Leksyon 31
Doktrina ug mga Pakigsaad 24 ug 26
Pasiuna
Sa Hunyo ug Hulyo sa 1830, si Joseph Smith ug ubang mga miyembro sa Simbahan nag-atubang og grabeng pagpanggukod. Atol niining panahon sa kalisud, ang Ginoo milig-on ni Joseph Smith ug Oliver Cowdery ug mitudlo kanila mahitungod sa ilang mga responsibilidad pinaagi sa pagpadayag nga anaa diha sa Doktrina ug mga Pakigsaad 24. Ang Ginoo mihatag usab og direksyon alang sa buhat sa pag-uyon sa kadaghanan diha sa Simbahan, nga makita sa Doktrina ug mga Pakigsaad 26.
Mga Sugyot alang sa Pagtudlo
Doktrina ug mga Pakigsaad 24:1–12
Si Joseph Smith ug Oliver Cowdery nakadawat og tambag kalabut sa ilang mga calling
Sa dili pa magsugod ang klase, isulat sa pisara ang mosunod nga pangutana: Unsay inyong buhaton kon ang kinabuhi lisud?
Hangyoa ang mga estudyante sa paghunahuna og usa ka lisud o makapasagmuyo nga panahon nga ilang nasinati ug giunsa nila pag-atubang ang kalisdanan. Dapita ang pipila ka estudyante sa pagpakigbahin sa ilang mga kasinatian. (Pahinumdumi ang mga estudyante nga ang ubang mga kasinatian hilabihan ka sagrado o personal aron ipakigbahin.)
Ipasabut nga nakasinati si Joseph Smith og daghang lisud nga mga panahon sa iyang kinabuhi. Dapita ang usa ka estudyante sa pagbasa og kusog sa ulohan sa seksyon 24. Dapita ang klase sa pagsunod ug pag-ila sa mga kahimtang diin kini ug ang mosunod nga duha ka pagpadayag nadawat.
Aron mahulagway ang pagpanglutos nga giatubang ni Joseph Smith ug sa uban niining panahona, ikonsiderar ang paghangyo sa usa ka estudyante sa pag-summarize og kusog sa mosunod nga background sa kasaysayan (tingali kinahanglan ka nga mohatag niini nga impormasyon sa dili pa magklase aron makapangandam ang estudyante):
Niadtong Hunyo 1830, si Joseph Smith ug pipila ka kauban miadto sa Colesville, New York, aron makig-istorya sa mga tawo nga interesado sa pagpabunyag. Gi-dam nila ang usa ka sapa sa pagpangandam alang sa bunyag sa sunod nga adlaw (Dominggo), apan usa ka panon sa manggugubot miguba sa dam pagkagabii. Sayo sa Lunes sa buntag, gihimo og balik ang dam ug 13 ka tawo ang nabunyagan, lakip si Emma Smith. Hinoon, sa dihang nakompleto na ang bunyag, usa ka panon sa manggugubot nga dul-an sa 50 ka mga tawo nagpundok, nanginsulto ug nanghulga sa pagdagmal sa mga Santos. Nianang pagka-gabii, nag-abut ang mga Santos aron ikumpirma kadtong nabunyagan sa sayo nianang adlawa, apan sa wala pa mapahigayon ang kumpirmasyon, gidakop si Joseph sa pasangil nga “badlungon nga tawo, gihimong gubot ang dapit pinaagi sa pagsangyaw sa Basahon ni Mormon.” (Tan-awa sa History of the Church, 1:86–88.)
Padulong sa iyang husay sa korte, si Joseph nakaikyas sa panon sa mga manggugubot uban sa tabang sa maloloy-on nga konstable [polis] nga mibantay kaniya. Human sa husay ug paghukom nga siya walay sala sa mga akusasyon, gidakop na usab si Joseph diha-diha dayon pinaagi sa usa ka konstable nga gikan sa lahi nga dapit. Nianang gabhiona si Joseph gitamay ug giabusaran sa “pundok sa mga tawo”, ug sa pagkasunod buntag miatubang siya sa husay. Gihukman na usab nga walay sala si Joseph ug nakaikyas sa laing panon sa manggugubot sa iyang biyahe pagpauli. (Tan-awa sa History of the Church, 1:88–96.)
Si Joseph Smith ug Oliver Cowdery misulay na usab nga makigpundok sa bag-ong nabunyagan nga mga miyembro sa Colesville, apan usa ka panon sa manggugubot nagtapok dayon sa ilang pag-abut. Napugos si Joseph ug Oliver sa pag-ikyas, hapit wala makaeskapo samtang gigukod sila sa panon sa manggugubot sa tibuok gabii (tan-awa sa History of the Church, 1:97). Miingon si Joseph niining lisud nga panahon, “Bisan pa sa tanang kayugot sa among mga kaaway, kami adunay dakong kahupayan, ug daghang mga butang ang nahitabo sa paglig-on sa among pagtuo ug pagdasig kanamo” (sa History of the Church, 1:101).
Hangyoa ang usa ka estudyante sa pagbasa og kusog sa katapusang sentence sa ulohan sa seksyon sa Doktrina ug mga Pakigsaad 24. Mahimo nimong isugyot nga markahan sa mga estudyante kini nga sentence. Dapita sila sa pagkonsiderar panahon sa leksyon kon sa unsang paagi ang tambag sa Ginoo kang Joseph Smith ug Oliver Cowdery makatabang usab kanila kon makasinati sila og lisud nga panahon.
Isulat sa pisara ang mosunod:
|
Paglig-on ug Pag-awhag |
Pagtudlo |
|---|---|
I-assign ang mga estudyante sa pagtuon sa Doktrina ug mga Pakigsaad 24:1–12 nga magpares. Dapita ang usa ka estudyante nga hilum nga mobasa sa mga bersikulo, nga mangita sa mga pulong nga tingali nakalig-on ug nakaawhag sa Propeta ug ni Oliver Cowdery. Dapita ang ikaduhang estudyante sa pagbasa sa mga bersikulo, nga mangita sa mga instruksyon nga gihatag sa Ginoo. Human sa igong panahon, giyahi ang mga estudyante sa pagpaambit ngadto sa ilang mga pares sa unsay ilang nadiskubre. Dapita ang managpares sa pagpili og hugpong sa mga pulong nga makahuluganon ngadto kanila ug ilakip diha sa ilang diskusyon kon sa unsang paagi kana nga piho nga pagdasig o instruksyon gikan sa Ginoo tingali nakatabang ni Joseph Smith ug Oliver Cowdery.
Human makahisgut ang matag pares sa Doktrina ug mga Pakigsaad 24:1–12, dapita ang pipila ka estudyante sa pag-report sa unsay ilang nakat-unan. Samtang ang mga estudyante mohatag sa ilang mga ideya, ilista ang mga pulong sa pagdasig ug pagtudlo nga ilang nadiskubrihan ubos sa tukma nga ulohan diha sa pisara.
-
Unsa nga baruganan ang atong makat-unan gikan sa Doktrina ug mga Pakigsaad 24:8 kalabut sa unsay makatabang kanato sa atong mga kasakit? (Tingali kinahanglan nimong ipasabut nga ang kasakit maoy usa ka hinungdan o kondisyon sa sakit, kalisud, o pag-antus. Ang mga estudyante mahimong mogamit og lain-laing mga pulong, apan siguroa nga ilang mahibaloan ang mosunod nga baruganan: Kon kita mapailubon ug molahutay sa atong mga kasakit, ang Ginoo magauban kanato. Isulat sa pisara kini nga baruganan.)
Aron matabangan ang mga estudyante nga makasabut niini nga baruganan, hangyoa sila sa pagsulat sa ilang mga class notebook o scripture study journal og usa ka mubo nga pagpasabut sa unsay ilang gibati nga gipasabut sa pagmapailubon ug paglahutay. Dapita ang pipila ka mga estudyante sa pagbasa og kusog sa ilang mga paghulagway. Dugangi ang ilang mga ideya pinaagi sa pagpasabut nga diha sa konteksto sa ebanghelyo, ang paglahutay og kasakit mahimong nagpasabut nga magpabiling matinud-anon ngadto sa Ginoo ug sa pagbuntog sa mga pagsulay uban sa kaisug.
-
Ngano nga lisud man ang magmapailubon panahon sa mga kasakit?
-
Kanus-a kamo nakakita og mga tawo nga nagmapailubon ug nagpabiling matinud-anon panahon sa mga kasakit?
-
Sa unsang paagi gipakita sa Ginoo niadtong mga tawhana nga nagauban Siya kanila?
Aron matabangan ang mga estudyante nga mahibaloan ang kamatuoran kalabut sa baruganan nga gisulat sa pisara, dapita ang usa ka estudyante sa pagbasa og kusog sa Doktrina ug mga Pakigsaad 24:10–12. Hangyoa ang klase sa pagsunod ug pag-ila sa panalangin nga gisaad sa Ginoo kang Oliver Cowdery kon siya mopadayon nga matinud-anon sa iyang calling sa pagsangyaw sa ebanghelyo.
-
Unsa nga mga panalangin ang gisaad sa Ginoo ni Oliver kon magpadayon siya nga magmatinud-anon sa pagbuhat sa unsay gisugo sa Ginoo? (Tabangi ang mga estudyante nga makakita sa mosunod nga mga saad: “Ako mag-uban kaniya ngadto sa katapusan” [bersikulo 10]. “Ngari kanako siya makabaton og himaya” [bersikulo 11]. “Ako mohatag ngadto kaniya og kusog ingon nga wala pa mahibaloi taliwala sa mga tawo” [bersikulo 12].)
Isulat ang mosunod sa pisara: Kon … , niana …
Dapita ang mga estudyante sa pag-ila sa mga pamahayag nga “kon–niana” nga nagpahayag og usa ka baruganan nga gitudlo diha sa Doktrina ug mga Pakigsaad 24:10–12. (Ang mga estudyante mahimong moila og lain-laing mga baruganan, apan siguroha ang paghatag og gibug-aton sa mosunod nga baruganan: Kon matinud-anon natong buhaton ang gisugo sa Ginoo kanato, niana Siya molig-on kanato. Sulati ang mga blangko diha sa pisara sa pagkompleto sa baruganan.)
-
Giunsa kamo paglig-on sa Ginoo samtang nagmatinud-anon kamo Kaniya?
Dapita ang mga estudyante sa pagsulat og usa ka butang nga ilang mahimo aron magmapailubon ug magpabiling matinud-anon ngadto sa Ginoo kon mag-atubang og kalisdanan sa ilang kinabuhi. Ikonsiderar ang pagpaambit kon sa unsang paagi ka nalig-on ug giubanan sa Ginoo tungod sa imong mapailubon nga pagkamatinud-anon sa lisud nga mga panahon.
Doktrina ug mga Pakigsaad 24:13–19
Ang Ginoo mitudlo ni Joseph Smith ug Oliver Cowdery kabahin sa ilang buhat ug mahitungod niadtong mobatok kanila
I-summarize ang Doktrina ug mga Pakigsaad 24:13–19 pinaagi sa pagpasabut nga ang Ginoo mitudlo ni Joseph Smith ug Oliver Cowdery kabahin sa mga milagro nga ilang mabuhat diha sa Iyang ngalan. Misulti usab Siya kanila mahitungod sa proteksyon nga ilang madawat kon ang mga tawo mobatok kanila. Mahimo nimong ipasabut nga ang Ginoo mihatag kanila og pipila ka mga instruksyon nga lahi kay sa mga instruksyon nga madawat sa mga misyonaryo karon. Sama pananglit, mihatag Siya kanila og pagtugot sa “ pagtaktak sa mga abug sa [ilang] mga tiil” isip pagpamatuod batok niadtong wala modawat kanila (D&P 24:15). Kini nga buhat gigahin alang sa grabe nga mga kahimtang. Ang full-time nga mga misyonaryo wala hatagi og katungod sa pagbuhat niini karon. Si Joseph Smith ug Oliver Cowdery gisugo usab nga “dili modala og puntil ni puyô” (D&P 24:18), nagpasabut nga mibiyahe sila nga walay kwarta, nagsalig sa kaayo sa mga miyembro sa Simbahan ug sa uban sa paghatag og pagkaon ug kapuy-an. Karon, ang full-time nga mga misyonaryo wala gisugo sa paglakaw nga walay puntil o puyô.
Doktrina ug mga Pakigsaad 26
Ang Ginoo mitudlo kang Joseph Smith, Oliver Cowdery, ug John Whitmer
Ipasabut nga ang Doktrina ug mga Pakigsaad 26:1 naglangkob og dugang instruksyon ngadto ni Joseph Smith, Oliver Cowdery, ug John Whitmer kabahin sa espirituhanon ug pisikal nga mga buluhaton nga ilang ipahigayon. Gipanghimug-atan pag-usab sa Ginoo ang usa ka importanting baruganan kalabut sa pagdumala sa Simbahan. Sa pagpaila niini nga baruganan, awhaga ang mga estudyante sa paghunahuna nga ang usa ka higala sa laing tinuohan miuban kanila ngadto sa usa ka miting diin ang mga opisyales sa Simbahan gipaluyohan. Ipangutana kon unsaon nila pagpasabut ngadto sa ilang higala ang buhat sa pagpaluyo. (Ikonsiderar ang pagdapit og duha ka mga estudyante sa pagrole-play niini nga sitwasyon.)
Dapita ang usa ka estudyante sa pagbasa og kusog sa Doktrina ug mga Pakigsaad 26:2. Hangyoa ang klase sa pagsunod, nga mangita sa mga pulong nga may kalabutan sa buhat sa pagpaluyo. Human mabasa ang bersikulo, pangutan-a ang mga estudyante kon unsay ilang nailhan. Mahimo nimong isugyot nga ilang markahan ang mga pulong nga nagpahayag sa mosunod nga baruganan: Ang tanan nga mga butang diha sa Simbahan buhaton nga inuyunan sa kadaghanan.
-
Unsa kaha ang gipasabut sa “inuyunan sa kadaghanan”? (Tingali kinahanglan nimong ipasabut nga ang “inuyunan sa kadaghanan” nagpasabut nga ang mga miyembro sa Simbahan mogamit sa ilang kabubut-on sa pagpahayag sa ilang kaandam o dili kaandam sa pagsuporta sa usa ka sugyot gikan sa usa ka lider sa Simbahan. Sa mga miting sa sakrament ug sa stake ug sa kinatibuk-ang mga komperensya, gihangyo kita sa pagpakita sa atong pag-uyon pinaagi sa pagpataas sa atong tuo nga kamot.)
-
Unsa ang kalainan tali sa pagpaluyo pinaagi sa pag-uyon sa kadaghanan ug sa pagboto?
Tingali kinahanglan nimong ipasabut nga sa gingharian sa Ginoo, ang Ginoo kanunay mopadayag og mga desisyon ngadto sa Iyang gitudlo nga mga lider. Sa ubang sitwasyon, hinoon, gitugutan Niya ang mga lider sa paghimo og mga desisyon pinaagi sa awtoridad nga gisalig kanila. Ang Espiritu Santo momatuod niadto nga mga desisyon, ug dayon ang mga miyembro sa Simbahan mogamit sa ilang kabubut-on sa pagpakita sa ilang kaandam sa pagsuporta sa mga desisyon. Ang balaod sa inuyunan sa kadaghanan magamit sa mga calling sa Simbahan, mga ordinasyon sa priesthood, ug mga pagpadayag. Moapil kita sa balaod sa inuyunan sa kadaghanan sa matag higayon nga kita mopataas sa atong mga kamot sa pagpaluyo sa usa ka tawo o desisyon diha sa miting sa Simbahan.
Aron matabangan ang mga estudyante nga dugang makasabut kon unsay kahulugan sa atong pagpaluyo sa uban, hangyoa ang usa ka estudyante sa pagbasa og kusog sa mosunod nga pamahayag ni Presidente Gordon B. Hinckley. Dapita ang klase sa pagpaminaw sa tulo ka butang nga gipasalig natong buhaton kon mopaluyo kita sa uban pinaagi sa pag-uyun sa kadaghanan.
“Ang pamaagi sa pagpaluyo sobra pa kay sa naandang pagpataas sa kamot. Kini usa ka pasalig sa pagdapig, sa pagsuporta, sa pagtabang niadtong kinsa napili” (“This Work Is Concerned with People,” Ensign, Mayo,1995, 51).
-
Unsay atong gipasalig nga buhaton sa atong pagpataas sa atong mga kamot aron sa pagpaluyo sa uban?
Pangutan-a ang mga estudyante ko sila gipaluyohan ba alang sa usa ka pag-orden, pag-advance, o calling.
-
Unsay inyong gibati nga gipaluyohan?
-
Unsaon nato sa pagpaluyo sa uban sa tulo ka paagi nga gihulagway ni Presidente Hinckley? (Isulat sa pisara ang mga tubag sa mga estudyante.)
Dapita ang mga estudyante sa pagsulat sa ngalan sa usa ka tawo nga ilang gipaluyohan pinaagi sa pagpataas sa ilang mga kamot (sama pananglit, ang propeta, mga apostoles, bishop, o mga lider sa kabatan-onan). Hangyoa ang mga estudyante sa pagsulat og usa ka aksyon nga ilang buhaton aron mas maayo nilang mapaluyohan kini nga indibidwal. Pagpamatuod sa mga panalangin nga moabut gikan sa pagpaluyo sa mga lider sa Simbahan.
Komentaryo ug Background nga Impormasyon
Doktrina ug mga Pakigsaad 24:13. Mga milagro
Ang mga milagro nga gihisgutan diha sa Doktrina ug mga Pakigsaad 24:13 mga timailhan nga giingon sa Manluluwas nga mosunod niadtong kinsa motuo (tan-awa sa Marcos 16:17–18). Si Presidente Spencer W. Kimball mitudlo nga “kon asa maanaa ang priesthood [sa Ginoo] ug kon asa makit-an ang hugot nga pagtuo, anaa dinha ang mga timailhan sa gahum, dili alang sa pagpakita apan alang sa usa ka panalangin ngadto sa katawhan” (“President Kimball Speaks Out on Administration to the Sick,” New Era, Okt. 1981, 45). Sa atong panahon, ang mga tumutuo makadawat og mga pagpang-ayo ug mga milagro sama sa nanghitabo kaniadto. Hinoon, dili kita makadungog sa tanan nga mga pagpang-ayo ug mga milagro nga mahitabo. Ang ingon nga mga kasinatian sagrado. Sa daghang mga higayon, ang mga tawo nga nakadawat og ingon nga mga milagro naaghat nga ipabilin kining hilum ug pribado.
Doktrina ug mga Pakigsaad 24:15. Unsay gipasabut sa “pagtaktak sa mga abug sa imong mga tiil”?
Si Elder James E. Talmage sa Korum sa Napulog Duha ka mga Apostoles mitudlo:
“Ang ingon og seremonyas nga pagpanaktak sa abug gikan sa tiil sa usa ka tawo isip pagpamatuod batok sa lain gisabut sa mga Judeo nga simbolo sa pagputol sa panaghigalaay ug ang pagbiya sa tanang responsibilidad alang sa mga sangputanan nga mahimong mosunod. Nahimo kini nga ordinansa sa pag-akusar ug pagpamatuod pinaagi sa mga panudlo sa Ginoo ngadto sa Iyang mga apostoles. … Sa dispensasyon karon, ang Ginoo susama nga misugo sa Iyang awtorisadong mga sulugoon sa pagpamatuod gayud batok niadtong tuyo ug madumtanon nga mibatok sa kamatuoran nga awtorisadong gipaila” (tan-awa sa Dok. ug mga Pak. 24:15; 60:15; 75:20; 84:92; 99:4). Ang responsibilidad sa pagpamatuod sa atubangan sa Ginoo pinaagi niining nag-akusar nga simbolo dako kaayo nga kini gamiton lamang ubos sa talagsaon ug hilabihan nga mga kahimtang, sumala sa pag-aghat sa Espiritu sa Ginoo” (Jesus the Christ, 3rd ed. [1916], 345; tan-awa usab sa Doctrine and Covenants Student Manual, 2nd ed. [manwal sa Church Educational System, 2001], 50).
Doktrina ug mga Pakigsaad 26:1. “Kini mahibaloan unsa ang inyong buhaton”
Sa usa ka pagpadayag kang Joseph Smith, Oliver Cowdery ug John Whitmer, ang Ginoo miingon nga “sa sunod nga komperensya … kini mahibaloan unsa ang [kinahanglan nilang] buhaton” (D&P 26:1). Kini nga pagpadayag gihatag niadtong Hulyo 1830. Sa usa ka komperensya nga gipahigayon niadtong Septyembre 1830, si Joseph Smith “mao ang natudlo pinaagi sa tingog sa Komperensya sa pagdawat ug pagsulat sa mga Pagpadayag & mga Sugo sa Simbahan” (sa Far West Record: Minutes of The Church of Jesus Christ of Latter-day Saints, 1830–1844, ed. Donald Q. Cannon ug Lyndon W. Cook [1983], 3).
Doktrina ug mga Pakigsaad 26:2. Ngano nga ang usa ka tawo moboto man nga dili uyon?
Si Presidente Joseph Fielding Smith mitudlo sa mga sirkumstansya diin mahatag ang dili uyon nga boto:
“Wala akoy katungod sa pag-isa sa akong kamot sa pagbatok sa tawo nga gitudlo ngadto sa bisan unsang posisyon sa Simbahan, tungod lang kay dili ko ganahan niya, o tungod sa personal nga dili pag-uyon o pagbati nga tingali aduna ko, apan gawas lamang sa rason nga duna siyay nahimong sala, kalapasan sa mga balaod sa Simbahan nga maghimo kaniya nga dili takus sa posisyon nga gitawag siya sa paghupot” (Doctrines of Salvation , comp. Bruce R. McConkie, 3 vols. [1954–56], 3:124; tan-awa usab sa Doctrine and Covenants Student Manual, 2nd ed. [manwal sa Church Educational System, 2001], 52).