Iakwe Eweppān, jān Del Parson

Nobōm̧ba 27–Tijem̧ba 3

1–3 Jon; Jude

“Anij Ej Iakwe”

Ta unin tōl ko im pedped in katak ko rej make wōt n̄an kwe ilo am̧ riiti 1–3 Jon im Jude? Ekōjkan am̧ maron̄ kōjerbali n̄an jipan̄ ro uwaan kūlaaj eo am̧?

Kajjitōk bwe ren Kwaļo̧k

Kajjitōk ippān jejjo uwaan kūlaaj eo n̄an kwaļo̧k unin tōl ko ak m̧ool ko remakeļo̧k me rem̧m̧an tata ippāer ilo aer kar ekkatak Leta ko an Jon im Juda. Ta ennaan ko jān leta kein raar lukkuun jetjet tata n̄an er im baam̧le ko aer?

Katakin Katak eo

1 Jon 1:5–10; 2:3–11; 3:1–3; 4:7–21; 5:1–3

Jemedwōj Ilan̄ im Jisōs Kraist rej waanjon̄ak ko rōweppān tata an meram im iakwe.

• Ekōjkan am̧ maron̄ jipan̄ ro kwoj katakin er kile meram eo im iakwe eo an Anij ilo mour ko aer? Kwomaron̄ jino kōn je naan ko meram im iakwe ioon boot eo. Kajjitōk ippān ro uwaan kūlaaj eo n̄an kwaļo̧k naan ko jet me rejiktok ilo kōļmenļo̧kjeņ n̄e rej ļōmņak kōn naan kein ruo. Innām kajjojo uwaan kūlaaj eo remaron̄ ekkatak juon iaan eoon in jeje in rekwojarjar, kappuōt juon men eo eoon ko rej katakin kake kōn meram ak iakwe: 1 Jon 1:5–10; 2:3–11; 3:1–3; 4:7–12; 4:16–21; 5:1–3. Kajjitōk ippān jet iaer n̄an kwaļo̧ke ippān kūlaaj eo ta eo rekar loe. Kwomaron̄ barāinwōt kajjitōk ippān ro uwaan kūlaaj eo n̄an kwaļo̧k en̄jake ko ilo iien eo raar en̄jake meram im iakwe eo an Anij.

• Kwomaron̄ kajjitōk ippān ro uwaan kūlaaj eo n̄an reilo̧k n̄an juon tōm̧a in jiļiin̄ eo ak meram eo ej itok ilo juon wintō im kwaļo̧k ta eo rejeļā kōn meram eo. Ekōjkan an meram eo āinwōt meram eo ilo jetōb? Ro uwaan kūlaaj eo remaron̄ ekkatak eoon kein n̄an loe elōn̄ļo̧k kōļmenļo̧kjeņ ko kōn ekōjkan an Anij im Nejin letok meram ilo mour ko ad Sam Ko 27:1; Jon 1:4–5; 1 John 1:5–7; 3 Nipai 11:11; Katak im Bujen Ko 88:6–13; im juon al kōn meram, eo āinwōt “The Lord Is My Light” (Hymns, nō. 89). Ro uwaan kūlaaj eo remaron̄ barāinwōt kwaļo̧k en̄jake ko kōn kappukōt im bōk meram eo ilo jetōb ilo mour ko aer.

1 Jon 2:18–28; 4:3; 2 Jon 1:7–11; 3 Jon 1:9–11; Jude

Jej aikuj “[ļoor] katak eo an Kraist.”

• Katak ko an Jon im Juda kōn bun̄ jān tōmak eo remaron̄ jipan̄ ro uwaan kūlaaj eo ļōmņak kōn ekōjkan aer kōkajoor wōt tōmak eo aer ilo Jisōs Kraist. Ļōmņak in kajjitōk ippān jimettan in kūlaaj eo n̄an kappukōt kōmeļeļe ko kōn katak ko rebōd ak bun̄ jān tōmak eo ilo 1 Jon 2:18–23, 26–28; 4:3; 2 Jon 1:7–11; 3 Jon 1:9–11 im jimettan eo juon n̄an kappukōt kain kōmeļeļe kein wōt ilo Jude. Ak remaron̄ pukōt uwaak ko n̄an kajjitōk ko āinwōt kein: Ekōjkan an Jon im Jude kōmeļeļeik juon rijum̧ae-Kraist? (lale barāinwōt Unin Tōl N̄an Jeje Ko Rekwōjarjar, “Rijum̧ae Kraist,” scriptures.ChurchofJesusChrist.org). Ebar wōr ke jabdewōt ilo eoon kein me rej āinwōt eļap tata aer jetjet n̄an kapan̄pan̄ ko jej jelm̧ai rainin? Ta meļeļe in n̄an “[ļoor] katak eo an Kraist”? (1 Jon 1:9).

• Jude ej kōjerbal pija eo ekaitoktok limo n̄an kōmeļeļeik rūkaki ro rebōd, ak ro me rej “kōnono nana kōn men ko me rejjab jeļā” (Jude 1:10). Kwomaron̄ kajjitōk ippān jejjo ro uwaan kūlaaj eo n̄an jin̄a ioon boot eo jet iaan pija ko kar kōmeļeļeik ilo Jude 1:12–13 ilo an ro jet uwaan kūlaaj eo kajidedeik ewi wōt eoon eo armej eo ej jin̄aik. Ekōjkan an pija kein jutak kōn rūkaki ro rebōd im rijum̧ae-Kraist ro? N̄an waanjon̄ak, ekōjkan an jerbal ko renana ejaki “ejm̧aan ko [ad] ilo kwojkwoj in yokwe ko”? Ta eo jemaron̄ kōm̧m̧ane n̄an kake n̄an kōj make ņae “ri kajjirere”? (lale Jude 1:18–21). Etke Jude emaron̄ in kar elmakote bwe en wōr ippād “ tūriaṃokake” (Jude 1:22) ioon ro me rej kajirere kōn gospel eo?

“Ejjeļok lan̄lōn̄ ippa eļap jān in, bwe in ron̄ kōn an ro nejiō etetal ilo m̧ool” (3 Jon 1:4).

3 Jon 1:1–4

Lan̄lōn̄ eo ej itok ilo ad jipan̄ ro jet “etetal ilo m̧ool.”

• Ewōr bōlen armej ilo kūlaaj eo am̧ emaron̄ in keidi ta eo Jon ekar en̄jake ke ekar ba bwe ekar wōr ippān “ejjeļo̧k lan̄lōn̄ eļap” jān ron̄ bwe Gaius (juon iaan ajri ro nejin”) ekar etetal ilo m̧ool. Ro uwaan kūlaaj eo remaron̄ jeraam̧m̧an jān ron̄jake en̄jake ko an doon. Bōlen kom̧ maron̄ jino kōn riiti ippān doon 3 Jon 1:1–4 im ilo eoon in jeje ko rekwojarjar ilo “Kein Jipan̄ ko Jet.” Ta eo eoon in jeje ko rekwojarjar rej katakin kōn̄ unjen lan̄lōn̄ eo em̧ool? Ro uwaan kūlaaj eo remaron̄ kōnono kōn ekōjkan aer kar en̄jake āinwōt ro jinen im jemen, mijenede ro, ritōl ro an Kabun̄ in, ak rūkaki ro ilo iien eo raar jeļā bwe armej ro raar katakin er raar etetal ilo m̧ool. Kwomaron̄ kepaak jejjo ro uwaan kūlaaj eo m̧okta jān kūlaaj im kajjitōk ippāer n̄an bōktok pija ko pija in armej ro raar jipan̄ bōktok er n̄an Kraist im kōnono kōn en̄jake ko aer.

Kein Jipan̄ ko jet

Jeje ko rekwojarjar rej kōn jipan̄ ro jet etetal ilo m̧ool.

• Duteronomi 6:6–7

• Jabōn Kōnnaan ko 22:6

• Jon 4:36

• 1 Tessalonika 3:9

• Mosaia 4:14–15

• Alma 17:1–2; 26:11–37

• Katak im Bujen Ko 18:10–16; 50:22

Kōkm̧anm̧anļo̧k Ad Katakin

Jar kōn ro uwaan kūlaaj eo am̧. Ejja āinwōt an Rilo̧mo̧o̧r eo kar jar kōn Piter (lale Luk 22:32), kwoj aikuj jar kōn etan ro kwoj katakin er, pukōt n̄an meļeļe aikuj ko aer rein juon. Ilo am̧ kōm̧m̧ane āindein, Jemedwōj Ilan̄ enaaj “kōpooj burueer” (Alma 16:16) im jipan̄ eok jeļā ta eo kwoj katakin n̄an am̧ maron̄ tōpar aikuj ko aer (lale Teaching in the Savior’s Way, 6).