11–17 Septanm.

2 Korentyen 1–7

“Rekonsilye nou avèk Bondye“

Pandan w ap li 2 Korentyen 1–7 semèn sa a, panse avèk kèk manm klas byen spesifik—sa k vin nan klas yo ak sa k pa vini yo. Kijan prensip ki nan chapit sa yo ka beni yo?

Envite Pataj

Manm klas yo kapab benefisye nan tande ide yo chak sou fason pou yo rann etid ekriti yo pi efikas. Bay kèk minit pou sa detanzantan.

Anseye Doktrin nan

2 Korentyen 1:3–7; 4:6–10, 17–18; 7:4–7

Eprèv nou yo ka yon benediksyon.

• Eksperyans Pòl dekri yo ak konsèy li te bay nan 2 Korentyen yo ka ede yo panse sou benediksyon ki soti nan eprèv yo. Pou kòmanse yon diskisyon, ou gen dwa mande yon manm nan klas la pou l prepare l pou l pale sou kijan yon eprèv te beni lavi li oubyen sa l te aprann nan men yon lòt moun ki te travèse yon eprèv. Apresa, ou gen dwa envite manm klas yo pran kèlke minit pou repase 2 Korentyen 1:3–7; 4:6–10, 17–18; ak 7:4–7, pandan w ap chèche kida Pòl te anseye sou objektif ak benediksyon eprèv. Mande plizyè manm nan klas la pou yo pataje sa yo te jwenn. Ou ka sigjere pou yo li vèsè yo te jwenn yon ansèyman patikilye ladan l lan awotvwa epi apresa pataje yon eksperyans oubyen yon temwayaj anrapò avèk ansèyman sa a.

• Pou ajoute sou diskisyon w lan, panse pou fè manm klas yo chante ansanm kèk kantik yo renmen ki temwaye de rekonfò ak benediksyon Pè Selès la ak Sovè a ofri nou nan moman eprèv yo—tankou “Quel fondements fermes” (Cantiques, no. 85). Lè nou fin chante ansanm, ou gen dwa envite manm klas yo pou yo chèche yon fraz nan 2 Korentyen 1 ak 4 yo santi ki mache avèk mesaj ki nan kantik la.

2 Korentyen 2:5–11

Padon se yon benediksyon nou bay epi nou resevwa.

• Nou tout konn fè eksperyans kote yon moun “lakoz tristès” pou nou oubyen fanmi nou (verse 5). Petèt manm klas yo ta ka gade nan 2 Korentyen 2:5–11, pandan y ap chèche konsèy Pòl sou fason nou ta dwe trete yon moun ki ofanse nou. Panse envite manm klas yo pou revize Matye 5:43–48 ak Lik 15:11–32 pou yo aprann plis sou fason nou ta dwe trete moun ki ofanse nou. Kijan nou ka fè tèt nou oubyen lòt moun mal lè nou pa chwazi padone?

2 Korentyen 5:14–21

Gras ak Sakrifis Ekspyatwa Jezikri a, nou ka rekonsilye avèk Bondye.

• Anpil moun vin legliz avèk yon dezi pou yo santi yo pi pre Bondye, epi yon diskisyon sou 2 Korentyen 5:14–21 an kapab ede yo. Pou kòmanse, manm klas yo ka etidye siyifikasyon mo rekonsilyea, petèt nan kòmanse pa chèche mo a nan yon diksyonè. Ki eksplikasyon bagay sa a bay sou rekonsilye nou avèk Bondye? Ki eksplikasyon adisyonèl nou jwenn nan definisyon mo “Ekspyasyon” an nan Diksyonè Bib la? Kijan eksplikasyon sa yo ede nou konprann 2 Korentyen 5:14–21? Ou gen dwa envite manm klas yo pou yo pataje sa yo santi osijè Sovè a, ke Ekspyasyon l lan rann posib pou nou reyini avèk Bondye a.

2 Korentyen 7:8–11

Tristès selon Bondye mennen nan repantans.

• 2 Korentyen 7:8–11 bay yon eksplikasyon itil sou tristès selon Bondye ak wòl li nan repantans. Kisa nou aprann sou tristès selon Bondye nan 2Korentyen 7:8–11 ak nan pawòl Prezidan DieterF. Uchtdorf nan seksyon “Resous adisyonèl” la? Poukisa tristès selon Bondye esansyèl pou repantans?

• Ou gen dwa santi w pouse pou w ankouraje pi plis diskisyon sou repantans. Si se konsa, ou gen dwa eseye yon bagay konsa: Ekri sou tablo a Repantans se . Mande manm klas yo pou yo chèche fason pou konplete fraz sa a, kote y ap itilize sa yo aprann nan 2 Korentyen 7:8–11yo, menmjan ak nan ekriti yo ak lòt resous yo jwenn nan atik sou Sijè Levanjil la “Repantans” (topics.ChurchofJesusChrist.org). Kijan nou ta ka itilize ansèyman sa yo pou ede yon moun konprann kijan pou l repanti sensèman?

Resous adisyonèl

Tristès selon Bondye pote chanjman ak lespwa.

Prezidan Dieter F. Uchtdorf te eksplike:

“Tristès selon Bondye enspire chanjman ak lespwa atravè Ekspyasyon Jezikri a. Tristès selon mond lan rabese nou, li elimine lespwa e pèsyade nou pou n sede anba pi plis tantasyon.

“Tristès selon Bondye mennen nan konvèsyon ak yon chanjman kè. Li fè nou rayi peche e renmen bagay ki byen. Li ankouraje nou pou n kanpe pou n mache nan limyè lanmou Kris la. Vrè repantans se konsènan transfòmasyon, non pa tòti ni touman” (Ou Ka Fè L Kounyea!,” Liahona, Nov. 2013, 56).

Amelyore Ansèyman Nou

Entegre moun ki gen difikilte yo. Pafwa gen manm klas la k ap lite ki jis bezwen santi yo entegre epi nou renmen yo. Panse pou w ba yo tach pou yo patisipe nan yon pwochenn leson. Pa dekouraje si yo pa reponn tousuit malgre efò w yo. (Gade nan Anseye nan Fason Sovè a, 8–9.)