16–22 Oktòb

1 ak 2 Tesalonisyen

“Pèfeksyone Sa ki Manke nan Lafwa Ou”

Alma te anseye: “Pa mete konfyans nan pèsonn pou vin enstriktè nou ak pastè nou eksepte si l se yon moun Bondye, ki mache nan chemen li e ki respekte kòmandman l yo” (Mozya 23:14). Kisa ekriti yo sigjere sou fason nou dwe prepare tèt nou pou n anseye?

Envite Pataj

Bay manm klas la kèk minit pou yo repase byen vit 1 ak 2 Tesalonik pou yo ka jwenn yon vèsè ki enpresyone yo. Envite yo pou yo pataje vèsè yo avèk yon lòt moun nan klas la, epi apresa mande kèk ladan yo pou pataje sa youn te aprann nan men lòt.

Anseye Doktrin nan

1 Tesalonisyen 1:5–8; 2:1–13

Sèvitè Senyè a yo ta dwe preche avèk senserite ak lanmou.

• Pòl te kòmanse Epit li te voye bay Tesalonisyen yo nan raple Sen yo ki fason limenm ak lòt moun yo te pataje levanjil la avèk yo. Sa ka yon bon opòtinite pou manm klas ou yo evalye kijan y ap pou youn anseye ak aprann lòt. Ou gen dwa envite manm klas la pou yo li 1 Tesalonisyen 1:5–8; 2:1–13 epi idantifye prensip ki anrapò avèk pataje levanjil la efikasman yo. Apresa yo gen dwa ekri kesyon ki baze sou vèsè sa yo k ap ede yo evalye efò yo pou anseye lòt moun levanjil la. Paregzanp, youn nan kesyon sa yo se ka “èske m se egzanp bagay m konnen yo?” gade 1 Tesalonisyen 1:7). Kijan suiv prensip nan pasaj sa a ka ede nou pi byen sèvi moun n ap anseye yo?

1 Tesalonisyen 3:9–13; 4:1–12

Lè nou suiv Jezikri, Li ka fè nou vin sen.

• Pòl te anseye Tesalonisyen yo ke “Bondye pa aple nou pou nou ale nan enpite, men pou nou rive nan sanktifikasyon” (1 Tesalonisyen 4:7 Pou kòmanse yon diskisyon sou sentete, klas ou a oubyen yon moun ladan l ka chante “Ah, donne-moi, Père” (Cantiques, no. 70). Mande manm klas la pou yo diskite sou karakteristik sentete yo mansyone nan kanti la ki atire atansyon yo. Ekri sou tablo a Ah, donne-moi, Père, plus … ,epi envite manm klas la pou yo chèche mo ak fraz nan 1 Tesalonisyen 3:9–13; 4:1–12 pou yo ka konplete fraz la. Kijan nou ka devlope karakteristik sa yo?

• Envitasyon pou nou vin sen an ka sanble l entimidan. Sa ka ede si manm klas la ta konprann ke devlope sentete se yon pwosesis gradyèl ki mande pou nou “pwogrese plis an plis” avèk letan (1 Tesalonisyen 4:10). Pou ilistre pwosesis sa a, ou gen dwa envite youn nan manm klas yo pou l pale de yon talan oubyen yon akonplisman ki te mande efò konsistan avèk letan, tankou fè yon kra bwode oubyen jwe yon enstriman mizikal. Nan ki fason pwosesis sa a sanble ak pwosesis pou nou vin sen an? Mande yo pou yo repase 1 Tesalonisyen 3:9–13; 4:1–12 la epi pou yo pataje ide yo jwenn sou efò sa mande pou n vin sen nan fason Pòl dekri a. Kisa k ede nou pwogrese al nan sentete?

1 Tesalonisyen 4:11–12; 2 Tesalonisyen 3:7–13

Nou dwe travay pou n okipe tèt nou ak moun ki nan bezwen.

• Kesyon tankou sa yo ka enspire yon diskisyon sou konsèy Pòl bay konsènan travay la: ki konsekans laparès genyen? Ki benediksyon ki genyen nan travay? Kisa w panse Pòl te vledi lè l te itilize mo “trankil” ak “pezib” la? (1 Tesalonisyen 4:11; 2 Tesalonisyen 3:12). Ou gen dwa vle ekri kesyon konsa sou tablo a pou manm klas la ka medite ak diskite pandan y ap li 1 Tesalonisyen 4:11–12 ak 2 Tesalonisyen 3:7–13. Ki lòt ekriti ki ede nou konprann enpòtans travay ak danje ki gen nan chomaj? (gade sigjesyon nan “Resous Adisyonèl yo”).

2 Tesalonisyen 2

Yon apostazi te fèt anvan Dezyèm Vini Jezikri a.

• Li ta bon pou n diskite sou kèk nan metafò pwofèt yo te itilize pou dekri Apostazi a, tankou yon chit (gade 2 Tesalonisyen 2:3), yon grangou (gade Amòs 8:11–12), lou kriyèl k ap antre nan yon twoupo (gade Travay 20:28–30), ak zòrèy grate (gade 2 Timote 4:3–4). Panse pou w divize manm klas la de pa de epi mande yo pou yo li youn oubyen plis nan ekriti sa yo (oubyen lòt ou chwazi) epi dekri sa vèsè yo anseye sou Gran Apostazi a. Kisa pwofèt yo anseye sou Apostazi a ak ki konsekans li t ap genyen?

• Byenke Legliz la pap fè eksperyans yon lòt “chit” (2 Tesalonisyen 2:3) menmjan l te fè lontan an, nou kapab toujou chite endividyèlman. Kisa 2 Tesalonisyen 2 sigjere fason chit sa a ka rive (gade vèsè 9–10) ak fason nou ka evite l? (gade vèsè 15–17).

Resous adisyonèl

Ekriti osijè travay ak laparès.

• Jenèz 3:19

• Matye 21:28–32

• Mozya 2:10–16

• Doktrin ak Alyans 42:42; 58:27; 60:13; 75:29

Amelyore ansèyman nou

Itilize plizyè metòd ansèyman. Sa ka souvan fasil pou w santi w konfòtab avèk yon stil ansèyman patikilye, men diferant metòd ansèyman ap pèmèt ou atenn diferant manm nan klas la. Chèche fason pou w varye apwòch ansèyman w yo, tankou itilize videyo, ilistrasyon, oswa mizik oubyen bay manm klas la opòtinite pou yo anseye (gade Anseye nan fason Sovè a, 22).