Kakulangan Dili usa ka Silot

• Juan 9:1–3

“Tungod sa mga rason nga wala masayri, ang ubang mga tawo natawo nga adunay pisikal nga mga limitasyon. Piho nga mga parte sa lawas dili normal. Ang mga sistema sa pagpahiangay tingali dili balanse. Ug ang tanan natong mga lawas magkasakit ug mamatay. Bisan pa, bililhon kaayo [dili mapalit] ang gasa nga pisikal nga lawas. Kon wala kini, dili kita makakab-ot sa kahingpitan sa kalipay.

“Wala kinahanglana ang perpekto nga lawas aron maangkon ang usa ka balaan nga padulngan. Sa pagkatinuod, ang ubang pinakamalumong mga espiritu anaa sulod sa huyang nga mga lawas. Ang talagsaong espirituhanong kalig-on sagad mapalambo sa mga tawo nga adunay pisikal nga mga hagit tungod kay nahagit gayud sila. Ang ingon niana nga mga indibidwal may katungod sa tanang panalangin nga giandam sa Dios alang sa tanan Niyang matinud-anon ug masulundong mga anak.

“Sa katapusan moabut ang panahon nga ang matag ‘espiritu ug … lawas pagahiusahon pag-usab … sa iyang hingpit nga lawas; ug ang mga lutahan mapahiuli sa iyang tukma nga bayanan’ (Alma 11:43). Niana, salamat ngadto sa Pag-ula ni Jesukristo, kita mahimong hingpit diha Kaniya” (Russell M. Nelson, “Kita mga Anak sa Dios,” Liahona, Nob. 1998, 86–87).

“Una ako kinahanglan gayud, ug uban sa paghatag og gibug-aton, motino niini nga punto: Kini kinaiya sa mga ginikanan nga may mga anak nga may kakulangan ang pagpangutana sa ilang mga kaugalingon, ‘Unsay nahimo namong sayop?’ Ang ideya nga ang tanan nga pag-antus direkta nga resulta sa sala gitudlo na sukad sa karaang mga kapanahunan. Sayop kini nga doktrina. Kana nga hunahuna gani gidawat sa pipila sa unang mga disipulo hangtud sa pagkorihir sa Ginoo kanila” (Boyd K. Packer, “The Moving of the Water [Ang Pagpalihok sa Tubig],” Liahona, May 1991, 7).