Si Melchizedek Nagpanalangin kang Abram, ni Walter Rane

Nobyembre 11–17

Mga Hebreohanon 7–13

“Labawng Sacerdote sa mga Maayong Butang nga Nanagpangabut”

Samtang magbasa ka sa Mga Hebreohanon 7–13, pamalandunga kon unsay mensahe sa Ginoo alang sa Hebreohanon nga mga Santos. Pangitaa usab ang Iyang mga mensahe nganha kanimo ug sa mga tawo nga imong gitudloan.

Irekord ang Imong mga Impresyon

Dapita ang Pagpaambit

Sa dili pa magklase, dapita ang pipila ka sakop sa klase nga motungha nga andam nga ipaambit ang mga bersikulo gikan sa Mga Hebreohanon 7–13 nga motabang kanila nga “manuol [ngadto sa Dios] uban ang matinuoron nga kasingkasing, nga sa hingpit pinasaligan sa pagtuo” (Mga Hebreohanon 10:22).

Itudlo ang Doktrina

Mga Hebreohanon 7:1–22

Ang pagpakabuhi nga takus sa mga pakigsaad ug mga panalangin sa Melchizedek Priesthood moresulta sa kahimayaan.

• Usa ka paagi sa pagsusi niining kapitulo mao ang pagdapit sa mga sakop sa klase nga isulat sa pisara ang pipila ka tinuod nga mga pamahayag mahitungod sa Melchizedek Priesthood (alang sa mga ideya, mahimo nilang basahon ang “Melchizedek Priesthood” diha sa Matinud-anon sa Tinuhoan, 108–10). Mahimo dayon silang mosiksik sa Mga Hebreohanon 7:1–22 alang sa mga pulong nga nagsuporta sa mga pamahayag diha sa pisara. Mahimo usab nilang gamiton ang Giya ngadto sa mga Kasulatan sa pagpangita og laing nagsuporta nga mga kasulatan.

• Diha sa Mga Hebreohanon 7:11 nangutana si Pablo, “Nganong gikinahanglan pa man nga mobarug ang laing sacerdote sumala sa laray ni Melchisedec, ug dili ang usa nga sumala sa laray ni Aaron?” Sa laing pagkasulti, nganong magkinahanglan man kita sa Melchizedek Priesthood agig dugang sa Aaronic Priesthood? Tingali ang mga sakop sa klase mahimong mangita alang sa posible nga mga tubag diha sa Matinud-anon sa Tinuhoan, “Aaronic Priesthood” ug “Melchizedek Priesthood.” Mahimo usab nimo silang dapiton sa pagkonsiderar sa mga panalangin nga anaa kanato tungod niining duha ka priesthood (tan-awa usab sa kinutlo ni Sister Sheri L. Dew diha sa “Dugang nga mga Kapanguhaan”). Giunsa pagsinati sa mga sakop sa klase kining mga panalangin?

Mga Hebreohanon 8–10

Ang karaan ug moderno nga mga ordinansa nagtudlo ngadto kang Jesukristo.

• Bisan kon wala na kita mohalad og mga gisakripisyo nga hayop, miapil kita sa mga ordinansa karon nga, sa susamang paagi, nagtudlo sa atong mga kalag ngadto kang Kristo ug naghatag sa “awtorisadong paagi diin ang mga panalangin ug gahum sa langit modagayday sa tinagsa natong kinabuhi” (David A. Bednar, “Kanunay nga Magbaton og Kapasayloan sa Inyong mga Sala,” Liahona, Mayo 2016, 60). Tingali mahimo ninyong susihon og dungan ang pipila ka detalye mahitungod sa karaang mga ordinansa nga gihulagway diha sa Mga Hebreohanon 8–10 ug sa ilang simbolikanhong mga kahulugan. Pananglitan, unsa may girepresentaran sa dugo sa mga torong baka ug mga kanding? (tan-awa sa Mga Hebreohanon 9:13–14). Kinsa man ang girepresentaran sa labawng sacerdote? (tan-awa sa Mga Hebreohanon 9:24–26).Sa unsang paagi nga ang moderno nga mga ordinansa nakapanalangin kanato ug nakatabang sa pagtudlo kanato ngadto kang Jesukristo? Unsay atong mabuhat aron sa paghimo niining mga ordinansa nga mas makahuluganon ug maka-focus sa Manluluwas?

Mga Hebreohanon 10:34–38; 11

Ang hugot nga pagtuo nagkinahanglan og pagsalig sa mga saad sa Dios.

• Aron matabangan ang mga sakop sa klase nga makasabut sa mga pagtulun-an ni Pablo mahitungod sa hugot nga pagtuo, mahimo nimong sugdan pinaagi sa paghangyo kanila nga maghunahuna kon unsaon nila sa paghulagway ang hugot nga pagtuo sa usa ka sentence. Dayon, basaha ug hisguti isip usa ka klase ang depinisyon nga gihatag ni Pablo diha sa Mga Hebreohanon 11:1. Mahimo dayon nimong bahinon ang klase ngadto sa ginagmay nga mga grupo ug i-assign ang matag grupo sa pagtuon sa usa sa mga tawo nga nahisgutan diha sa Mga Hebreohanon 11. Ang mga sakop sa klase mahimong mogamit sa mga footnote o sa Giya ngadto sa mga Kasulatan sa pagribyu sa mga kasinatian sa tawo diha sa Daang Tugon, ug dayon ang usa ka representante gikan sa matag grupo mahimong mopaambit ngadto sa klase kon unsay nakit-an sa grupo. Giunsa niining mga tawo sa pagpakita nga mibati sila og “kasiguroan sa mga butang nga gilauman”? (Hubad ni Joseph Smith, Mga Hebreohanon 11:1). Unsa ang ubang mga ehemplo bahin sa matinud-anong mga tawo nga mapaambit sa mga sakop sa klase? Kanus-a man kita mipakita og hugot nga pagtuo diha sa mga saad nga wala pa matuman?

• Mahimong makalingaw ang paghimo og dula aron matabangan ang mga sakop sa klase nga makakat-on mahitungod sa hugot ng pagtuo gikan sa Mga Hebreohanon 11. Pananglitan, mahimo nimong bahinon ang klase ngadto sa duha ka team ug ipangutana ang mahitungod sa hugot nga pagtuo nga gitubag diha sa Mga Hebreohanon 11 (tan-awa sa “Dugang nga mga Kapanguhaan” alang sa mga ehemplo). Ang unang team nga makakita sa tubag nga gisuportahan og mga kasulatan makadawat og usa ka puntos. Hangyoa ang mga sakop sa klase sa paghisgot sa unsay ilang nakat-unan gikan niining mga bersikulo nga makatabang kanila aron mas masabtan ang hugot nga pagtuo.

• Human matun-i ang mga pagtulun-an ni Pablo bahin sa hugot nga pagtuo diha sa Mga Hebreohanon 10:34–38; 11, makabenepisyo ba ang mga sakop sa klase pinaagi sa pagkat-on mahitungod sa hugot nga pagtuo gikan sa ubang mga kapanguhaan? Mahimo nimong i-assign daan ang pipila ka sakop sa klase nga tun-an ang usa ka pangutana mahitungod sa hugot nga pagtuo sama sa mosunod: Unsa man ang hugot nga pagtuo? Unsaon man nato sa pagpalambo ang hugot nga pagtuo? Sa unsang mga pamaagi nga mapanalanginan kita kon mopakita kita og hugot nga pagtuo? Unsay mahitabo kon mopili kita nga dili mopakita og hugot nga pagtuo? Dayon, diha sa klase, mahimo nilang ipaambit kon unsay ilang nakat-unan. O mahimo nimong dapiton ang mga sakop sa klase nga magtinabangay diha sa mga grupo aron makakita og mga tubag. Ang ubang kapanguhaan nga ilang magamit mahimong maglakip sa Alma 32:21–43; Ether 12; ug Giya ngadto sa mga Kasulatan, “Hugot nga Pagtuo.” Human mapaambit sa mga sakop sa klase ang ilang nakat-unan, hangyoa sila sa pagkonsiderar kon unsa kaha ang ilang mahimo aron mapalig-on ang ilang pagtuo. Dapita ang pipila ka sakop sa klase sa pagpaambit sa ilang mga hunahuna.

• Ang tambag ngadto sa Hebreohanon nga mga Santos kinsa natintal nga “mosibug” gikan sa ilang pagtuo mahimong bililhon ngadto sa mga sakop sa klase kinsa tingali nanglimbasug sa ilang mga pagpamatuod. Aron madiskubrihan kini nga tambag, ang mga sakop sa klase mahimong mobasa sa Mga Hebreohanon 10:34–38 ug sa pamahayag ni Elder Jeffrey R. Holland diha sa “Dugang nga mga Kapanguhaan.” Nganong ang mga tawo sa kalibutan karon misalikway man sa ilang pagsalig (tan-awa sa Mga Hebreohanon 10:35) diha sa Ginoo ug sa Iyang ebanghelyo? Unsa ang atong mahimo aron makaugmad ug makamintinar og hugot nga pagtuo ug pagsalig nga “makadawat sa gisaad [sa Dios]”? (Mga Hebreohanon 10:36).

Awhaga ang Pagkat-on diha sa Panimalay

Ang mga sakop sa klase mahimong pamilyar sa kasinatian ni Joseph Smith nga nagbasa sa Santiago 1:5, nga miresulta sa Unang Panan-awon. Dapita sila nga mangita og bag-ong mga ideya mahitungod sa Santiago 1:5 samtang magbasa sila niini karong semanaha diha sa konteksto sa mas halapad nga mensahe ni Santiago.

Dugang nga mga Kapanguhaan

Mga Hebreohanon 7–13

Mga pangutana mahitungod sa hugot nga pagtuo gikan sa Mga Hebreohanon 11.

• Giunsa man sa Mga Hebreohanon 11 paghatag og depinisyon ang hugot nga pagtuo? (tan-awa sa bersikulo 1).

• Unsay napahimo sa hugot nga pagtuo kang Abel? (tan-awa sa bersikulo 4).

• Sumala sa Mga Hebreohanon 11, unsa may imposible nga buhaton kon walay hugot nga pagtuo? (tan-awa sa bersikulo 6).

• Unsa may nadasig sa hugot nga pagtuo kang Abraham nga nakapahimo kaniya nga dunay pangitaon? (tan-awa sa bersikulo 10).

• Unsay gibuhat ni Isaac sa iyang hugot nga pagtuo? (tan-awa sa bersikulo 20).

• Unsa may nadasig sa hugot nga pagtuo kang Moises nga nakapahimo kaniya nga dunay biyaan? (tan-awa sa mga bersikulo 24–27).

Ang mga panalangin sa Melchizedek Priesthood available sa tanan.

Si Sister Sheri L. Dew, kanhi magtatambag sa Kinatibuk-ang Kapangulohan sa Relief Society , miingon: “Ang mga panalangin sa priesthood madawat sa tanang matarung nga mga lalaki ug mga babaye. Kitang tanan mahimong makadawat sa Espiritu Santo, makadawat og personal nga pagpadayag, ug makadawat sa endowment sulod sa templo, diin kita mogula nga ‘sinangkapan’ og gahum. Ang gahum sa priesthood moayo, manalipod, ug molaban sa tanang matarung batok sa mga gahum sa kangitngit” (“It Is Not Good for Man or Woman to Be Alone,” Ensign, Nob. 2001, 13).

“Busa ayaw wagtanga ang inyong kamasaligon.”

Si Elder Jeffrey R. Holland nagtudlo:

“Sigurado nga lisud kini—sa wala pa kamo magpasakop sa Simbahan, samtang naninguha kamo sa pagpasakop, ug human kamo magpasakop. Ingon na gyud niana sukad pa kaniadto, nag-ingon si Pablo, apan ayaw pagsibug. Ayaw og kalisang ug hunong. Ayaw wad-a ang inyong pagsalig. Ayaw kalimti unsay inyong gibati kaniadto. Ayaw kawad-i og pagsalig ang inyong kasinatian. …

“Sa bisan unsang dagkong desisyon dunay mga pasidaan ug mga konsiderasyon nga himoon, apan sa higayon nga dunay kahayag, pagbantay sa mga tintasyon sa pagsibug gikan sa usa ka maayo nga butang. Kon kini mao ang eksakto kon kamo nag-ampo mahitungod niini ug misalig niini ug nagpuyo sulod niini, sakto kini karon. Ayaw paghunong kon ang pagpamugos magkabug-at. … Atubanga ang inyong mga pagduha-duha. Kontrolaha ang inyong mga kahadlok. ‘Busa ayaw wagtanga ang inyong kamasaligon.’ Pagpabilin sa dalan ug sud-onga ang katahum sa kinabuhi nga mobukhad alang kaninyo” (“Cast Not Away Therefore Your Confidence,” Ensign, Mar. 2000, 6–11).

Pagpalambo sa Atong Pagtudlo

Dangup una sa mga kasulatan. Ang mga kasulatan kinahanglan mao ang nag-unang tinubdan alang sa imong pagtuon ug pagpangandam. Ang mga pulong sa modernong mga propeta makasuporta sa sumbanan nga mga basahon (tan-awa sa Pagtudlo sumala sa Pamaagi sa Manluluwas, 17).