Leksyon 63

Doktrina ug mga Pakigsaad 58:1–33

Pasiuna

Sa Agosto 1, 1831, kulang ma-duha ka semana human gipaila sa Ginoo ang Independence, Missouri isip ang tunga-tunga nga dapit sa Zion, nadawat ni Joseph ang pagpadayag nga gilangkub sa Doktrina ug mga Pakigsaad 58. Kini nga pagpadayag gihatag agi og tubag niadtong kinsa nagtinguha nga mahibalo sa kabubut-on sa Dios kalabut kanila dinhi niining bag-o nga yuta. Niini nga pagpadayag ang Ginoo mitambag sa mga Santos sa pagmatinud-anon diha sa ilang mga kalisdanan ug mipasabut kon ngano nga Siya mipadala sa mga Santos ngadto sa Zion. Giawhag usab sa Ginoo ang mga Santos sa paggamit sa ilang kabubut-on sa paghimo og pagkamatarung.

Mga Sugyot alang sa Pagtudlo

Doktrina ug mga Pakigsaad 58:1–5

Ang Ginoo mitambag sa mga Santos sa pagmatinud-anon diha sa ilang mga kalisdanan

Sa dili pa magsugod ang klase, isulat sa pisara ang mga pulong nga Karon ug Umaabut diha sa pisara.

Sugdi ang leksyon pinaagi sa paghangyo sa mga estudyante sa paghunahuna sa labing dako nga hagit nga ilang giatubang karon sa ilang mga kinabuhi.

• Sa unsa nga paagi kaha nga ang paghunahuna mahitungod sa inyong umaabut, niini nga kinabuhi ug sa sunod, nagtabang kaninyo sa pag-atiman sa mga hagit nga inyong giatubang karon?

Dapita ang usa ka estudyante sa pagbasa og kusog sa mosunod nga paragraph. Hangyoa ang klase sa pagpaminaw sa mga hagit nga gisinati sa mga Santos sa Missouri sa 1831 nga tingali mao ang hinungdan sa pipila kanila nga nawad-an og kadasig.

Sa Enero 1831, ang mga misyonaryo nakakaplag og usa ka grupo sa Delaware nga mga Indian nga nagpuyo sa Indian nga Teritoryo lapas sa kasadpang utlanan sa Missouri. Ang Delaware nga mga Indian interesado sa pagkat-on sa ebanghelyo nga gilangkub diha sa Basahon ni Mormon. Hinoon, tungod kay ang mga misyonaryo wala makakuha sa gikinahanglang mga permiso sa pagsulod sa Indian nga Teritoryo ug pagsangyaw sa ebanghelyo ug tungod sa oposisyon gikan sa lokal nga mga Indian nga tinugyanan ug mga ministro, ang mga misyonaryong gikan sa Simbahan napugos sa pagbiya sa teritoryo. Niana ang mga misyonaryo misulay sa pagtudlo sa puti nga mga lumulupyo sa Independence, Missouri ug sa palibut nga mga dapit, apan mas diyutay pa sa napulo ka mga kinabig ang mipasakop sa Simbahan sa Hulyo 1831. Sa dihang ang mga elder sa Simbahan gikan sa Ohio misugod sa pag-abut sa Missouri sa Hulyo 1831, ang pipila nadismaya sa unsay ilang nakaplagan. Ang pipila kanila nagdahum nga makakita og kusog nga nagtubo nga komunidad sa mga tumutuo ug usa ka panimuyoan nga andam sa pagpahiluna sa milalin nga mga miyembro sa Simbahan. Ang pipila mipahayag og kabalaka tungod kay ang yuta sa Independence wala maugmad. Sa pagdugang, pipila sa mga kaigsoonan giawhag sa pagpabilin sa Missouri ug sa pagpalit og mga yuta aron sa pag-andam sa Zion alang sa mga Santos kinsa moabut sa dili madugay.

• Ngano sa inyong hunahuna kini nga sitwasyon tingali nakawala og kadasig alang sa pipila ka mga miyembro sa Simbahan?

Dapita ang usa ka estudyante sa pagbasa og kusog sa Doktrina ug mga Pakigsaad 58:1–2. Hangyoa ang klase sa pagsunod, nga mangita sa unsay gisulti sa Ginoo sa mga elder nga tingali nakatabang kanila sa pag-atiman sa mga hagit nga ilang giatubang.

• Unsa ang gisulti sa Ginoo sa mga elder?

• Unsaon man ninyo sa pag-summarize ang mga kamatuoran diha sa bersikulo 2? (Kinahanglan ilhon sa mga estudyante ang mosunod nga mga baruganan: Kita mapanalanginan kon kita mosunod sa mga sugo sa Ginoo. Ang atong mahangturong ganti mahimong mas dako kon magpabilin kitang matinud-anon sa kalisdanan. (Mahimo nimong isugyot nga markahan sa mga estudyante ang mga pulong nga nagtudlo niini nga mga baruganan diha sa bersikulo 2.)

I-refer ngadto sa mga pulong nga Karon ug Umaabut diha sa pisara. Dapita ang usa ka estudyante sa pagbasa og kusog sa Doktrina ug mga Pakigsaad 58:3–5. Hangyoa ang klase sa pagsunod, nga mangita kon unsay gisulti sa Ginoo nga buhaton sa mga elder kalabut sa karon ug sa umaabut sa Iyang mga katawhan. Hangyoa ang mga estudyante sa pag-report sa unsay ilang nakaplagan.

• Sumala sa bersikulo 3, unsa ang atong kasagarang dili makita o masabtan kon kita nagsinati og kalisdanan?

Ipasabut nga kini nga mga bersikulo ingon og nagpasabut nga ang Ginoo buot nga ang mga elder mokonsiderar lapas pa sa mga pagsulay nga ilang gilahutay ug hinoon mohatag og gibug-aton diha sa mahimayaong umaabut nga ilang pagasination kon sila mga matinud-anon. Ang mensahe sa Ginoo ngadto sa mga Santos sa Missouri makatabang kanato sa paglahutay sa mga hagit pinaagi sa atong paghatag og gibug-aton diha sa mga panalangin nga gisaad ngadto niadtong kinsa naglahutay sa mga kalisdanan sa matinud-anong paagi.

• Sa unsa nga paagi nga ang pagsalig diha sa Ginoo mopanalangin kaninyo og panabang nga kamo makalahutay og kalisdanan sa matinud-anong paagi?

• Kanus-a kamo mibati nga kamo gipanalanginan tungod sa pagkamatinud-anon atol sa kalisdanan?

Dapita pag-usab ang mga estudyante sa pagkonsiderar sa labing dako nga hagit nga karon ilang gisinati. Awhaga sila sa pagpabilin nga matinud-anon ngadto sa ebanghelyo bisan sa ilang mga hagit aron sila makadawat sa mga ganti nga giandam sa Ginoo kanila sa karon ug didto sa mga kahangturan.

Doktrina ug mga Pakigsaad 58:6–13

Nagpasabut ang Ginoo kon nganong gipadala Niya ang mga Santos ngadto sa Zion

Ipangutana sa mga estudyante ang mosunod:

• Gihangyo na ba kamo sukad sa pagbuhat og usa ka butang, apan wala kamo makasabut kon nganong gihangyo kamo sa pagbuhat niini? Unsay gibati ninyo?

• Sa laing bahin, aduna bay usa ka tawo sukad nga mihangyo kaninyo sa pagbuhat og usa ka butang ug mitabang usab kaninyo sa pagpasabut sa mga rason sa pagbuhat niini? Unsa ang kalainang nahimo nga nahibalo sa mga rason?

Ipasabut nga ang Ginoo mipadayag og pipila sa Iyang mga rason sa pagpadala og mga katawhan sa pagpahimutang sa sukaranan sa Zion. Dapita ang usa ka estudyante sa pagbasa og kusog sa Doktrina ug mga Pakigsaad 58:6–8. Hangyoa ang klase sa pagsunod, nga mangita sa mga rason nga gihatag sa Ginoo sa pagpadala og mga katawhan sa pagpahimutang sa sukaranan sa Zion. Dapita ang mga estudyante sa pag-report sa unsay ilang nakat-unan.

I-summarize ang Doktrina ug mga Pakigsaad 58:9–13 pinaagi sa pagpasabut nga usa ka rason ang Ginoo mipadala og mga katawhan sa pagpahimutang sa sukaranan sa Zion mao ang pag-andam sa yuta alang sa Ikaduhang Pag-anhi ni Jesukristo. Dinhi niini nga mga bersikulo, mi-refer ang Ginoo ngadto sa usa ka sambingay sa Bag-ong Tugon nga nagtudlo nga ang mga katawhan sa tanang nasud pagadapiton sa pag-ambit sa mga panalangin sa ebanghelyo.

• Sa unsa nga paagi kaha nga ang pagkahibalo nga sila nag-andam sa yuta alang sa Ikaduhang Pag-anhi ni Jesukristo nakatabang sa mga elder nga magmatinud-anon diha sa ilang mga kalisdanan?

Doktrina ug mga Pakigsaad 58:14–23

Naghulagway ang Ginoo sa mga responsibilidad sa usa ka bishop ug nagmando sa mga Santos sa pagsunod sa mga balaod sa yuta

Pahinumdumi ang mga estudyante nga ang Ginoo mitawag ni Bishop Edward Partridge sa pagdumala sa mga paningkamot sa pagtukod sa siyudad sa Zion. Gimandoan sa Ginoo si Bishop Partridge ug Sidney Gilbert sa pagpabilin sa Missouri aron sa pagdumala sa mga kabtangan sa Simbahan ug sa pagpamalit og yuta diha ug libut sa Independence, Missouri (tan-awa sa D&P 57:7–8). Ipasabut nga samtang ang mga Santos nag-andam sa pagpamalit og yuta,nakiglalis si Bishop Partridge ni Joseph Smith mahitungod sa kalidad sa yuta nga napilian. Gibati niya nga lain-laing mga parsela sa yuta ang kinahanglan hinoong paliton. Kini nga pagsumpaki midangat ngadto sa pagbadlong gikan sa Ginoo.

Dapita ang usa ka estudyante sa pagbasa og kusog sa Doktrina ug mga Pakigsaad 58:14–15. Hangyoa ang klase sa pagsunod, nga mangita kon unsay gisulti sa Ginoo ni Bishop Partridge. Hangyoa ang mga estudyante sa pag-report unsa ang ilang nakaplagan.

• I-refer ang mga estudyante balik ngadto sa Doktrina ug mga Pakigsaad 58:3. Sa unsa nga paagi kaha nga ang mga kamatuorang gipadayag diha niana nga bersikulo nagtabang ni Bishop Partridge sa pagpili sa paghinulsol tungod sa pagpakiglalis sa Propeta mahitungod sa haing mga parsela sa yuta ang kinahanglang paliton?

Ipasabut ngadto sa klase nga si Bishop Partridge midawat sa pagbadlong sa Ginoo uban ang pagpaubos ug gipasaylo sa iyang mga sala.

• Sa unsa nga paagi nga ang mga kamatuorang gipadayag sa Doktrina ug mga Pakigsaad 58:3 nagtabang kanato sa pagtubag sa mga sugo sa Ginoo uban ang hugot nga pagtuo kay sa walay pagtuo ug pagkawalay pagbati sa kasingkasing?

Dapita ang usa ka estudyante sa pagbasa og kusog sa Doktrina ug mga Pakigsaad 58:16–20. Hangyoa ang klase sa pagsunod, nga mangita sa unsay gisulti sa Ginoo ni Bishop Partridge mahitungod sa iyang tahas isip bishop ug sa iyang responsibilidad ngadto sa pagtabang og tukod sa Zion.

• Sumala niini nga mga bersikulo, unsa ang responsibilidad sa usa ka bishop?

• Unsa ang pipila ka mga paagi nga ang mga bishop maghukom sa mga katawhan sa Ginoo karon?

I-summarize ang Doktrina ug mga Pakigsaad 58:21–23 pinaagi sa pagpasabut nga ang Ginoo nagpaabut kanato sa pagsunod sa mga balaod sa yuta hangtud Siya moanhi ug maghari sa panahon sa Milenyum.

Doktrina ug mga Pakigsaad 58:24–33

Nagtambag ang Ginoo sa mga Santos sa paggamit sa ilang kabubut-on sa paghimo og matarung

I-presentar ang mosunod nga sitwasyon ngadto sa klase:

Hunahunaa nga samtang kamo naglakaw sa dalan nakita ninyo ang usa ka tigulang nga tawo nga nadagma. Hain sa mosunod ang kinahanglan ninyong buhaton?

1. Hulata ang Espiritu nga moaghat ninyo sa pagtabang.

2. Hulata nga laing tawo ang mosulti kaninyo kon unsay buhaton.

3. Hulata kon aduna bay lain nga motabang.

4. Diha-diha dayon tabangi ang tawo kinsa nadagma.

Human makatubag ang mga estudyante, ipangutana ang mosunod:

• Nganong importante ang pagtabang sa tawo nga dili maghulat sa mga mando gikan sa laing tawo?

Dapita ang usa ka estudyante sa pagbasa og kusog sa Doktrina ug mga Pakigsaad 121:45–46. Hangyoa ang klase sa pagsunod ug sa pagpangita sa mga baruganan nga gitudlo sa Ginoo sa mga Santos samtang sila nag-atubang sa hagit sa pagtukod sa siyudad sa Zion. (Mahimo nimong ipasabut nga ang mga pulong nga “siya nga gipugos diha sa tanan nga mga butang” [D&P 58:26] nagpasabut ngadto sa usa ka tawo kinsa dili molihok gawas kon siya gikinahanglan sa pagbuhat niini.)

• Unsa nga mga kamatuoran ang inyong nadiskubre sa mga bersikulo 26–28? (Mahimong tubagon sa mga estudyante og mga kamatuoran sama sa mosunod: Kita adunay gahum sa pagpili sa paglihok alang sa atong mga kaugalingon. Kon kita maghulat sa Ginoo nga mosugo kanato sa tanang mga butang nga kinahanglan nga atong buhaton, mawad-an kita sa atong ganti. Kon atong gamiton ang atong kabubut-on sa pagbuhat og mga butang nga magpahinabo og pagkamatarung, kita pagagantihan. Gamit ang mga pulong sa mga estudyante, isulat kini nga mga kamatuoran diha sa pisara.)

• Unsa nga “ganti” ang gipasabut niini nga mga bersikulo? Sa unsa nga paagi nga ang pagbuhat og maayong mga butang sa atong kaugalingong kabubut-on makaapektar kon madawat ba nato ang kinabuhing dayon?

• Unsa ang pipila ka mga paagi nga kamo mahimong matinguhaong moapil sa pagbuhat og maayo diha sa panimalay? Sa eskwelahan? Sa inyong ward o branch?

Dapita ang mga estudyante sa pagpakigbahin og mga kasinatian nga sila aduna sa dihang napanalanginan sila tungod sa paggamit sa ilang kabubut-on sa pagbuhat og maayo.

Dapita ang usa ka estudyante sa pagbasa og kusog sa Doktrina ug mga Pakigsaad 58:29–33 . Hangyoa ang klase sa pagsunod, nga mangita sa unsay mahitabo ngadto niadtong kinsa dili mogamit sa ilang kabubut-on sa pagbuhat og maayo o kinsa nagduda sa mga sugo sa Ginoo.

• Unsay mahitabo ngadto niadtong dili mogamit sa ilang kabubut-on sa pagbuhat og maayo o kinsa nagduda sa mga sugo sa Ginoo?

• Sa unsa nga paagi ang ubang mga katawhan motubag kon sila dili makadawat sa mga panalangin tungod sa ilang pagkatapulan o sa pagkadili masulundon? Unsa nga mga pahimangno ang gihatag sa Ginoo ngadto sa ingon nga mga indibidwal diha sa bersikulo 33?

Pagpamatuod sa importansya sa paggamit sa atong kabubut-on sa pagbuhat og maayo. Dapita ang mga estudyante sa paggamit sa ilang kabubut-on sa pagbuhat og usa ka butang nga maayo sa dili pa magkita og usab ang klase. Sultihi ang mga estudyante nga sila adunay oportunidad sa pagpakigbahin unsay ilang gihimo isip kabahin sa sunod nga leksyon.

Komentaryo ug Background nga Impormasyon

Doktrina ug mga Pakigsaad 58:2–4. “Ang himaya nga mosunod human sa daghan nga kalisdanan”

Mitudlo si Presidente Brigham Young sa mosunod mahitungod sa pagbaton og usa ka mahangturong panan-aw ug mahitungod sa himaya nga moabut ngadto sa matinud-anon:

“Nagsulti kita mahitungod sa atong mga pagsulay ug mga kasamok dinhi niini nga kinabuhi; apan pananglit kon kamo makakita sa inyong mga kaugalingon liboan ug minilyon ka mga tuig human kamo nakapakita nga matinud-anon sa inyong relihiyon sulod sa pipila ka mubo nga katuigan niini nga panahon, ug nakaangkon og mahangturong kaluwasan ug usa ka korona sa himaya diha sa atubangan sa Dios? Dayon tan-awa og balik ang inyong mga kinabuhi dinhi, ug makita ang mga nawala, mga kalisud, ug ang mga kahigawad; … mapugos kamo sa pagsinggit, ‘apan unsa ra man kadtong tanan? Kadtong mga butanga usa lamang ka higayon, ug kita karon ania na dinhi. Matinud-anon kita sulod sa pipila ka mga higayon sa atong mortalidad, ug karon kita nagpahimulos og mahangturong kinabuhi ug himaya’” (“Remarks,” Deseret News, Nob. 9, 1859, 1). (Tan-awa usab sa Doctrine and Covenants Student Manual, 2nd ed. [manwal sa Church Educational System, 2001], 119–20.)

Doktrina ug mga Pakigsaad 58:3. “Kamo dili makakita uban sa inyong kinaiyanhon nga mga mata, … sa paagi sa inyong Dios”

Mipakigbahin si Elder Neal A. Maxwell sa pamahayag ni C. S. Lewis, kinsa mipasabut nga kita dili sa kanunay makasabut unsa ang gitagana sa Dios alang kanato:

“Si C. S. Lewis, sa iyang basahon Mere Christianity, naghulagway sa atong pakigrelasyon uban sa Dios sa usa ka espesyal nga paagi nga makatabang kanato sa pagdayeg kon sa unsa nga paagi nga ang pagnunot sa atong mga kaugalingon ngadto sa iyang kabubut-on mao lamang ang paagi nga ang espirituhanong pagtubo mahitabo:

“Hunahunaa nga ikaw usa ka buhi nga balay. Ang Dios miabut aron pagtukod og balik niana nga balay. Sa sinugdanan, tingali, makasabut ka unsay Iyang gibuhat. Iyang giayo ang agianan sa tubig ug giayo ang mga tulo sa atop ug uban pa: nahibaloan nimo nga kadto nga mga trabaho kinahanglang buhaton ug busa ikaw wala matingala. Apan sa wala madugay Siya nagsugod sa pag-usab sa balay sa paagi nga hilabihan ka ngil-ad nga ingon og dili masabtan. Unsay buhaton Niya? Ang pagpasabut mao nga Siya nagtukod og lahi kaayo nga balay kaysa imong gihunahuna—nagdugang og bag-ong pasilyo dinhi, nagdugang og salog didto, nagtukod og mga tore, naghimo og mga courtyard. Abi nimo nga himoon ka nga usa ka desenteng gamay nga payag: apan Siya nagtukod og palasyo. …’ (New York: The Macmillan Company, 1952, p. 160.)” (“The Value of Home Life,” Ensign, Peb. 1972, 5).

Doktrina ug mga Pakigsaad 58:8–11. “Ang panihapon sa Ginoo”

“Duha ka mga simbolo sa bangkete gikan sa Daang Tugon magamit ngadto sa Panihapon sa Ginoo: ang ‘bangkete sa pinili nga lamian nga mga pagkaon,’ ug ang ‘lawog sa bino nga maayo nga pagkasala.’ Ang duha mga timailhan sa pagkaadunahan, nagpakita nga ang bangkete nga gihisgutan dinhi dako kaayo og importansya (tan-awa usab D&P 57:5–14; 65:3; Mateo 22:1–14; Pinadayag 19:7–9)” (Doctrine and Covenants Student Manual [Manwal sa Church Education System, 2001], 120).

Doktrina ug mga Pakigsaad 58:14–15. Gihinulsulan ni Bishop Partridge ang iyang mga sala

Nakiglalis si Bishop Partridge ni Joseph Smith mahitungod sa kalidad sa yuta nga napilian didto sa Missouri. Gibati niya nga lain-laing mga parsela sa yuta ang kinahanglan hinoong paliton. Gipanton sa Ginoo si Bishop Partridge tungod sa iyang kinaiya.

Gidawat ni Bishop Partridge ang pagbadlong sa Ginoo diha sa Doktrina ug mga Pakigsaad 58 uban ang pagpaubos. Pipila lamang ka mga adlaw human nahatag kini nga pagpadayag, misulat siya ngadto sa iyang asawa: “Kahibalo ka nga ako naghupot og usa ka importanting posisyon ug ingon nga ako panagsa nga gipanton usahay bation nako nga daw mapakyas gayud ako, dili mobiya sa kawsa, apan nahadlok ako nga ang akong posisyon mas lisud kay sa unsay akong mabuhat nga madawat sa akong langitnong amahan” (sulat ngadto ni Lydia Partridge, Ago. 5–7, 1831, Church History Library, Siyudad sa Salt Lake). Ang mga hilisgutan sa miting sa Zion nga nagrekord sa panaglalis tali sa Propeta Joseph Smith ug Bishop Partridge nag-ingon nga si Partridge misulti nga “siya ug sa kanunay masulub-on” tungod sa panaglalis (Minute Book 2, Mar. 10, 1832, 23, Church History Library, Siyudad sa Salt Lake; tan-awa usab sa josephsmithpapers.org). Usa ka pagpadayag nga gihatag niadtong Septyembre 11, 1831, nagpakita nga si Partridge napasaylo sa iyang gibuhat (Documents, Volume 2: Hulyo 1831–Enero 1831, vol. 2 sa Documents series sa The Joseph Smith Papers [2013], 62).

Doktrina ug mga Pakigsaad 58:27–28. “Mobuhat og daghan nga mga butang diha sa ilang kaugalingon nga gawasnon nga kabubut-on”

Usa ka positibo nga panig-ingnan sa pagsunod sa tambag nga “kinahanglan nga matinguhaon nga moapil diha sa usa ka maayo nga katuyoan” (D&P 58:27) makita diha sa kasinatian nga gipakigbahin ni Elder Vaughn J. Featherstone sa Seventy:

“Sa dihang ako mga dyes o onse, daghan sa among mga paryente mibisita. Tingali dihay mga 35 o 40. Giimbitar silang tanan ni Mama og panihapon. Human og panihapon ang tanan miadto sa laing kwarto ug milingkod aron mag-istoryahay. Dihay nagpundok nga hugawng mga plato ug mga bahilya bisan asa. Ang mga pagkaon wala mahipos, ug dihay hugaw nga mga kaldero ug mga kaha gikan sa tanang mga pagpangandam.

“Nahinumdom ako nga naghunahuna nga sa dili madugay ang tanan mobiya, ug ang akong inahan ang mohimo sa tanang pagpanglimpyo. Usa ka ideya ang kalit miabut kanako. Gisugdan ko ang pagpanglimpyo. Kini kaniadto sa mga panahon nga wala pay electric nga mohugas og mga pinggan. Si Mama sa kanunay limpyo kaayo, ug gitudloan niya kami kon unsaon sa paghugas ug pagtrapo sa mga plato sa hustong paagi. Gisugdan nako kining nagtapun-og nga trabaho. Sa katapusan, human sa mga tulo ka oras, nahuman ko sa pagtrapo sa katapusang plato. Nahipos ko na ang tanang mga pagkaon, nalimpyohan ang tanang mga counter, ang lababo, ug ang salog. Ang kusina walay lama.

“Dili ko gyud makalimtan ang hitsura sa nawong ni Mama sa wala madugay nianang gabhiona sa dihang ang tanang mga bisita mibiya ug siya mibalik ngadto sa kusina aron sa pagpanglimpyo. Basa ako gikan sa akong dughan ngadto sa akong mga tuhod. Kini takos sa tanang kakugi nga akong gihatag ngadto niini aron lamang makita ang hitsura sa nawong ni Mama. Sagol kini og mga pagbati, kahupay, ug garbo. Mihimo dayon ako og desisyon nga maninguha ko nga balik-balik nga mabutang kana nga hitsura diha sa iyang nawong” (“We Love Those We Serve,” New Era, Mar. 1988, 19).