Doktrina ug mga Pakigsaad 30

Pasiuna

Niadtong Septyembre 1830, wala madugay human ang usa ka komperensya sa Simbahan didto sa Fayette, New York, si Joseph Smith nakadawat og mga pagpadayag alang ni David Whitmer, Peter Whitmer Jr., ug John Whitmer. Kini nga mga pagpadayag sa sinugdanan gimantala sa tinagsa-tagsa, apan gihiusa kini ni Joseph Smith ngadto sa usa ka seksyon sa 1835 nga edisyon sa Doktrina ug mga Pakigsaad.

Mga Sugyot alang sa Pagtudlo

Doktrina ug mga Pakigsaad 30:1–4

Gipanton sa Ginoo si David Whitmer tungod kay wala mopatalinghug sa Espiritu ug sa gitudlo nga mga sulugoon sa Ginoo

Hangyoa ang mga estudyante sa hilum nga pagkonsiderar sa mosunod nga mga sitwasyon:

Usa ka batan-ong lalaki nagpaminawan og musika nga wala mohaum sa mga sumbanan nga gi-outline diha sa Alang sa Kalig-on sa mga Kabatan-onan. Bisan og nalingaw siya sa pagpaminaw niining musika, hinay-hinay siyang nakaamgo nga ang mga mensahe niini makapawagtang sa Espiritu ug makapahilayo gikan sa iyang pamilya, sa iyang mga higala, ug sa Simbahan.
Human sa pipila ka mga pakig-date sa usa ka batan-ong lalaki, ang batan-ong babaye nagsugod sa pag-ila, pinaagi sa pag-aghat sa Espiritu Santo, nga ang batan-ong lalaki sa hinay-hinay misulay sa pagdani kaniya sa paglapas sa balaod sa kaputli.

Ipasabut nga ang Espiritu Santo mopasidaan kanato kon anaa kita sa kakuyaw sa espirituhanong paagi. Hinoon, kon dili kita maminaw sa Iyang mga pasidaan, ang Espiritu sa Ginoo mobiya gikan kanato. Ang Doktrina ug mga Pakigsaad 30 naglangkob og mga doktrina ug mga baruganan nga makatabang kanato nga maandam sa pagdawat ug pagsunod sa mga pasidaan gikan sa Espiritu.

Ipasabut nga ang unang bahin sa Doktrina ug mga Pakigsaad 30 usa ka pagpadayag nga nadawat ni Propeta Joseph Smith alang ni David Whitmer.

Unsa ang inyong nahibaloan mahitungod ni David Whitmer? (Ang mga tubag mahimong maglakip nga siya ug ang iyang mga ginikanan mihatag og dapit alang ni Joseph Smith sa paghubad sa Basahon ni Mormon, nga siya usa sa Tulo ka mga Saksi sa Basahon ni Mormon, ug nga siya mao ang usa sa unom ka orihinal nga mga miyembro sa Simbahan.)

Ipasabut nga bisan kon si David Whitmer nagmatinud-anon sa daghan nga mga paagi, ang Ginoo mipanton kaniya mahitungod sa pagbaliwala sa iyang mga responsibilidad sa Simbahan. Dapita ang usa ka estudyante sa pagbasa sa Doktrina ug mga Pakigsaad 30:1–2. Hangyoa ang klase sa pagsunod, nga mangita sa mga pulong sa Ginoo sa pagpanton.

Nganong gipanton man sa Ginoo si David Whitmer? (Mahimo nimong ilista ang mga tubag sa mga estudyante diha sa pisara. Ang mga tubag mahimong maglakip nga si David nahadlok sa mga tawo, wala mosalig sa Ginoo alang sa kalig-on, mas naghunahuna sa mga butang sa yuta kay sa mga butang sa Ginoo, wala mosunod sa direksyon sa Espiritu ug sa mga lider sa Simbahan, ug nakabig niadtong wala gitawag sa Ginoo.)

Dapita ang mga estudyante sa pagsugyot og mga baruganan nga atong makat-unan gikan sa Doktrina ug mga Pakigsaad 30:1–2. Tingali mosugyot sila og pipila o tanan sa mosunod nga mga baruganan:

Kay sa mahadlok sa mga tawo, kinahanglang mosalig kita sa Ginoo alang sa kalig-on.

Kinahanglan ibutang nato sa atong mga hunahuna ang mga butang sa Dios labaw pa kay sa mga butang sa kalibutan.

Kinahanglan kitang mosunod sa Espiritu ug sa tambag sa mga lider sa Simbahan kay sa magpadani niadtong wala gitawag sa Ginoo.

Aron matabangan ang mga estudyante nga makasabut ug mobati sa kaimportante niini nga mga baruganan, ipangutana ang pipila o ang tanan sa mosunod nga mga pangutana:

Unsa kaha ang ipasabut nga mahadlok sa mga tawo? (Ang mga tubag mahimong maglakip nga kini nagpasabut sa pagtugot sa mga pagtulun-an sa ubang mga tawo nga mopalayo kanato gikan sa mga pagtulun-an sa Dios.)
Unsa ang pipila ka butang nga atong mahimo aron mosalig sa Ginoo alang sa kalig-on? Kanus-a kamo mibati nga ang Ginoo milig-on kaninyo?
Unsa kaha ang ipasabut nga ang atong mga hunahuna mas anaa sa mga butang sa yuta kay sa mga butang sa Ginoo? Unsa ang pipila ka peligro nga mahimong sad-an niini?
Sa unsang paagi kamo napanalanginan pinaagi sa pagsunod sa Espiritu ug sa tambag sa mga lider sa Simbahan?

Dapita ang usa ka estudyante sa pagbasa og kusog sa Doktrina ug mga Pakigsaad 30:3–4. Awhaga ang klase sa pagpangita sa tambag sa Ginoo ngadto ni David Whitmer.

Human mopanton ni David, unsa man ang gisugo sa Ginoo nga buhaton ni David? (Sa pagpamalandong sa mga butang nga iyang nadawat ug sa pag-atiman sa iyang mga katungdanan sa Simbahan.)
Sa unsang paagi nga ang pagpamalandong sa mga butang nga atong nadawat gikan sa Dios makatabang kanato nga magpabiling matinud-anon?
Sa unsang paagi kita naimpluwensyahan alang sa kaayo kon kita mopahinungod sa atong kaugalingon sa mga calling nga atong nadawat?

Awhaga ang mga estudyante nga hilum nga moribyu sa Doktrina ug mga Pakigsaad 30:1–4, nga mangita sa tambag nga magamit kaayo sa ilang kinabuhi. Hangyoa usab sila sa pagpamalandong kon unsay ilang mabuhat sa pagsunod niana nga tambag. Dapita sila sa pagsulat sa ilang mga hunahuna diha sa ilang mga class notebook o scripture study journal.

Doktrina ug mga Pakigsaad 30:5–8

Gitawag si Peter Whitmer Jr. sa pagkuyog ni Oliver Cowdery sa usa ka misyon ngadto sa mga Lamanite

Pagdala sa klase og bug-at nga butang o usa ka bag nga puno sa bug-at nga mga butang, sama sa mga libro o mga bato. Dapita ang usa ka estudyante sa paggunit sa butang diha sa iyang atubangan. Samtang naggunit ang estudyante sa butang, ipasabut nga agig dugang sa pagpadayag ngadto ni David Whitmer, ang Doktrina ug mga Pakigsaad 30 naglakip og duha ka dugang nga mga pagpadayag, gitumong ngadto sa mga igsoon ni David nga si Peter ug John. Dapita ang mga estudyante sa pagbasa sa Doktrina ug mga Pakigsaad 30:5 sa ilang kaugalingon ug mangita kon unsay gipabuhat sa Ginoo ni Peter Whitmer Jr.

Unsa ang gisugo sa Ginoo nga buhaton ni Peter Whitmer Jr.? (Pagsangyaw sa ebanghelyo.) Kinsa man ang mahimong pangulo ni Peter niini nga paningkamot? (Oliver Cowdery.)

Dapita ang ikaduha nga estudyante sa pagtabang sa estudyante nga naggunit sa bug-at nga butang. Hangyoa ang unang estudyante sa paghulagway sa kalainan nga iyang gibati nga nakabaton sa suporta sa laing tawo. Ipasabut nga ang Ginoo mihatag og tambag ngadto ni Peter, nga naghulagway kon sa unsang paagi siya mosuporta ni Oliver Cowdery. Dapita ang mga estudyante sa pagsiksik sa Doktrina ug mga Pakigsaad 30:5–8, nga mangita sa mga pulong nga naghulagway kon sa unsang paagi si Peter mosuporta ni Oliver. Mahimo nimong isugyot nga markahan sa mga estudyante kini nga mga pulong.

Unsa nga mga pulong ang inyong nakit-an? (Mahimo kang modapit og usa ka estudyante sa pagsulat sa mga tubag sa mga estudyante diha sa pisara.)
Unsa kaha ang gipasabut niini alang kang Peter nga “mag-antus sa … tanan nga mga kasakitan [ni Oliver]”? (Si Peter kinahanglang mosuporta ni Oliver, bisan sa lisud nga mga panahon.)
Sumala sa bersikulo 6, unsa ang tahas sa pag-ampo diha sa pagsuporta sa atong mga lider sa Simbahan?

Doktrina ug mga Pakigsaad 30:9–11

Si John Whitmer gitawag sa pagsangyaw sa ebanghelyo

Ipasabut nga ang Doktrina ug mga Pakigsaad 30:9–11 naglangkob og usa ka pagpadayag alang ni John Whitmer. Dapita ang usa ka estudyante sa pagbasa og kusog sa Doktrina ug mga Pakigsaad 30:9–10. Hangyoa ang klase sa pagsunod, nga mangita sa unsay gipabuhat sa Ginoo ni John Whitmer. (Mahimong makatabang ang pagpasabut nga ang asawa ni Philip Burroughs miyembro sa Simbahan. Ang pamilyang Burroughs nagpuyo mga onse ka kilometro sa amihanan sa mga Whitmers, sa Seneca Falls, New York. Bisan tuod si Philip Burroughs gihisgutan isip “igsoon” sa bersikulo 10, walay rekord nga nagpamiyembro siya sa Simbahan.)

Human ang mga estudyante mo-report sa unsay ilang nakit-an, hangyoa sila sa pagsiksik sa Doktrina ug mga Pakigsaad 30:11, nga mangita og baruganan kon unsaon nato sa pagserbisyo sa Ginoo. Awhaga sila sa pagpahayag sa ilang nakat-unan sa usa ka “kon–niana” nga sentence.

Unsa nga baruganan ang inyong nakita sa bersikulo 11? (Ang mga estudyante mahimong mogamit og lain-laing mga pulong, apan kinahanglan nilang mapahayag ang mosunod nga baruganan: Kon moserbisyo kita sa Ginoo sa tanan natong kalag, niana Siya magauban kanato.)

Dapita ang mga estudyante sa pagpaambit og kasinatian diin ilang gibati ang Ginoo nga uban kanila samtang nagserbisyo sila Kaniya. (Mahimo ka usab nga mopaambit sa imong pagpamatuod kabahin niini nga baruganan.) Awhaga ang mga estudyante sa pagpangita og mga oportunidad sa pagpaduol sa Ginoo pinaagi sa pagserbisyo Kaniya.

Komentaryo ug Background nga Impormasyon

Doktrina ug mga Pakigsaad 30:5–7. Si Oliver Cowdery isip magtatambag ni Joseph Smith

Si Presidente Joseph Fielding Smith mitudlo:

“Si Peter [Whitmer Jr.] gipahibalo nga walay lain nga gitudlo nga mahimong magtatambag ni Oliver, gawas ni Joseph Smith. Busa nasabtan ni Peter nga iyang katungdanan ang pagdawat, dili ang paghatag, og tambag samtang anaa niini nga panaw. Ang kamatuoran nga si Oliver Cowdery kauban ni Joseph Smith sa pagtugyan sa Priesthood ug awtoridad sa tanang okasyon natural nga mihatag ngadto kaniya og awtoridad nga mobarug nga ikaduha sa Simbahan ngadto ni Joseph Smith sa pagdumala sa Simbahan” (Church History and Modern Revelation, 2 vols. [1953], 1:146–47).