Doktrina ug mga Pakigsaad 36–40; Didto sa Ohio (Unit 9)

Materyal sa Pagpangandam alang sa Home-Study Teacher

Summary sa Daily Home-Study nga mga Leksyon

Ang mosunod nga summary sa mga panghitabo, mga doktrina, ug mga baruganan nga nakat-unan sa mga estudyante samtang gitun-an nila ang Doktrina ug mga Pakigsaad 36–40 ug ang leksyon nga “Didto sa Ohio” (unit 9) dili tuyo nga itudlo isip kabahin sa imong leksyon. Ang leksyon nga imong itudlo magtutok lamang sa pipila niining mga doktrina ug mga baruganan. Sunda ang mga pag-aghat sa Balaang Espiritu samtang magkonsiderar ka sa mga panginahanglan sa imong mga estudyante.

Day 1 (Doktrina ug mga Pakigsaad 36–37)

Pinaagi sa usa ka pagpadayag ngadto ni Edward Partridge sa wala pa ang iyang bunyag, nakat-unan sa mga estudyante nga ang mga naghupot sa priesthood gitawag sa pagsangyaw sa ebanghelyo ug kinahanglan nga mahimong limpyo.

Day 2 (Doktrina ug mga Pakigsaad 38)

Samtang gitun-an sa mga estudyante ang mga sugo sa Ginoo alang sa mga Santos sa pagpundok didto sa Ohio, ilang nadiskubrihan nga ang Ginoo nasayud sa tanang butang, nga Siya makapasidaan kanato sa mga kakuyaw, ug nga Siya naghatag kanato og mga sugo alang sa pagpanalipod kanato. Nakat-unan usab nila nga ang Ginoo misaad sa mga Santos nga kon sila mosunod sa Iyang mga sugo sila maandam ug dili mahadlok.

Day 3 (Doktrina ug mga Pakigsaad 39–40)

Ang Ginoo migiya sa usa ka ministro sa Protestante nga ginganlan og James Covel aron magpabunyag ug sa pagsangyaw sa kahingpitan sa ebanghelyo. Gikan niining instruksyon nakat-unan sa mga estudyante nga kon kita modawat ni Jesukristo, Siya mohatag kanato og gahum nga mahimong Iyang mga anak nga lalaki ug Iyang mga anak nga babaye. Nadiskubrihan usab sa mga estudyante nga ang gisaad nga mga panalangin sa Ginoo mag-agad sa atong pagpatalinghug ngadto sa Iyang tingog. Si James Covel misalikway sa pagdapit sa Manluluwas nga magpabunyag. Nakat-unan sa mga estudyante nga ang kahadlok ug ang mga kabalaka sa kalibutan ang makaingon nga kita mosalikway sa pulong sa Dios.

Day 4 (Didto sa Ohio)

Kini nga leksyon naghatag sa mga estudyante sa kinatibuk-ang pagpasabut sa kasinatian sa mga Santos didto sa Ohio gikan niadtong 1831 hangtud 1838. Nakat-unan sa mga estudyante nga misaad ang Ginoo sa mga Santos nga Siya mobutyag sa Iyang balaod ug motuga kanila og gahum gikan sa kahitas-an. Agig dugang, ang Ginoo namahayag nga Siya motawag sa mga Santos sa pagsangyaw sa ebanghelyo sa tibuok kalibutan. Nakat-unan sa mga estudyante kon sa unsang paagi nga ang Ginoo mihatag sa pagpadayag ngadto sa laing pagpadayag diha sa mga Santos ug mituman sa Iyang mga saad bisan sa oposisyon ug pagpanggukod. Nakat-unan usab nila ang mahitungod sa pipila ka dili maayong panghitabo ug oposisyon nga gisagubang sa mga Santos samtang anaa sa Ohio.

Pasiuna

Ang Ginoo dili basta lang mitudlo sa mga Santos sa pagbalhin ngadto sa Ohio, mitambag usab Siya kanila kon unsaon sa pagtratar ang usag usa. Niini nga leksyon ang mga estudyante makakat-on bahin sa mando ni Jesukristo sa paghiusa ug mohatag og bili sa uban sama nga kita mihatag og bili sa atong kaugalingon.

Mga Sugyot alang sa Pagtudlo

Doktrina ug mga Pakigsaad 36–38

Ang mga Santos gisugo nga magkahiusa

Bahina ang klase ngadto sa duha ka grupo ug hatagi ang matag grupo og nagkadaiyang mga butang nga mahimong magamit sa pagtukod (kini mahimong maglakip sa gagmayng mga kahoy, mga paper cup, o gagmayng basiyo nga mga kahon). Siguroa nga ang usa ka grupo makadawat og mas daghang butang o mas dagko nga butang kay sa laing grupo.

Isulat ang mosunod diha sa pisara: Magpabarug og tore nga taas kutob sa inyong mahimo gamit kining mga butanga. Ayaw pagsulti og bisan unsa bahin niining kalihokan nga usa ka kompetisyon o magpasabut sa paghimo og duha ka mga tore. Lagmit magtuo ang mga estudyante nga ang duha ka grupo makigkompetinsya sa usag usa. Kon sila mangutana kon kinahanglan ba silang magtinabangay o isip managlahi nga grupo, isulti lang pag-usab ang tumong: Sila kinahanglang magpabarug og tore nga taas kutob sa ilang mahimo.

Hatagi ang mga estudyante og usa ka minuto sa pagkompleto sa tahas. Human sa kalihokan hangyoa sila sa pagtimbang-timbang kon si kinsa ang “midaug.” Human makapaambit ang mga estudyante sa ilang mga opinyon, pahibaloa sila nga aron matino kon unsa sila kamaayo nga milampus niining kalihokan, kinahanglan silang magtuon sa tambag nga gihatag sa Ginoo sa mga Santos samtang nangandam sila sa pagbalhin ngadto sa Ohio. Dapita ang mga estudyante sa pagpangita og mga panabut ngadto niining kalihokan ingon man sa ilang mga kinabuhi samtang sila magtuon sa mga gisugo sa Ginoo ngadto sa nag-unang mga Santos.

Hangyoa ang mga estudyante sa paghinumdom kon nganong ang Ginoo mimando sa mga Santos sa pagpundok didto sa Ohio. (Kon gikinahanglan, awhaga sila sa pagribyu sa ilang mga nasulat sa Doktrina ug mga Pakigsaad 37–38 ug sa ilang mga scripture study journal.) Ang mga tubag sa mga estudyante kinahanglang maglakip og mga pakisayran sa mga kakuyaw nga giatubang sa mga Santos didto sa New York ingon man ang mga panalangin nga gisaad nga ihatag sa Ginoo ngadto sa Iyang katawhan kon sila magpundok didto sa Ohio.

Ipasabut nga samtang ang Ginoo mitudlo sa mga Santos kalabut sa ilang pagbalhin ngadto sa Ohio, mihatag Siya og tambag kanila kon unsaon nila sa pagtagad ang usag usa. Dapita ang mga estudyante sa pagbasa og hilum sa Doktrina ug mga Pakigsaad 38:23–25, nga mangita sa mga pulong nga nagtudlo kon unsaon nato sa pagtagad ang ubang mga tawo.

Giunsa pagsulti sa Ginoo unsaon nato sa pagtagad ang uban?
Unsa kaha ang gipasabut sa pagtamud sa atong mga kaigsoonan sama sa atong kaugalingon? (Human makatubag ang mga estudyante, isulat ang mosunod nga baruganan sa pisara: Kita angayang mohatag og bili sa uban sama sa atong paghatag og bili sa atong kaugalingon.)
Unsa ang mahitabo kon ang mga tawo maghunahuna nga sila mas bililhon, o mas maayo, kay sa uban?
Unsa ang mga panalangin nga mahimong moabut kanato isip Simbahan ug indibidwal kon dili nato ikonsiderar ang atong kaugalingon nga mas bililhon kay sa uban?

Guniti ang usa ka nindot nga panapton ug usa ka nuog. Pangutan-a ang mga estudyante hain nga materyal nga gusto nilang masul-ob. Ipasabut nga aron matabangan ang mga estudyante nga makasabut niining baruganan, ang Ginoo mihatag kanila og usa ka sambingay.

Dapita ang usa ka estudyante sa pagbasa og kusog sa Doktrina ug mga Pakigsaad 38:26. Hangyoa ang ubang mga estudyante sa pagsunod, nga mangita kon giunsa sa pagtagad sa tawo ang iyang mga anak nga lalaki dinhi niining sambingay.

Unsay inyong bation kon kamo ang anak nga nakadawat sa mga nuog?
Unsa kaha ang buhaton sa anak nga nakadawat sa kupo aron molambo kining sitwasyon? (Mahimo niyang ipaambit kon unsa ang anaa kaniya ngadto sa anak nga nakadawat og diyutay.)
Unsa kaha ang mensahe sa Ginoo dinhi niining sambingay ngari kanato?

Hangyoa ang mga estudyante sa pagbasa og hilum sa Doktrina ug mga Pakigsaad 38:27, nga mangita sa baruganan nga gusto sa Ginoo nga atong masabtan gikan niini nga sambingay. Isulat ang mosunod nga baruganan diha sa pisara duol sa unang baruganan nga imong gisulat: Kon kita dili magkahiusa, dili kita katawhan sa Ginoo. Mahimo usab nimong isugyot nga markahan sa mga estudyante ang mga pulong diha sa ilang mga kasulatan nga nagtudlo niining baruganan.

Diha sa konteksto sa bersikulo 27, unsa ang gipasabut sa “paghiusa”? (Ang mahiusa sa uban ug sa Ginoo diha sa pagkamatarung.)
Sa unsang paagi kaha nga ang paghatag og bili sa uban sama sa paghatag nato og bili sa atong kaugalingon makatabang kanato nga mahiusa sa usag usa? Sa unsang paagi kaha nga kini makatabang kanato nga mahiusa sa Ginoo?
Ngano kaha nga dili man kita mahimong katawhan sa Ginoo kon kita wala magkahiusa?

Ipasabut nga ang unang mga miyembro sa Simbahan kinsa gitawag sa pagpundok ngadto sa Ohio miabut gikan sa nagkadaiyang mga background. Ang pipila nanag-iya og malampuson nga mga kaumahan ug tinahud sa ilang mga komunidad, samtang ang uban adunay gamay lang nga kabtangan ug gikonsiderar nga anaa sa mas ubos nga estado sa katilingban.

Sa unsa kaha nga paagi nga ang mga baruganan nga anaa sa pisara nakapanalangin sa mga Santos samtang sila nanagpundok uban sa mga miyembro sa Simbahan didto sa Ohio?

I-refer ngadto sa kalihokan sa pagtukod og tore gikan sa sinugdanan sa leksyon. Hangyoa ang mga estudyante nga sublion sa pagsulti unsa ang tumong (sa pagtukod og taas nga tore kutob sa ilang mahimo).

Napabarug ba nato ang tore sa ingon kataas kutob sa atong mahimo? (Kon ang duha ka grupo motipon sa ilang mga piraso, mahimo unta nila. Kon ang mga grupo nag-iyahay sa pagtrabaho, mahimo silang moangkon nga napabarug nila ang tore sama kataas kutob sa ilang mahimo sa unsay anaa nila.)
Base sa tambag sa Ginoo ngadto sa mga Santos sa Doktrina ug mga Pakigsaad 38, unsa ang labing maayong paagi sa pagpabarug og usa ka taas nga tore kutob sa atong mahimo? (Sa pagpundok isip usa ka grupo ug tipunon ang unsay nahatag kanato sa pagpabarug og usa ka tore.)
Unsa ang pipila ka mga sitwasyon sa kinabuhi diin mahimo kitang matintal sa paghunahuna sa atong kaugalingong interes kay sa magtinguha sa pagpalig-on ug pagbayaw niadtong anaa sa atong palibut?

Dapita ang usa ka estudyante sa pagbasa og kusog sa mosunod nga pamahayag ni Presidente Henry B. Eyring sa Unang Kapangulohan. Hangyoa ang klase sa pagpaminaw kon sa unsang paagi nga ang sugo nga mahiusa dunay kalabutan sa sugo sa Dios alang sa Iyang katawhan sa pagpundok. Mahimo nimong andamon ang mga kopya niining pamahayag aron ang ubang mga estudyante makasunod.

“Kita nasayud gikan sa kasinatian nga ang hingpit nga kalipay moabut kon kita panalanginan og panaghiusa. … Ang tinguha sa [Langitnong Amahan] mao ang paghatag kanato nianang sagrado nga pangandoy nga magkahiusa gikan sa Iyang gugma alang kanato.

Siya dili mahimong mohatag niini ngari kanato isip mga indibidwal. Ang hingpit nga kalipay sa panaghiusa nga gusto Niya ihatag kanato dili alang sa mga indibidwal lamang. Kita kinahanglan nga motinguha niini ug mopasarang alang niini uban sa lain. Mao nga dili ikatingala nga ang Dios miawhag kanato sa pagpundok aron Siya makapanalangin kanato. Iyang gusto nga kita magkapundok diha sa pamilya. Siya mi-establisar og mga klase, mga ward, ug mga branch ug misugo kanato sa pagtigum kanunay. Diha niadto nga mga panagpundok, nga gipahiangay sa Dios alang kanato, anaa ang atong dakong oportunidad. Kita mahimong mag-ampo ug sa pagbuhat alang sa panaghiusa nga maghatag kanato og hingpit nga kalipay ug mopadako sa atong gahum sa pagserbisyo” (“Ang Atong mga Kasingkasing Nabugkos diha sa Panaghiusa,” Ensign o Liahona, Nob. 2008, 69).

Sumala ni Presidente Eyring, ngano kaha nga ang Ginoo gusto nga kita magkapundok?
Unsa nga mga panalangin nga iyang giingon nga dala sa panaghiusa ngari kanato?
Sa unsang paagi nga ang pamahayag ni Presidente Eyring makatabang kanato nga makasabut kon nganong kita magpundok isip mga pamilya? Isip mga miyembro sa Simbahan? Isip usa ka klase sa seminary?
Sa unsang mga paagi nga inyong nasinati ang mga panalangin nga moabut gikan sa pakig-uban sa pagpundok?

Dapita ang mga estudyante sa paggahin og pipila ka gutlo sa pagsulat diha sa ilang mga scripture study journal mahitungod sa unsay ilang mahimo aron mahiusa uban sa ilang mga pamilya, uban sa mga batan-ong lalaki ug babaye diha sa ilang mga korum ug mga klase sa simbahan, ug uban sa Ginoo. Human sa igong panahon, dapita ang pipila ka mga estudyante sa pagpakigbahin unsay ilang nasulat. Mahimo usab nimong ipakigbahin ang imong pagpamatuod sa mga panalangin sa pagpakighiusa sa uban ug sa paghatag og bili sa uban sama sa paghatag nato og bili sa atong mga kaugalingon.

Doktrina ug mga Pakigsaad 39–40

Ang Ginoo mipadangat og imbitasyon ngadto kang James Covel

Dapita ang mga estudyante sa pagribyu kon kinsa si James Covel ug unsa ang nahitabo niya pinaagi sa pagbasa sa mga ulohan sa mga seksyon sa Doktrina ug mga Pakigsaad 39 ug 40. Pagka-Enero 5, 1831, si James Covel gisugo sa Ginoo nga magpabunyag (tan-awa sa D&P 39:10). Hinoon, napakyas siya sa pagtuman sa iyang saad sa pagsunod sa sugo sa Dios.

Dapita ang usa ka estudyante sa pagbasa og kusog sa Doktrina ug mga Pakigsaad 40:1–3. Hangyoa ang mga estudyante sa pagsaysay nganong si James Covel misalikway sa imbitasyon nga gihatag sa Ginoo ngadto kaniya. Dapita ang pipila ka mga estudyante sa pagpakigbahin unsa ang ilang nakat-unan gikan niining mga bersikulo mahitungod sa kaimportante sa pagtuman sa mga pakigsaad nga ilang gihimo uban sa Dios.

Sunod nga Unit (Doktrina ug mga Pakigsaad 41–44)

Aron maandam ang mga estudyante sa ilang pagtuon sa Doktrina ug mga Pakigsaad 41–44, mahimo nimong dapiton sila sa pagkonsiderar sa mosunod: Unsa ang mga kakuyaw sa kahigal? Unsaon man nato sa pagtudlo diha sa Simbahan sa Ginoo? Unsa kaha ang kamatayon niadtong mga matarung? Ipasabut nga sa sunod nga unit ang mga estudyante makabaton og oportunidad nga makakat-on sa mga tubag sa Ginoo ngadto niining mga pangutana ingon man makakat-on mahitungod sa balaod sa Ginoo bahin sa pagpahinungod.