Doktrina ug mga Pakigsaad 47–48

Pasiuna

Niadtong Marso 1831, hapit sa usa ka tuig human sa pagka-organisar sa Simbahan, nadawat ni Propeta Joseph Smith ang mga pinadayag nga narekord karon isip mga seksyon 47 ug 48 sa Doktrina ug mga Pakigsaad. Sa wala pa kini nga higayon, si Oliver Cowdery nahimo isip usa ka tigsaysay [historian] ug tigtala [recorder] sa Simbahan. Niini nga tahas, nagtipig siya og usa ka rekord sa mga pagpadayag nga nadawat sa Propeta. Hinoon, nagmisyon si Oliver Cowdery sukad pa niadtong Oktubre 1830 ug wala makapadayon isip usa ka historian ug recorder. Sa pinadayag nga narekord diha sa Doktrina ug mga Pakigsaad 47, gitawag sa Ginoo si John Whitmer nga mopuli ni Oliver niini nga posisyon. Atol niining panahona, ang mga Santos sa Ohio nagtinguha usab og direksyon kon unsaon pagtabang ang mga miyembro sa Simbahan nga milalin gikan sa New York. Sa pinadayag nga narekord karon diha sa Doktrina ug mga Pakigsaad 48, gimanduan sa Ginoo ang mga Santos sa pagpakigbahin sa ilang yuta ngadto niadtong nanginahanglan ug sa pag-andam sa pagtukod sa pundasyon sa Zion.

Mga Sugyot alang sa Pagtudlo

Doktrina ug mga Pakigsaad 47

Gitudlo sa Ginoo si John Whitmer sa pagrekord sa kasaysayan sa Simbahan

Hangyoa ang mga estudyante sa paghunahuna og talagsaon nilang mga sitwasyon nga ilang gibati nga angayang hinumduman. (Pananglitan, mahimong maghunahuna sila og mga kalihokan sama sa usa ka pagpahinungod sa templo o miting sa Simbahan, o mahimong mamalandong sila og usa ka higayon sa dihang nakadawat sila og tubag sa pag-ampo o mibati sa presensya sa Espiritu Santo.) Dapita ang pipila ka estudyante sa pagpakigbahin niini nga mga kasinatian. Ipangutana ngadto sa mga estudyante ang mosunod:

Nganong makahuluganon man kini nga kasinatian nganha ninyo?
Ngano kaha nga importante nga mahinumduman kini nga kasinatian?
Sa unsang paagi nga ang rekord niining kasinatian makapanalangin sa inyong kaliwatan?

Dapita ang usa ka estudyante sa pagbasa og kusog sa seksyon sa pasiuna sa Doktrina ug mga Pakigsaad 47. Hangyoa ang klase sa pagsunod, mangita kon unsay gipabuhat sa Ginoo sa Iyang mga tawo. Dayon dapita ang mga estudyante sa pagbasa og hilum sa Doktrina ug mga Pakigsaad 47:1–3, ug mangita og dugang detalye bahin sa calling ni John Whitmer. Hangyoa ang mga estudyante sa pag-report sa unsay ilang nakat-unan. (Mahimo nimong pahinumduman ang mga estudyante nga sa miaging pinadayag, ang Ginoo miingon, “Adunay talaan nga gitipigan diha kaninyo” [D&P 21:1]. Ipasabut nga sa Simbahan karon, ang Unang Kapangulohan mitawag og usa ka Church Historian ug Recorder [kasagaran gipasabut nga Church Historian] ug mopresentar kaniya aron ma-sustain.)

Ngano kaha nga importante nga marekord ang kasaysayan sa Simbahan?
Unsa ang pipila ka istorya gikan sa kasaysayan sa Simbahan nga labihan ka makapadasig kaninyo?

Dapita ang usa ka estudyante sa pagbasa og kusog sa mosunod nga pamahayag ni Elder Marlin K. Jensen sa Seventy, kinsa miserbisyo isip Church Historian gikan niadtong 2005 hangtud sa 2012:

“Adunay lain nga mahinungdanong mga istorya sa atong kasaysayan nga angayang mahibaloan ug itudlo sa simbahan ug diha sa pinuy-anan. Ang mga leksyon sa Kirtland, mga pagsulay sa Missouri, ang mga kalampusan ug ang katapusan nga pagpapahawa sa mga Santos gikan sa Nauvoo, ug ang pagbaktas paingon sa kasadpan sa mga pioneer mao ang mga istorya nga nakadasig sa mga Santos sa Ulahing mga Adlaw sa matag kayutaan ug pinulongan. Apan adunay mga sama ka mahinuklugong mga istorya mahitungod sa pagtubo ug pag-uswag sa Simbahan ug ang sangputanan sa ebanghelyo sa mga kinabuhi sa ordinaryo nga mga miyembro sa matag nasud nga natandog sa gipahiuli nga ebanghelyo. Kini nagkinahanglan nga marekord ug ingon man matipigan.

“… Kadaghanan sa pinakaimportante nga mga istorya sa Simbahan ang nalakip sa personal ug mga kasaysayan sa pamilya, ug kini ang mga kabilin sa atong indibidwal ug mga kabilin sa pamilya” (“Kinahanglan nga Adunay Talaan nga Gitipigan diha Kaninyo,” Liahona, Dis. 2007, 29).

Ngano kaha nga ang personal ug pamilya nga mga kasaysayan mahinungdanon man?

I-refer ngadto sa mga kasinatian nga nahinumduman sa mga estudyante sa pagsugod sa klase. Hangyoa sila sa paghunahuna nga ang ilang mga anak ug mga apo nagbasa sa ilang personal nga mga istorya bahin niadtong mga kasinatian. Dapita ang mga estudyante sa pagpamalandong sa mosunod nga mga pangutana:

Unsa nga bahin sa kasinatian ang gusto ninyong hatagan og gibug-aton? Unsay gusto ninyong mabati ug mahibaloan sa inyong pamilya isip resulta sa pagbasa sa inyong istorya?

Ipasabut nga ang mga baruganan nga gisunod ni John Whitmer isip Church Historian ug Recorder magamit usab sa atong mga kasaysayan nga personal ug sa pamilya. Dapita ang mga estudyante sa pagbasa og hilum sa Doktrina ug mga Pakigsaad 47:4 aron mahibaloan kon unsay gisaad sa Ginoo kon magmatinud-anon si John Whitmer sa iyang mga paningkamot.

Unsa ang gisaad sa Ginoo ngadto ni John Whitmer? (Ang Ginoo misaad nga ang Maghuhupay—ang Espiritu Santo—motabang kaniya sa iyang paningkamot sa pagsulat sa kasaysayan sa Simbahan.)
Sa unsang paagi nga kini dunay kalabutan sa atong mga paningkamot sa pagtipig og mga kasaysayan nga personal ug sa pamilya? (Tabangi ang mga estudyante nga mahibalo sa mosunod nga baruganan: Kon kita matinud-anon sa atong mga paningkamot sa pagtipig og personal ug pamilya nga mga kasaysayan, ang Espiritu Santo motabang kanato. Mahimo nimong isulat sa pisara kini nga baruganan.)
Sa unsa kaha nga paagi nga ang Espiritu Santo motabang sa usa ka tawo samtang nagtipig siya og personal ug pamilya nga kasaysayan?

Samtang naghisgot ang mga estudyante niini nga pangutana, tabangi sila nga makita nga ang Espiritu Santo makapahinumdom kanato sa mga butang (tan-awa sa Juan 14:26) ug makatabang kanato nga masulat ang mga panghitabo ug mga sitwasyon sa paagi nga makapanalangin sa mga sakop sa pamilya ug sa uban.

Awhaga ang mga estudyante sa pagpangayo og tabang sa Espiritu Santo samtang magtipig sila sa ilang personal ug pamilya nga mga kasaysayan.

Doktrina ug mga Pakigsaad 48

Gisugo sa Ginoo ang mga Santos sa Ohio sa pagtabang niadtong nagagikan sa New York

Hangyoa ang mga estudyante sa paghunahuna nga ang mga Santos sa usa ka layo nga dapit kinahanglang mobakwit gikan sa ilang mga panimalay. Gihangyo sa mga lider sa Simbahan ang mga pamilya sa mga estudyante sa paghatag og pagkaon ug kapuy-an alang sa pipila ka nawad-an og kapuy-an nga mga pamilya sulod sa pipila ka bulan.

Unsa kaha ang mga pangutana ug mga problema ninyo ug sa inyong pamilya bahin niini nga hangyo?
Unsa kaha nga mga problema ug mga pagbati ang mabatunan niadtong mobalhin sa inyong panimalay?

Dapita ang mga estudyante sa pagpakli ngadto sa Mapa 3 (“Ang New York, Pennsylvania, ug Ohio nga mga Dapit sa USA”) diha sa seksyon sa mga Mapa sa Kasaysayan sa Simbahan sa ilang mga kasulatan. Hangyoa sila sa pagtultol sa Fayette, New York, ug Kirtland, Ohio, ug sa pagtino sa gibana-bana nga gilay-on tali niining mga siyudad (mga 250 ka milya o 400 ka kilometro). Pahinumdumi ang mga estudyante nga niadtong Disyembre 1830, gimanduan sa Ginoo ang mga Santos sa New York nga mamalhin ngadto sa Ohio (tan-awa sa D&P 37:3).

Dapita ang usa ka estudyante sa pagbasa og kusog sa Doktrina ug mga Pakigsaad 48:1–3. Hangyoa ang klase sa pagsunod ug sa pagpangita kon unsay gipabuhat sa Ginoo sa mga Santos sa Ohio alang sa mga miyembro sa Simbahan nga mamalhin ngadto sa rehiyon. Dayon hangyoa ang mga estudyante sa pag-report kon unsay ilang nakat-unan.

Unsa ang gisugo sa Ginoo nga buhaton sa mga Santos didto sa Ohio? (Gimanduan Niya kadtong dunay yuta nga mopakigbahin niini sa mga Santos nga mamalhin ngadto sa dapit.) Unsa nga baruganan ang atong makat-unan gikan niini nga sugo? (Ang mga estudyante kinahanglang mamalandong sa mosunod nga baruganan: Gimanduan sa Ginoo ang mga Santos sa Ulahing mga Adlaw nga ipakigbahin kon unsay anaa kanila ngadto sa mga nanginahanglan. Mahimong makatabang ang pagpasabut nga dili tanang mga Santos didto sa Ohio adunay yuta nga ipakigbahin ug ang pipila ka miyembro gikan sa New York kinahanglang mopalit og kaugalingon nilang yuta.)
Unsa ang pipila ka paagi nga kita mahimong mopakigbahin sa unsay anaa kanato ngadto sa uban?

Hangyoa ang mga estudyante nga ipakigbahin ang mga kasinatian nga ilang nasinati sa dihang nakasaksi sila og mga tawo nga mipakigbahin niadtong nanginahanglan. Mahimo usab nimo silang dapiton sa paghulagway sa mga panahon sa dihang nakabenepisyo sila tungod sa kamanggihatagon ug pagserbisyo sa usa ka tawo.

Sa paghatag og usa ka ehemplo bahin sa pagtabang niadtong nanginahanglan, hangyoa ang usa ka estudyante sa pagbasa sa mosunod nga pamahayag ni Presidente Thomas S. Monson bahin sa usa niya ka kasinatian sa iyang klase sa Primary sa dihang bata pa:

“Duna mi proyekto nga magtigum og mga sinsiyo para sa usa ka dako kaayo nga Christmas party. Si Sister Gertsch mihimo og rekord sa among paglambo. Isip mga batang lalaki nga ganahan kaayong mokaon among gihunahuna ang kwartang natigum ngadto sa mga cake, biskwit, pie, ug ice cream. Ang party dako gyud unya nga kalihokan. Wala pa gyud ni mahitabo kaniadto nga ang among mga magtutudlo misugyot niini nga kalihokan.

“Ang mga bulan sa ting-init hinay-hinay nga nahimong tinglarag. Ang tinglarag ngadto sa ting-tugnaw. Ang among tumong sa party natuman. Ang klase mitubo sa espirituhanong paagi. Ang diwa sa panagdait mipatigbabaw.

“Walay usa namo ang makalimot niadtong masulub-on nga adlaw sa dihang ang among pinalanggang magtutudlo misulti kanamo nga ang inahan sa usa sa among classmate namatay. Naghunahuna kami sa among kaugalingong mga inahan ug unsa usab sila ka bililhon ngari kanamo. Naguol gyud kami kaayo para kang Billy Devenport sa iyang dako kaayong kaguol.

“Ang leksyon niini nga Dominggo gikan sa basahon sa Mga Buhat, kapitulo 20, bersikulo 35: ‘Magahinumdom kamo sa mga pulong ni Ginoong Jesus, nga siya gayud mao ang nagsulti, Labi pang bulahan ang paghatag kay sa pagdawat.’ Sa katapusan sa presentasyon sa maayo kaayong pagkaandam nga leksyon, si Lucy Gertsch mikomentaryo sa panalapi nga sitwasyon sa pamilya ni Billy. Nahitabo kini atol sa Dakong Depresyon, ug lisud ang kwarta. Uban sa malaumong panan-aw, nangutana siya: ‘Ganahan ba mong mosunod niining pagtulun-an sa Ginoo? Unsa kaha og atong gamiton ang atong kwarta sa party ug, isip usa ka klase, ihatag ngadto sa pamilya Devenport isip pagpakita sa atong gugma?’ Ang desisyon nauyunan sa tanan. Giihap namog maayo ang kada sinsiyo ug mibutang sa tanang kwarta sa dakong sobre. Usa ka nindot nga kard ang gipalit ug gisulatan sa among mga ngalan.

“Kining yano nga buhat sa kalooy nakapahiusa namo” (“Ang Imong Personal nga Impluwensya,” Liahona, Mayo 2004, 21–22).

Unsay atong makat-unan gikan niini nga istorya? Sa unsang paagi nga ang pagkamabination ug pagserbisyo makapanalangin sa kinabuhi sa tighatag ingon man usab sa tigdawat?

Hangyoa ang mga estudyante sa pagpakigbahin og kasinatian nga ilang nasinati sa dihang sila nakatabang (o nakakita sa uban nga mitabang) niadtong nanginahanglan. Awhaga ang mga estudyante sa paghunahuna og usa ka paagi nga makatabang sila og tawo sa sunod nga semana.

I-summarize ang Doktrina ug mga Pakigsaad 48:4–6 pinaagi sa pagpasabut nga gusto sa Ginoo nga ang mga Santos mangandam sa pagpalit og yuta sa higayon nga Iyang ipadayag ang lokasyon sa siyudad sa Zion, o sa Bag-ong Jerusalem. Gimanduan sa Ginoo ang mga Santos sa pagtigum sa tanang kwarta kutob sa ilang mahimo agig pagpangandam alang sa pagtukod sa pundasyon niana nga siyudad (tan-awa sa D&P 48:4–6). Sultihi ang mga estudyante nga makakat-on pa sila og dugang bahin sa mga paningkamot sa mga Santos sa pag-establisar sa siyudad sa Zion sa umaabut nga mga leksyon.

Komentaryo ug Background nga Impormasyon

Doktrina ug mga Pakigsaad 47:1. “Pagbuhat og usa ka regular nga kasaysayan”

Gihulagway ni Propeta Joseph Smith ang resulta sa pagkapakyas sa pagrekord og talagsaong mga panghitabo sa kasaysayan sa Simbahan:

“Usa kini ka kamatuoran, kon anaa nako karon, ang matag desisyon nga nahimo diha sa importante nga mga butang sa doktrina ug sa mga katungdanan sukad sa pagsugod niini nga buhat, dili ko kini ibaylo sa bisan unsang kantidad sa kwarta; apan among gibaliwala ang pagsulat og mga minutes sa maong mga butang, naghunahuna, tingali, nga dili gayud kini makabenepisyo kanamo pagkahuman niana; diin, kon aduna pa kami niini karon, makadesisyon sa hapit tanang punto sa doktrina nga mahimong pagahisgutan. Apan gibaliwala kini, ug karon dili kami makapamatuod ngadto sa Simbahan ug sa kalibutan, bahin sa mahinungdanon ug mahimayaong mga pagpakita nga nahimo ngari kanamo uban sa matang sa gahum ug awtoridad nga amo untang madawat, kon duna pa kami niining mga butanga nga mamantala sa laing nasud” (sa History of the Church, 2:198–99). (Tan-awa usab sa Doctrine and Covenants Student Manual, 2nd ed. [manwal sa Church Educational System, 2001], 103.)

Doktrina ug mga Pakigsaad 47. Unsa ang calling sa Church Historian ug Recorder?

Si Elder Marlin K. Jensen sa Seventy, kinsa miserbisyo isip Church Historian ug Recorder gikan niadtong 2005 hangtud sa 2012, mipasabut:

“Ang trabaho sa tigsaysay ug tigsulat sa Simbahan sa kasagaran mao ang pagtipig sa talaan. Naglakip kini sa pagtigum ug pagtipig sa mga kapanguhaan sa kasaysayan sa Simbahan, ang pagsulat sa mga ordinansa, ug sa pagpangolekta og mga importante nga mga hilisgutan sa miting. Ang mga kasulatan nagsugyot usab nga adunay usa ka responsibilidad sa pagsiguro nga ang mga rekord gigamit ‘alang sa kaayohan sa simbahan, ug alang sa nagtubo nga mga kaliwatan’ (D&P 69:8).

“Ang mga buluhaton sa tigsaysay ug tigsulat nagsuporta sa usag usa ug gani usahay dili mailhan sa usag usa. Mao nga sa akong hunahuna, sa unang mga adlaw sa Simbahan, usahay usa ka tigsulat ang itudlo ug usahay usa ka tigsaysay ug ngano nga sa karong panahona ang mga buluhaton gihiusa sa usa ka katungdanan” (“Kinahanglan nga Adunay Talaan nga Gitipigan diha Kaninyo,” Liahona, Dis. 2007, 26).

Doktrina ug mga Pakigsaad 48:6. “Pinaagi sa kapangulohan ug sa obispo sa simbahan”

Ang Doktrina ug mga Pakigsaad 48:6 naglakip sa mga pulong nga “pinaagi sa kapangulohan ug sa obispo sa simbahan.” Hinoon, sa dihang gihatag ang pagpadayag, ang Unang Kapangulohan wala pa maorganisar. Ang pinakaunang manuskrito niini nga pagpadayag naglangkob sa mga pulong nga “pinaagi sa Obispo ug mga Anciano sa Simbahan” (tan-awa sa Documents, Volume 1: July 1828–June 1831, vol. 1 sa Documents series sa The Joseph Smith Papers [2013], 288). Ang mga pulong giusab human naorganisar ang Unang Kapangulohan. Ang maong mga kausaban gihimo usahay samtang nagkadako ang Simbahan ug samtang nagkalapad ang organisasyon sa priesthood sumala sa pagpadayag.