M̧aaj 27–Eprōļ 2

Matu 14; Mark 6; Jon 5–6

“Kom̧win Jab Abwinmake”

Ilo am̧ m̧aanjabpopo n̄an katakin jān Matu 14; Mark 6; im Jon 5–6, kappukōt ennaan ko me rej jetjet n̄an kūlaaj eo am̧. Ilo am̧ kōm̧m̧ane, ļōmņak kōn ekōjkan kobaik ro uwaan kūlaaj eo ilo juon en̄jake eļap meļeļe in kōn jeje ko rekwojarjar.

Kajjitōk bwe ren Kwaļo̧k

Juon wāween n̄an jipan̄ juon iien ekōnono ej n̄an kajjitōk ippān jejjo ro uwaan kūlaaj eo n̄an kajjojo kāālet juon jepta jān kein riit eo im kwaļo̧k juon ennaan jān jepta jab eo me ekar ļap meļeļe in n̄an er. Ilo aer kwaļo̧ke, ro jet uwaan kūlaaj eo remaron̄ kajjitōk kajjitōk ko ak kobaitok kōļmenļo̧kjeņ ko.

Katakin Katak eo

Jon 5:16–47

Jisōs Kraist ej Jitōnbōro Nejin Jemedwōj Ilan̄.

• Ilo Jon 5, Jisōs ekar letok jet kōļmenļo̧kjeņ ko kōn E make, Jemen, im kadkad eo An n̄an Jemen. N̄an jipan̄ ro uwaan kūlaaj eo lo kōļmenļo̧kjeņ kein, kajjieon̄ ajije er n̄an kumi ko im leļo̧k n̄an er jejjo minit ko n̄an kōllaajrak jon̄an lōn̄ in wōt m̧ool ko ilo aer maron̄ loi ilo eoon 16–47 kōn bōnja eo an Anij im Jisōs Kraist im kōn kadkad eo Aer. Kajjitōk ippān kumi ko n̄an juon illo̧k juon riiti m̧ool ko jān laajrak ko aer. Ekōjkan an m̧ool kein jipan̄ kōj em̧m̧anļo̧k ad meļeļe kōn Jemedwōj Ilan̄ im Nejin? Ekōjkan ad maron̄ ļoor waanjon̄ak eo an Jisōs Kraist kōn pokake Jemen?

• Juon m̧akūtkūt ilo unin tōl eo an wiik in ilo Itok, Ļoor Eō—N̄an Kajjojo Armej im Baam̧le ko ej elmakote je aolep iien ko Jisōs ekar kōjerbal naan eo Jema ilo Jon 5:16–47. Kajjitōk ippān jejjo ro uwaan kūlaaj eo n̄an kwaļo̧k ta eo rekar ekkatak kake ilo aer kar kadedeļo̧k m̧akūtkūt eo. Kajjitōk ippāer n̄an kwaļo̧k kōļmenļo̧kjeņ ko raar būki kōn Jemedwōj Ilan̄ im Nejin Jitōnbōro.

Matu 14:15–21; Mark 6:33–44; Jon 6:5–14

Rilo̧mo̧o̧r eo emaron̄ kōļapļo̧k jortak ko ad rettā n̄an kōtōprak jibadbad ko An.

• Ta eo emaron̄ jipan̄ ro uwaan kūlaaj eo lo meļeļe eo aer make ilo kabwilōn̄lōn̄ eo kōn an Jisōs naajdik ļalem taujin? Kwomaron̄ kajjitōk ekōjkan an kein riit eo kōn kabwilōn̄lōn̄ eo kōļapļo̧k tōmak eo aer ilo keke mo̧o̧j eo an Rilo̧mo̧o̧r eo n̄an kōjeraam̧m̧an er make. Remaron̄ kōnono kōn juon iien raar en̄jake bwe Rilo̧mo̧o̧r eo ekar kōļapļo̧k ak kalōn̄ļo̧k kijejeto ko aer n̄an jipan̄ er kōtōprak juon me eaar āinwōt epen. Barāinwōt, m̧oktak jān kūlaaj, kwomaron̄ kajjitōk ippān ro uwaan kūlaaj eo n̄an bōktok juon pija ak men me ej jutak kōn en̄jake eo aer.

  

  Jisōs ekabwilōn̄lōn̄ an kar naajdik taujin armej ro kōn ļalem pilawā ļoob ko im ruo ek.

• Pija in alooj eo “The Feeding of the 5,000” (ChurchofJesusChrist.org) emaron̄ jipan̄ ro uwaan kūlaaj eo kejekļo̧kjeņ kōn kabwilōn̄lōn̄ eo kar kōmeļeļeik ilo ennaan kein. Ta ennaan ko ilo bwebwenato in ej kōļapļo̧k tōmak eo ad ilo Rilo̧mo̧o̧r eo? Ilo wāween ta Rilo̧mo̧o̧r eo emaron̄ naajdik kōj ilo jetōb? N̄aat eo kar naajdik kōj im kar rejtake jān Jisōs Kraist?

Matu 14:22–33

Jisōs Kraist ej kajjitōk ippād n̄an door ņai iturejet mijak ko ad im pere ko bwe jen maron̄ lukkuun itok n̄an E.

• Bwebwenato eo ilo Matu 14:22–33 emaron̄ jipan̄ ro uwaan kūlaaj eo kōļapļo̧k tōmak eo aer ilo Rilo̧mo̧o̧r eo im ikdeelel ko aer n̄an ļoor E. Kajjitōk ippān ro uwaan kūlaaj eo n̄an riiti bwebwenato in, kanooj leļo̧k an n̄an naan ko kar kōnono kaki jān Kraist, Piter, im Rijilōk ro jet. Ekōjkan an naan ko an Jisōs maron̄ kar jipan̄ Piter wōr an tōmak n̄an ilo̧k jān wa eo im etetal ioon dān? Ekōjkan an kean̄ eo an Jisōs n̄an “kwom̧in peran” im “kwom̧in jab mijak(abwinmake)” (eoon 27) ej jerbal n̄an kōj rainin? Ta eo jemaron̄ ekkatak jān Piter kōn ta meļeļe in n̄an juon rikaļoor an Jisōs Kraist im n̄an lōke E? Kwomaron̄ kōketak ro uwaan kūlaaj eo n̄an ļōmņak kōn im kwaļo̧k en̄jake ko me raar, āinwōt Piter, kar bōk n̄an ļoor Rilo̧mo̧o̧r eo, em̧ool jekdo̧o̧n n̄e ta eo ej waļo̧k jāne ekar jab jeļā kake. Kajjitōk ippāer n̄an kwaļo̧k ta eo raar ekkatak kake jān en̄jake ko. Ekōjkan an Jisōs Kraist kar itok n̄an lo̧mo̧o̧ren kōj ilo iien ko jaar mijak ak pere?

Jon 6:22–71

Āinwōt rikaļoor eo an Kraist, jej aikuj m̧ōņōņō n̄an tōmak im bōk m̧ool eo, jekdo̧o̧n n̄e epen n̄an kōm̧m̧ane.

• Iien ko ilo Jon 6 remaron̄ letok juon kōļmenļo̧kjeņ eo ejipan̄ n̄e armej ro ewōr aer kajjitōk ko kōn katak eo, bwebwenato eo, ak kakien ko an Kabun̄ eo an Kraist. N̄an jipan̄ ro uwaan kūlaaj eo meļeļe iien kein, kwomaron̄ je kajjitōk ko āinwōt kein ioon boot eo n̄an aer uwaaki: Ta eo armej ro raar kōtmene? (lale eoon 26). Ta eo Kraist ekar leļo̧k n̄an er ijello̧kin? (lale eoon 51). Ta eo elikjab an armej ro kar meļeļe? (lale eoon 41–42, 52). Kwomaron̄ barāinwōt kajjitōk kajjitōk ko āinwōt kein n̄an jipan̄ ro uwaan kūlaaj eo kōjerbal bwebwenato in n̄an mour ko aer: Ta jet iaan wāween ko jemaron̄ kāāleti n̄an etetal ippān Kraist jekdo̧o̧ņ n̄e ewōr kajjitōk ko ak pere ko? (lale eoon 66). Ta katak ko jet, kain̄i ko, ak “naan ko naan in mour indeeo” ko jet me maron̄ loi wōt ilo Kabun̄ eo kōjepļaaktok an Kraist? (lale eoon 67–69). Kōn kōļmenļo̧kjeņ ko jān juon Rijilōk ilo raan kein, lale ennaan eo an Būreejtōn M. Russell Ballard “Kōm Naaj Ilo̧k N̄an Wōn?,” (Liaona, Nob. 2016, 90–92).

Kōkōm̧anm̧anļo̧k Ad Katakin

Ron̄jake. “Ron̄jake ej juon jerbal in iakwe. … Kajjitōk ippān Jemedwōj Ilan̄ n̄an jipan̄ eok meļeļe ta eo ro uwaan kūlaaj eo am̧ rej ba. Ilo am̧ kanooj leļo̧k am̧ n̄an ennaan ko aer kar kōnono kaki ak jab kōnono kaki, kwonaaj itok n̄an an em̧m̧anļo̧k am̧ meļeļe aikuj ko aer, n̄ūrbōktak ko aer, im ikdeelel ko aer” (Teaching in the Savior’s Way, 34).