The City Eternal [Ko e Kolo Taʻengatá], tā fakatātaaʻi ʻe Keith Larson

25-31 Tīsema

Fakahā 15–22

“Ko Ia ia ʻe Ikuná, ʻe Maʻu ʻe Ia ʻa e Ngaahi Meʻa Kotoa Pē”

Ko e hā ʻoku akoʻi atu ʻe he tau ʻi he vahaʻa ʻo e leleí mo e koví ʻoku fakamatalaʻi ʻi he tohi Fakahaá fekauʻaki mo hono mahuʻinga ʻo e muimui kia Kalaisi ʻi māmaní? Hili hoʻo fakalaulauloto ki he tefitoʻi moʻoni ko ʻení, fakakaukau ki he ngaahi fiemaʻu ʻa e kau mēmipa hoʻo kalasí. Ko e hā ha ngaahi moʻoni mei he tohi ʻa Fakahaá ʻe lava ʻo tokoni kiate kinautolu ke nau fai ʻa e ngaahi fili ʻoku māʻoniʻoní?

Fakaafeʻi e Feʻinasiʻakí

ʻI he fakaʻosinga ʻo e ako ʻa e kau mēmipa hoʻo kalasí ki he Fuakava Foʻoú, poupouʻi ke nau vahevahe ʻenau ngaahi fakakaukau fekauʻaki mo e Fuakava Foʻoú. Fakaafeʻi kinautolu ke vahevahe e founga kuo tokoniʻi ai kinautolu ʻe heʻenau ako folofolá ke nau ʻiloʻi lelei ange ʻa Sīsū Kalaisi pea hoko ʻo hangē ko Iá.

Akoʻi ʻa e Tokāteliné

Fakahā 17–18

Kuo pau ke tau fakamavaheʻi kitautolu mei he angahala ʻo e māmaní.

• ʻOku ʻikai fakamānako ʻa e laukonga fekauʻaki mo e angahala ʻo Pāpiloné mo hono fakaʻauhá ʻi he Fakahā 17–18, ka ʻoku fakatupu ʻilo koeʻuhí he ʻe lava ʻa Papilone ke hoko ko ha fakataipe ʻo e māmani angahalaʻia ʻoku tau moʻui ai he ʻaho ní. Mahalo te ke lava ke vahevahe ʻa e ngaahi vahe ko ʻení ki he kau mēmipa ʻo e kalasí pea kole ange ke nau kumi e tali ki he ngaahi fehuʻi hangē ko ʻení: Ko e hā ʻoku tohoakiʻi ai ʻa e kakaí ki Pāpiloné, pe ko e anga fakamāmaní? Ko e hā ʻoku fakatuʻutāmaki ai ʻa Pāpiloné? Ko e hā ʻe hoko ki Pāpiloné? Ko e hā ʻa e ngaahi fakatokanga naʻe fai ʻe Sione ke tokoni mai ke tau fakaʻehiʻehi mei he ikuʻanga ʻo Papiloné?

• Hili hono lau ʻo e Fakahā 18:4, ʻe lava ke aleaʻi ʻe he kau mēmipa ʻo e kalasí ha founga te nau lava ai ʻo “haʻu [mei]” Pāpilone pea “ʻoua te [nau] kau ʻi heʻene ngaahi angahalá.” Te nau lava ʻo vahevahe ha ngaahi veesi folofola pe pōpoaki mei he kau taki ʻo e Siasí kuo tokoni ke nau tekeʻi ʻa e ngaahi fakatauele ʻo Pāpiloné, pe ko e māmaní? Fakakaukau ke mamataʻi e vitiō “Pole ke Tuʻu Toko Taha” (ChurchofJesusChrist.org) pe ko hoʻomou lau e lea ʻa ʻEletā Kuenitini L. Kuki ʻi he “Ngaahi Maʻuʻanga Tokoni Kehé.” ʻE lava ke vahevahe ʻe he kau mēmipa ʻo e kalasí ha ngaahi fakakaukau fekauʻaki mo e founga ke fakaʻaongaʻi ai e ongo tefitoʻi moʻoni naʻe fakamatala ki ai ʻa ʻEletā Kukí. Ko e hā ʻa e founga ʻoku tau “haʻu [ai mei]” Pāpiloné? (hangē ko ʻení, vakai ki he ʻĪsaia 52:11; Tokāteline mo e Ngaahi Fuakava 25:10). Ko e hā te tau lava ʻo fai ke poupouʻi e niʻihi kehé ke nau fai e meʻa tatau?

Fakahā 19–20

Te tau lava ʻo teuteu ki he Haʻele ʻAnga Ua mai ʻa e ʻEikí mo e ʻAho ʻo e Fakamāú.

• ʻOku faʻa ui ʻa e Hāʻele ʻAnga Ua Mai ʻa Sīsū Kalaisí ko e “ʻaho lahi pea fakamanavahē ʻo [e ʻEikí]” (Sioeli 2:31), pea fakatatau mo e Fakahā 19–20, ʻoku ngali ko ha fakamatala lelei ia. Fakakaukau ke ke hiki ʻi he palakipoé ha niʻihi ʻo e ngaahi meʻa ne hoko ʻoku fakamatalaʻi ʻi he Fakahā 19:5–20:15. Fakaafeʻi e kau mēmipa ʻo e kalasí ke nau kumi ha ngaahi veesi ʻokú ne fakamatalaʻi e ngaahi meʻa ko ʻeni naʻe hokó. Ko e hā ʻoku ui ai ʻa e ngaahi meʻá ni ko e lahi mo fakamanavaheé? Ko e hā ʻoku tau ako mei he ngaahi veesi ko ʻení fekauʻaki mo e Fakamoʻuí mo kinautolu ʻoku muimui kiate Iá? Ko e hā te tau lava ʻo fai he taimí ni ke tau kau ʻiate kinautolu ʻe fiefia ʻi he taimi ʻo ʻEne hāʻele maí?

• Ke kamataʻi ha fealeaʻaki fekauʻaki mo e tohi ʻo e moʻuí, pea mo e fakamaau fakaʻosí, te ke lava ʻo fakaafeʻi e kau mēmipa ʻo e kalasí ke nau faʻu ha tohi ʻaki hano pelu fā ha laʻipepa. Hili ia pea nau toki lau ʻa e Fakahā 20:12–15; 2 Nīfai 9:14; 29:11 mo fakalaulauloto ki ha meʻa te nau fie maʻu ke ʻosi hiki fekauʻaki mo kinautolu ʻi he tohi ʻo e moʻuí. Fakaafeʻi kinautolu ke nau hiki e ngaahi meʻa ko iá ʻi heʻenau tohí, pea fakaafeʻi ha kau mēmipa ʻe niʻihi ʻo e kalasí ke nau vahevahe ha meʻa ne nau tohi. Ko e hā ha ngaahi fili te tau lava ʻo fai he taimí ni koeʻuhí ke tohi ʻa e ngaahi meʻá ni ʻi he tohi ʻo e moʻuí? Koeʻuhí ke tokoni ke ʻoua ʻe ongoʻi loto-siʻi ʻa e kau mēmipa ʻo e kalasí fekauʻaki mo ʻenau fakalakalaka fakalaumālié, fakakaukau ke vahevahe ʻa e faleʻi mei he pōpoaki ʻa ʻEletā Sefilī R. Hōlani “Ko ia Ke Haohaoa ʻA Kimoutolu” (Liahona, Nōvema 2017, 40–42).

The Last Judgement [Ko e Fakamaau Fakaʻosí], tā fakatātaaʻi ʻe John Scott

Fakahā 21:1–22:5

Kapau ʻoku tau faivelenga, ʻe tāpuekina kitautolu ʻaki e nāunau fakasilesitialé.

• Neongo kuo kikiteʻi ʻa e ngaahi ʻaho kimui ní ʻe fonu ʻi he angahalá mo e fakatuʻutāmakí, ka ko e pale naʻe mamata ki ai ʻa Sione maʻá e kau faivelengá, ʻoku mahulu lahi hake ia ʻi he ngaahi meʻa fakamamahi ʻe muʻomuʻa maí. Ke tokoni ke vakavakaiʻi ʻe he kau mēmipa ʻo e kalasí ʻa e aofangatuku fakaʻofoʻofa ko ʻeni ki he tohi Fakahaá, te ke lava ʻo fakaafeʻi ke nau toe vakaiʻi ʻa e Fakahā 21:1–22:5, ʻo kumi e ngaahi kupuʻi lea ʻokú ne ueʻi kinautolu ke nau feinga ki he nāunau fakasilesitialé. Ko e hā ʻa e ngaahi talaʻofa ʻoku fai ki he kau faivelengá? ʻOku tokoniʻi fēfē kitautolu ʻe he fakamatalá ni ʻi he taimi ʻoku tau fepaki ai mo hotau ngaahi faingataʻaʻia mo e ngaahi ʻahiʻahi lolotongá?

Ngaahi Maʻuʻanga Tokoni Kehé

Ko e fili ki he māʻoniʻoní kae ʻikai ko e angahala ʻo Pāpiloné.

Naʻe akoʻi ʻe ʻEletā Kuenitini L. Kuki:

“He ʻikai ke tau lava ʻo kalo mei he māmaní. ʻOku ʻikai ko e nofo mūnoá ʻa e talí. Ko ʻetau tokoni ki māmaní ko ha konga ia ʻo ʻetau tukupaá pea ʻoku mahuʻinga ia kapau ʻoku fie maʻu ke tau fakatupulaki hotau ngaahi talēnití. …

… ʻOku fie maʻu ke kau atu ʻa e kau mēmipa ʻo e Siasí ʻi he ngaahi meʻa ʻo e māmaní ʻi ha founga ʻoku leleí. ʻE founga fēfē leva haʻatau fakafenāpasi ʻa e fiemaʻu ke tau tokoni lelei ki he māmaní mo e ʻikai ke tau tukulolo ki he ngaahi angahala ʻo e māmaní? [Vakai, Tokāteline mo e Ngaahi Fuakava 25:10; 59:9.] Ko ha ongo tefitoʻi moʻoni ʻe ua te na fakahoko e faikehekehe lahí.

1. Tuku ke ʻilo ʻe he kakaí ko ha Kāingalotu līʻoa koe ʻo e Siasí. …

2. Loto-toʻa mo moʻui ʻaki hoʻo ngaahi tuí” “(Lessons from the Old Testament: In the World but Not of the World,” Ensign, Feb. 2006, 54–55).

Ko Hono Fakatupulaki ʻEtau Founga Akoʻí

Faka‘apaʻapa‘i e tau‘atāina ke fili ʻa e niʻihi kehé. “ʻE meimei ke fakahoko ʻe he kakaí ha ngaahi liliu mahuʻinga ʻi heʻenau moʻuí ʻi he taimi ʻoku fai ai e ngaahi liliu ko iá ʻi heʻenau tauʻatāina ke filí. ʻI hoʻo fai ha ngaahi fakaafe ke ngāué, fakapapauʻi ʻokú ke fakaʻapaʻapaʻi e tauʻatāina ke fili ʻa e niʻihi ʻokú ke akoʻí” (Ko e Faiako ʻi he Founga ʻa e Fakamoʻuí, 36).