Leksyon 52
Doktrina ug mga Pakigsaad 45:16–59
Pasiuna
Ang Biblia ug ang Basahon ni Mormon nanagna bahin sa mga kahimtang ug mga panghitabo nga mag-una sa Ikaduhang Pag-anhi ni Jesukristo. Sa wala madugay human nabalhin ang Simbahan gikan sa New York ngadto sa Ohio, si Joseph Smith nakadawat og pagpadayag nga narekord diha sa Doktrina ug mga Pakigsaad 45. Diha sa bahin sa pagpadayag nga naapil niini nga leksyon, mihatag ang Manluluwas og mga detalye bahin sa panahon sa wala pa ang Iyang Ikaduhang Pag-anhi. Gipalapdan Niya ang mga kamatuoran nga Iyang gitudlo sa Iyang mga disipulo didto sa Bukid sa mga Oliba (tan-awa sa Mateo 24).
Mga Sugyot alang sa Pagtudlo
Doktrina ug mga Pakigsaad 45:16–46
Gipadayag sa Manluluwas ang mga timailhan nga mag-una sa Iyang Ikaduhang Pag-anhi
Sugdi ang leksyon pinaagi sa pagpangutana sa mosunod:
-
Unsaon ninyo pagkahibalo kon hapit na mag-ulan?
Ipasabut nga ingon nga dunay mga timaan nga makatabang kanato aron mahibalo kon kanus-a mobundak ang ulan, dunay mga timaan usab, o mga timailhan, nga makatabang kanato aron mahibalo kon kanus-a mahitabo ang Ikaduhang Pag-anhi ni Jesukristo.
Isulat ang mosunod diha sa pisara: Ang mga Timailhan sa Ikaduhang Pag-anhi.
Ipasabut nga sa pagpadayag nga narekord diha sa Doktrina ug mga Pakigsaad 45, gihulagway sa Ginoo ang pipila sa mga timailhan nga makapaalerto kanato sa nagkaduol Niyang Ikaduhang Pag-anhi.
Dapita ang mga estudyante sa pagbasa og hilum sa Doktrina ug mga Pakigsaad 45:16–17, nga mangita sa unsay gipangutana sa mga disipulo sa Ginoo ngadto Kaniya ug unsay Iyang gisulti nga Iyang ipakita ngadto kanila.
-
Unsay gihangyo sa mga disipulo nga itudlo sa Ginoo ngadto kanila?
-
Unsay gisulti sa Ginoo nga Iyang ipakita ngadto sa Iyang mga disipulo? (Kon sa unsang paagi nga ang adlaw sa katubsanan moabut ug kon sa unsang paagi nga ang nagkatibulaag nga Israel mapahiuli.)
Aron matabangan ang mga estudyante nga mahibalo sa mga timailhan nga gisulti sa Ginoo nga mag-una sa Iyang Ikaduhang Pag-anhi, isulat ang mosunod nga mga reference diha sa pisara:
Ipares-pares ang mga estudyante, ug i-assign ang matag parisan sa usa sa mga tudling diha sa pisara. Hangyoa sila sa pagbasa og dungan sa mga bersikulo, nga mangita sa mga timailhan nga gihisgutan niadto nga mga bersikulo. Sa dili pa sila magsugod, mahimo nimong ipasabut nga ang pipila sa mga timailhan natuman na.
Human sa igong panahon, hangyoa ang matag parisan sa pag-report sa ilang nasuta ngadto sa klase. Dapita ang usa ka estudyante nga isulat diha sa pisara ang ilang mga tubag ubos sa ulohan nga “Ang mga Timailhan sa Ikaduhang Pag-anhi.” Kon gikinahanglan, gamita ang impormasyon diha sa sunod nga duha ka paragraph aron matabangan ang mga estudyante nga makasabut sa mga panagna.
Diha sa Doktrina ug mga Pakigsaad 45:18–24, atong mabasa ang bahin sa mga panagna nga natuman na. Ang mga panghitabo nga gipanagna niining mga bersikulo nahitabo sa wala madugay human sa kamatayon ug sa Pagkabanhaw sa Manluluwas. Hinumdumi nga ang bersikulo 20 nagpasabut sa templo nga gitukod ni Herodes ang Bantugan didto sa Jerusalem. Giguba kini sa mga Romano niadtong A.D. 70.
Diha sa Doktrina ug mga Pakigsaad 45:25–46, atong mabasa ang bahin sa mga panagna nga matuman niini nga dispensayon, sa dili pa ang Ikaduhang Pag-anhi sa Manluluwas. Niini nga tudling, ang mga pulong nga “ang mga panahon sa mga Hentil” (D&P 45:25, 28, 30) nagpasabut sa ebanghelyo nga unang gisangyaw ngadto sa mga Hentil sa ulahing mga adlaw. Si Elder Bruce R. McConkie sa Korum sa Napulog Duha ka mga Apostoles nagtudlo nga si Joseph Smith “anaa sa mga Hentil, buot ipasabut nga siya usa ka lumulupyo sa Hentil nga Nasud ug usab dili siya usa ka Judeo. … Sa pagkatinuod, ang ebanghelyo miabut sa katapusang mga adlaw diha sa mga panahon sa mga Hentil ug, sa kinatibuk-an, dili maadto sa mga Judeo hangtud nga ang kahingpitan sa Hentil moabut. (D. & P. 45:28–30.)” (Mormon Doctrine, 2nd ed. [1966], 311).
Dapita ang usa ka estudyante sa pagbasa og kusog sa Doktrina ug mga Pakigsaad 45:34. Hangyoa ang klase sa pagsunod, nga mangita kon unsay gibati sa mga disipulo sa panahon ni Jesukristo sa dihang Iya silang gisultihan bahin sa mga timailhan sa Iyang Ikaduhang Pag-anhi.
-
Unsa ang inyong bation kon kamo maghunahuna sa Ikaduhang Pag-anhi?
Ipasabut nga ang pagkat-on bahin sa mga timailhan sa Ikaduhang Pag-anhi makatabang kanato nga magpakabuhi nga walay pagpangagpas, kahadlok, o kabalaka. Dapita ang mga estudyante sa pagbasa og hilum sa Doktrina ug mga Pakigsaad 45:35–38 nga magkat-on kon nganong gihatag sa Ginoo kining mga timailhan. (Sa dili pa mobasa ang mga estudyante, mahimo nimong ipasabut nga sa Israel, ang kahoy nga igos mao ang katapusang kahoy nga mosalingsing og dahon sa tingpamulak ug mahitabo kini sa hinapus nga bahin sa maong panahon.)
-
Nganong importante man nga makaila kon “ang takna duol na,” o dili na kapugngan ang Ikaduhang Pag-anhi?
Isulat sa pisara ang Doktrina ug mga Pakigsaad 45:32, 39. Dapita ang mga estudyante sa pagbasa niining mga bersikulo uban sa ilang mga pares ug motino kon unsay buhaton sa mga sumusunod ni Jesukristo aron maandam alang sa Iyang pag-anhi.
-
Unsay atong mabuhat aron maandam alang sa pag-anhi sa Ginoo?
Isulat sa pisara ang mosunod nga dili kompleto nga pamahayag: Kon magbarug kita sa balaan nga mga dapit ug magbantay sa mga timailhan, kita …
-
Base sa unsay ato nang natun-an, unsaon ninyo sa pagkompleto kining pamahayag? (Ang mosunod usa ka paagi nga ang mga estudyante mahimong mokompleto sa baruganan: Kon magbarug kita sa balaan nga mga dapit ug magbantay sa mga timailhan, kita maandam alang sa Ikaduhang Pag-anhi sa Ginoo. Tiwasa pagsulat ang baruganan diha sa pisara.)
-
Sa unsang paagi kaha nga ang usa ka sumusunod ni Jesukristo “magbarug sa balaan nga mga dapit”? Asa ang ubang mga dapit sa inyong kinabuhi nga inyong makonsiderar nga “balaan nga mga dapit”?
Aron matabangan ang mga estudyante nga madugangan ang ilang panabut kon unsay gipasabut sa magbarug sa balaan nga mga dapit, dapita ang usa ka estudyante sa pagbasa og kusog sa mosunod nga pamahayag. Awhaga ang klase sa pagpaminaw kon unsay gipasabut sa magbarug sa balaan nga mga dapit:
“‘Ang balaan nga mga dapit’ mas dunay kalabutan kon giunsa sa usa ka tawo sa pagpakabuhi kay sa diin ang usa ka tawo nagpakabuhi. Kon nagpakabuhi kita nga takus sa pagpakig-uban sa Espiritu Santo, nan nagbarug kita sa balaan nga dapit. … Ang balaan nga dapit mao ang bisan unsa nga dapit diin matagamtaman sa usa ka tawo ang Espiritu sa Dios” (Doctrine and Covenants Student Manual, 2nd ed. [manwal sa Church Educational System, 2001], 196).
-
Unsaon nato pagbarug sa balaan nga mga dapit samtang gilibutan kita sa pagkadautan sa kalibutan?
Ikonsiderar ang pag-display sa hulagway nga Ang Ikaduha nga Pag-anhi (Libro sa mga Hulagway sa Ebanghelyo [2009], nu. 66; tan-awa usab sa LDS.org). I-summarize ang Doktrina ug mga Pakigsaad 45:44–46 pinaagi sa pagpasabut nga kadtong kinsa andam alang sa pag-anhi sa Manluluwas makakita Kaniya nga moabut diha sa himaya. Ang mga matarung nga namatay sa wala pa ang Iyang pag-anhi mabanhaw ug mobangon aron mosugat Kaniya. Ang matinud-anong mga Santos nga buhi dinhi sa yuta pagasakgawon aron sa pagsugat Kaniya (tan-awa sa D&P 88:96–98).
Doktrina ug mga Pakigsaad 45:47–59
Gipadayag sa Manluluwas ang mga timailhan ug mga katingalahan nga mag-una sa Iyang Ikaduhang Pag-anhi
I-display o dapita ang mga estudyante sa pagpakli sa Mapa 1 (“Physical Map of the Holy Land”) diha sa seksyon sa Bible Maps sa ilang mga kasulatan. Ipakita ang lokasyon sa Bukid sa mga Oliba duol sa Jerusalem, ug mipasabut nga ang Doktrina ug mga Pakigsaad 45:48 nagpasabut ngadto niining importante nga dapit sa Israel. Dapita ang usa ka estudyante sa pagbasa og kusog sa Doktrina ug mga Pakigsaad 45:48. Hangyoa ang klase sa pagsunod, nga mangita kon unsay mahitabo ngadto niini nga bukid ug sa yuta kon mobalik na ang Manluluwas.
Dapita ang usa ka estudyante sa pagbasa sa Doktrina ug mga Pakigsaad 45:49–50. Hangyoa ang klase sa pagsunod ug mangita kon unsa pa ang mahitabo atol sa Ikaduhang Pag-anhi.
-
Unsa man ang mahitabo sa kanasuran sa yuta atol sa Ikaduhang Pag-anhi?
-
Unsa kaha ang gipasabut sa “sila nga nagbiay-biay”?
Dapita ang mga estudyante sa pagbasa og hilum sa Doktrina ug mga Pakigsaad 45:51–53, nga mangita kon unsay reaksyon sa mga Judeo kon moabut na ang Ginoo ngadto sa Bukid sa mga Oliba.
-
Nganong magbakho man ang mga Judeo kon mobalik na ang Ginoo?
Aron matabangan ang mga estudyante nga makasabut sa dugang nga mga paagi sa pag-andam sa Ikaduhang Pag-anhi sa Ginoo, ipakita ang litrato nga Sambingay sa Napulo ka mga Dalagang Birhen (Libro sa mga Hulagway sa Ebanghelyo [2009], nu. 53; tan-awa usab sa LDS.org). Pangutan-a ang mga estudyante kon duna ba kanila ang makasaysay sa sambingay sa napulo ka mga dalagang birhen. Kon gikinahanglan, dapita ang usa ka estudyante sa pagbasa og kusog sa Mateo 25:1–13.
-
Sa unsang mga paagi nga ang lima ka mga dalagang birhen maalamon?
-
Sa unsang paagi nga kining sambingay may kalabutan ngadto sa Ikaduhang Pag-anhi sa Manluluwas?
Dapita ang mga estudyante sa pagbasa og hilum sa Doktrina ug mga Pakigsaad 45:56–57, nga mangita kon sa unsang paagi nga ang sambingay sa napulo ka mga dalagang birhen matuman.
-
Sa unsang paagi nga kining sambingay matuman sa Ikaduhang Pag-anhi?
Aron matabangan ang mga estudyante nga masabtan ang sambingay sa napulo ka mga dalagang birhen, dapita ang usa ka estudyante sa pagbasa og kusog sa mosunod nga pamahayag ni Elder Dallin H. Oaks sa Korum sa Napulog Duha ka mga Apostoles. Hangyoa ang klase sa pagpaminaw alang sa unsay girepresentaran sa napulo ka mga dalagang birhen:
“Ang lintunganay niining mao nga sambingay makahahadlok. Ang napulo ka mga dalagang birhen tataw nga nagrepresentar sa mga miyembro sa Simbahan ni Kristo, kay ang tanan giimbitar man sa kumbira sa kasal ug ang tanan nahibalo sa unsay gikinahanglan aron makasulod inig abut ang pamanhunon. Apan katunga lamang ang andam sa dihang siya miabut” (“Preparation for the Second Coming,” Liahona, Mayo 2004, 8).
-
Sumala sa bersikulo 57, unsay kinahanglan gayud natong buhaton aron maandam alang sa pag-anhi sa Ginoo? (Kinahanglang mahibaloan sa mga estudyante ang mosunod nga baruganan: Kon dawaton nato ang kamatuoran ug himoon ang Balaang Espiritu nga maoy atong giya, makabarug kita alang sa Ikaduhang Pag-anhi sa Manluluwas. Isulat sa pisara ang baruganan.)
Dapita ang mga estudyante sa paghunahuna bahin sa baruganan diha sa pisara ug mamalandong sa mga higayon sa dihang ilang gidawat ang kamatuoran o misunod sa Balaang Espiritu. Dapita ang pipila sa pagpakigbahin sa ilang mga kasinatian.
-
Sa unsa kaha nga paagi nga ang inyong mga kasinatian sa pagdawat sa kamatuoran ug pagsunod sa Balaang Espiritu makatabang kaninyo aron maandam sa pagsugat sa Ginoo atol sa Iyang Ikaduhang Pag-anhi?
Dapita ang mga estudyante sa paggamit sa mga baruganan nga gisulat diha sa pisara sa paghimo og tumong nga makatabang kanila nga maandam sa pag-anhi sa Manluluwas.
Dapita ang mga estudyante sa pagbasa og hilum sa Doktrina ug mga Pakigsaad 45:55, 58–59 aron sa pagdiskubre og dugang nga mga panalangin nga moabut niadtong kinsa andam ug magbarug sa adlaw sa Ikaduhang Pag-anhi. Hangyoa sila sa pag-report unsay ilang nakit-an.
Ipasabut nga si Presidente Boyd K. Packer sa Korum sa Napulog Duha ka mga Apostoles mihatag og gibug-aton sa kaimportante sa pagbaton sa Espiritu sa mga panahon sa kasamok. Dapita ang usa ka estudyante sa pagbasa og kusog sa mosunod nga pamahayag, ug dapita ang klase sa pagpaminaw sa gisulti ni Presidente Packer kon unsay mahimo natong bation bahin sa pagpuyo sa panahon nga mag-una sa Ikaduhang Pag-anhi:
“Nagpuyo kita sa mga panahon sa kasamok—mga panahon nga hilabihan gayud kasamok. Naglaum kita, nag-ampo kita, alang sa mas maayong mga adlaw. Apan dili kana maoy mahitabo. Ang mga panagna nagsulti kanato niana. Kita isip katawhan, isip mga pamilya, o isip mga indibidwal dili makalikay gikan sa mga pagsulay nga moabut. …
“Dili kita kinahanglang magpuyo sa kahadlok sa umaabut. Anaa kanato ang tanang rason nga magmaya ug gamayng rason nga mahadlok. Kon mosunod kita sa mga pag-aghat sa Espiritu, mahimo kitang luwas, bisan una pa ang mahitabo sa umaabut. Pakit-on kita kon unsay angayang buhaton” (“The Cloven Tongues of Fire,” Ensign, Mayo 2000, 8).
Hangyoa ang mga estudyante sa pagpakigbahin og butang nga ilang nakat-unan bahin sa Ikaduhang Pag-anhi gikan niini nga leksyon. Mahimo usab nimong ipakigbahin ang imong mga gibati.
Komentaryo ug Background nga Impormasyon
Doktrina ug mga Pakigsaad 45. Artikulo bahin sa Ikaduhang Pag-anhi
Si Elder M. Russell Ballard sa Korum sa Napulog Duha ka mga Apostoles mipresentar og usa ka komprehensibo nga kinatibuk-ang pagpasabut [overview] bahin sa mga panghitabo sa Ikaduhang Pag-anhi sa usa ka artikulo nga giulohan og “When Shall These Things Be?” Kini nga artikulo migawas sa Disyembre 1996 nga Ensign. Anaa kini sa LDS.org.
Doktrina ug mga Pakigsaad 45:25–28. “Ang mga panahon sa mga Hentil”
Si Elder Bruce R. McConkie sa Korum sa Napulog Duha ka mga Apostoles mipasabut:
“Ang mga panahon sa mga Hentil mao kanang panahon o higayon, kanang gitas-on sa panahon o katuigan, kon kanus-a ang ebanghelyo naadto sa mga Hentil base sa pribilehiyo. Sa panahon ni Jesus ang ebanghelyo gitanyag og una ngadto sa iyang kaliwat nga mga Judeo; lamang sa kaulahian gisangyaw kini ngadto sa mga Hentil. Sa atong panahon gipahiuli kini ngadto sa mga Hentil, buot ipasabut ngadto sa katawhan nga dili Judeo—katawhan, hinoon, kinsa sakop sa balay sa Israel. Gitudlo kini karon base sa pribilehiyo ngadto sa mga Hentil o katawhan nga dili Judeo, kay, sama sa giingon si Pablo, ‘ang katig-a anha sa usa ka bahin sa Israel, hangtud sa panahon nga mahisulod na ang hingpit nga gidaghanon sa mga Hentil.’ (Rom. 20. 11:25.)
“Ang pagpahiuli sa ebanghelyo nag-una sa pagtapos sa higayon sa Hentil ug sa pagpasiuna sa higayon sa Judeo. Ang atong mga pagpadayag nag-ingon nga human nga ang salin sa mga Judeo sa Jerusalem natibulaag sa tanang kanasuran, usa ka hitabo nga dugay nang nahitabo, ‘sila pagapundukon pag-usab.’ Hinoon, sila magpabilin diha sa ilang kahimtang sa pagkatibulaag ‘hangtud ang mga panahon sa mga Hentil matuman. … Ug kon ang mga panahon sa mga Hentil moabut, usa ka kahayag motungha taliwala kanila nga naglingkod sa kangitngit, ug mao kini ang kahingpitan sa akong ebanghelyo. Apan sila [nagpasabut sa nagkatibulaag nga mga Judeo] wala modawat niini; kay wala sila makakita sa kahayag, ug sila mitalikod sa ilang mga kasingkasing gikan kanako tungod sa mga lagda sa mga tawo. Ug niana nga kaliwatan ang mga panahon sa mga Hentil matuman.’ (D&P 113:4–6.) Nga ang mga Judeo, ang pipila kanila, nagsugod na karon sa pagtuo sa gipahiuli nga ebanghelyo ug mibalik na ngadto sa ilang tinuod nga Mesiyas nahibaloan na kaayo. Ang mga panahon sa mga Hentil sa dili madugay matuman, ug ang mga panahon sa mga Judeo sa makausa pa moabut na usab” (The Mortal Messiah: From Bethlehem to Calvary, 4 vols. [1979–81], 1:97).
Doktrina ug mga Pakigsaad 45:35–38. “Ang takna duol na”
Si Elder Neal A. Maxwell sa Korum sa Napulog Duha ka mga Apostoles mipasabut nga ang mga panghitabo nga mag-una sa Ikaduhang Pag-anhi mahimong dali nga moabut:
“Unsa pa kadugay sa dili pa ang Ikaduhang Pag-anhi? Kay ang mga anghel, mga indibidwal nga daghan unta og nahibaloan , wala masayud sa adlaw o sa oras (unsa kaha ang tuig?), sigurado walay usa kanato ang nasayud. Bisan pa man niana, bisan kon nahikawan kita sa katukma, makaobserbar gihapon kita sa mga dahon sa kahoy nga igos ug sa gipanagna nga mga timailhan sa mga panahon. Unang butang nga ikonsiderar, klaro nga dunay daghan pa kaayong mahitabo: una, ang ebanghelyo isangyaw sa matag nasud alang sa usa ka saksi (tan-awa sa Mateo 24:14). Hinoon, daghang panghitabo ang mahimong mahitabo sulod sa mubong panahon (pananglitan, ang pag-abli sa mga ganghaan ngadto sa kanasuran nga karon sirado)” (That Ye May Believe [1992], 7).