Pija eo kōm̧m̧an jān Eric Johnson: The Grand Council, jān Robert T. Barrett; star cluster jipan̄ jān European Space Agency

Tijem̧ba 11–17

Revelesōn 6–14

“Raar Bōk Anjo̧ … kōn Bōtōktōkin Lamb eo”

Josep Smith ekar ba bwe bok in Revelesōņ “ej juon iaan bok ko reļem waan tata Anij ekar kōm̧m̧an bwe ren jeje” (ilo Journal, December 1842–June 1844; Book 2, 10 March 1843–14 July 1843, 98, JosephSmithPapers.org). Ekōjkan am̧ maron̄ jipan̄ ro uwaan kūlaaj eo lo m̧ool ko reļam waan ilo jepta kein?

Kajjitōk bwe ren Kwaļo̧k

N̄an jipan̄ ro uwaan kūlaaj eo etale jet iaan kōļmenļo̧kjeņ ko ewōr ippāer ilo aer ekkatak Revelesōn 6–14, je nōm̧ba ko 6 n̄an 14 ioon boot eo. Ro uwaan kūlaaj eo remaron̄ je turinļo̧k juon nōm̧ba jabdewōt kōļmenļo̧kjeņ ko rej loi ilo jepta ko rej uwaake me rej jetjet n̄an juon eo ej mour ilo raan ko āliktata.

Katakin Katak eo

Revelesōn 6

Jisōs Kraist ej kōpeļļo̧k jiiļ ko an bok eo.

• N̄an jipan̄ ro uwaan kūlaaj eo pijaikļo̧k bok eo kōn jiiļ ko jijlimjuon (lale Revelesōn 5:1), kwomaron̄ kōmeļeļeik bwe bok lemlem ko etto emakijkij kar kōn jiļi er kōn jidik clay ak wax. Juon riin̄ ak juon jitaam̧ ekōn jipedeļo̧k n̄an ioon clay eo ak wax eo m̧okta jān an pen, kwaļo̧k maron̄ eo an armej eo me ekar jiļi bok lemlem eo im jab rōjan̄ armej ro ejjeļo̧k aer maron̄ jān aer kōpeļļo̧ke. Innām ro uwaan kūlaaj eo remaron̄ kwaļo̧k jabdewōt ļōmņak ko ak im̧weo ko raar būki ilo aer kar riit kōn bok in ilo Revelesōn 6; Katak im Bujen Ko 77:6–7; im unin kōnono eo an wiik in ilo Itok, Ļoor Eō—N̄an Kajjojo Armej im Baam̧le ko. Etke kwoj ļōmņak ej aorōk n̄an jeļā kōn meļeļe in kakōļļe eo an bok in? Etke kwoj ļōmņak ej aorōk n̄an jeļā bwe Rilo̧mo̧o̧r eo ej juon eo n̄an kōpeļļo̧k kajjojo jiiļ ko an bok eo? (lale Revelesōn 5:1–9).

Revelesōn 7–11

“Aelōn̄ in kiin̄ ko an laļ in rej erom aelōn̄ in kiin̄ ko an ad Irooj.”

• Revelesōn 7–11 emaron̄ in pen n̄an meļeļe. Juon jeraam̧m̧an an juon kūlaaj in Jabōt Jikuuļ ej bwe ro uwaan kūlaaj eo remaron̄ jipan̄ doon meļeļe jeje ko rekwojarjar. Kwomaron̄ kōm̧m̧ane juon laajrak in kajjitōk ko an ro uwaan kūlaaj eo kōn jepta kein im kajjitōk ippāer n̄an kwaļo̧k kōļmenļo̧kjeņ ko ippān doon. Kōketak aolep ro uwaan kūlaaj eo—ro me remaron̄ en̄jake eļapļo̧k jeļā im ro me remaron̄ en̄jake rejjab kanooj jeļā eļap—n̄an kwaļo̧k kōļmenļo̧kjeņ ko aer kōn jepta kein.

• Kwomaron̄ jino juon iien ekōnono kōn kajjitōk ippān ro uwaan kūlaaj eo ta unin tōl ko rej illo̧k waļo̧k rej loe ilo Revelesōn 7–11. Remaron̄ kwaļo̧k eoon ko ijo unin tōl kein rej pād ie im kōmeļeļeik etke unin tōl kein rej aorōk. Eļan̄n̄e rej aikuj jipan̄, kwomaron̄ elmakote bwe ren riiti Revelesōn 11:15–17. Ta unin tōl ko rej loi ilo eoon kein, im ekōjkan an unin tōl in kar kwaļo̧k ilo eoon ko jet ilo Revelesōn 7–11? Em̧ool men̄e jepta kein rej kwaļo̧k kadkad in pata ko im nan̄inmej ko, ta eo jej lo me ej letok n̄an kōj kōjatdikdik eo im lōke eo ilo Jisōs Kraist?

Revelesōn 12–14

Jej anjo̧ ioon Setan “jān bōtōktōkin Lamb eo, im jān naan in kam̧ool eo [ad].”

• Ekkatak kōn Tariņae eo ilo Lan̄ emaron̄ jipan̄ kōj em̧m̧anļo̧k ad meļeļe kōn mour eo ioon laļ in. Ro uwaan kūlaaj eo remaron̄ riiti Josep Smith Ukok, Revelesōn 12:7–11 (ilo Bible appendix) eo im kile ekōjkan ad anjo̧ ioon Setan im ro m̧ōttan. Ta kōļmenļo̧kjeņ ko jet jej bōk jān deļo̧n̄e Tariņae eo ilo Lan̄ ilo Bibel Dictionary eo ak Gospel Topic ko? (topics.ChurchofJesusChrist.org). Ta eo jej ekaktak me emaron̄ jipan̄ kōj anjo̧ ioon rijum̧ae eo?

• Tariņae eo ikōtaan em̧m̧an im nana ej kōmeļeļeiki ilo Revelesōn 13–14. Ta eo jepta 13 ej katakin kōj kōn ekōjkan an tūraikōn eo tariņaik pata in? Ekkar n̄an jepta 14, ekōjkan an Lamb eo tariņaik pata in? Emaron̄ in kaitoktok limo n̄an kōm̧m̧ane juon laajrak kōn wāween ko me kajjojo rejete rej tariņaik pata in ekkar n̄an jepta kein ruo. Ta men ko reier wōt juon im ko roktak jej loi?

• Ta meļeļe in bwe Ļam̧ eo kar “ṃan E, jān jinoin kōṃanṃan laḷ”? Revelesōn 13:8; bar lale Revelesōn 5:6). Ļōmņak in jipan̄ ro uwaan kūlaaj eo lo uwaak ko n̄an kajjitōk in kōn riiti Mosaia 3:13 im Moses 7:47 āinwōt juon kūlaaj. Ta meļeļe in n̄an anjo̧ ioon Setan “kōn bōtōktōkin Lamb eo”? (Revelesōn 12:11).

Revelesōn 14:6–7

“Iar lo bar juon enjeļ … ippān gospel ej indeeo.”

• Unin tōl eo an wiik in ilo Itok, Ļoor Eō—N̄an Kajjojo Armej im Baam̧le ko ej elmakote ekkatak kōn elōn̄ enjeļ ro me raar kōjepļaaktok “gospel eo indeeo n̄an … ro rej jokwe ioon laḷ” (Revelesōn 14:6). Kajjitōk ippān ro uwaan kūlaaj eo n̄an kwaļo̧k ta eo raa ekkatak. Ta eo Katak im Bujen Ko 133:36–40 ej katakin kōj kōn Revelesōn 14:6–7? Ekōjkan ad bōk koņaad ilo jerbal eo enjeļ eo ekar kōnono kake ilo Revelesōn 14:6–7? Kwomaron̄ barāinwōt kwaļo̧k pija in alooj eo “The Work of These Last Days” (ChurchofJesusChrist.org).

Kōkōm̧anm̧anļo̧k Ad Katakin

Ej Em̧m̧an n̄an ba, “Ijjab jeļā.” “Ilo an aolep iien kōņaan uwaake aolep kajjitōk, ilo jet jekjek ejetjet n̄an baj ba, ‘Ijjab jeļā. Jen ekkatak kajjitōk jab in kōn kōj make ilo wiik in, im jemaron̄ ekōnono kake iien in tok juon’” (Teaching in the Savior’s Way, 24). Innām kajjitōk ippān ro uwaan kūlaaj eo n̄an etale eoon in jeje ko rekwojarjar im bar kein jipan̄ ko jet an Kabun̄ in kōn uwaak ko.