Itok eo Kein Karuo, jān Harry Anderson

Māe 22–28.

Josep Smith—Matu 1; Matu 24–25; Mark 12–13; Luk 21

“Nejin Armej Naaj Itok”

Keememej n̄an jino m̧aanjabpopo eo am̧ n̄an katakin kōn jar ilo riiti Josep Smith—Matu 1; Matu 24–25; Mark 12–13; im Luk 21. Pukōt im̧weo eo kōn kwe make, innām etale unin tōl in kōn elōn̄ļo̧k ļōmņak ko.

Kajjitōk bwe ren Kwaļo̧k

Kōm̧m̧ane juon laajrak ioon boot eo kōn būrabōļ ko an Rilo̧mo̧o̧r eo loi ilo kein riit eo an wiik in, ko āinwōt wōjke fig eo, em̧m̧aan eo em̧m̧an im riko̧o̧t eo, rijerbal ro retiljek im nana, bōjin ro jon̄oul, tōļan ko, im sip eo im koot ko. Ilo an ro uwaan kūlaaj eo kwaļo̧k m̧ool ko raar ekkatak jān būrabōļ kein me remaron̄ jipan̄ er m̧aanjabpopo n̄an Itok eo Kein Karuo an Irooj. Ta eo rej kōm̧m̧ane n̄an kōjerbal m̧ool kein n̄an mour ko aer.?

Katakin Katak eo

Josep Smith—Matu 1:21–37

Kanaan ko kōn Itok eo Kein Karuo an Rilo̧mo̧o̧r eo emaron̄ jipan̄ kōj jelm̧ae ilju jekļaj kōn tōmak.

• Kakōļļe ko kōn Itok eo Kein Karuo an Rilo̧mo̧o̧r eo emaron̄ in pen n̄an jet uwaan kūlaaj eo n̄an meļeļe. Emaron̄ in jipan̄ er n̄an jerbal ilo kumi ko im kile kakōļļe ko rej loi ilo Josep Smith—Matu 1:21–37. Emaron̄ in barāinwōt kōkōm̧anm̧anļo̧k aer meļeļe kōn aorōk eo an kakōļļe kein eļan̄n̄e rej keidi er n̄an kakōļļe ko an iaļ eo. Etke kakōļļe in iaļ ko raorōk? Ekōjkan an kakōļļe ko an Itok eo Kein Karuo āinwōt kakōļļe in iaļ ko? Ewi wāween aer oktak? Aaet kwomaron̄ leļo̧k n̄an kajjojo kumi ko m̧ōttan peba ko ilo jekjek in kakōļļe in iaļ ko im kajjitōk ippāer n̄an je ioon kajjojo peba juon kakōļļe me ej itok m̧okta jān Itok eo Kein Karuo. Kōm̧m̧an bwe ren kwaļo̧k ta eo raar loe, im kajjitōk ippān kūlaaj eo n̄an ekōnono kōn kein kam̧ool eo kōn kakōļļe kein ilo laļ in rainin.

Josep Smith—Matu 1:26–27, 38–55; Matu 25:1–13

Jej aikuj aolep iien pojak n̄an Itok eo Kein Karuo an Rilo̧mo̧o̧r eo.

• Būrabōļ eo ilo Josep Smith—Matu 1:26–27, 38–55 im Matu 25:1–13 emaron̄ jipan̄ ro uwaan kūlaaj eo kile aorōk eo an pojak n̄an Itok eo Kein Karuo. Kajjitōk ippān ro uwaan kūlaaj eo pukōt eoon kein im kwaļo̧k ta eo rej en̄jake an Rilo̧mo̧o̧r eo kajjitōk ippān n̄an kōm̧m̧ane. Elder David A. Bednar ekar letok juon ukok in būrabōļ eo kōn bōjin ro jon̄oul me emaron̄ jipan̄ (lale “Kein Jipan̄ ko Jet”). Etke kōj kajjojo jej aikuj in en̄jake oktak eo kōn kōj make? Ekōjkan ad kōm̧m̧ane menin? Ta eo Katak im Bujen Ko 45:56–57 ej kobaiktok n̄an meļeļe eo ad kōn būrabōļ in?

• Ilo ami ekkatak kōn bar ro̧o̧ltok eo an Rilo̧mo̧o̧r eo, kom̧ maron̄ riiti ak al ippān doon kōn al ko kōn Itok eo Kein Karuo (lale “Jesus Christ—Second Coming” ilo topical index eo ilo tulikin hymnbook eo).

Matu 25:14–16

Ilo Ekajet eo Āliktata, jenaaj leļo̧k n̄an Irooj juon bwebwenato in mour ko ad.

• Būrabōļ eo kōn tōļan ko im būrabōļ eo kōn sip ko im koot ko emaron̄ im̧we kōj n̄an ļōmņak kōn bwebwenato eo kōn mour ko ad jenaaj leļo̧k n̄an Irooj ilo Ekajet eo Āliktata. Kwomaron̄ riiti būrabōļ ko ippān doon im kajjitōk ippān kajjojo ro uwaan kūlaaj eo n̄an kwaļo̧k juon kajjitōk Rilo̧mo̧o̧r eo emaron̄ kajjitōk kake kōn mour ko ad n̄e jej ekajet. Leļo̧k iien n̄an ro uwaan kūlaaj eo karōk wāween ko renaaj jerbale im̧we ko raar būki ilo iien ekōnono eo.

  

  Kraist ekar kōjerbal sip ko im koot ko n̄an katakin kōn Ekajet eo Āliktata (lale Matu 25:31–33).

• N̄an kōjjerake juon iien ekōnono kōn Matu 25:34–40, kwomaron̄ kajjitōk ippān ro uwaan kūlaaj eo n̄an kwaļo̧k waanjon̄ak ko kōn armej ro me raar kwaļo̧k meanwōd eo kar kōmeļeļeik ilo eoon kein. Leļo̧k n̄an er iien n̄an kejekļo̧kjeņ kōn wōn eo emaron̄ aikuji jerbal in jipan̄ eo aer. Ta jet wāween ko iminene kaki jemaron̄ naajdik eo ekwōle, kanuknuk eo ekāālwa im loļo̧k eo enan̄inmej?

Kein Jipan̄ ko jet

Oil in oktak eo.

Elder David A. Bednar ekar elmakote ukok in emaron̄ in kar meļeļe in būrabōļ eo kōn bōjin ro jon̄oul:

“Ļōmņak bwe oil eo eaar āinwōt oil in oktak [lale Matu 25:4–9]. …

“Virgin ro ļalem raar ke kūbboņ im jab kōņaan ajej, ak raar ke kwaļo̧k ilo jim̧we bwe oil eo an oktak ejjab maron̄ barroik? Kajoor eo ilo jetōb emaron̄ me ej waļo̧k jān pokake eo ejjab oktak n̄an kien ko kar liļo̧k n̄an bar juon armej? Jeļāļo̧kjeņ eo bōke jān ekkatak ilo tiljek im kejōkļo̧kjeņ eo kōn jeje ko rekwojarjar leļo̧k n̄an juon eo ej aikuj? Aenōm̧m̧an eo ilo ko̧jpeļ eo emaron̄ ke bōktok n̄an juon Armej ro Rekwojarjar ilo Raan-ko Āliktata etiljek leļo̧k n̄an juon eo ej en̄jake eppen im apan̄ eļļap? Uwaak eo ealikkar n̄an kajjojo kajjitōk kein ej jaab.

“Ilo an virgin ro remeletlet kar kalikkar ilo jejjet, kajjojo iaad aikuj ‘wiaiki kōn kōj make.’ Kōrā rein reim̧we raar jab kōmeļeļeik juon jekjek in pejnej; ijello̧kin, raar kwaļo̧ke eddo eo an juon make n̄an dāpij ļaam̧ in naan in kam̧ool eo ad urur im n̄an bōk kein jipan̄ ko rōbwe an oil in oktak. Tōl in eaorōk ej aikuji juon pilin̄lin̄ ilo juon iien—‘lain im bar lain [im] kain̄i im bar kain̄i’ (2 Nipai 28:30), kijenmej im kije” (“Oktaktok n̄an Irooj,” Liaona, Nob. 2012, 109).

Kōkōm̧anm̧anļo̧k Ad Katakin

Lale bwe kwon katakin katak eo em̧ool. “Wōnm̧aanļo̧k wōt in kajjitōk ippam̧ make, ‘Ewi waween an ta eo ij katakin naaj jipan̄ ro uwaan kūlaaj eo aō kalōk tōmak ilo Kraist, ukweļo̧k, kōm̧m̧an im kōjparok bujen ko ippān Anij, im bōk Jetōb Kwojarjar eo?” (Teaching in the Savior’s Way, 20).