Corinto, Habagatang Gresya, ang Forum ug Civic Center, painting pinaagi ni Balage Balogh

Agosto 19–25

1 Mga Taga-Corinto 1–7

“Mausa Unta Hinoon”

Si Elder Jeffrey R. Holland nagtudlo nga kasagaran sa mga tawo “moadto [sa simbahan] nga magtinguha og espiritwal nga kasinatian” (“A Teacher Come from God,” Ensign, Mayo 1998, 26). Samtang magbasa ka sa 1 Mga Taga-Corinto 1–7, mainampuong ikonsiderar kon unsay imong mahimo aron makatabang sa pagmugna og espiritwal nga mga kasinatian diha sa imong klase.

Irekord ang Imong mga Impresyon

Dapita ang Pagpaambit

Ikonsiderar ang pagdapit sa mga sakop sa klase nga isulat kon unsay ilang gibuhat sa ilang nakat-unan gikan sa mga kasulatan. Hangyoa ang pipila ka sakop sa klase sa pagpaambit kon unsay ilang gisulat.

Itudlo ang Doktrina

1 Mga Taga-Corinto 1:10–17; 3

Ang mga miyembro sa simbahan ni Kristo kinahanglang magkahiusa gayud.

• Ang paghisgot sa unang pipila ka kapitulo sa 1 Mga Taga-Corinto mahimong usa ka oportunidad sa pag-ugmad og mas dakong panaghiusa tali sa mga miyembro sa ward. Mahimo nimong sugdan pinaagi sa paghangyo sa mga sakop sa klase nga maghisgot mahitungod sa usa ka club, grupo, o team nga ilang naapilan nga dunay dakong matang sa panaghiusa. Nganong gibati man niini nga grupo nga nagkahiusa gayud? Mahimo dayon nimong susihon ang pipila ka pagtulun-an ni Pablo bahin sa panaghiusa diha sa 1 Mga Taga-Corinto 1:10–13; 3:1–11. Unsa may gitudlo niining mga bersikulo, uban sa atong mga kasinatian, kon unsay makatabang nga makamugna og panaghiusa ug unsay makahulga niini? Unsa nga mga panalangin ang moabut niadtong nagkahiusa? Ang mga istorya nga gipaambit ni Presidente Henry B. Eyring diha sa “Dugang nga mga Kapanguhaan” mahimong makatabang usab niining panaghisgutan.

• Gigamit ni Pablo ang imahe sa usa ka building sa pag-awhag og panaghiusa diha sa 1 Mga Taga-Corinto 3:9–17. Sa unsang paagi nga kining analohiya makatabang sa imong klase nga mas makasabut sa panaghiusa? Pananglitan, human nga dungan nga mabasa kining mga bersikulo, mahimo nimong hatagan ang matag sakop sa klase og usa ka bloke ug magtinabangay sa pagtukod og usa ka butang. Sa unsang paagi nga kita “building sa Dios”? (1 Mga Taga-Corinto 3:9). Sa unsang paagi nga ang Dios nagtukod kanato sa indibidwal nga paagi? Unsa may atong gitabangan pagtukod isip isigka mga Santos? Unsa may atong mahimo isip usa ka nagkahiusang ward nga dili nato mahimo isip mga indibidwal?

1 Mga Taga-Corinto 1:17–31; 2; 3:18–20

Aron matuman ang buhat sa Dios, nagkinahanglan kita sa kaalam sa Dios.

• Ang ubang mga tawo mibati nga dili kwalipikado nga moserbisyo sa Simbahan tungod kay kulang sila sa edukasyon o propesyonal nga training. Ang uban mibati nga medyo kwalipikado tungod kay sila adunay edukasyon o propesyonal nga training. Ang parehong mga panglantaw nagpakita og sayop nga panabut kon unsa gayud ang makapahimo natong kwalipikado alang sa buhat sa Dios. Aniay usa ka ideya nga makatabang sa imong klase nga mosalig sa Dios: Bahina ang mga sakop sa klase ngadto sa mga grupo ug hangyoa sila sa pagbasa sa 1 Mga Taga-Corinto 1:17–31; 2; o 3:18–20 nga magsiksik sa mga pulong sama sa manggialamon ug binuang. Dayon mahimo nilang ipaambit sa ilang mga grupo kon unsay gitudlo niining mga bersikulo mahitungod sa pagkamanggialamon diha sa buhat sa Ginoo. Unsa ang mga butang mahitungod sa ebanghelyo nga tingali morag binuang ngadto sa ubang tawo? Sa unsang paagi nga kining mga butanga nagpakita sa kaalam sa Dios? Tingali ang mga sakop sa klase mahimo usab nga mopaambit og mga kasinatian diin misalig sila sa kaalam sa Dios, imbis nga sa ilang kaugalingon, sa pagtuman sa Iyang buhat.

1 Mga Taga-Corinto 6:9–20

Ang atong pisikal nga mga lawas sagrado.

• Sa pagsugod og panaghisgutan mahitungod niining mga bersikulo, mahimo nimong isulat diha sa pisara ang mga pangutana sama sa mosunod: Unsa may tan-aw sa Ginoo sa atong mga lawas? Unsay nakalahi niini gikan sa paagi nga gusto ni Satanas nga maoy atong hunahunaon bahin sa atong mga lawas? Unsa may gipasabut nga ang atong mga lawas mga templo sa Espiritu Santo? Dapita ang mga sakop sa klase sa pagpangita og mga tubag niining mga pangutana diha sa 1 Mga Taga-Corinto 6:9–20 (tan-awa usab sa DP 88:15; Moises 6:8–9).

• Ang inyong panaghisgutan mahitungod sa kabalaan sa atong mga lawas mahimong maglakip og panag-istoryahanay mahitungod sa balaod sa kaputli. Mahimong makatabang gayud kini tungod kay isip mga Santos sa Ulahing mga Adlaw, kasagaran kita adunay mga oportunidad sa pagpasabut sa atong mga gituohan mahitungod sa kaputli niadtong tingali dili pareho nato og gituohan. Tingali mahimo nimong pangutan-on ang mga sakop sa imong klase kon unsay ilang nakat-unan gikan ni Pablo—ingon man usab gikan sa ubang mga kapanguhaan sa Simbahan—nga makatabang kanila sa pagpasabut ngadto sa uban kon nganong importante ang kaputli. Ang uban niining mga kapanguhaan mahimong maglakip niadtong nalista diha sa “Dugang nga mga Kapanguhaan.”

Awhaga ang Pagkat-on diha sa Panimalay

Sultihi ang mga sakop sa imong klase nga kon ganahan sila og dugang nga mga ideya kon unsaon aron mahimong mas magkahiusa uban sa ilang kapikas, pamilya, o ward, ang tema sa panaghiusa nagpadayon diha sa 1 Mga Taga-Corinto 8–11.

Dugang nga mga Kapanguhaan

1 Mga Taga-Corinto 1–7

Mga ehemplo sa panaghiusa.

Si Presidente Henry B. Eyring nagtudlo:

“Ako gidapit nga moluhod sa tingkatulog uban sa usa ka pamilya sa dihang ako bisita sa ilang balay. Ang kinagamyang anak ang gihangyo nga mag-ampo. Siya nag-ampo sama sa usa ka patriarch alang sa matag tawo diha sa pamilya, nga gihinganlan ang pangalan. Akong gibuka ang akong mga mata sa makadiyot aron tan-awon ang mga nawong sa ubang mga bata ug mga ginikanan. Makaingon ko nga ilang gihiusa ang ilang hugot nga pagtuo ug ilang kasingkasing diha nianang pag-ampo sa gamay nga batang lalaki.

“Pipila sa Relief Society nga mga sister bag-ohay nga magkaubang nag-ampo samtang sila nangandam sa pagbisita sa unang higayon sa usa ka batan-ong biyuda kinsa ang iyang bana namatay sa kalit lang. Gusto sila nga masayud kon unsay buhaton ug unsaon nila dungan nga tabangan sa pag-andam sa balay alang sa pamilya ug sa mga higala nga moanha sa panahon sa haya. … Ang tubag sa ilang mga pag-ampo miabut. Sa dihang sila miabut sa balay, ang matag sister milihok aron sa paghuman sa buluhaton. Ang balay dali kaayong naandam nga ang pipila sa mga sister nagmahay nga sila wala nay laing buhatonon. Mga pulong sa paghupay ang gipamulong nga hingpit nga mihaum. Sila nakahatag sa serbisyo sa Ginoo isip usa, ang mga kasingkasing nabugkos diha sa panaghiusa” (“Ang Atong mga Kasingkasing Nabugkos diha sa Panaghiusa,” Liahona, Nob. 2008, 68–69).

Ang mga panalangin sa sekswal nga kaputli.

Atol sa usa ka Tibuok Kalibutan nga Debosyonal alang sa mga Young Adult, si Sister Wendy W. Nelson miingon:

“Ang personal nga kaputli mao ang labing importante nga butang sa tinuod nga gugma. Kon mas putli ang inyong hunahuna ug mga pagbati, inyong mga pulong ug mga buhat, mas modako ang inyong kapasidad sa paghatag ug pagdawat og tinuod nga gugma. …

“Isip importante nga bahin sa pagpahayag sa ilang gugma, gusto sa Ginoo nga ang bana ug asawa moambit sa katalagsaon ug kalipay sa kasuod sa kaminyoon. …

“… Ang bisan unsa nga makadapit sa Espiritu sa inyong kinabuhi, ug sa kinabuhi sa inyong kapikas ug sa inyong kaminyoon, mopalambo sa inyong abilidad sa kasuod sa kaminyoon. … Sa laing bahin, ang bisan unsa nga makapasilo sa Espiritu mopaminus sa inyong abilidad nga mahiusa sa inyong kapikas. …

“Ang kasuod sa kaminyoon nga gitugutan sa Espiritu panalanginan sa Ginoo ug makapabalaan” (“Gugma ug Kaminyoon,” Tibuok Kalibutan nga Debosyonal alang sa mga Young Adult, Ene. 8, 2017, broadcasts.lds.org).

Si Elder Jeffrey R. Holland nagtudlo:

“Akong hatagan og gibug-aton nga ang tawhanong kasuod gitagana alang sa mga minyo tungod kay mao kini ang katapusang simbolo sa kinatibuk-ang panaghiusa, ang kinatibuk-an ug usa ka panaghiusa nga gi-orden ug giila sa Dios. …

“Apan ang maong kinatibuk-ang panaghiusa, ang ingon nga dili mapaling nga pasalig tali sa usa ka lalaki ug babaye, moabut lamang uban sa kaduol ug kapermanente nga mahatag sa pakigsaad sa kaminyoon, uban sa maligdong nga mga saad ug panumpa sa tanan nga anaa kanila—ang ila mismong kasingkasing ug hunahuna, tanan nilang adlaw ug tanan nilang damgo” (“Personal Purity,” Ensign, Nob. 1998, 76).

Si Elder David A. Bednar mipasabut: “Ang [sekswal] nga relasyon dili pagahimoon tungod lang sa kakuryuso nga buot diskobrehon, gana nga buot tagbawon, o matang sa paglingaw-lingaw nga hinakog nga buhaton. Kini dili usa ka pagpangbuntog nga kinahanglan himoon o lihok nga yano lang buhaton. Hinoon, sa pagkamortal kini ang usa sa dakong pagpahayag sa atong balaanong kinaiya ug potensyal ug paagi sa paglig-on sa emosyonal ug espiritwal nga kasuod sa bana ug asawa. Kita mga tinugyanan nga napanalanginan og moral nga kabubut-on ug naila sa atong balaanong panulundon isip mga anak sa Dios—ug dili sa atong sekswal nga kinaiya, mga modernong pamatasan, o kalibutanon nga mga pilosopiya” (“Kita Nagtuo sa Pagkaputli,” Liahona, Mayo 2013, 42).

Unsaon sa pagpabiling putli sa sekswal nga paagi.

• “Sekswal nga Kaputli,” Alang sa Kalig-on sa mga Kabatan-onan, 35–37

Pagpalambo sa Atong Pagtudlo

Paghatag og pagpamatuod bahin ni Jesukristo. Samtang magtudlo ka, hinumdumi ang ehemplo ni Pablo: siya “mianha dili pinaagi sa hinashasan nga mga pulong ni sa kaalam, nga nagsangyaw … sa pamatuod mahitungod sa Dios” (1 Mga Taga-Corinto 2:1). Ang imong yano nga pagpamatuod bahin sa Manluluwas mahimong dunay talagsaong impluwensya.