“Agosto 26–Septyembre 1. 1 Mga Taga-Corinto 8–13: ‘Kamo Mao ang Lawas ni Kristo’” Dali, Sunod Kanako—Alang sa Sunday School: Bag-ong Tugon 2019 (2019)
“Agosto 26–Septyembre 1. 1 Mga Taga-Corinto 8–13,” Dali, Sunod Kanako—Alang sa Sunday School: 2019
Agosto 26–Septyembre 1
1 Mga Taga-Corinto 8–13
“Kamo Mao ang Lawas ni Kristo”
Si Elder Richard G. Scott nagtudlo nga atong “mapasagdan ang labing bililhon, personal nga direksyon sa Espiritu nga wala mapaminaw” kon mapakyas kita sa pagrekord ug pagtubag “sa unang mga pag-aghat nga miabut [kanato]” (“Aron Makabaton og Espirituhanong Giya,” Liahona, Nob. 2009, 8).
Irekord ang Imong mga Impresyon
Dapita ang Pagpaambit
Migamit si Pablo og mga analohiya ug larawan [imagery] diha sa 1 Mga Taga-Corinto 8–13, sama sa usa ka magdadagan sa usa ka lumba, usa ka lawas sa tawo, ug “piyang-piyang nga nagatagingting” (1 Mga Taga-Corinto 13:1). Unsa nga mga hunahuna ang anaa sa mga sakop sa klase mahitungod niini nga larawan? Sa unsang paagi nga nakatabang kini kanila aron makasabut og usa ka kamatuoran sa ebanghelyo?
Itudlo ang Doktrina
Makasinati kitang tanan og tintasyon, apan naghatag ang Dios og paagi aron makabuntog niini.
-
Unsaon nimo sa pagtabang ang mga sakop sa klase nga makadiskubre og gamhanang mga kamatuoran diha sa 1 Mga Taga-Corinto 10:13? Usa ka ideya mao ang pagbahin sa bersikulo ngadto sa mugbo nga hugpong sa mga pulong, ihatag ang matag usa ngadto sa lain-lain nga sakop sa klase, ug hangyoa ang mga sakop sa klase sa pagsulti og usab sa mugbo nga hugpong sa mga pulong sa ilang kaugalingong mga pulong. Pananglitan, unsa ang laing paagi sa pagsulti sa “Ang Dios kasaligan” o “pagapanulayon sa labaw sa inyong kaarangan”? Mahimo dayon nimong ipahimutang og balik ang pipila ka pamahayag sa mga sakop sa klase ug mangita sa dugang nga mga kagamitan niini sa atong kinabuhi. Ang mga sakop sa klase mahimong mopaambit og mga kasinatian diin ilang nakita nga tinuod ang mga saad niining bersikulo. Unsa nga dugang nga mga ideya ang atong mabatunan niining mga bersikulo gikan sa Alma 13:27–28?
-
Imbis nga maghisgot og maayo sa piho nga mga tintasyon sa usa ka tawo, mahimo nimong i-focus ang panaghisgutan sa 1 Mga Taga-Corinto 10:13 bahin sa mga tintasyon nga, sa mga pulong ni Pablo, “sagad ra sa tawo.” Ang mga sakop sa klase mahimong magsugod pinaagi sa pag-ila sa mga tintasyon nga gipasidaan ni Pablo diha sa mga bersikulo 1–12. Mahimo usab silang mosugyot og modernong mga ehemplo sa sagad nga mga tintasyon, sama sa mga tintasyon nga mahimong dili matinuoron, panglibak, o paghukom sa uban. Sa unsa kaha nga paagi nga ang usa ka tawo, uban sa tabang sa Dios, “makalikay” niining mga tintasyon? Mahimo nimong ipa-role-play ang pipila ka sitwasyon.
-
Mahimong bililhon ang pagkonsiderar sa 1 Mga Taga-Corinto 10:13 sa konteksto sa hilabihan nga tinguha ni Pablo alang sa panaghiusa taliwala sa mga Santos. Unsa ang atong mahimo aron matabangan ang usag usa nga “makalikay” ug “makaantus” sa mga tintasyon nga mahimo natong masinati? Sa unsang paagi nga ang panaghiusa makatabang kanato sa pagbatok sa tintasyon?
1 Mga Taga-Corinto 10:16–17; 11:23–30
Ang sakrament makapahiusa kanato isip mga miyembro sa Simbahan ni Kristo.
-
Kining mga bersikulo makapadasig og panaghisgutan kon sa unsang paagi nga ang sakrament makapahiusa sa inyong ward diha sa inyong mga paningkamot nga mas mahisama sa Manluluwas. Mahimo nimong sugdan pinaagi sa pagbasa sa 1 Mga Taga-Corinto 10:16–17 ug sa pagsusi kon unsa kaha ang kahulugan sa pulong nga pagpakig-ambit dinhi niini nga konteksto (ang usa ka tawo mahimong mangita sa posible nga mga kahulugan diha sa diksyonaryo). Sa unsang paagi nga ang dungan nga pag-ambit sa sakrament nakatabang kanato nga mobati nga mas nagkahiusa? Unsay atong mabuhat aron makaawhag og panaghiusa panahon sa sakrament miting? Sa unsang paagi nga ang tambag ni Pablo nga “ipasusi sa matag usa ka tawo ang iyang kaugalingon” adunay kalabutan niini nga tumong? (1 Mga Taga-Corinto 11:28).
Kinahanglan natong tinguhaon ang mga gasa sa Espiritu aron makabenepisyo sa tanang anak sa Langitnong Amahan.
-
Unsaon nimo pagtabang ang mga sakop sa imong klase sa pagribyu sa espirituhanong mga gasa nga gihulagway ni Pablo ug makaila sa nagkadaiyang espirituhanong mga gasa? Mahimo nimo silang hatagan og usa ka minuto sa pagsulat og lista sa daghang gasa sa Espiritu kutob sa ilang mahunahunaan. Kon mahuman na sila, dapita ang mga sakop sa klase sa pagpaambit kon unsay ilang gisulat hangtud nga ang matag gasa nga ilang gilista mahisgutan. Dayon ang mga sakop sa klase mahimong mangita og ubang mga gasa nga ikadugang sa ilang mga lista pinaagi sa pagsiksik sa 1 Mga Taga-Corinto 12 ug sa lista ni Elder Marvin J. Ashton diha sa “Dugang nga mga Kapanguhaan.” Hain niining mga gasa ang nakita sa mga sakop sa klase diha sa mga tawo nga ilang nailhan? Sa unsa kaha nga paagi nga kining mga gasa makatabang kanato nga mahisama kang Jesukristo?
-
Aron matabangan ang mga sakop sa klase nga makita ang mga ehemplo kon sa unsang paagi nga ang pagpalambo sa ilang espirituhanong mga gasa makatabang sa paglig-on sa Simbahan, ikonsiderar ang pagdapit kanila sa paghunahuna bahin sa espirituhanong mga gasa nga anaa sa mga tawo diha sa mga kasulatan. Alang sa mga ideya, mahimo nimo silang i-assign sa pagsiksik sa mga pakisayran sa kasulatan diha sa “Dugang nga mga Kapanguhaan” ug ipaambit ang espirituhanong mga gasa nga sa ilang hunahuna anaa nianang tawhana. Sa unsang paagi nga ang espirituhanong mga gasa niining mga tawhana nakapanalangin sa ilang kaugalingon ug sa uban? Unsaon man nato paggamit sa atong espirituhanong mga gasa aron mapanalanginan ang uban ug mapalig-on ang lawas ni Kristo, o ang Simbahan? (tan-awa sa 1 Mga Taga-Corinto 12:12–31; tan-awa usab sa 1 Mga Taga-Corinto 14:12).
-
Aron matabangan ang mga sakop sa klase nga makasabut kon unsaon sa pagpalambo ang espirituhanong mga gasa, dapita sila sa pagbasa sa 1 Mga Taga-Corinto 12:27–31; Moroni 7:48; 10:23, 30; Doktrina ug mga Pakigsaad 46:8; ug sa kinutlo ni Presidente George Q. Cannon diha sa “Dugang nga mga Kapanguhaan.” Unsa ang gitudlo kanato niining mga kapanguhaan kon unsaon sa pagbaton og espirituhanong mga gasa? Sa unsa nga paagi nga ang pagpalambo niining espirituhanong mga gasa makapahimo kanato nga mas mahisama kang Kristo? Dapita ang mga sakop sa klase sa pagpili og usa ka gasa nga gusto nilang mabatunan ug sa pagtinguha sa tabang sa Ginoo sa pag-angkon niana nga gasa.
Ang gugmang putli mao ang labing importante nga espirituhanong gasa.
-
Ang ubang mga tawo naghunahuna sa charity [gugmang putli] isip mga donasyon ngadto sa mga kabus o kamabination ngadto sa uban. Samtang kining mga butanga siguradong makapakita og gugmang putli, ang paghulagway ni Pablo mas labaw pa gayud. Aron matabangan ang mga sakop sa klase nga maanalisar kini, mahimo nimo silang hangyuon nga hilum nga mamalandong sa 1 Mga Taga-Corinto 13 ug sa paghunahuna og usa ka tawo nga ilang nailhan kinsa maayong ehemplo sa usa o dugang pa sa mga aspeto nga gihisgutan ni Pablo. Ang ubang mga sakop sa klase mahimong mohulagway sa tawo nga ilang nahunahunaan ug sa usa ka kasinatian diin kini nga tawo nakapakita og gugmang putli. Mahimo gani nimong ilista sa pisara ang mga bahin sa paghulagway ni Pablo ug dapita ang mga sakop sa klase sa pagpaambit og mga ideya kon unsay gipasabut sa “mapailubon” o “dili masuk-anon” (1 Mga Taga-Corinto 13:4–5). Giunsa pagpakita sa Manluluwas kining mga kinaiya sa gugmang putli? Unsaon man nato pagpalambo ang gugmang putli? (tan-awa sa Moroni 7:46–48).
Awhaga ang Pagkat-on diha sa Panimalay
Nahibalo ba ang mga sakop sa imong klase nga ang mga doktrina bahin sa mga bunyag alang sa mga patay ug sa tulo ka ang-ang sa himaya gipasabut diha sa Biblia? Sultihi sila nga ilang makat-unan ang mahitungod niining mga kamatuoran samtang magtuon sila sa 1 Mga Taga-Corinto 14–16 karong semanaha.
Dugang nga mga Kapanguhaan
Ang espirituhanong mga gasa nga mahimong wala nimo mahunahunai.
Si Elder Marvin J. Ashton mipaambit niining mga ehemplo sa unsay iyang gitawag nga “dili kaayo dayag nga mga gasa” sa Espiritu: “Ang gasa sa pagpangutana; ang gasa sa pagpaminaw; ang gasa sa pagkadungog ug paggamit sa hinay, hinagawhaw nga tingog; ang gasa nga makahimo sa pagbakho; ang gasa sa paglikay sa panagbingkil; ang gasa nga dali rang mouyon; ang gasa sa paglikay sa kawang nga pagbalik-balik; ang gasa sa pagpangita nianang unsay matarung; ang gasa nga dili dayon mohukom; ang gasa sa pagpangayo sa Dios og giya; ang gasa sa pagkadisipulo; ang gasa sa pag-amuma sa uban; ang gasa nga makahimo sa pagpamalandong; ang gasa sa paghalad og pag-ampo; ang gasa sa paghatag og makapatandog nga pagpamatuod; ug ang gasa sa pagkadawat sa Espiritu Santo” (“There Are Many Gifts,” Ensign, Nob. 1987, 20).
Mga ehemplo sa kasulatan bahin sa espirituhanong mga gasa.
Pagtinguha og espirituhanong mga gasa.
Si Presidente George Q. Cannon (1827–1901) sa Unang Kapangulohan miingon nga ato kining katungdanan “nga mag-ampo sa Dios aron mohatag [kanato] og mga gasa nga mokorohir sa [atong] pagkadili hingpit. … Gituyo kini alang niini nga katuyoan. Walay tawo nga angay nga moingon, ‘Ah, wala na koy mahimo niini; mao na kini ang akong kinaiya.’ Dili siya kahatagan og kaangayan niini, tungod sa rason nga ang Dios misaad nga mohatag og kalig-on sa pagkorihir niining mga butanga, ug aron sa paghatag sa mga gasa nga mowagtang niini. Kon ang usa ka tawo kulang sa kaalam, katungdanan niya ang pagpangayo sa Dios alang sa kaalam. Mao usab kini sa bisan unsa pang butang” (Millennial Star, Abr. 23, 1894, 260).
Pagpalambo sa Atong Pagtudlo
Sunda ang mga baruganan nga imong gitudlo. Ang pagsunod sa mga baruganan nga imong gitudlo makatabang nimo sa paghatag og dugang nga pagsaksi bahin niini sa gamhanang paagi. Si Pablo nagtudlo, “Sa ingon nga paagi, ang Ginoo nagsugo nga ang mga nagasangyaw sa ebanghelyo [maayong balita] kinahanglang magasunod sa ebanghelyo” (1 Mga Taga-Corinto 9:14).