Pran Swen Mouton M yo, pa Kamille Corry

26 Jen–4 Jiyè.

Matye 28; Mak 16; Lik 24; Jan 20–21

”Li Resisite”

Anvan w eksplore ide pou ansèyman ki nan plan leson sa a, li Matye 28; Mak 16; Lik 24; ak Jan 20–21, epi medite sou jan w ta kapab itilize chapit sa yo pou ranfòse lafwa moun w ap anseye yo.

Envite Pataj

Pou ede manm klas la pataje sa yo te aprann nan etid pèsonèl ak familyal yo, mande yo pou yo ekri yon verite ki soti nan lekti semèn sa a yo santi yo ta dwe pataje avèk “tout mond lan” (gade nan Mak 16:15). Nan fen klas la, mande yo si yo jwenn lòt verite yo ta renmen pataje.

Anseye Doktrin nan

Matye 28; Mak 16; Lik 24; Jan 20

Paske Jezikri te resisite, nou menm tou n ap resisite.

• Ou ta kapab bay manm klas la kèk minit pou yo revize asiyasyon lekti semèn nan ak “Rezirèksyon” nan Gid Ekriti yo epi pou yo ekri verite yo te aprann sou Rezirèksyon an. Fè manm klas la pataje sa yo te ekri yo, epi ankouraje yo pou yo leve men yo lè yo tande yon moun pataje yon verite ki sanble avèk sa yo te ekri yo. Èske verite sa a enpòtan pou nou? Kijan yo enfliyanse relasyon nou yo? Kijan yo enfliyanse chwa nou yo?

Lik 24:13–35

Nou ka envite Sove a pou L “rete avèk nou.”

• Pou ede manm klas la wè koneksyon ki genyen ant eksperyans pa yo avèk eksperyans disip yo sou wout Emayis la, desine yon wout sou tablo a, epi envite manm klas la pou yo ekri detay ki soti nan istwa ki nan Lik 24:13–35 la sou yon bò wout la. Apre sa, sou lòtbò wout la, yo ka ekri paralèl yo wè nan eksperyans pa yo kòm disip Jezikri. Pa egzanp, yo ta gen dwa ekri “Je yo pa t ka wè” (Lik 24:16) sou yon bò nan wout la ak Pafwa nou pa rekonèt enfliyans Senyè a nan lavi nou sou lòtbò a. Nou ka envite Sovè a pou l “rete avèk nou.”

Jekri te anseye Toma: “Ou pa dwe enkredil, men se pou w kwè” (Jan 20:27).

Jan 20:19–29

“Benediksyon pou moun ki pa wè, men ki kwè.”

• Pou man klas ou a Lekòldidimanch kapab yon kote youn ranfòse lafwa lòt nan bagay yo pa ka wè yo. Petèt ou ta ka kòmanse pandan w ap mande yon moun pou l rezime eksperyans Toma a nan Jan 20:19–29. Ou ta gen dwa pase videyo “Benediksyon pou moun ki pa wè, men ki kwè” a tou nan (ChurchofJesusChrist.org). Manm klas la ta gen dwa fè lis kèk bagay Bondye mande nou pou nou kwè san nou pa wè sou tablo a. Apre sa ou ta kapab mande yo pou yo pataje eksperyans ki te ranfòse temwayaj yo konsènan bagay sa yo ak benediiksyon ki te vin jwenn yo lè yo te egzèse lafwa.

Jan 21:1–17

Sovè a envite nou pou nou pran swen brebi L yo.

• Kisa k ta ka ede manm klas ou a pou yo aksepte envitasyon Sovè a pou yo “pran swen brebi [L] yo”? Pou kòmanse, ou ta gen dwa mande yo pou yo li Jan 21:15–17 an silans, pandan y ap ranplase non Simon an pa non pa yo epi “mouton m yo” ak “brebi m yo” pa non moun yo santi Senyè a ta renmen yo sèvi—pa egzanp, moun yo responsab pou aktivite pastoral yo, vwazen yo, oubyen moun yo konnen nan travay oubyen nan lekòl. Apre kèk minit, manm klas la ta ka pataje enpresyon yo te genyen. Kisa nou aprann sou Sovè apati de aksyon L yo nan Jan 21:4-13? Kisa sa nou ka fè pou nou pran swen mouton ak brebi Senyè a? Deklarasyon Èldè Gary E. Stevenson te fè nan “Resous Adisyonèl” yo ka ede nou reponn kesyon sa a.

Resous adisyonèl

Kijan nou ka “pran swen brebi [L] yo”?

Èldè Gary E. Stevenson te eksplike kijan nou ka obeyi kòmandman Senyè a pou nou pran swen brebi L yo:

“Kisa yon bèje ye? Chak gason, chak fi, ak chak timoun nan wayòm Bondye a se yon bèje. Sa pa mande yon apèl. Apati moman nou soti nan dlo batèm yo, nou anchaj travay sa a. Nou lonje lamen bay lòt avèk amou paske se sa Sovè nou an te kòmande nou pou nou fè. Kèlkeswa lè pwochen nou nan detrès tanporèlman oubyen espirityèlman, nou kouri al pote yo sekou. Nou youn pote fado lòt pou yo ka vin lejè. Nou kriye avèk moun ki ap kriye. Nou konsole moun ki bezwen konsolasyon [gade nan Mozya 18:8–9]. Se sa Senyè a ap tann nan men nou. Epi gen yon jou ki ap rive kote nou ap responsab pou swen nou bay lè nou fè aktivite pastoral pou twoupo L la [gade nan Matye 25:31–46]” (“Sèvi Kòm Bèje Nanm,” Lyawona, Nov. 2018, 111).

Amelyore Ansèyman Nou

Rezève tan pou manm klas la pataje. “Lè etidyan yo pataje sa y ap aprann, non sèlman yo santi Lespri a epi fòtifye temwayaj yo, men yo ankouraje lòt manm klas la pou yo dekouvri verite yo poukont yo tou. … Rezève tan pou etidyan yo fè pataj nan chak leson—nan kèk ka, ou ka vin wè ke diskisyon sa yo se leson an” (Anseye nan Fason Sovè a,30).