ʻOua Te Mou Manavahē, tā fakatātaaʻi ʻe Michael Malm

13–19 Māʻasi

Mātiu 11–12; Luke 11

“Te u Foaki ʻa e Fiemālié Kiate Kimoutolu”

Lau ʻa e Mātiu 11–12 mo e Luke 11 ʻi he lolotonga ʻo e uiké kimuʻa peá ke toki faiakó. Te ke maʻu heni ha taimi ke fakalaulauloto mo maʻu ha fakahā fekauʻaki mo e meʻa ke ke tokanga taha ki ai ʻi he kalasí.

Fakaafeʻi e Feʻinasiʻakí

Ko hono fakaʻaongaʻi ko ia e ngaahi tefitoʻi moʻoni ʻoku tau maʻu he folofolá ki heʻetau moʻuí, ko ha founga mahuʻinga ia ke tau aʻusia ai e mālohi ʻo e folofola ʻa e ʻOtuá. Poupouʻi e kau mēmipa ʻo e kalasí ke vahevahe ʻa e meʻa naʻa nau maʻu ʻi heʻenau ako folofola ʻi he uike ní, ʻa ia ʻe lava ke nau fakaʻaongaʻi ʻi heʻenau moʻuí. Ko hono vahevahe ko ia ha sīpinga ʻo e founga hoʻo fakaʻaongaʻi e folofolá, ʻe lava ʻo tokoni ia ke ueʻi fakalaumālie ai e kau mēmipa ʻo e kalasí ke nau vahevahe ʻenau takitaha sīpingá.

Akoʻi ʻa e Tokāteliné

Mātiu 11:28–30

ʻE foaki mai ʻe Sīsū Kalaisi ʻa e fiemālié kiate kitautolu ʻi heʻetau falala kiate Iá.

• Naʻe akoʻi ʻe he Fakamoʻuí ʻi he Mātiu 11:28–30, te Ne tokoniʻi kitautolu ʻi he fua ʻo ʻetau ngaahi kavenga mamafá kapau te tau tali ʻEne fakaafe ke “Toʻo ʻeku haʻamongá kiate kimoutolú” (veesi 29). Koeʻuhí ke tokoni ke mahino lelei ange ki he kau mēmipa ʻo e kalasí ʻa e talaʻofa ko ʻení, te ke lava ʻo fakaʻaliʻali ha fakatātā ʻo ha ʻioke (vakai, fokotuʻutuʻu ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí) pea vahevahe ha ngaahi moʻoni hangē ko ʻení: ʻoku faʻu ʻa e ngaahi ʻioké ke tokoni ki he fanga monumanú ʻi hono uta ha kavenga mamafa pe fakahoko ha ngāue, pea ʻoku faʻa faʻu ʻa e ngaahi ʻioké ke feʻunga mālie mo e monumanú. Ko e hā ʻoku tānaki mai ʻe he ngaahi fakaikiiki ko ʻení ki heʻetau mahino fekauʻaki mo e Mātiu 11:28–30? Ko e hā ha ngaahi fakaafe ʻoku tau maʻu ʻi he ngaahi veesi ko ʻení? Ko e hā ha ngaahi tāpuaki ʻoku talaʻofa mai kiate kitautolú? Te ke lava foki ʻo vahevahe ʻa e talaʻofa ʻa Palesiteni Lāsolo M. Nalesoni ʻi he “Ngaahi Maʻuʻanga Tokoni Kehé.”

• ʻOku tau maʻu kotoa ha ngaahi kavenga ʻe lava ke fakamaʻamaʻa ʻi he mālohi ʻo Sīsū Kalaisí. Ke poupouʻi hono aleaʻi ʻo e meʻa ko ʻení, te ke lava ʻo fakaafeʻi e kau mēmipa ʻo e kalasí ke lau pea aleaʻi ʻa e Mātiu 11:28–30 mo ha taha kehe ʻi he kalasí. ʻE lava ke nau fakakau ai ha ngaahi fehuʻi hangē ko ʻení: Ko e hā ha sīpinga ʻo ha ngaahi kavenga ʻe ala fuesia ʻe ha taha? Ko e hā ʻoku fie maʻu ke tau fakahoko ke tau omi ai kia Kalaisí? ʻOku ʻuhinga ki he hā ke toʻo kiate kitautolu e haʻamonga ʻa e Fakamoʻuí? Kuó ke ongoʻi fēfē hano fakamaʻamaʻa ʻe he Fakamoʻuí hoʻo ngaahi kavengá ʻi haʻo tafoki kiate Iá? ʻE lava ke maʻu ʻe he kau mēmipa ʻo e kalasí ha ngaahi fakakaukau makehe ʻi he pōpoaki ʻa ʻEletā Tēvita A. Petinaá “Ke Nau Lava ʻo Fua Faingofua ʻEnau Ngaahi Kavengá” (Liahona, Mē 2014, 87–90).

Ko e Kai ʻe he Kau Ākongá ʻa e Uité ʻi he Sāpaté, tā fakatātaaʻi ʻe James Tissot

Mātiu 12:1–13

Ko e Sāpaté ko ha ʻaho ia ke fai ai ha ngāue lelei.

• ʻI heʻenau loto ʻaki ke tauhi ʻa e ʻaho Sāpaté ke māʻoniʻoní, naʻe fokotuʻu ai ʻe he kau Fālesí ha ngaahi tuʻutuʻuni mamafa mo ha ngaahi tukufakaholo naʻe faʻu ʻe he tangatá, ʻa ia naʻe fakaiku ʻo ne fakakuihi ʻenau mahino ki he taumuʻa totonu ʻo e Sāpaté. Ke kamataʻi ha fealēleaʻaki fekauʻaki mo e ʻuhinga naʻe ʻomi ai ʻe he ʻEikí ʻa e ʻaho Sāpaté kiate kitautolú, te ke ala fakaafeʻi e kau mēmipa ʻo e kalasí ke toe vakaiʻi ʻa e Mātiu 12:1–13 . Ko e hā ʻoku akoʻi ʻe he ngaahi fakamatala ko ʻení fekauʻaki mo e taumuʻa ʻo e Sāpaté? Ko e hā ha ngaahi fakakaukau kehe ki he Sāpaté ʻoku tau maʻu mei he ʻEkesōtosi 31:16–17; ʻĪsaia 58:13–14; mo e Tokāteline mo e Ngaahi Fuakava 59:9–13? Kuo liliu fēfē hotau vā fetuʻutaki mo e Fakamoʻuí ʻi heʻetau feinga ke tauhi Hono ʻahó ke māʻoniʻoní?

• Neongo naʻe fakamamafaʻi ʻe he kau Fālesí ha konga lahi ʻo e ngaahi tuʻutuʻuni fakaikiiki fekauʻaki mo e Sāpaté, ka naʻe akoʻi ʻe he Fakamoʻuí ha tefitoʻi moʻoni faingofua: “ʻOku ngofua ke failelei ʻi he ʻaho Sāpaté” (Mātiu 12:12). Ko e hā ha ngaahi tefitoʻi moʻoni kehe ʻoku tokoni ke tau tauhi ʻa e ʻaho Sāpaté ke māʻoniʻoní? (vakai, fakamatala ʻa Palesiteni Lāsolo M. Nalesoni ʻi he “Ngaahi Maʻuʻanga Tokoni Kehé”). Ko e hā ʻoku lelei ange ai e ngaahi tefitoʻi moʻoní ʻi ha ngaahi lisi ʻo ha ngaahi tuʻutuʻuni ʻi heʻetau feinga ko ia ke fakatupulaki ha moʻui fakafalala fakalaumālie pē kiate kitá?

• ʻE ala tānaki atu e pōpoaki ʻa Palesiteni Lāsolo M. Nalesoni “ʻOku Fakafiefia ʻa e ʻAho Sāpaté” (Liahona, Mē 2015, 129–32) mo e ngaahi vitiō ʻo e faleʻi ʻa ʻEletā Sefilī R. Hōlani ʻi he “Ngaahi Maʻuʻanga Tokoni Kehé” ki ha fealeaʻaki kau ki he ʻaho Sāpaté.

Ngaahi Maʻuʻanga Tokoni Kehé

Haʻi fakataha mo Sīsū Kalaisi.

Naʻe akoʻi ʻe Palesiteni Lāsolo M. Nalesoni: “Mou haʻu kia Kalaisi ke haʻi fakataha mo Ia pea mo Hono mālohí, koeʻuhí ke ʻoua naʻa mou toʻo toko taha pē ʻa e kavenga ʻo e moʻuí. ʻOkú ke toʻo ʻa e kavenga ʻo e moʻuí kuo haʻi fakataha koe mo e Fakamoʻui mo e Huhuʻi ʻo e māmaní, pea fakafokifā pē, kuo fakaʻau ʻo maʻamaʻa ange hoʻo ngaahi palopalemá, neongo pe ko e hā honau mamafá” (“The Mission and Ministry of the Savior: A Discussion with Elder Russell M. Nelson,” Ensign, June 2005, 18).

“Ko e hā ʻa e fakaʻilonga ʻoku ou fie ʻoange ki he ʻOtuá?”

Naʻe akoʻi ʻe Palesiteni Lāsolo M. Nalesoni: “Ko e taimi kuo pau ai ke u fai ha fili pe tuʻutuʻuni pe ʻoku taau ʻa e ʻekitivitī ko iá pe ʻikai mo e Sāpaté, ʻoku ou fehuʻi pē kiate au, ‘Ko e hā ʻa e fakaʻilonga ʻoku ou fie ʻoange ki he ʻOtuá?’ Naʻe ʻai ʻe he fehuʻí ni ke mahino ʻaupito ʻeku ngaahi fili kau ki he ʻaho Sāpaté” (“ʻOku Fakafiefia ʻa e ʻAho Sāpaté,” Liahona, Mē 2015, 130).

Ko e ngaahi tāpuaki ʻo hono tauhi e Sāpaté ke māʻoniʻoní.

 

Ko Hono Fakatupulaki ʻEtau Founga Akoʻí

Poupouʻi ʻa e feʻinasiʻakí. “Ko e tokotaha kotoa pē ʻi hoʻo kalasí ko ha maʻuʻanga tokoni fungani ia ʻo e fakamoʻoní, ʻiló, mo e taukei ʻi hono moʻui ʻaki e ongoongoleleí. Fakaafeʻi kinautolu ke nau vahevahe pea mou felangakihakeʻaki” (Ko e Faiako ʻi he Founga ʻa e Fakamoʻuí, 5).