Luwas diha sa Kuwadra, ni Dan Burr

Disyembre 16–22

Pasko

“Maayong Balita sa Dakong Kalipay”

Ang mga panaghisgutan sa ebanghelyo gamhanan sa espirituhanong paagi kon nakasentro kini kang Jesukristo. Samtang magtuon ka sa pagkatawo ug misyon ni Jesukristo karong semanaha, pagtinguha og inspirasyon gikan sa Espiritu Santo aron masayud kon sa unsang paagi nga masentro gayud nimo ang imong panaghisgutan sa klase diha sa Manluluwas.

Irekord ang Imong mga Impresyon

Dapita ang Pagpaambit

Dapita ang mga sakop sa klase nga ipaambit kon unsay ilang gibuhat o nabuhat sa nangagi isip mga indibidwal o mga pamilya sa pagsaulog sa pagkatawo sa Manluluwas sa mga paagi nga mas nakapaduol kanila ngadto Kaniya.

Itudlo ang Doktrina

Mateo 1:18–25Lucas 1:26–38; 2:1–20

Si Jesukristo mipakig-angay [condescended] nga magpakatawo dinhi sa yuta.

• Ang pagpakig-angay nagpasabut nga boluntaryong nanaug gikan sa usa ka posisyon o dignidad (tan-awa sa 1 Nephi 11:14–26). Ang Pasko usa ka maayong panahon sa pagpamalandong ug pagsaulog sa pagpakig-angay ni Kristo—sa Iyang kaandam nga mobiya sa “hukmanan sa iyang Amahan didto sa kahitas-an, nga magpakabuhi uban sa tawo, nga magpakamatay alang sa tawo” (“Again We Meet around the Board,” Hymns, nu. 186). Aron sa pagdasig og panaghisgutan bahin sa hilisgutan, mahimo nimong pangutan-on ang mga sakop sa klase kon unsay ilang nakat-unan diha sa ilang personal o pamilya nga pagtuon karong semanaha kon si kinsa si Jesukristo sa wala pa Siya matawo (tan-awa sa Juan 17:5; Mosiah 7:27; DP 76:12–14, 20–24; Moises 4:2). Dayon mahimo nimong i-display ang imahe diha sa outline karong semanaha sa Dali, Sunod Kanako—Alang sa mga Indibidwal ug mga Pamilya samtang magbasa ang mga sakop sa klase mahitungod sa pagkatawo sa Manluluwas (tan-awa sa Mateo 1:18–25; Lucas 1:26–38; 2:1–20). Unsa ang ilang mga hunahuna ug mga pagbati samtang gitandi nila ang premortal nga himaya sa Manluluwas ngadto sa ubos Niya nga pagkahimugso?

• Usa ka pangutana sama sa gipangutana sa anghel kang Nephi diha sa 1 Nephi 11:16 mahimong usa ka maayong paagi sa pagsugod og panaghisgutan sa klase, bisan kon lahi ang mga pulong nga imong gamiton niini. Siguro mahimo nimong isulat diha sa pisara ang Unsa man ang pagpakig-angay sa Dios? ug hangyoa ang mga sakop sa klase sa pagpamalandong niining pangutana samtang magbasa sila sa 1 Nephi 11:17–33. Dapita sila sa pagpaambit og bisan unsang mga hunahuna mahitungod sa Manluluwas nga gidasig niining mga bersikulo. Unsa nga mga hulagway ang imong mapakita sa klase nga nagpakita sa mga sitwasyon gikan sa kinabuhi sa Manluluwas nga gihulagway ni Nephi?

• Ang musika usa ka talagsaong paagi sa pagdapit sa Espiritu nganha sa inyong klase. Ikonsiderar ang pagpatukar sa mga himno sa Pasko nga gipasundayag sa Tabernacle Choir (tan-awa sa mormontabernaclechoir.org), nga magdapit sa usa ka tawo sa pagpasundayag og usa ka awit sa Pasko, o pagbasa o pagkanta og dungan sa pipila ka himno isip usa ka klase (tan-awa sa Hymns, mga nu. 201–14). Ang mga sakop sa klase mahimong mangita sa mga pulong diha niining mga himno ug sa mga kasulatan nga nalista uban sa mga himno nga nakapadugang sa ilang pasalamat alang sa Manluluwas ug sa Iyang kaandam nga moanhi sa yuta.

Lucas 4:16–21; Juan 3:16

Si Jesukristo mituman sa Iyang misyon, nga nakapahimo niining posible nga makapanunod kita og kinabuhing dayon.

• Aron matabangan ang mga sakop sa klase sa paghisgot sa mga rason nga natawo si Jesukristo, mahimo nimo silang dapiton sa pagpangita ug sa pagpaambit og mga kasulatan nga nag-summarize sa Iyang misyon (tan-awa sa outline karong semanaha diha sa Dali, Sunod Kanako—Alang sa mga Indibidwal ug mga Pamilya alang sa pipila ka ehemplo). Tingali ang mga sakop sa klase mahimong mangita ug mobasa sa mga bersikulo nga magpares o sa ginagmay nga mga grupo. Unsa ang ilang makat-unan mahitungod sa misyon ni Kristo gikan sa mga bersikulo nga ilang nakit-an? Unsa ang atong makat-unan mahitungod sa Iyang misyon gikan sa pipila ka tawag nga gihatag Kaniya diha sa mga kasulatan? (tan-awa sa Giya ngadto sa mga Kasulatan, “Jesukristo”).

• Ang mga sakop sa klase mahimong makakat-on mahitungod sa misyon sa Manluluwas pinaagi sa pagbasa sa “Ang Buhi nga Kristo: Ang Pagpamatuod sa mga Apostoles” (Liahona, Mayo 2017, sulod sa atubangan nga hapin) ug sa pagpaambit sa mga pamahayag nga ilang makit-an nga nagpasabut nganong mianhi Siya sa yuta. O mahimo nilang ribyuhon ang mensahe ni Presidente Gordon B. Hinckley diha sa “Dugang nga mga Kapanguhaan” ug hisgutan kon unsay ilang nakat-unan mahitungod sa Manluluwas. Unsaon man nato paggahin og higayon karong panahon sa Pasko alang sa “hilum nga paghunahuna ug pagpamalandong” bahin sa Manluluwas ug sa Iyang misyon?

• Hatagi ang mga sakop sa klase og panahon sa pagpamalandong sa ilang mga pagpamatuod bahin ni Jesukristo ug sa Iyang misyon. Mahimo ba silang mopaambit og personal nga mga kasinatian o mga istorya gikan sa kinabuhi sa Manluluwas nga nakapalambo sa ilang pagtuo o gugma alang Kaniya? Sa unsang paagi nga ang pagtuon sa Bag-ong Tugon karong tuiga nakatampo sa mas makahuluganong panahon sa Pasko?

Awhaga ang Pagkat-on diha sa Panimalay

Isugyot ngadto sa mga sakop sa imong klase nga ang pagtuon sa Pinadayag 12–22 karong semanaha makapalambo sa ilang pagdayeg alang sa tahas sa Manluluwas diha sa plano sa kaluwasan ug makadugang og kahulugan sa ilang pagsaulog sa Pasko.

Dugang nga mga Kapanguhaan

Pasko

Ang tinuod nga kahulugan sa Pasko.

Si Presidente Gordon B. Hinckley nagtudlo:

“Sa dihang ang tanan gipamulong ug natapos, … walay ingon kaanindot, ingon ka harianon, ingon ka dalaygon sama niining buhat sa kalooy sa dihang ang Anak sa Makagagahum, … Siya kinsa mikanaog dinhi sa yuta isip usa ka bata nga natawo didto sa Betlehem, mihatag sa Iyang kinabuhi sa makauulaw ug kasakit aron ang tanang anak sa Dios nga mga lalaki ug babaye sa tanang henerasyon sa panahon, sa kada usa nga kinahanglang moagi sa kamatayon, nga unta makalakaw pag-usab ug mabuhi sa kahangturan. Iyang gihimo alang kanato kon unsay dili nato mahimo sa atong kaugalingon. …

“Kini mao ang maanindot ug tinuod nga istorya sa Pasko. Ang natawhan ni Jesus didto sa Betlehem sa Judea mao ang pasiuna. Ang tulo ka tuig nga pagpangalagad sa Agalon mao ang pasiunang pamulong. Ang halangdon nga butang sa istorya sa Iyang sakripisyo, ang kahingpit sa pagkadili hinakog nga buhat sa pagkamatay sa kasakit diha sa krus sa Kalbaryo aron sa pag-ula alang sa mga sala natong tanan.

Getsemani, ni J. Kirk Richards

“Ang panapos mao ang milagro sa Pagkabanhaw, nga nagdala sa kasiguraduhan nga ‘maingon nga diha kang Adan ang tanan nangamatay, maingon man usab diha kang Kristo ang tanan mangabuhi’ (1 Cor. 15:22).

“Wala untay Pasko kon wala nahitabo ang Pasko sa Pagkabanhaw. Ang bata nga si Jesus sa Betlehem lahi unta nga bata nga wala ang matubsanong Kristo sa Getsemani ug Kalbaryo, ug ang madaugon nga kamatuoran sa Pagkabanhaw.

“Nagtuo ako sa Ginoo nga si Jesukristo, ang Anak sa Mahangturon, Buhi nga Dios. Walay talagsaon kaayo nga nakalakaw sa yuta. Walay laing nakahimo og susama nga sakripisyo o miganti og susama nga panalangin. Siya ang Manluluwas, ug ang Manunubos sa kalibutan. Nagtuo ako Kaniya. Ipamahayag nako ang Iyang kabalaan nga walay paglingla o kompromiso. Nahigugma ako Kaniya. Gipamulong nako ang Iyang ngalan sa balaang pagtahud ug katingala. …

“Alang sa matag usa kaninyo hinaut nga mahimo kining usa ka malipayong Pasko. Apan mas importante, ako manghinaut nga matag usa kaninyo mogahin og usa ka panahon, tingali usa lang ka oras, nga igahin sa hilum nga paghunahuna ug pagpamalandong ug hinuktokan ang kaanindot ug ang kaharianon niini, ang Anak sa Dios. Ang atong kalipay niining panahona tungod kini kay Siya mianhi sa kalibutan. Ang kalinaw nga moabut gikan Kaniya, sa Iyang walay katapusan nga gugma nga gibati sa matag usa kanato, ug hilabihan nga pagpasalamat alang nianang Iyang gihatag nga walay bayad kanato nga dako kaayo nga bugti ngadto sa Iyang Kaugalingon—mao kini ang tinuod nga kahulugan sa Pasko” (“The Wondrous and True Story of Christmas,” Ensign, Dis. 2000, 4–5).

Pagpalambo sa Atong Pagtudlo

Pagreserba og panahon alang sa pagpaambit sa mga tigkat-on. “Kon ang mga tigkat-on mopaambit sa ilang nakat-unan, sila dili lamang mobati sa Espiritu ug molig-on sa ilang kaugalingong mga pagpamatuod, apan nag-awhag usab sila sa mga sakop sa klase sa pagdiskobre sa mga kamatuoran sa ilang mga kaugalingon. … Pagreserba og panahon alang sa pagpaambit sa mga estudyante diha sa matag leksyon—sa pipila ka sitwasyon, mahimo nimong mabantayan nga kini nga mga diskusyon mao ang leksyon” (Pagtudlo sumala sa Pamaagi sa Manluluwas, 30).