka nga takus sa Iyang tabang, mohatag Siya kanimo sa pagpadayag nga imong gitinguha. (Tan-awa sa Pagtudlo sumala sa Pamaagi sa Manluluwas, 5.)