Leksyon 3
Ang Dakong Apostasiya
Pasiuna
Si Jesukristo mitukod sa Iyang Simbahan sa panahon sa Iyang pagpangalagad dinhi sa yuta. “Ang mga Apostoles, human sa Pagkayab ni Kristo, nagpadayon sa paggamit sa mga yawe nga Iyang gibilin kanila. Apan tungod sa pagkamasinupakon ug pagkawala sa hugot nga pagtuo sa mga miyembro, namatay ang mga Apostoles nga wala mahatag ang mga yawe ngadto sa mga nagsunod. Gitawag nato kana nga mangilngig nga hitabo nga ‘ang Apostasiya’” (Henry B. Eyring, “Ang Tinuod ug Buhi nga Simbahan,” Liahona, Mayo 2008, 21). Tungod niining mikanap pag-ayo nga apostasiya, gikuha sa Ginoo ang awtoridad sa priesthood gikan sa katawhan. Ang pagsabut sa Dakong Apostasiya nagtabang kanato nga mas makasabut sa panginahanglan alang sa Pagpahiuli sa ebanghelyo ni Jesukristo sa ulahing mga adlaw.
Mga Sugyot alang sa Pagtudlo
Pahinumdom: Tungod kay kini nga leksyon nagsugyot sa paggamit og butang ug daghang lain-lain nga mga hulagway isip mga tabang sa pagtudlo, mahimo nimong pundukon og una ang pipila ka mga butang. Kini naglakip og parte sa makina sa bisan unsang matang ug sa mosunod nga mga hulagway: Kristo Nag-orden sa mga Apostoles (Libro sa mga Hulagway sa Ebanghelyo [2009], nu. 38; tan-awa usab sa LDS.org), Batan-ong Lalaki nga Gibunyagan (nu. 103), Ang Gasa sa Espiritu Santo (nu. 105), Pagpanalangin sa Sakrament (nu. 107), ug Batan-ong Magtiayon Nagpadulong ngadto sa Templo (nu. 120).
Si Jesukristo mitukod sa Iyang Simbahan sa dinhi pa Siya sa yuta
Pagdala sa klase og parte sa makina nga gikinahanglan aron moandar ang usa ka makina o ekipo (sama sa usa ka power cord gikan sa usa ka kasangkapan o computer, kadena o ligid gikan sa bisekleta, o mga spark plug gikan sa usa ka sakyanan). Ipakita sa mga estudyante ang parte ug pangutan-a sila asa kini nahisakop ug unsay mahimo niini. (Kon wala kay makuha nga parte sa makina, pagdrowing og usa diha sa pisara.)
-
Unsa ang mahitabo kon kini nga parte mawala gikan sa piraso sa ekipo nga kini nahisakop?
-
Sa unsa nga paagi kini nga ehemplo maitandi ngadto sa Simbahan ni Jesukristo? (Ang Simbahan ni Jesukristo adunay importante nga mga parte; kon wala kini nga mga parte dili kini makalihok o gani maanaa.)
Hangyoa ang mga estudyante sa pagsugod og hunahuna kon hain nga mga parte sa Simbahan ang importante sa paglihok niini sa paghalad og kaluwasan sa kalibutan. Isulat ang ulohan Importanting mga Elemento sa Simbahan ni Jesukristo diha sa pisara.
Dapita ang usa ka estudyante sa pagbasa og kusog sa Mga Taga-Efeso 2:19–22. Hangyoa ang klase sa pagsunod ug sa pag-ila sa pundasyon diin gitukod ni Jesukristo ang Iyang Simbahan sa panahon sa Iyang mortal nga pagpangalagad. (Mahimo nimong hatagan ang mga estudyante og numero sa pahina aron matabangan sila sa pagpangita sa mga kasulatan sa Bag-ong Tugon nga ilang pagabasahon atol sa leksyon.) Samtang sila nagreport sa unsay ilang nakit-an, isulat ang mosunod nga kamatuoran ubos sa ulohan diha sa pisara: Ang mga apostoles ug mga propeta mao ang pundasyon sa Simbahan ni Jesukristo. Mahimo nimong isugyot nga markahan sa mga estudyante ang mga pulong sa Mga Taga-Efeso 2:20 nga nagtudlo niini nga kamatuoran.
-
Ngano kaha nga ang mga apostoles ug mga propeta gikonsiderar nga “pundasyon” sa Simbahan?
Aron matabangan ang mga estudyante sa pag-ila og laing importanting elemento sa Simbahan ni Jesukristo, ipakita ang hulagway nga Kristo Nag-orden sa mga Apostoles (Libro sa mga Hulagway sa Ebanghelyo, nu. 38). Hangyoa ang usa ka estudyante sa pagpasabut kon unsay nahitabo diha sa litrato. Dayon dapita ang usa ka estudyante sa pagbasa og kusog sa Marcos 3:13–14. Hangyoa ang klase sa pagsunod ug sa pag-ila og laing elemento sa Simbahan nga importante alang sa kaluwasan sa mga anak sa Dios. Human sa pagreport sa mga estudyante kon unsay ilang nakit-an, isulat ang mosunod nga kamatuoran diha sa pisara: Ang awtoridad sa priesthood gikinahanglan sa pagdawat sa mga ordinansa ug mga pakigsaad sa kaluwasan.
Ipasabut nga sa wala pa ang Manluluwas mibiya sa yuta, Iyang gihatag sa Iyang mga Apostoles ang awtoridad sa pagdumala sa Simbahan ug sa paglihok diha sa pangalan sa Dios alang sa kaluwasan sa Iyang mga anak.
Dapita ang usa ka estudyante sa pagbasa sa mosunod nga pamahayag ni Elder D.°Todd Christofferson sa Korum sa Napulog Duha ka mga Apostoles. Hangyoa ang klase sa pag-ila og laing importanting elemento sa tinuod nga Simbahan:
“Ang mga kamatuoran ug doktrina nga atong nadawat miabut na ug mopadayon sa pag-abut pinaagi sa balaang pagpadayag. Sa mga tradisyon sa ubang tinuohan … ang doktrinal nga butang daugon lang sa opinyon. … Apan sa Simbahan karon, sama sa karaan, ang pag-establisar sa doktrina ni Kristo o pagkorihir sa doktrinal nga mga sayop nagkinahanglan sa balaang pagpadayag ngadto sa gitugahan sa Ginoo sa apostolikanhong awtoridad” (“Ang Doktrina ni Kristo,” Liahona, Mayo 2012, 86).
-
Sumala ni Elder Christofferson, unsa ang usa ka importanting tahas sa mga propeta ug mga apostoles? (Ang mga estudyante mahimong mogamit og lahi nga mga pulong, apan siguroha nga ilang ilhon ang mosunod nga kamatuoran: Ang mga apostoles ug mga propeta nag-establisar og husto nga doktrina pinaagi sa balaang pagpadayag. Mahimo nga imong pahinumduman ang mga estudyante nga ang doktrina nagpasabut ngadto sa sukaranan, mahangturong mga kamatuoran sa ebanghelyo ni Jesukristo. Idugang kini nga kamatuoran ngadto sa lista diha sa pisara.)
Ipakita sa mga estudyante ang lista sa Nag-unang mga Doktrina nga makit-an diha sa appendix niini nga manwal o sa mga scripture study journal sa mga estudyante. Ipasabut nga ang mga estudyante sa seminary giawhag sa pagbaton og mas lawom nga pagsabut sa Nag-unang mga Doktrina sa tibuok nilang panahon sa seminary. Ang pagbuhat sa mao motabang kanila sa paglig-on sa ilang mga pagpamatuod ug sa pag-andam kanila sa pagtudlo sa ebanghelyo ngadto sa uban. Dapita ang mga estudyante sa pagbantay niini nga mga doktrina atol sa ilang pagtuon sa Doktrina ug mga Pakigsaad niining tuiga.
Dapita ang mga estudyante sa pagpili og usa sa Nag-unang mga Doktrina nga makahuluganon nganha kanila, ug hangyoa ang pipila kanila sa pagpasabut og dali nganong gipili nila kini.
-
Nganong importante ang tinuod nga doktrina ang gitudlo ug gisabut sa hustong paagi diha sa Simbahan sa Ginoo? (Samtang nagtubag ang mga estudyante, mahimo nimong ipakigbahin ang mosunod nga pamahayag ni Presidente Boyd K. Packer sa Korum sa Napulog Duha ka mga Apostoles: “Ang tinuod nga doktrina, nasabtan, nag-usab og mga panghunahuna ug pamatasan” [“Little Children,” Ensign, Nob. 1986, 17].)
Aron matabangan ang mga estudyante sa paghunahuna mahitungod sa laing importanting elemento sa Simbahan sa Ginoo, ipakita ang mga hulagway nga Batan-ong Lalaki nga Gibunyagan (Libro sa mga Hulagway sa Ebanghelyo, nu. 103), Ang Gasa sa Espiritu Santo (nu. 105), Pagpanalangin sa Sakrament (nu. 107), ug Batan-ong Magtiayon Nagpadulong ngadto sa Templo (nu. 120). Pangutan-a ang mga estudyante kon unsay komon sa bunyag, kumpirma, sakrament, ug sa sealing. (Silang tanan mga ordinansa.)
-
Unsa ang ordinansa? (Usa ka sagrado, pormal nga buhat nga gipahigayon pinaagi sa awtoridad sa priesthood.)
-
Ngano kaha nga ang mga ordinansa mga importanting bahin sa Simbahan ni Jesukristo? (Aron matabangan ang mga estudyante sa pagtubag niini nga pangutana, mahimo nimong dapiton sila sa pagbasa sa Juan 3:5 ug dayon pangutan-a sila kon unsa ang mahitabo kon walay paagi alang kanila nga mabunyagan. Hatagi og gibug-aton nga ang tanang makaluwas nga mga ordinansa sa priesthood inubanan og mga pakigsaad, mga sagradong pakigsabut uban sa Dios.)
Ipamatuod nga diha sa Simbahan ni Jesukristo makadawat kita og mga ordinansa nga gikinahanglan alang sa atong kaluwasan. Idugang kini nga kamatuoran ngadto sa lista diha sa pisara.
Ipasabut nga human mamatay si Jesukristo, nabanhaw Siya, ug misaka Siya ngadto sa langit. Wala na Siya pisikal nga midumala sa Simbahan dinhi sa yuta. Bisan tuod og wala Siya sa dinhi yuta, si Jesukristo nagdumala ug naggiya sa Iyang mga Apostoles pinaagi sa pagpadayag. Ubos sa pagpangulo sa Iyang mga Apostoles, ang karaang Simbahan mikaylap og dali ug liboan ang nabunyagan. Mga kongregasyon sa mga Santos gihan-ay kadaghanan sa tibuok Ginghariang Romano. Mga elder, mga bishop, mga deacon, mga priest, mga teacher, ug mga ebanghelista (mga patriyarka) gitawag ug gihatagan og awtoridad sa priesthood pinaagi sa mga Apostoles.
Ang Dakong Apostasiya nahitabo sa panahon sa mga siglo nga nagsunod sa mortal nga pangalagad sa Ginoo
Isulat ang mosunod nga kamatuoran diha sa pisara: Ang apostasiya mahitabo kon ang mga katawhan motalikod sa tinuod nga doktrina sa ebanghelyo ug mosalikway sa gihatagan og awtoridad nga sulugoon sa Ginoo.
Ipasabut nga ang mga panahon sa kinatibuk-ang apostasiya nahitabo sa tibuok kasaysayan sa kalibutan. Usa ka ehemplo niini mao ang Dakong Apostasiya, nga nahitabo human ang Manluluwas mitukod sa Iyang Simbahan (tan-awa sa 2 Mga Taga-Tesalonicca 2:1–3). Human sa kamatayon sa mga Apostoles sa Manluluwas, ang mga baruganan sa ebanghelyo gituis ug ang wala tugoti nga mga kausaban gihimo diha sa organisasyon sa Simbahan ug sa mga ordinansa sa priesthood. (Tan-awa sa Matinud-anon sa Tinuhoan: Usa ka Pakisayran sa Ebanghelyo [2004], 13–14.)
Isulat sa pisara ang mosunod nga mga scripture reference: Mga Buhat 12:1–3; 2 Timoteo 4:3–4; 2 Pedro 2:1–2.
Ipasabut nga bisan sa mga paningkamot sa mga Apostoles, ang unang Simbahan nag-atubang og mga hulga. Bahina ang klase ngadto sa tulo ka grupo. Dapita ang kada grupo sa pagtuon og usa sa mga scripture passage diha sa pisara, mangita og usa ka butang nga naghulga sa Simbahan. (Alang niadtong kinsa nagbasa sa Mga Buhat 12:1–3, mahimo nimong tinoon nga si Santiago ug Pedro mga Apostoles.) Human sa igo nga panahon, pagdapit og usa ka estudyante sa kada grupo sa pagreport unsay nakit-an sa grupo.
-
Ngano kaha nga kini nga mga hulga kuyaw ngadto sa Simbahan?
Dapita ang usa ka estudyante sa pagbasa sa mosunod nga pamahayag ni Presidente Boyd K. Packer sa Korum sa Napulog Duha ka mga Apostoles, kinsa namulong sa dakong kapildihan nga nasinati sa Bag-ong Tugon nga Simbahan atol niana nga panahon:
“Gipatay si Santiago ni Herodes sa Jerusalem. Namatay si Pedro ug si Pablo sa Roma. Ang tradisyon nag-ingon nga si Felipe miadto sa Silangan. Lapas pa niini kita wala nay nahibaloan.
“Sila nagbulag; sila nagtudlo, nagpamatuod, ug miestablisar sa Simbahan. Ug sila namatay tungod sa ilang mga gituohan, ug human sa ilang mga kamatayon miabut ang mangitngit nga mga siglo sa apostasiya” (“Ang Napulog Duha,” Liahona, Mayo 2008, 84).
Dapita ang laing estudyante sa pagpadayon og basa sa pagpasabut ni Presidente Packer sa labing importanting nawala gumikan sa Dakong Apostasiya:
“Ang labing bililhong butang nga nawala sa Apostasiya mao ang awtoridad nga gihuptan sa Napulog Duha—ang mga yawe sa priesthood. Aron ang Simbahan mahimong Iyang Simbahan, kinahanglan adunay usa ka Korum sa Napulog Duha nga naghupot sa mga yawe ug makahimo sa pagtugyan niini ngadto sa uban” (“Ang Napulog Duha,” 84).
-
Sa unsa nga paagi nga ang pagkawala sa awtoridad sa priesthood nakaapekto sa ubang importanting mga elemento sa Simbahan?
-
Diha bay bisan unsa nga paagi nga ang mga tawo makaayo sa Simbahan nga walay mga apostoles ug mga propeta, awtoridad sa priesthood, o husto nga kahibalo sa doktrina ni Jesukristo? Ngano o nganong dili man?
Pagdapit og estudyante sa pagbasa sa mosunod nga summary sa kasaysayan ni Elder Boyd K. Packer:
“Samtang nanglabay ang mga siglo, ang siga miawop ug mingitngit. Ang mga ordinansa giusab o gibiyaan. Ang linya naputol, ug ang awtoridad sa pagtugyan sa Espiritu Santo isip usa ka gasa nawala. Ang Mangiub nga mga Katuigan sa apostasiya nagpabilin sa tibuok kalibutan” (“The Cloven Tongues of Fire,” Ensign, Mayo 2000, 8).
-
Ngano kaha nga importante ang pagsabut sa Dakong Apostasiya ug ang mga sangputanan niini? (Bisan og ang mga estudyante mahimong mohatag og lain-laing mga rason, hatagi og gibug-aton nga ang pagsabut niining dakong pagbiya nagtabang kanato sa pag-amgo nga ang usa ka pagpahiuli sa doktrina ug awtoridad ni Jesukristo gikinahanglan sa pagbuntog sa mga epekto sa Dakong Apostasiya.)
Ipasabut nga bisan wala nay laing kinatibuk-ang apostasiya gikan sa kamatuoran, kinahanglan gayud nga kada usa magbantay batok sa personal nga apostasiya pinaagi sa pagtuman sa mga pakigsaad, pagsunod sa mga sugo, pagsunod sa mga lider sa Simbahan, pag-ambit sa sakrament, ug kanunay nga paglig-on sa atong mga pagpamatuod pinaagi sa inadlaw nga pagtuon sa kasulatan, pag-ampo, ug pagserbisyo (tan-awa sa Matinud-anon sa Tinuhoan, 10). Taposa pinaagi sa pagpamatuod sa gugma sa Langitnong Amahan alang sa Iyang mga Anak, ang katinuod sa Dakong Apostasiya, ug ang mahinungdanong gasa sa Pagpahiuli sa ebanghelyo.
Komentaryo ug Background nga Impormasyon
Ang apostasiya mahitabo tungod sa pagkadili masulundon ug sa pagkawala sa hugot nga pagtuo
Si Presidente Henry B. Eyring sa Unang Kapangulohan mipasabut nga ang usa ka rason nga nahitabo ang Apostasiya mao ang kakulang sa hugot nga pagtuo taliwala sa mga miyembro sa Simbahan:
“Ang katawhan sa Dios dili takus kanunay sa talagsaong kasinatian nga atong gipaambit karon. “Ang mga Apostoles, human sa Pagkayab ni Kristo, mipadayon sa paggamit sa mga yawe nga Iyang gibilin kanila. Apan tungod sa pagkamasinupakon ug pagkawala sa hugot nga pagtuo sa mga miyembro, namatay ang mga Apostoles nga wala mahatag ang mga yawe ngadto sa mga nagsunod. Gitawag nato kana nga mangilngig nga hitabo nga ‘ang Apostasiya.’ Kon ang mga miyembro sa Simbahan niadtong mga adlawa dihay oportunidad ug kabubut-on sa paggamit sa hugot nga pagtuo ingon nga kamo aduna karon, dili unta kuhaon sa Ginoo ang mga yawe sa priesthood gikan sa yuta. Busa kini adlaw nga mahinungdanon sa kasaysayan ug importante sa kahangturan sa kasaysayan sa kalibutan ug sa mga anak sa atong Langitnong Amahan.
“Karon ang atong obligasyon mao ang pagpabilin nga takus sa hugot nga pagtuo nga gikinahanglan nato aron sa pagtuman sa atong saad sa pagpaluyo niadtong kinsa gitawag. Ang Ginoo nahimuot sa Simbahan sa sinugdanan sa Pagpahiuli, sama sa Iyang kahimuot karon. Apan Iyang gipasidan-an ang mga miyembro nianang panahona, sama sa Iyang gibuhat karon, nga Siya dili makatan-aw sa sala uban sa labing gamay nga matang sa pagtugot. Aron kita makapaluyo niadtong gitawag karon, kinahanglan nga atong susihon ang atong mga kinabuhi, maghinulsol kon gikinahanglan, mosaad nga mosunod sa mga sugo sa Ginoo, ug mosunod sa Iyang mga sulugoon. Ang Ginoo mipasidaan kanato nga kon kita dili mobuhat niadtong mga butanga, ang Espiritu Santo pagakuhaon, mawala kanato ang kahayag nga atong nadawat, ug kita dili makatuman sa saad nga atong gihimo karon sa pagpaluyo sa mga sulugoon sa Ginoo diha sa Iyang tinuod nga Simbahan” (Ang Tinuod ug Buhing Simbahan,” Liahona, Mayo 2008, 21).
Ang Dios wala motalikod sa Iyang mga anak sa panahon sa Apostasiya
Si Elder M. Russell Ballard sa Korum sa Napulog Duha ka mga Apostoles mitudlo nga bisan sa mga panahon sa kangitngit ug apostasiya ang Langitnong Amahan wala motalikod sa Iyang mga anak:
“Sa mubong panahon nga naglangkob sa Bag-ong Tugon … ang mga tawo misalikway kang Kristo ug sa Iyang mga Apostoles. Ang pagkatumpag hilabihan nga kini atong giila nga Dako nga Apostasiya, nga midala ngadto sa gatusan ka mga tuig sa espirituhanong paghunong ug pagkaignorante nga gitawag og Mangiub nga mga Katuigan [Dark Ages].
“Karon, kinahanglan nga ako klaro kaayo kabahin niining makasaysayanong pagbalik-balik sa mga panghitabo sa apostasiya ug sa espirituhanon nga kangitngit. Ang atong Langitnong Amahan naghigugma sa tanan Niyang mga anak, ug Siya buot nga silang tanan makaangkon sa mga panalangin sa ebanghelyo sa ilang mga kinabuhi. Ang espirituhanong kahayag wala mawala tungod ang Dios mitalikod sa Iyang mga anak. Hinoon, ang espirituhanong kangitngit miresulta sa dihang ang Iyang mga anak naghiusang mitalikod Kaniya. Kini natural nga sangputanan sa sayop nga mga pagpili nga gihimo sa mga indibidwal, mga komunidad, mga nasud, ug sa tanang mga sibilisasyon. Kini napamatud-an na og makadaghan sa tibuok dagan sa panahon. Usa sa labing dako nga leksyon niining makasaysayanong sumbanan mao nga ang atong mga pagpili, ma-indibidwal ug matanan man, moresulta ngadto sa espirituhanong mga sangputanan alang sa atong mga kaugalingon ug sa atong kaliwatan” (“Pagkat-on sa mga Leksyon sa Nangagi,” Liahona, Mayo 2009, 32).