Jaden Jetsemane, pa Derek Hegsted

12–18 Jen.

Lik 22; Jan 18

“Se pa Volonte M ki pou Fèt, Se Volonte Pa Ou”

Panse ak sa w pral fè pou w envite Lespri nan klas ou a pandan w ap diskite evenman sakre nan chapit sa yo. Nan lapriyè, chèche fason pou ede manm klas yo apwofondi lanmou yo pou Sovè a ak lafwa yo nan li.

Envite Pataj

Envite plizyè manm klas pou di sa yo te santi lè yo t ap li semèn sa a ak ki vèsè ki te ede yo santi konsa.

Anseye Doktrin nan

Lik 22:39–46

Nou vin plis tankou Kris la lè nou chwazi pou nou soumèt volonte nou anba volonte Papa a.

• Egzanp Sovè a nan soumisyon l anba volonte Papa a ka ede manm klas ou yo lè yo bezwen fè menm bagay la tou. Pou kòmanse yon diskisyon, ou ta ka envite chak manm nan klas la pou yo pataje eksperyans kote yo te soumèt tèt yo devan yon bagay yo te konnen Bondye te vle yo fè. Mande yo pou yo eksplike kijan yo te konnen sa Bondye te vle yo fè a ak fason yo te beni poutèt yo te soumèt a vonlonte Li. Envite klas la pou yo li Lik 22:39–46 epi pale sou rezon ki fè Sovè a te vle soumèt volonte l anba volonte Papa li. Kijan nou ka suiv egzanp Sovè a?

• Anplis aksyon soumisyon Sovè a anvè Bondye nan Lik 22:42, ki lòt egzanp soumisyon Li nou jwenn nan Lik 22 ak Jan 18? Kijan Sovè a te soumèt a volonte Papa Li atravè lavi Li? Kisa nou ka fè pou nou vin plis tankou li? Deklarasyon Èldè Neal A. Maxwell nan “Resous Adisyonèl yo” ta dwe ede enspire manm klas yo pou yo panse sou fason yo kapab soumèt volonte yo anba volonte Bondye.

Lik 22:39–46

Jezikri te fè yon Ekspyasyon enfini pou nou.

• Lik 22:39–46 dekri sak te pase nan Jetsemane a. Pou ede manm klas yo konprann siyifikasyon pèsonèl evenman sakre sa a, petèt ou gen dwa ekri kesyon konsa sou tablo a Sak te pase nan Jetsemane? epi Poukisa sa enpòtan pou mwen? Manm klas yo gen dwa jwen repons yo nan Lik 22:39–46; Alma 7:11–13; Doktrin ak Alyans 19:16–19; ak videyo “Sovè a Soufri nan Jetsemane” (ChurchofJesusChrist.org). Yo gen dwa jwen repons tou nan mesaj Prezidan Tad R. Callister “Ekspyasyon Jezikri a” (Liahona, Me 2019, 85–87).

• Nan Liv Mòmon an, Jakob rele Ekspyasyon Jezikri a “yon ekspyasyon enfini” (2 Nefi 9:7). Pou ede manm klas yo konprann kisa sa vle di, ou gen dwa pataje ansèyman Prezidan Russell M. Nelson nan ki nan “Resous Adisyonèl yo” epi mande manm klas yo pou fè lis fason enfliyans sakrifis Sovè a ta ka konsidere kòm enfini. Yo gen dwa li ekriti sa yo tou epi ajoute sou lis yo a: Ebre 10:10; Alma 34:10–14; Doktrin ak Alyans 76:24; ak Moyiz 1:33. Kijan nou ka montre apresyasyon nou pou sa Sovè a fè pou nou?

Trayizon Pyè a, pa Carl Heinrich Bloch

Lik 22:54–62

Nou kapab rete fidèl a Jezikri malgre krent ak feblès nou yo.

• Pou ede manm klas yo imajine evenman nan Lik 22:54–62yo, ou gen dwa montre yon imaj, tankou Trayizon Pyè a (ChurchofJesusChrist.org), oubyen videyo “Jesus Is Tried by Caiaphas, Peter Denies Knowing Him (Kayif k ap jije Jezi, Pyè ki Nye ke l Konnen Li)” a nan (ChurchofJesusChrist.org). Manm klas yo gen dwa pataje sa yo aprann nan eksperyans Pyè a ki enspire yo pou yo rete fidèl a Jezikri.

Resous adisyonèl

Soumèt volonte nou anba volonte Papa a.

Èldè Neal A. Maxwell te anseye: “Lè nou soumèt volonte nou bay Bondye, nou ba Li sèl sa nou kapab vrèman ba li a, ki reyèlman pa nou pou nou bay la. Pa ret tann twòp pou w jwenn otèl la oubyen pou w kòmanse depoze don volonte w yo sou li!” (“Sonje kijan Senyè a te gen mizerikòd.” Liahona, Me 2004, 46).

Ekspyasyon enfini an.

Prezidan Russell M. Nelson te anseye:

“Ekspyasyon [Jezikri a] enfini—san yon fen. Li te enfini tou nan sans ke tout limanite t ap sove anba lamò san fen an. Li te enfini nan nan tèm gwo soufrans Kris la te pase yo. Li te enfini nan letan, paske l mete fen nan sakrifis animal presedan yo. Li te enfini nan pòte li—li te dwe fèt yon fwa pou tout. Epi mizèrikòd Ekspyasyon an disponib non sèlman pou yon kantite moun enfini, men pou yon kantite mond enfini ke l te kreye tou. Li te enfini odela tout fason lèzòm ka mezire e odela tout konpreyansyon imen.

Jezi sete sèl moun ki te ka ofri yon ekspyasyon enfini konsa, paske se yon manman mòtèl ak yon Papa imòtèl ki te fè li. Akoz dwa nesans san parèy sa a, Jezikri te yon Èt enfini” (“Ekspyasyon an,” Liahona, Nov. 1996, 35).

Amelyore Ansèyman Nou

Se pou ou yon enstriman enb nan men Lespri a. “Objektif ou antanke enstriktè se pa pou w fè yon prezantasyon enpresyonan men se pou w ede lòt moun santi enfliyans Sentespri a, ki se veritab enstriktè a” (Anseye nan fason Sovè a, 10).