Melchizedek Blesses Abram [Tāpuakiʻi ʻe Melekisēteki ʻa ʻĒpalamé], tā fakatātaaʻi ʻe Walter Rane. Meʻa-foaki ʻo e tangata tā fakatātaá

6–12 Nōvema.

Hepelū 7–13

“Ko e Taulaʻeiki Lahi ʻo e Ngaahi Meʻa Lelei ʻe Hokó”

ʻI hoʻo lau ʻa e Hepelū 7–13, fakalaulauloto pe ko e hā e pōpoaki ʻa e ʻEikí ki he Kāingalotu Hepeluú. Kumi foki mo ʻEne ngaahi pōpoaki kiate koe mo e kakai ʻokú ke akoʻí.

Fakaafeʻi e Feʻinasiʻakí

Kimuʻa pea kamata e kalasí, fakaafeʻi ha kau mēmipa ʻe niʻihi ʻo e kalasí ke nau omi mateuteu ke vahevahe ha ngaahi veesi mei he Hepelū 7–13 ʻoku tokoni kiate kinautolu ke nau “ʻunuʻunu atu [ki he ʻOtuá] ʻi he loto-moʻoni mo e ʻamanaki mālohi ʻo e tuí” (Hepelū 10:22).

Akoʻi ʻa e Tokāteliné

Hepelū 7–10

ʻOku tuhu ʻa e ngaahi ouau ʻo onoʻaho mo onopōní kia Sīsū Kalaisi.

• ʻOku fokotuʻu mai ʻe he fokotuʻutuʻu ʻo e uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí ke fakatotolo ʻi he Hepelū 7 ki ha ngaahi potufolofola ʻoku akoʻi fekauʻaki mo e Lakanga Taulaʻeiki Faka-Melekisētekí mo fakamoʻoni kia Sīsū Kalaisi. Fakaafeʻi e kau mēmipa ʻo e kalasí ke nau vahevahe ʻa e meʻa ne nau maʻú. Pe te ke ʻoange ha taimi kiate kinautolu ʻi he kalasí ke nau toe vakai ai ki he vahe 7 mo kumi ha ngaahi veesi ʻokú ne akoʻi ʻa e lakanga fakataulaʻeiki koʻení mo fakamoʻoni ki he Fakamoʻuí. Naʻe tatau fēfē ʻa Melekisēteki mo Sīsū Kalaisi? (vakai, ngaahi hingoa ʻo Melekisētekí ʻi he veesi 1–2). ʻOku tokoni fēfē e ngaahi ouau ʻo e Lakanga Taulaʻeiki Faka-Melekisētekí ke tau haʻu kia Kalaisí? Mahalo naʻa lava ke kumi ʻe he kau mēmipa ʻo e kalasí ha ngaahi tali ʻi he Ngaahi Tefito ʻo e Ongoongoleleí, “Lakanga Taulaʻeiki Faka-Melekisētekí” (topics.ChurchofJesusChrist.org).

• Neongo ʻoku ʻikai ke tau faifeilaulau ʻaki e fanga monumanú, ka ʻoku tau kau ʻi ha ngaahi ouau ʻi he ʻahó ni, ʻokú ne tataki e ngaahi laumālié kia Kalaisi mo ʻomi ha “ngaahi founga kuo fakamafaiʻi ke tafe mai ai e ngaahi tāpuaki mo e mālohi ʻo e langí ki heʻetau moʻui fakafoʻituituí” (David A. Bednar, “Tauhi Maʻu Ai Pē ha Fakamolemole ʻo Hoʻomou Ngaahi Angahalá,” Liahona, Mē 2016, 60). Mahalo te mou lava ʻo vakaiʻi fakataha e founga naʻe fakataipe ai ʻe he ngaahi ouau ʻo e kuonga muʻá ʻoku fakamatalaʻi ʻi he Hepelū 8–10 ki he feilaulau fakalelei ʻa e Fakamoʻuí. Hangē ko ʻení, ko e hā ʻoku fakafofongaʻi ʻe he toto ʻo e fanga pulú mo e fanga kosí? (vakai, Hepelū 9:13–14). Ko hai ʻoku fakafofongaʻi ʻe he taulaʻeiki lahí? (vakai, Hepelū 9:24–26).   Kuo tāpuekina fēfē kitautolu ʻe he ngaahi ouau ʻo onopōní mo tokoni ʻo fakahinohino kitautolu kia Sīsū Kalaisí? Ko e hā te tau lava ʻo fai ke toe ʻuhingamālie ange ai e ngaahi ouau ko ʻení mo nofotaha ʻi he Fakamoʻuí?

Hepelū 10:34–38; 11

ʻOku fie maʻu ʻe he tuí ʻa e falala ki he ngaahi talaʻofa ʻa e ʻOtuá.

• Ke tokoni ke mahino ki he kau mēmipa ʻo e kalasí e ngaahi akonaki ʻa Paula fekauʻaki mo e tuí, te ke lava ʻo kamata ʻaki haʻo kole ange ke nau fakakaukau ki ha founga te nau fakamatalaʻi ai ʻa e tuí ʻi ha foʻi sētesi pē ʻe taha. Hili ia, pea mou lau mo aleaʻi fakakalasi ʻa e fakaʻuhinga naʻe fai ʻe Paula ʻi he Hepelū 11:1. Hili ia peá ke toki vahe ʻa e tokotaha takitaha ke nau fili ha taha ʻo e kakai ʻoku fakamatalaʻi ʻi he Hepelū 11 ke nau ako. ʻE lava ke fakaʻaongaʻi ʻe he kau mēmipa ʻo e kalasí ʻa e Fakahinohino ki he Ngaahi Folofolá (scriptures.ChurchofJesusChrist.org) ke toe vakai ki he ngaahi aʻusia ʻa e tokotaha ʻi he Fuakava Motuʻá pea toki vahevahe mo e kalasí ʻa e meʻa ne nau maʻú. Naʻe fakahaaʻi fēfē ʻe he kakai ko ʻení ne nau ongoʻi ha “fakapapauʻi … ʻo e ngaahi meʻa ʻoku ʻamanaki ki aí”? (Liliu ʻe Siosefa Sāmita, Hepelū 11:1). Mahalo naʻa lava ke vahevahe ʻe he kau mēmipa ʻo e kalasí ha ngaahi sīpinga kehe ʻo ha kakai faivelenga. Ko e fē ha taimi kuo tau tui ai ki ha ngaahi talaʻofa ʻoku teʻeki ai fakahoko?

• ʻE lava ke mahuʻinga ki he kau mēmipa ʻo e kalasí ʻa ia ʻoku nau ngali fefaʻuhi mo ʻenau ngaahi fakamoʻoní, ʻa e faleʻi ki he Kāingalotu Hepelū naʻe fakataueleʻi ke nau “fakaholomui” mei heʻenau tuí. ʻE ala tokoni foki kiate kinautolu ʻoku feinga ke tokoni ki ha ngaahi ʻofaʻanga ʻoku tuʻu fakatuʻutāmaki ʻenau tuí. Ke ʻiloʻi ʻa e faleʻi ko ʻení, ʻe lava ke lau ʻe he kau mēmipa ʻo e kalasí ʻa e Hepelū 10:34–38 mo e fakamatala ʻa ʻEletā Sefilī R. Hōlani ʻi he “Ngaahi Maʻuʻanga Tokoni Kehé.” Ko e hā ʻoku ʻahiʻahiʻi ai kitautolu he taimi ʻe niʻihi ke tau siʻaki ʻetau tui (vakai, Hepelū 10:35 ki he ʻEikí mo ʻEne ongoongoleleí? Ko e hā te tau lava ʻo fai ke langa mo pukepuke ʻetau tui mo e loto-falala ke “maʻu ʻa e talaʻofa [ʻa e ʻOtuá]”? (Hepelū 10:36).  

Ngaahi Maʻuʻanga Tokoni Kehé

“Ke ʻoua naʻa siʻaki hoʻomou tuí.”

Naʻe akoʻi ʻe ʻEletā Sefilī R. Hōlani, fekauʻaki mo e Hepelū 10:32–39:

“ʻIo ʻoku faingataʻa—kimuʻa peá ke kau ki he Siasí, lolotonga hoʻo feinga ke kau ki aí, mo e hili hoʻo kau ki aí. ʻOku pehē ʻe Paula, kuo pehē maʻu pē ʻa e foungá, kae ʻoua ʻe holomui. ʻOua ʻe loto-hohaʻa pea holomuí. ʻOua ʻe mole hoʻo loto-falalá. ʻOua naʻa ngalo e anga hoʻo ongoʻí. ʻOua naʻa taʻe-falala ki he aʻusia naʻá ke maʻú. …

“ʻI ha faʻahinga fili mahuʻinga pē, ʻoku ʻi ai ha ngaahi fakatokanga mo e meʻa ke fakakaukauʻi, ka ʻi he hoko pē hano fakamaama, tokanga telia ʻa e ʻahiʻahi ko ia ke holomui mei ha meʻa ʻoku leleí. Kapau naʻe tonu ʻi he taimi naʻá ke lotua ai mo falala pea mo moʻui ke ke maʻu iá, ʻoku tonu ia ʻi he taimí ni. ʻOua ʻe foʻi ʻi he taulōfuʻu ʻa e faingataʻá. … Fehangahangai mo e ngaahi meʻa ʻokú ke veiveiua aí. Mapuleʻi hoʻo manavasiʻí. ʻKe ʻoua naʻa siʻaki hoʻomou tuí.’ Nofo maʻu ʻi he hala fonongá pea mamata ki he fakaʻofoʻofa ʻo e moʻui ʻe hoko mai kiate koé” (“Cast Not Away Therefore Your Confidence,” Ensign, Mar. 2000, 8–9).

Ko Hono Fakatupulaki ʻEtau Founga Akoʻí

ʻUluaki vakai ki he folofolá. ʻOku totonu ke hoko ʻa e folofolá ko e tefitoʻi maʻuʻanga tokoni ia ki hoʻo akó mo hoʻo teuteú. ʻE lava ke fakamahino ʻe he ngaahi lea ʻa e kau palōfita ʻo e onopōní ʻa e ngaahi folofola ʻoku fakaʻaongaʻi ʻe he Siasí (vakai, Ko e Faiako ‘i he Founga ‘a e Fakamoʻuí, 17).