Itilize Vini, Suiv Mwen—Pou Lekòldidimanchla

Prepare pou w Anseye nan Lekòldidimanch

Etid pèsonèl ak familyal nan fwaye a ta dwe sant aprantisaj levanjil la. Sa vrè pou oumenm ak pou moun w ap anseye yo. Lè w ap prepare pou w anseye, kòmanse fè pwòp eksperyans pa w nan ekriti yo. Preparasyon pi enpòtan pa w a la ap fèt lè w ap viv levanjil la, lè w sonde ekriti yo, ak lè w chèche enspirasyon Sentespri a.

Vini, Suiv Mwen—Pou Moun yo ak Fanmi yo se yon pati enpòtan nan etid pèsonèl ou ak preparasyon w pou w anseye a. L ap ede w gen yon konpreyansyon pi apwonfondi sou prensip doktrinal yo nou jwenn nan ekriti yo. L ap pèmèt ou enspire epi envite manm klas la pou yo itilize Vini, Suiv Mwen—Pou Moun yo ak Fanmi yo pou amelyore etid ekriti pèsonèl ak familyal yo (si w bezwen èd pou w fè sa, gade nan seksyon “Ide pou Ankouraje Etid Pèsonèl ak Familyal” la nan manyèl sa a). Pandan w ap fè sa, sonje pou w panse a manm nan klas ou a ki ap viv nan sikonstans familyal ki gen dwa pa ka fè etid ekriti familyal ak sware familyal regilyèman.

Pandan preparasyon w lan, w ap resevwa panse ak enpresyon osijè moun w ap anseye yo. W ap resevwa ide sou prensip nan ekriti yo k ap beni lavi yo. W ap jwenn direksyon pou enspire yo pou yo dekouvri prensip sa yo pandan y ap aprann nan ekriti yo pèsonèlman.

Ide pou ansèyman

Pandan w ap prepare w pou anseye a, ou ka jwenn enspirasyon adisyonèl nan eksplore plan leson yo bay pou anseye yo nan manyèl sa a. Pa panse a ide sa yo kòm enstriksyon pou w suiv etap pa etap, men pito, kòm sigjesyon pou deklanche pwòp enspirasyon pa w. Ou konnen manm klas ou yo, e w ap vin konnen yo pi byen toujou lè n ap aprann ansanm nan klas la. Senyè a konnen yo tou, e L ap enspire w avèk meyè fason pou w ede manm klas yo bati sou aprantisaj levanjil y ap fè lakay yo a.

Gen anpil lòt resous ki disponib pou w itilize lè w ap prepare, tankou ide ki nan Vini, Suiv Mwen—Pou Moun yo ak Fanmi yo a ak Revi Legliz yo. Pou plis enfòmasyon sou resous sa yo ak lòt resous, gade nan seksyon ki rele “Resous Adisyonèl” la nan manyèl sa a.

Kèk Bagay pou w Kenbe nan Lespri w

• Aprantisaj levanjil la pi efikas lè li santre nan fwaye a. Antanke enstriktè, ou gen yon responsablite enpòtan pou w sipòte, ankouraje, ak bati sou aprantisaj levanjil la nan fwaye a.

• Konvèsyon manm klas yo nan Jezikri ak levanjil Li a ap apwofondi lè y ap konprann ak aplike vrè doktrin nan. Ankouraje yo pou yo pran nòt epi pou yo suiv enspirasyon yo resevwa nan men Sentespri a.

• Anseye vledi plis pase yon prezantasyon vèbal, epi li plis pase senpleman dirije yon diskisyon. Yon pati nan wòl ou se ankouraje patisipasyon ki edifyan epi ki baze sou ekriti yo. Ou dwe pataje ide enspire w te resevwa pandan w t ap etidye ekriti yo.

• Sonje ke anpil manm nan klas la ap fè eksperyans enpòtan pandan y ap etidye menm ekriti ou pral diskite nan klas la lakay yo. Ou kapab sipòte etid yo nan ekriti yo lè w bayo opòtinite souvan pou yo pataje sa yo te aprann lakay yo.

• Papa nou ki nan Syèl la vle w reyisi kòm enstriktè. Li mete anpil resous pou ede w, tankou reyinyon konsèy enstriktè yo. Nan reyinyon sa yo, ou ka fè echanj konsèy avèk lòt enstriktè sou pwoblèm w ap rankontre yo. Ou ka fè diskisyon ak pratik tou sou prensip pou anseye nan fason Kris la.

• Moun aprann pi byen lè yo gen opòtinite pou yo anseye. Tanzantan, sonje pou w kite manm klas la, enkli jèn yo, anseye yon pati nan leson an. Baze desizyon sa a sou bezwen ak kapasite manm klas la. Si w envite yon manm nan klas la pou l anseye, pran tan pou w ede l prepare alavans nan eseye itilize ide yo bay nan manyèl sa a ak nan Vini, Suiv Mwen—Pou Moun yo ak Fanmi yo. Sonje ke, antanke enstriktè ki resevwa apèl sa a, se ou k responsab finalman pou sa k ap anseye nan klas la.

Manyèl sa a gen plan ansèyman pou chak semèn nan ane a. Jou Dimanch kote yo pa fè Lekòldidimanch akoz konferans pieu oubyen pou nenpòt lòt rezon, yo ankouraje manm klas yo pou yo kontinye li Nouvo Testaman an lakay yo selon orè ki afiche nan Vini, Suiv Mwen—Pou Moun yo ak Fanmi yoa. Lè Lekòldidimach la fèt, ou ka chwazi swa pou w sote oubyen konbine leson yo.