Jezi ap Preche Diskou sou Mòn nan, pa Gustave Doré

13–19 Fevriye.

Matye 5; Lik 6

“Benediksyon Pou Ou”

Ekri enpresyon espirityèl ou resevwa pandan w ap etidye Matye 5 ak Lik 6la. Revelasyon ap vini lè w chèche satisfè bezwen klas ou a.

Envite Pataj

Prezidan Joseph Fielding Smith te di ke Diskou sou Mòn nan se “pi gran [diskou] ki te janm preche” (Enseignements des présidents de l’église: Joseph Fielding Smith [2013], 234). Envite manm klas la pataje santiman yo sou kesyon poukisa sa a se verite.

Anseye Doktrin nan

Matye 5:1–12

Bonè dirab soti nan viv nan fason Jezi te anseye a.

• Nan Diskou sou Mòn nan, Sovè a te envite disip Li yo pou yo repanse sou kisa sa vle di pou nou viv yon lavi beni—yon lavi bonè dirab. Pou kòmanse yon diskisyon sou bonè dirab, ou ka mande manm klas yo pou yo di kisa k fè yo kontan. Dapre Matye 5:1–12, kisa Jezikri di ki fè yon moun “beni,” oubyen etènèlman kontan? Nan ki sans ansèyman Jezi yo diferan avèk lòt fason moun ap eseye jwenn bonè yo?

• Panse ekri sou tablo a yon lis kèk atribi oswa kalite nan vèsè 3–12, tankou “pi nan kè” oswa “patizan lapè”. Apresa envite manm klas la pou yo sigjere opoze chak tèm. Kisa nou aprann sou kalite sa yo lè nou konsidere sans kontrè yo? Mande yo pou yo medite sou sa yo ta ka chanje pou yo ka vin tounen kalite moun yo dekri nan vèsè sa yo. Kisa 3 Nefi 12:3, 6 ajoute sou konpreyansyon nou de Matye 5:3, 6la?

Sovè a te anseye fason pou viv ak kè kontan epi vin tankou Papa nou ki nan Syèl la.

Matye 5:14–16

Disip Sovè yo dwe se limyè mond la.

• Kisa sa vledi pou se “limyè mond lan”? (vèsè 14). Kisa sa vledi kache limyè nou “anba yon tab,”(vèsè 15), e poukisa nou gen dwa tante pou nou fè sa? Deklarasyon Prezidan Bonnie H. Cordon nan nan “Resous Adisyonèl yo” ak 3 Nefi 18:24 la ka ede manm klas la gen plis dezi pou yo vin yon limyè pou lòt moun. Yo te ka pale tou sou moun ki te yon limyè pou yo e ki te mennen yo nan direksyon Jezikri. Kijan nou ka imite moun sa yo?

Matye 5:17–48

Jezikri te anseye yon lwa siperyè ki ka mennen nou nan pèfeksyon.

• Kèk nan sityasyon ki dekri nan Matye 5 yo te espesifik nan epòk Sovè a, men prensip li te anseye yo inivèsèl. Pou ede manm klas la wè aplikasyon yo nan lavi yo, envite yo pou yo seleksyone yonn nan pasaj sa yo epi panse sou yon egzanp nan epòk nou an ki ilistre sa Sovè a t ap anseye a: vèsè 21–24; 27–30; 33–37; 38–39; 40–42; ak 43–44. Yo gen dwa fè sa endividyèlman oubyen an ti gwoup epi pataje egzanp yo avèk klas la.

• Kijan w ka ede manm klas la wè ke, lè Sovè a kòmande pou nou “pafè” a (Matye 5:48) , sa vle di, jan Prezidan Russell M. Nelson te eksplike a, pou nou “konplè” oubyen “fini”?Perfection Pending (Pèfeksyon Alatant),” Ensign, Nov. 1995, 86–88) Dekoupe yon foto Jezi pou fè l tounen yon jwèt asanblaj, epi envite manm klas yo pou, nan do chak moso, yo ekri yon ansèyman nan Matye 5 la ke yo santi yo enspire pou aplike nan lavi yo. Kite yo travay ansanm pou yo konplete asanblaj la. Kòman Sakrifis Jezikri a ede nou vin “konplè” oubyen “fini”? (gade nan Diksyonè Bib la, “Gras”). Kisa pawòl Prezidant Joy D. Jones nan “Resous Adisyonèl yo” ajoute nan konpreyansyon nou de pwosesis sa a?

Resous adisyonèl

Se pou w yon limyè.

Prezidant Bonnie H. Cordon te ansenye: Envitasyon Senyè a pou nou kite limyè nou briye a se pa annik poiu n flache yon reyon limyè nou nenpòt kijan pou nou fè mond lan pi briyan an jeneral. Men se pou nou konsantre limyè sa a yon fason pou lòt moun ka wè chemen pou y al jwenn Kris la. Se rasanbleman Izrayèl sou bò vwal sa a—k ap ede lòt moun wè pwochen etap pou yo pran an nan fè ak kenbe alyans sakre avèk Bondye” (“Pou Yo Kapab Wè,” Liahona, Me 2020, 79).

Chèche pèfeksyon.

Prezidant Joy D. Jones te eksplike:

“Senyè a renmen efò, epi efò pote rekonpans. Nou dwe kontinye pratike. Nou toujou ap pwogrese depi n ap fè efò pou nou suiv Senyè a. Li pa atann pèfeksyon jodia. Nou kontinye monte Mòn Sinayi pèsonèl nou. Menmjan ak nan tan lontan, vwayaj nou an anfèt mande efò, travay di, ak etid, men angajman nou pou nou pwogrese a pote rekonpans etènèl. …

“Annou deklare devosyon nou pou Papa nou Ki nan Syèl la ak Sovè nou an, “avèk lafwa fèm nou gen nan li, pandan n ap depann antyèman sou merit limenm ki gen pouvwa pou l sove a’ [2 Nefi 31:19]. Annou kontinye vwayaj sa a ak kè kontan nan pigran potansyèl espirityèl nou” (“Yon Apèl Espesyalman Nòb,” Liahona, Me 2020, 16–17).

Amelyore ansèyman nou

Ogmante patisipasyon manm klas la. Gen anpil aktivite nou ka fè ansanm antanke klas, an ti gwoup, de pa de, oubyen sou fòm yon deba. Itilize yon varyete metòd pou pèmèt kèk moun patisipe, moun ki otreman gen dwa pa gen yon chans pou yo patisipe. (Gade Anseye nan fason Sovè a, 33.)