Si Jesukristo Nagsangyaw didto sa Kalibutan sa mga Espiritu, ni Robert T. Barrett

Nobyembre 25–Disyembre 1

1 ug 2 Pedro

“Nagakalipay sa Labihan Gayud nianang Dili Ikaasoyng Kalipay ug Puno sa Himaya”

Hinumdumi nga ang imong katuyoan mao ang pagtudlo sa mga tawo, dili lang ang pagpresentar og usa ka leksyon. Samtang magbasa ka sa mga Epistola [Sulat] ni Pedro, hunahunaa ang indibidwal nga mga sakop sa klase. Unsa nga mga baruganan ang makatabang kanila sa pag-ugmad sa ilang pagtuo?

Irekord ang Imong mga Impresyon

Dapita ang Pagpaambit

Isulat ang mga ulohan nga 1 Pedro ug 2 Pedro diha sa pisara. Hatagi og panahon ang mga sakop sa klase sa pagribyu niining mga kapitulo, ug dapita sila sa pagsulat ubos niining mga ulohan sa mga pulong gikan sa mga kapitulo nga ilang nakita nga makahuluganon. Dayon gamita ang mga lista sa pagdapit sa mga tawo nga ipaambit ang ilang mga hunahuna.

Itudlo ang Doktrina

1 Pedro 1:3–9; 2:19–24; 3:14–17; 4:12–19

Makakita ko og hingpit nga kalipay atol sa mga panahon sa pagsulay ug pag-antus.

• Aron matabangan kadtong imong gitudloan nga mas makasabut ug makagamit sa tambag ni Pedro mahitungod sa pagpangita og hingpit nga kalipay diha sa lisud nga mga kahimtang, mahimo nimong hatagan ang mga sakop sa klase og mga piraso sa papel ug hangyoa sila sa pagsulat og mga pulong gikan sa 1 Pedro 1:3–9; 2:19–24; 3:14–17; 4:12–19 nga makatabang kanila sa mga panahon sa pagsulay o kalisdanan. Diha sa pikas nga bahin sa papel, mahimo nilang isulat ang mahitungod sa panahon sa pagsulay sa dihang mibati sila og kalinaw ug hingpit nga kalipay. Pipila ka boluntaryo mahimong mopaambit sa ilang mga pulong ug mga kasinatian, ug dayon ang mga sakop sa klase mahimong maghisgot sa unsay ilang makat-unan.

• Laing paagi sa pagribyu sa tambag ni Pedro diha sa 1 Pedro 1:3–9; 2:19–24; 3:14–17; 4:12–19 mao ang pagdapit sa mga sakop sa klase sa paghunahuna mahitungod sa usa ka tawo nga ilang nailhan nga nakasinati og usa ka pagsulay. Hatagi sila og panahon diha sa klase sa paghimo og sulat ngadto nianang tawhana, lakip na ang mga kamatuoran gikan niining mga bersikulo nga makadasig nianang tawhana (tan-awa usab sa DP 121:1–8; 123:17). Dayon ang mga sakop sa klase mahimong maghisgot mahitungod sa mga kamatuoran nga ilang gipili.

1 Pedro 1:13–20; 2:1–12

Gitawag kita nga mahimong “mga katawhan sa Dios.”

• Isip mga miyembro sa Simbahan ni Kristo, gitawag kita nga mosunod kang Jesukristo. Nagpasabut kini nga ang atong mga pagpili kasagaran lahi kay sa niadtong sa uban nga mga tawo. Sa unsang paagi nga ang mga pagtulun-an ni Pedro diha sa 1 Pedro 1:13–20; 2:1–12 makatabang niadtong imong gitudloan nga mas makasabut sa misyon sa Manluluwas ug sa tinguha nga mas mahisama Kaniya? Tingali mahimo nimong dapiton ang mga sakop sa klase sa pagsiksik niining mga bersikulo nga mangita sa mga paghulagway kon unsay gipasabut sa mahimong “mga katawhan sa Dios” (1 Pedro 2:10) ug dayon hisgutan kon unsay ilang nakit-an. Mahimo nimong ipasabut nga ang pulong nga “pinili” diha sa 1 Pedro 2:9 nagpasabut nga “linukat” o “tinipigan”. Unsa ang gitudlo niini kanato mahitungod sa paagi kon unsay gibati sa Dios kanato ug sa unsang paagi Niya gusto nga magpakabuhi kita?

1 Pedro 3:18–20; 4:6

Ang ebanghelyo gisangyaw ngadto sa mga patay aron mahukman sila sa makiangayong paagi.

• Ang Unang Sulat ni Pedro naglangkob sa usa sa pipila ka pakisayran diha sa Biblia sa pagbisita ni Jesukristo sa kalibutan sa mga espiritu human sa Iyang kamatayon—usa ka panghitabo nga ang modernong pagpadayag nakatabang kanato nga mas hingpit nga masabtan. Aron matabangan ang mga sakop sa klase nga mapalambo pa ang ilang panabut bahin sa kalibutan sa mga espiritu, mahimo nimo silang dapiton nga magbasa sa mosunod nga mga kasulatan ug isulat kon unsay ilang nakat-unan diha sa pisara: Juan 5:25; 1 Pedror 3:18–20; 4:6; Alma 40:7–14, 21; Doktrina ug mga Pakigsaad 138:11–32.

  Ang mga pamahayag nga gihatag diha sa “Dugang nga mga Kapanguhaan” nagpakita nga ang pagbisita ni Kristo ngadto sa kalibutan sa mga espiritu nasabtan ug gitudlo dili lamang sa Iyang mga Apostoles apan sa nag-unang Kristohanong mga magtutudlo usab. Ang pagsabut nga kining kahibalo nawala atol sa Dakong Apostasiya ug gipahiuli sa atong panahon makatabang sa mga sakop sa klase nga mapalig-on ang ilang mga pagpamatuod bahin ni Joseph Smith ug sa Pagpahiuli sa ebanghelyo.

• Ang paghisgot sa 1 Pedro 3:18–20; 4:6 makatabang sa pagdasig sa mga sakop sa klase nga mas moapil gayud sa buhat sa family history ug sa templo. Sa pagbuhat niini, mahimo nimong bahinon ang klase ngadto sa tulo ka grupo ug hatagan ang matag grupo og usa sa mosunod nga mga pangutana mahitungod sa pagtubos sa mga patay: Unsa man ang tahas sa Manluluwas diha sa pagtubos sa mga patay? Unsa ang tahas niadtong nangamatay na—nga matinud-anon ug namatay nga wala makahibalo sa ebanghelyo? Unsa man ang atong tahas? Hangyoa ang matag grupo sa pagribyu sa 1 Pedro 3:18–20; 4:6; Doktrina ug mga Pakigsaad 128:17–18; 138:11–32, 57–59, nga mangita sa mga tubag sa ilang mga pangutana. Hangyoa ang matag grupo sa pagpaambit sa unsay ilang nakat-unan, ug ikonsiderar ang pagpaambit sa kinutlo ni Elder D. Todd Christofferson o usa sa mga video nga makita diha sa “Dugang nga mga Kapanguhaan.” Unsa nga mga panalangin ang atong nasaksihan samtang miapil kita sa pagdala og kaluwasan ngadto sa nangamatay na natong mga katigulangan?

2 Pedro 1:1–11

Pinaagi sa gahum ni Jesukristo, makapalambo kita sa atong balaanong mga kinaiya.

• Sa pag-awhag niadtong imong gitudloan diha sa ilang mga paningkamot nga mas mahisama kang Jesukristo, mahimo nimo silang dapiton sa pagtino sa Kristohanong mga kinaiya nga gihulagway diha sa 2 Pedro 1:1–11. Ikonsiderar ang pagsulat sa pisara niining mga kinaiya ug hangyoa ang mga sakop sa klase sa pagtino niini. Ang mga sakop sa klase mahimo dayon nga maghisgot kon sa unsang paagi nga ang pagpalambo og usa ka kinaiya moresulta sa pagpalambo sa ubang mga kinaiya. Hatagi sila og panahon sa pagpamalandong kon hain nga kinaiya ang gusto nilang mas palambuon gayud (tan-awa usab sa Isangyaw ang Akong Ebanghelyo, 126).

Ang matag Kristohanong kinaiya nga atong palambuon makatabang kanato sa paglala og usa ka espiritwal nga tapestry sa pagkadisipulo.

Awhaga ang Pagkat-on diha sa Panimalay

Mahimo nimong ipasabut nga ang mga sakop sa klase magtuon sa mga Epistola [Sulat] ni Juan atol sa sunod nga semana. Kini nga mga sulat makatabang sa pagkorihir sa sayop nga mga pagtulun-an mahitungod ni Jesukristo ug makapalig-on sa atong mga pagpamatuod sa buhing reyalidad kabahin sa Manluluwas.

Dugang nga mga Kapanguhaan

1 ug 2 Pedro

Ang buhat sa pagtubos sa mga patay nagpamatuod sa misyon ni Kristo.

Si Elder D. Todd Christofferson nagtudlo:

“Ang Kristiyanong mga nagtuon sa relihiyon [theologians] dugay nang nagsugakod niini nga pangutana, Unsa ang padulngan niining binilyon nga nabuhi ug namatay nga walay kahibalo kabahin ni Jesus? Pinaagi sa Pagpahiuli sa ebanghelyo ni Jesukristo miabut ang pagsabut unsaon nga ang patay nga wala mabunyagi matubos ug unsaon sa Dios nga mahimong ‘usa ka mahingpit, makiangayon nga Dios, ug usa ka maloloy-on nga Dios usab’ [Alma 42:15].

“Samtang buhi pa, si Jesus nanagna nga Siya usab mosangyaw ngadto sa mga patay [tan-awa sa Juan 5:25]. Si Pedro misulti kanato nga kini nahitabo sa sal-ang tali sa Paglansang sa Manluluwas ug sa Pagkabanhaw [tan-awa sa 1 Pedro 3:18–19]. Si Presidente Joseph F. Smith nakasaksi diha sa panan-awon nga ang Manluluwas mibisita sa kalibutan sa mga espiritu [tan-awa sa DP 138:30, 33]. …

“Ang atong dakong paningkamot sa pagtubos sa mga patay, ug ang panahon ug kapanguhaan nga atong gibutang luyo niana nga pasalig mao, labaw sa tanan, usa ka pagpahayag sa atong pagsaksi kabahin ni Jesukristo. Kini naglangkob ingon ka gamhanan nga pamulong nga atong mahimo kabahin sa Iyang balaan nga kinaiya ug misyon. Nagpamatuod kini, una, bahin sa Pagkabanhaw ni Kristo; ikaduha, bahin sa walay kinutuban nga maabut sa Iyang Pag-ula; ikatulo, nga Siya lamang ang bugtong tinubdan sa kaluwasan; ikaupat, nga Iyang giestablisar ang mga kondisyon alang sa kaluwasan; ug, ikalima, nga Siya moanhi pag-usab” (“The Redemption of the Dead and the Testimony of Jesus,” Ensign o Liahona, Nob. 2000, 9–10).

Ang mga sinulat sa nag-unang Kristohanong mga magtutudlo (una ngadto sa ikatulong mga siglo) mahitungod sa pagsangyaw ngadto sa mga patay.

Origen: “Sa dihang [si Jesus] nahimong usa ka kalag [usa ka espiritu], nga walay lawas, nagpuyo Siya kauban niadtong mga kalag nga walay lawas, nga nagkabig kanila kinsa andam nga motuo sa Iyang kaugalingon” (sa The Ante-Nicene Fathers, ed. Alexander Roberts ug James Donaldson [1907], 4:448).

Hermas: “Ang mga apostoles ug mga magtutudlo kinsa misangyaw sa ngalan sa Anak sa Dios, human sila nahikatulog diha sa gahum ug pagtuo bahin sa Anak sa Dios, misangyaw usab ngadto kanila nga nahikatulog sa wala pa sila” (sa The Apostolic Fathers, trans. J. B. Lightfoot [1898], 472).

Mga video mahitungod sa buhat sa family history (tan-awa sa LDS.org).

Pagpalambo sa Atong Pagtudlo

Tudloan sa “ngano.” “Usahay ang mga tigkat-on—ilabi na ang kabatan-onan—naghunahuna kon sa unsang paagi ang mga baruganan sa ebanghelyo adunay kalabutan ngadto kanila o nganong kinahanglan silang mosunod og piho nga mga sugo. Hinoon, kon sila nakasabut sa mahangturong plano sa Langitnong Amahan alang sa kalipay sa Iyang mga anak, ang mga hinungdan sa mga baruganan sa ebanghelyo ug mga sugo mahimong mas klaro ug ang kadasig sa pagsunod magkadako” (Pagtudlo sumala sa Pamaagi sa Manluluwas, 20).