M̧aaj 20–26

Matu 13; Luk 8; 13

“Eo Ewor Lo̧jiln̄in En Ron̄jake”

Ilo am̧ riit, ļōmņak kōn kajjitōk ko ro uwaan kūlaaj eo am̧ emaron̄ wōr aer ilo aer kajjieon̄ in meļeļe ennaan ko an būrabōļ ko. Ta eo emaron̄ in pen n̄an meļeļe? Ekōjkan an ekkatak eo am̧ maron̄ kōpooj eok n̄an uwaaki kajjitōk ko aer?

Kajjitōk bwe ren Kwaļo̧k

Etale ippān kūlaaj eo “Ļōmņak ko n̄an Kōkōm̧anm̧anļo̧k Ekkatak Jeje ko Rekwojarjar Am̧ Make” ilo Itok, Ļoor Eō—N̄an Kajjojo Armej im Baam̧le ko. Kajjitōk ippān ro uwaan kūlaaj eo n̄an kwaļo̧k jekjek ko raar kōjerbali n̄an ekkatak Matu 13 im Luk 8; 13.

Katakin Katak eo

Matu 13:1–23

Būruōd rej aikuj pojak n̄an bōk naan eo an Anij.

• Ekōjkan am̧ maron̄ kōjerbal būrabōļ eo kōn rikallūb eo n̄an im̧we ro uwaan kūlaaj eo am̧ n̄an kōpooj būruier n̄an bōk naan eo an Anij? Kwomaron̄ je Rikaļoor ro im Ro Jet ioon boot eo. Kajjitōk ippān ro uwaan kūlaaj eo n̄an riiti Matu 13:10–17 im pukōt ekōjkan an Rilo̧mo̧o̧r eo kar kōmeļeļeik oktak ko ikōtaan rikaļoor ro An im ro jet me raar ron̄ būrabōļ eo An. Innām kajjitōk ippān ro uwaan kūlaaj eo n̄an etale eoon 18–23, kappukōt ta eo emaron̄ in kōm̧m̧an bwe lo̧jilin̄id en erom “ron̄ jam̧ōņ” ak mejād en kilōk n̄an men ko an jetōb. Ilo jekjek ta jej bōke ilo raan kein ad jān Anij im ro Rikarejeran? Ekōjkan ad maron̄ kōpooj “bwidej em̧m̧an” n̄an bōk tōl eo aer? (eoon 23).

• Kwomaron̄ kajjitōk ippān jejjo ro uwaan kūlaaj eo n̄an aer kajjojo itok pojak n̄an katak in juon jekjōn jān ennaan eo an Būreejtōn Dallin H. Oaks “Būrabōļ Eo Kōn Rijeor Ine Eo” (Liaona, Māe 2015, 32–35). Ta eo ennaan eo an ej kobaiktok n̄an meļeļe eo ad kōn būrabōļ eo?

Matu 13:24–35, 44–53

Būrabōļ eo an Jisōs ej jipan̄ kōj eddōkļo̧k eo, mejān kajjik eo, im aorōk eo an Kabun̄ eo An.

• Ekōjkan am̧ maron̄ jipan̄ ro uwaan kūlaaj eo meļeļe m̧ool ko kōn Kabun̄ in me raar katakin ilo būrabōļ ko an Jisōs ilo Matu 13? Kwomaron̄ kōllaajrake jejjo iaan būrabōļ ko ioon boot eo (lale unin tōl eo an wiik in ilo Itok, Ļoor Eō—N̄an Kajjojo Armej im Baam̧le ko im Teachings of Presidents of the Church: Joseph Smith [2007], 293–303). Ro uwaan kūlaaj eo remaron̄ ekkatak juon ak elōn̄ļo̧k būrabōļ ko er make ak ilo kumi ko reddik im kwaļo̧k ta eo rej ekkatak kōn eddōkļo̧k eo im mejān kajjik eo an Kabun̄ eo an Kraist.

Aelōn̄ in kiin̄ in lan̄ ej āinwōt juon ook an juon rieon̄ad.

• Ta eo jemaron̄ ekkatak kōn aorōk eo an uwaan Kabun̄ in jān būrabōļ ko an m̧weiuk eo ņoje ilo jikin kallūb eo im bōōr eo eļap wōņāān, loe ilo Matu 13:44–46? Jet uwaan kūlaaj eo am̧ (ak armej ro kwojeļā kajjier) remaron̄ kar kōm̧m̧ani kaarmejete ko—reļļap ak reddik—n̄an erom ro uwaan Kabun̄ in. Kajjitōk ippān ro uwaan kūlaaj eo n̄an kwaļo̧k kaarmejete ko raar kōm̧m̧ani ak kar lo ro jet kōm̧m̧ani n̄an aer maron̄ uwaan Kabun̄ in. Ta kōjeraam̧m̧an ko raar itok āinwōt juon tōprak? Kajjitōk ippān ro uwaan kūlaaj eo n̄an kejekļo̧kjeņ kōn ta eo rej im̧we n̄an kaarmejete n̄an Rilo̧mo̧o̧r eo.

Matu 13:24–30, 36–43

Ilo jem̧ļo̧kin laļ in, Irooj enaaj aintok ro rejim̧we im kakkure ro renana.

• Ekōjkan am̧ maron̄ jipan̄ ro uwaan kūlaaj eo bōk katak ko jān būrabōļ eo kōn wiit ko im tare ko me enaaj jipan̄ er pād wōt ilo aer Armej ro Rekwojarjar ilo Raan-ko Āliktatat retiljek? Jino kōn kajjitōk ippān juon uwaan kūlaaj eo n̄an ba ilo tukadu in būrabōļ eo im kōmeļeļe eo an. Ta jet iaan katak ko ilo būrabōļ in n̄an tōre in ad? Etke ej aorōk n̄an jeļā bwe Irooj ej kōtļo̧k an Rikwojarjar ro An “jim̧or eddek” (Matu 13:30) ippān nana m̧ae iien m̧adm̧ōd eo? Ekōjkan ad maron̄ dāpij wōt tōmak eo ad ilo Jisōs Kraist kajoor wōt n̄e nana ej pād ipeļaakid. Ekōjkan an Kraist jipan̄ kōj? Katak im Bujen Ko 86:1–7 im ennaan eo an Elder L. Tom Perry ilo “Kein Jipan̄ ko Jet” maron̄ letok kōļmenļo̧kjeņ ko jet n̄an kōjerbal būrabōļ in ilo raan ko āliktata.

Kein Jipan̄ ko Jet

Jej aikuj naajrik men eo em̧m̧an.

Elder L. Tom Perry ekar katakin: “Rikōjdāt in etto eo an armej otemjeļo̧k emōj an lo elōn̄ wāween ko emaron̄ lōmnaki n̄an kajeded tāō ko ettoļo̧k im depakpak. Emōj an loi wāween ko remaron̄ deblo̧ke ekwōjarjar eo an m̧ōko im̧ōd. Wāween ko renana im jān laļ in emōj aer kanuij ajeded āinwōt n̄e ejjeļo̧k juōn lukkuun ialan kōm̧akūtļo̧k er. Rej itok ilo wire im ilo mejatoto n̄an kein jerbal ko jekar kōmmani n̄an katakin im kam̧ōņōņōik kōj. Wiit ko im tāo ko emōj aer eddōk ippān doon. Eo ej lale jikin kallib in eaikuij, ilo aolepen an kajoor, najidik men eo em̧m̧an bwe en kajoor im woleo jon̄an tāō ko rejamin wōr aer maron̄ kareel māj ak lo̧jiln̄i” (“Kappukōt Aenōm̧m̧m̧an eo Eaetok Jetn̄aakin im Kalōk Baam̧le ko Ejjeļo̧k Jemļo̧kier,” Liaona, Nob. 2014, 44).

Kōkm̧anm̧anļo̧k Ad Katakin

Mije wōt katakin ko am̧ ikkijeen katak eo. Lukkuun lale bwe kōmeļeļe ko an kūlaaj eo am̧ en mije pedped in katak ko ilo jeje ko rekwojarjar. Kwomaron̄ kōm̧m̧ane menin kōn kajjitōk ippān rijikuuļ ro n̄an riiti eoon in jipan̄ ko an jeje ko rekwojarjar m̧oktaļo̧k, pedped e iien ekōnono ko an kūlaaj eo am̧ ioon jeje ko rekwojarjar, im kajjitōk ippān ro uwaan kūlaaj eo n̄an kwaļo̧k naan in kam̧ool ko aer kōn katak eo em̧ool. (Lale Teaching in the Savior’s Way, 20–21.)