2–8 Janvye.

Matye 1; Lik 1

“Se pou sa fèt selon jan w di a”

Anvan w li nenpòt lòt dokimantasyon adisyonèl, li epi medite sou Matye 1 ak Lik 1, epi ekri enpresyon espirityèl ou yo. Kite Lespri a gide w nan preparasyon w lan. Apresa, egzamine ide yo bay nan plan sa a ak nan Vini, Suiv Mwen—Pou Moun yo ak Fanmi yoa.

Envite Pataj

Youn nan objektif prensipal Matye, Lik ak lòt moun ki ekri Levanjil yo sete pou temwaye ke Jezikri se Pitit Gason Bondye. Bay manm klas yo kèk minit pou yo revize Matye 1 oubyen Lik 1 epi pataje yon vèsè ki bati lafwa yo nan Jezikri. Sigjere klas la ke, pandan y ap etidye Nouvo Testaman an ane sa a, yo gen dwa fè yon lis sou pasaj ki temwaye ke Jezikri se Pitit Gason Bondye a. Ou gen dwa menm sèvi ak lis sa a pou klas la.

Anseye Doktrin nan

Matye 1:18–25; Lik 1:5–80

Papa nou ki nan syèl la travay atravè pitit fidèl li yo pou akonpli objektif li.

• Manm klas yo ap gen plis tandans pou yo fè eksperyans siyifikan pandan y ap etidye Nouvo Testaman an ane sa a si yo ka tire leson nan eksperyans moun y ap li nan ekriti yo. Pou ede yo fè sa, ou gen dwa ekri non moun ki nan Matye 1 ak Lik 1 yo sou tablo a, ansanm avèk referans ekriti sou moun sa yo, nan fason sa a:

  • Mari (Lik 1:26–56)

  • Jozèf (Matye 1:18–25)

  • Elisabèt (Lik 1:5–7, 24–25, 40–45, 57–60)

  • Zakari (Lik 1:5–23, 59–64)

  Kisa nou ka aprann nan resi sa yo k ap ede nou jodi a?

• Pou ede manm klas yo panse plis sou Mari ak wòl li nan plan Papa nou ki nan Syèl la, ou gen dwa pase videyo “An Angel Foretells Christ’s Birth to Mary (Yon Zanj Predi Nesans Kris la pou Mari)” ak “Mary and Elisabeth Rejoice Together (Mari ak Elizabèt Rejwi Ansanm)” nan (ChurchofJesusChrist.org). Oubyen ou ka li ansanm Lik 1:26–38, 46–56, epi chèche bagay Mari te di ki revele yon bagay sou karaktè li. Ki lòt bagay nou aprann sou Mari?

Lik 1:5–25

Benediksyon Bondye yo vini nan moman L chwazi.

• Ka gen moun nan klas ou a ki, tankou Elisabeth ak Zakari, ap mennen yon lavi dwat, men ki poko resevwa yon benediksyon yo espere. Panse envite klas la pou gade nan Lik 1:5–25, pou yo chèche leson yo ka aprann de Elisabèt ak Zakari konsènan rete tann Senyè a. Ki lòt egzanp nan lavi pa yo oubyen nan ekriti yo manm klas yo ka pataje konsènan zafè rete tann Senyè a? Kisa nou aprann nan egzanp sa yo? Manm klas yo gen dwa diskite tou deklarasyon nan “Resous Adisyonèl yo.”

Lik 1:26–38

“Avèk Bondye anyen pa enposib.”

• Kèkfwa manm klas yo ka mande tèt yo—jan Mari te fè a—kòman plan ak pwomès Bondye genyen pou yo yo ka akonpli. Pou ede manm klas yo konprann ke, atravè pouvwa Bondye tout bagay posib, ou gen dwa montre yo foto Anonsyasyon an: Anj Gabriyèl parèt devan Mari (Liv Ilistrasyon Levanjil la,, no. 28) epi envite yo li ansanm Lik 1:26–38 Kisa nou ka aprann konsènan simonte bagay ki parèt enposib yo nan etidye pawòl ak aksyon Mari yo? Mande manm klas yo pou yo pataje eksperyans kote Bondye te ede yo akonpli yon bagay yo te panse ki te enposib.

Resous adisyonèl

Rete tann Senyè a.

Paske l rekonèt ke anpil nan nou ap mande poukisa nou bezwen rete tann benediksyon Bondye yo, Èldè Jeffrey R. Holland te di:

“Repons pou kesyon sa yo se ‘Wi, Bondye ka fè mirak tousuit, men to ou ta nou aprann ke tan ak sezon vwayaj nou nan mòtalite a se pou Li e se Limenm sèl ki dirije l.’ … Lafwa vle di fè Bondye konfyans nan bon tankou nan move tan, menmsi sa mande kèk soufrans jiskaske nou wè bra Li revele anfavè nou. …

“… Moun ki ‘konfye yo nan Senyè a , fòs yo a renouvle; [epi] tankou malfini, y ap pran zèl pou yo vole ale. y ap kouri san yo pa janm bouke; … y ap mache, yo p ap janm febli’ [Ezayi 40:31; italik ajoute]. Mwen priye pou ke “byento” —to ou ta-—benediksyon sa yo vin jwenn nou chak k ap chèche sekou anba chagren nou yo ak libète anba gwo lapenn nou yo. Mwen rann temwayaj konsènan lanmou Bondye ak Retablisman levanjil gloriye L la, ki, nan yon fason oubyen yon lòt, se repons pou chak pwoblèm nou rankontre nan lavi a” (“Mete Konfyans nan Senyè a,” Liahona, Nov. 2020, 116–17).

Amelyore ansèyman nou

Ankouraje manm klas la pou yo etidye ekriti yo lakay yo. Yon fason w ka ankouraje etid ekriti yo lakay se bay manm klas la tan pou yo pataje dekouvèt ak ide yo jwenn nan etid pèsonèl ak familyal yo (gade Anseye nan Fason Sovè a, 29).