Leksyon 64

Doktrina ug mga Pakigsaad 58:34–65

Pasiuna

Agi og tubag sa mga pangutana sa mga elder mahitungod sa unsaon pagpadayon og tukod ang siyudad sa Zion, mihatag og pagpadayag ang Ginoo nga girekord diha sa Doktrina ug mga Pakigsaad 58 sa Agosto 1, 1831. Ang mga bersikulo 34–65 naglangkob og mga panudlo sa pagsunod sa balaod sa pagpahinungod alang niadtong kinsa namalhin ngadto sa Zion. Dinhi niini nga mga bersikulo, gitudlo usab sa Ginoo ang mga baruganan sa paghinulsol, gimandoan ang mga elder sa pagsangyaw sa ebanghelyo, ug gitambagan sila kalabut sa unsaon pagtukod ang Zion.

Mga Sugyot alang sa Pagtudlo

Sa miaging leksyon, gidapit ang mga estudyante sa paggamit sa ilang kabubut-on sa pagbuhat og usa ka butang nga maayo sa dili pa magklase karon. I-follow up kini nga imbitasyon pinaagi sa paghangyo sa mga estudyante sa pagpakigbahin sa ilang mga kasinatian sa pagpili nga mahimong “matinguhaong moapil” (D&P 58:27) diha sa pagbuhat og maayo.

Doktrina ug mga Pakigsaad 58:34–43

Naghatag og panudlo ang Ginoo kalabut sa Zion ug nagtudlo og mga baruganan sa paghinulsol

Sa wala pa ang klase, isulat ang mosunod nga pangutana diha sa pisara: Unsa ang kahulugan sa paghinulsol?

Hangyoa ang pipila ka mga estudyante sa pagtubag niini nga pangutana. Dayon isulat ang mosunod nga mga pangutana diha sa pisara: Unsaon nako pagkahibalo kon ako sa hingpit nakahinulsol ba? Unsaon nako pagkahibalo kon ang Ginoo nakapasaylo ba kanako sa akong mga sala?

Dapita ang mga estudyante sa pagsulat niini nga mga pangutana diha sa ilang mga class notebook o mga scripture study journal. Hangyoa sila sa paggahin og pipila ka minuto sa pagsulat og mga tubag sa kada usa. Human sa igong panahon, pahibaloa sila nga sila adunay oportunidad sa pagtan-aw og balik sa ilang mga tubag unya diha sa leksyon.

I-summarize ang Doktrina ug mga Pakigsaad 58:34–37 pinaagi sa pagpasabut nga daghan sa mga elder kinsa mibiyahe ngadto sa Missouri ug mopuyo didto buot mahibalo kon unsay ilang kinahanglang buhaton sa pagplano, pag-organisar, ug sa pagtukod sa siyudad sa Zion. Gitudloan sa Ginoo kadtong namalhin sa Missouri sa paghatag sa ilang kwarta ug kabtangan ngadto sa kawsa sa pagtukod sa Zion. Gitudloan si Martin Harris nga mahimong ehemplo sa paghatag og kwarta ngadto sa bishop. Mihatag siya og dakong kantidad sa kwarta aron matabangan si Bishop Edward Partridge sa pagpalit og yuta alang sa Simbahan.

Isulat ang mosunod nga mga ngalan diha sa pisara: Martin Harris, William W. Phelps, ug Ziba Peterson. Dapita ang usa ka estudyante sa pagbasa og kusog sa Doktrina ug mga Pakigsaad 58:38–41, 60. Hangyoa ang klase sa pagsunod, nga mangita sa tambag sa Ginoo nga gihatag ngadto ni Martin Harris, William W. Phelps, ug Ziba Peterson samtang giandam nila ang pagtukod sa Zion.

Samtang nagtubag ang mga estudyante sa mga pangutana, isulat ang ilang mga tubag ubos sa angay nga ngalan diha sa pisara.

• Unsa nga sala ang gisulti sa Ginoo nga si Martin sad-an? Unsa ang gisulti sa Ginoo nga iyang buhaton?

• Unsa nga mga sala ang gisulti sa Ginoo nga si William W. Phelps sad-an? Unsa ang gisulti sa Ginoo nga iyang buhaton? (Tingali kinahanglan nimong ipasabut nga ang mga pulong nga “nagtinguha og gahum” [bersikulo 41] wala magpasabut sa paghimo sa atong labing maayo o pagpaningkamot sa paglambo. Hinoon, kini nga mga pulong nagpasabut ngadto sa dili matarung, mapasigarbuhon nga tinguha aron mas maayong tan-awon o mas importante kay sa ubang mga tawo.)

• Unsa ang gipaningkamutan nga buhaton ni Ziba Peterson bahin sa iyang mga sala?

Ipasabut nga ang mga sala niining mga tawhana nakahulga sa pagpugong kanila sa pagtabang sa pagtukod sa Zion.

• Unsa ang pipila ka mga paagi nga malimitahan sa atong mga sala ang atong abilidad sa pagserbisyo sa Ginoo?

Dapita ang usa ka estudyante sa pagbasa og kusog sa Doktrina ug mga Pakigsaad 58:42. Hangyoa ang klase sa pagsunod, nga mangita sa unsay gitudlo sa Ginoo bahin sa paghinulsol.

• Sumala niining bersikulo, unsa ang gisaad sa Ginoo kanato kon kita maghinulsol sa atong mga sala? (Kinahanglang mahibaloan sa mga estudyante ang mosunod nga baruganan: Kon maghinulsol kita sa atong mga sala, ang Ginoo mopasaylo kanato ug dili na mohinumdom sa atong mga sala. Isulat kini nga baruganan diha sa pisara. Mahimo nimong isugyot sa mga estudyante nga markahan ang mga pulong nga nagtudlo niining baruganan sa bersikulo 42.)

• Hain sa atong mga sala nga magamit kini nga saad? (Ang tanan niini.)

Dapita ang usa ka estudyante sa pagbasa og kusog sa mosunod nga pamahayag ni Presidente Boyd K. Packer sa Korum sa Napulog Duha ka mga Apostoles. Hangyoa ang klase sa pagpaminaw sa mga pulong nga may kalabutan sa baruganan nga nasulat diha sa pisara.

“Bisan unsa man ang inyong mga sayop, bisan unsa ka sakit ang nahimo ninyo sa uban, kana nga sala tanan mapapas. Alang nako, tingali ang labing matahum nga pulong diha sa tanang kasulatan mao ang giingon sa Ginoo, “Tan-awa, siya kinsa naghinulsol sa iyang mga sala, ang mao gipasaylo, ug Ako, ang Ginoo, dili na mahinumdom kanila’ [D&P 58:42].

“Mao kana ang saad sa ebanghelyo ni Jesukristo ug sa Pag-ula” (“Ang Pag-ula,”Liahona, Nob. 2012, 77).

I-refer ang mga estudyante ngadto sa mga pangutana nga gisulat diha sa pisara.

• Sa unsa nga paagi ang saad sa Ginoo diha sa bersikulo 42 nagtabang sa pagtubag sa ikatulong pangutana: Unsaon nako pagkahibalo kon ang Ginoo nakapasaylo ba kanako sa akong mga sala? (Ang saad sa Ginoo nagtabang kanato nga mahibalo nga Siya sa kanunay naghatag og kapasayloan kon kita sa hingpit naghinulsol.)

• Agi og dugang sa pagkahibalo nga ang Ginoo nagsaad sa pagpasaylo kanato kon kita sa hingpit maghinulsol, sa unsa pa nga paagi kita mahibalo nga kita napasaylo?

Dapita ang usa ka estudyante sa pagbasa og kusog sa mosunod nga pamahayag ni Presidente Dieter F. Uchtdorf sa Unang Kapangulohan. Hangyoa ang mga estudyante sa pagpaminaw kon unsaon nila pagkahibalo kon ang Ginoo nakapasaylo ba kanila sa ilang mga sala.

“Sa higayon nga nakahinulsol na kita sa tinuoray nga paagi, si Kristo mokuha sa kabug-at sa kahasol tungod sa atong mga sala. Masayud kita sa atong mga kaugalingon nga napasaylo na kita ug nahimo na nga limpyo. Ang Espiritu Santo mopanghimatuod niini ngari kanato; Siya mao ang Tigbalaan. Walay pagpamatuod sa pagpasaylo nga mas labaw pa” (“Punto sa Luwas nga Pagbalik,”Liahona, Mayo 2007, 101).

• Sa unsa nga paagi nga ang pagkahibalo nga kamo mapasaylo sa tanan ninyong mga sala mipanalangin sa inyong mga kinabuhi?

Ipasabut ngadto sa mga estudyante nga ang pipila ka mga tawo sayop ang paghunahuna nga kon sila makahinumdom pa sa ilang mga sala niana sila wala pa sa hingpit makahinulsol. Dapita ang usa ka estudyante sa pagbasa og kusog sa mosunod nga pamahayag ni Presidente Uchtdorf. Hangyoa ang klase sa pagpaminaw kon nganong kita mahimong mohinumdom sa atong mga sala bisan human kita naghinulsol.

“Si Satanas mosulay sa pagpatuo kanato nga ang atong mga sala wala mapasaylo tungod kay ato man kining mahinumduman. Si Satanas bakakon; mosulay siya sa pagpahanap sa atong panan-aw ug modala kanato palayo sa dalan sa paghinulsol ug kapasayloan. Ang Dios wala mosaad nga dili kita mahinumdom sa atong mga sala. Ang paghinumdom motabang kanato nga malikayan ang pagbuhat pag-usab sa samang mga sayop. Apan kon magpabilin kita nga matinuoron ug matinud-anon, ang paghinumdom sa atong mga sala magkaanam og kawala sa paglabay sa panahon. Mahimo kining kabahin sa gikinahanglan nga proseso sa pag-ayo ug paglimpyo” (“Punto sa Luwas nga Pagbalik,” 101).

Ipasabut nga ang saad nga nasulat diha sa pisara adunay kondisyon. Madawat lamang nato ang kapasayloan sa Ginoo kon buhaton nato ang tanan nga atong mahimo sa paghinulsol og hingpit sa atong mga sala.

• Unsay ipasabut niining paghinulsol? (Mahimo nimong dapiton ang mga estudyante sa pag-refer og balik ngadto sa mga tubag nga ilang gisulat ngadto sa mga pangutana diha sa pisara.)

Human tubaga sa mga estudyante, dapita ang usa ka estudyante sa pagbasa og kusog sa mosunod nga pamahayag gikan sa Alang sa Kalig-on sa mga Kabatan-onan nga booklet. Hangyoa ang klase sa pagpaminaw alang sa dugang nga mga butang nga ilang makat-unan mahitungod sa unsay ipasabut sa paghinulsol.

“Ang paghinulsol sobra pa kay sa pag-ila lamang sa nahimong mga sayop. Usa kini ka kausaban sa hunahuna ug kasingkasing. Naglakip kini sa pagpalayo sa sala ug pagpaduol ngadto sa Dios alang sa kapasayloan. Nadasig kini sa gugma alang sa Dios ug sa kinasingkasing nga tinguha sa pagsunod sa Iyang mga sugo” (Alang sa Kalig-on sa mga Kabatan-onan [booklet, 2011], 28).

Ipasabut nga ang tinuod nga paghinulsol naglakip og daghan nga mga panginahanglanon. Duha niini ka mga panginahanglanon gihisgutan diha sa Doktrina ug mga Pakigsaad 58:43. Dapita ang usa ka estudyante sa pagbasa og kusog niana nga bersikulo. Hangyoa ang klase sa pagsunod, nga mangita sa duha ka mga butang nga kinahanglan gayud natong buhaton aron hingpit nga makahinulsol sa atong mga sala.

• Sumala sa bersikulo 43, unsa ang duha ka mga butang nga kinahanglan gayud natong buhaton aron hingpit nga makahinulsol sa atong mga sala? (Ang mga estudyante kinahanglang moila sa mosunod nga baruganan: Sa paghinulsol, kita kinahanglan gayud mokumpisal ug mobiya sa atong mga sala. Isulat sa pisara kini nga baruganan.)

• Sa unsa nga paagi kini nga kamatuoran nagtabang kanato sa pagtubag sa pangutana Unsaon nako pagkahibalo kon ako sa hingpit nakahinulsol ba? (Tabangi ang mga estudyante sa pagsabut nga ang pagkumpisal ug pagbiya sa mga sala importante sa bug-os nga paghinulsol.)

• Unsay gipasabut sa pagkumpisal sa atong mga sala?

Aron matabangan ang mga estudyante nga mas makasabut kon unsay kahulugan sa pagkumpisal sa atong mga sala, dapita ang usa ka estudyante sa pagbasa og kusog sa mosunod nga pamahayag ni Elder D. Todd Christofferson sa Korum sa Napulog Duha ka mga Apostoles:

“Pagkumpisal ug pagbiya gamhanan nga mga konsepto. Labaw pa kini sa pag-ingon lang og ‘Giangkon ko kini; Pasayloa ko.’ Ang pagkumpisal usa ka lawom, usahay sakit nga pag-angkon sa sayop ug kalapasan ngadto sa Dios ug sa tawo” (“Ang Balaanong Gasa sa Paghinulsol,” Liahona, Nob. 2011, 40).

• Sa unsang paagi nga ang pagkumpisal sa atong mga sala makatabang kanato nga matalikdan ang mga sala ug mobalik ngadto sa Dios alang sa kapasayloan?

Isip kabahin niining hilisgutan, mahimong maghunahuna ang mga estudyante kon unsa ang mga sala nga kinahanglang ikumpisal ug ngadto kang kinsa. Ipasabut nga kita kinahanglan nga mokumpisal sa atong mga sala ngadto sa Langitnong Amahan. Ang seryosong mga kalapasan, sama sa sekswal nga kalapasan o pagtan-aw og pornograpiya, kinahanglan usab nga ikumpisal ngadto sa bishop o branch president.

I-refer ang mga estudyante ngadto sa katapusang kamatuoran nga imong gisulat diha sa pisara.

• Unsay gipasabut sa pagsalikway sa atong mga sala? (Hingpit nga pagpalayo gikan sa atong mga sala ug ang paghunog sa pagbuhat niini.)

Ipamatuod ang mahitungod sa Pag-ula sa Manluluwas ug ang mga baruganan sa paghinulsol ug ang kapasayloan nga imong nahisgutan. Dapita ang mga estudyante sa pagpamalandong kon aduna bay mga sala nga kinahanglan nilang hinulsulan, ug awhaga sila sa paghinulsol pinaagi sa paggamit sa mga kamatuoran nga ilang nakat-unan.

Doktrina ug mga Pakigsaad 58:44–65

Ang Ginoo nagmando sa mga elder sa pagsangyaw sa ebanghelyo ug gitambagan sila kalabut sa unsaon pagtukod ang Zion

I-summarize ang Doktrina ug mga Pakigsaad 58:49–62 pinaagi sa pagpasabut nga gisultihan sa Ginoo ang mga elder kinsa magpabilin sa Missouri nga sila kinahanglang magpalit og yuta ug mag-andam alang sa pagpundok sa mga Santos diha sa Missouri.

Dapita ang usa ka estudyante sa pagbasa og kusog sa Doktrina ug mga Pakigsaad 58:46–47, 63–65. Hangyoa ang klase sa pagpangita sa tambag sa Ginoo ngadto sa mga elder kinsa mobalik ngadto sa Ohio.

• Sumala sa mga bersikulo 46–47, unsa ang pagabuhaton sa mga elder samtang sila mobalik ngadto sa Ohio?

• Sumala sa bersikulo 64, ngadto kang kinsa kinahanglan gayud isangyaw ang ebanghelyo? (Ang mga estudyante mahimong mogamit og lahi nga mga pulong, apan ang ilang mga tubag kinahanglan nga magpakita sa mosunod nga kamatuoran: Ang ebanghelyo kinahanglan gayud nga isangyaw ngadto sa tanang mga tawo. Mahimo nimong isugyot nga markahan sa mga estudyante ang mga pulong nga nagtudlo niini nga kamatuoran diha sa bersikulo 64.)

Awhaga ang mga estudyante sa pagsunod sa mga pag-aghat sa Espiritu sa pagpakigbahin sa mga kamatuoran sa ebanghelyo ngadto niadtong naglibut kanila.

Komentaryo ug Background nga Impormasyon

Doktrina ug mga Pakigsaad 58:39. “Paghinulsol”

Gitudlo ni Elder D. Todd Christofferson sa Korum sa Napulog Duha ka mga Apostoles nga ang paghinulsol labaw pa kay sa listahan lang sa mga butang nga buhaton:

“Ang pagsulay sa paghimog listahan sa piho nga mga lakang sa paghinulsol mahimong makatabang sa uban, apan mahimo usab kining modala ngadto sa paagi nga wala sa hunahuna, listahan lang sa mga lakang sa paghimo nga walay tinuod nga pagbati o kausaban. Ang tinuod nga paghinulsol dili pagpakaaron-ingnon. Ang Ginoo mihatag og duha ka mahinungdanong mga kinahanglanon: ‘Pinaagi niini kamo masayud kon ang usa ka tawo naghinulsol sa iyang mga sala—tan-awa, siya mokumpisal kanila ug mobiya kanila’ (D&P 58:43)” (“Ang Balaanong Gasa sa Paghinulsol,” Liahona, Nob. 2011, 40).

Si Elder Russel M. Nelson sa Korum sa Napulog Duha ka mga Apostoles mipasabut unsa ang maghinulsol:

“Ang doktrina sa paghinulsol adunay mas lapad nga pagpasabut kay sa gipasabut diha sa diksyonaryo. Sa dihang si Jesus miingon, ‘paghinulsol,’ ang Iyang mga tinun-an mirekord niana nga sugo sa Griyego nga pinulongan uban sa berbo nga metanoeo. Kining gamhanan nga pulong hilabihan ka mahinungdanon. Niini nga pulong, ang prefix nga meta nagpasabut og ‘kausaban.’ Ang suffix nagpasabut sa upat ka importante nga Griyego nga mga termino: nous, ang gipasabut ‘ang hunahuna’; gnosis, ang gipasabut kahibalo’; pneuma, ang gipasabut ‘espiritu’; ug pnoe, ang gipasabut ‘ginhawa.’

“Busa, sa dihang miingon si Jesus ‘paghinulsol,’ Siya mihangyo kanato sa pag-usab—sa pag-usab sa atong hunahuna, kahibalo, ug espiritu—bisan sa atong ginhawa. Usa ka propeta mipasabut nga ang mao nga kausaban sa ginhawa sa tawo mao ang pagginhawa uban sa mapasalamaton nga pag-ila Kaniya kinsa naghatag sa matag ginhawa. Si Haring Benjamin miingon, ‘Kon kamo kinahanglan nga moalagad gayud kaniya kinsa naglalang kaninyo … nanalipod kaninyo sa matag adlaw, pinaagi sa paghatag kaninyo og ginhawa, … gikan sa usa ka gutlo ngadto sa lain—ako moingon, kon kamo kinahanglan moalagad kaniya uban sa tibuok ninyo nga mga kalag bisan pa niana kamo mahimo gihapon nga dili mapuslanon nga mga sulugoon.’ [Mosiah 2:21.]

“Oo, ang Ginoo misugo kanato sa paghinulsol, sa pag-usab sa atong mga pamaagi, sa pagduol Kaniya, ug mamahimong mas sama Kaniya. [Tan-awa sa 3 Nephi 27:21, 27.] Kini nagkinahanglan og tibuok kausaban” (“Paghinulsol ug Pagkakabig,”Liahona, Mayo 2007, 103).

Doktrina ug mga Pakigsaad 58:42. “Dili na mahinumdom kanila”

Mipakigbahin si Elder F. Burton Howard sa Seventy og kasinatian niya diin iyang nakat-unan nga human sa paghinulsol, ang Ginoo sa tinuod dili na mahinumdom sa atong mga sala:

“Usa ka katapusang istorya—sa makausa pa sa dihang ako usa ka bishop. Usa ka gabii, samtang ako nahinanok og katulog, mibagting ang doorbell. Nagsukarap ako sa pagtubag niini ug nakita ang usa ka batan-ong miyembro sa akong korum sa mga priest diha sa pultahan. Nakaila ko kaayo niya, igo nga nakigkuyog niya og panuroy, nag-ampo uban ug mahitungod kaniya, ug nakatudlo kaniya. Nakaila usab ako niya sama sa usa ka maayong bishop nga nakaila sa bisan kinsa nga aktibong disiotso anyos nga priest, nga igo aron mangutana kon unsay iyang gibuhat diha sa atubangan sa akong pultahan niining tunga sa gabii.

“Miingon siya, ‘Kinahanglan kong makigsulti kanimo, bishop. Mao pa gyuy pagbuhat nakog usa ka butang nga seryoso, ug dili ako makapauli.’

“Husto gyud siya. Seryoso kini. Gidapit ko siya sa pagsulod ug nagsultihanay kami. Misulti siya ug ako naminaw, dayon ako misulti ug siya naminaw, hangtud sa kaadlawon. Siya dihay daghang mga pangutana. Nakahimo siya og grabe nga sala. Gusto siyang mahibalo kon aduna bay paglaum. Gusto siyang mahibalo kon unsaon sa paghinulsol. Gusto siyang mahibalo kon ang paghinulsol naglakip ba sa pagsulti sa iyang mga ginikanan. Gusto siyang mahibalo kon aduna pa bay purohan nga siya makamisyon. Gusto siyang mahibalo og daghang mga butang.

“Wala ako sa tanang mga tubag, apan gisultihan ko siya nga adunay paglaum. Gisultihan ko siya nga ang pagbalik malisud, apan kini mahimo. Akong gipasabut sa unsay akong nahibaloan mahitungod sa proseso sa paghinulsol ug sa pagtabang kaniya sa pagtan-aw unsay kinahanglan gayud niyang buhaton. Gisultihan ko siya kon siya sa tinuoray gusto nga magmisyon nga kana nga desisyon mahimo lamang sa umaabut human sa iyang paghinulsol. Dayon gisultihan ko siya sa pagpauli, ug siya mipauli.

“Gipasabut niya ang iyang mga ginikanan. Nangayo siya og pasaylo gikan niadtong iyang nasad-an. Nagpalayo siya sa sala ug sa ngil-ad nga mga higala ug gihimo ang tanan nga siya makahinulsol.

“Paglabay sa usa ka tuig o kapin pa, lima ka batan-ong mga lalaki gikan niana nga korum nagmisyon. Usa siya niadto. Suod ako nilang tanan. Mitambong ako sa tanan nilang mga panamilit. Tanan sila nagserbisyo og dungganang mga misyon. Sulod sa mubong panahon human mopauli, silang tanan naminyo sa templo. Ang akong asawa ug ako mitambong sa kada seremonya. Makakuha ako og papel, bisan karon, ug isulat ang ilang mga ngalan ug ang mga ngalan sa ilang mga asawa ug pipila sa ilang mga anak. Ingon niana ko sila nailhan og maayo.

“Apan karon sultihan ko kamo og usa ka butang—usa ka butang nga pribado kaayo ug hilabihan ka importante. Dili ako makahinumdom sa ngalan sa batan-ong lalaki kinsa mianha sa akong panimalay sa tungang gabii. Nahibalo ako nga siya usa sa lima, apan dili ako makahinumdom hain nga usa.

“Dihay panahon nga ako nagsubo mahitungod niana. Naghunahuna ko nga tingali ang akong panumduman nagkahinay. Naninguha ako sa pagsulay og hinumdom kinsa kini nga adunay problema, apan dili gyud mahimo.

“Sa kadugayan na-release ako, ug gikalimtan ko ang tibuok hitabo. Pila ka tuig ang milabay usa ka paglakaw sa lawom nga gabii, nakaplagan ko ang akong kaugalingon diha sa ward diin makausa ako ang bishop. Ang walay timik nga kangitngit mipabalik og daghang mga panumduman. Lawom ang akong hunahuna sa dihang naamguhan ko nga naglakaw ako sa atubangan sa usa ka balay diin usa sa akong priest nagpuyo kaniadto. Sa kalit, ang istorya sa batan-ong lalaki nga akong gihisgutan misulod sa akong hunahuna, ug pag-usab naninguha ako sa paghinumdom kon kinsa siya niadtong lima. Nakapuyo ba siya niana nga balay? Naghunahuna ako. Nganong dili ako makahinumdom?

“Samtang ako nagpadayon sa akong paglakaw, usa ka butang ang nahitabo—usa ka butang nga lisud ipasabut, apan tinuod ngari kanako. Ingon og nakadungog ako og usa ka tingog nga nag-ingon: ‘Wala ka ba makasabut, anak ko? Nakalimtan ko kana. Nganong kinahanglan nimong hinumduman?’

“Nahasol ako. Walay makatagbaw nga tubag sa pangutana. Wala na gyud ako maghunahuna mahitungod niini pag-usab. Ug mas siguro akong nahibalo nianang higayona kay sa akong nahibaloan kaniadto nga ang Ginoo nahimuot kon ang iyang mga anak mobalik kaniya.

“Ang tanan kinsa mga magbalantay ug ang tanang nawala nga mga karnero kinahanglan nga maminaw niining usa nga katapusang butang. Ang Ginoo tinuoray nga nagpasabut sa dihang siya miingon, ‘Siya kinsa naghinulsol sa iyang mga sala, ang mao gipasaylo, ug Ako, ang Ginoo, dili na mahinumdom kanila (D&P 58:42)’” (“Come Back to the Lord,” Liahona, Nob. 1986, 77–78).

Doktrina ug mga Pakigsaad 58:43. “Mokumpisal kanila”

Si Elder Richard G. Scott sa Korum sa Napulog Duha ka mga Apostoles mihatag sa mga panginahanglanon sa pagkumpisal:

“Kanunay ninyong gikinahanglan ang pagkumpisal sa inyong mga sala ngadto sa Ginoo. Kon kini bug-at nga mga kalapasan, sama sa [sekswal] nga imoralidad, gikinahanglan kining ikumpisal ngadto sa bishop o stake president. Palihug sabta nga ang pagkumpisal dili paghinulsol. Kini usa ka importanting lakang apan sa kaugalingon dili igo. Ang dili pagkumpisal sa tanan pinaagi sa paghisgot og minos nga mga sayop dili motabang kaninyo pagsulbad sa mas bug-at, wala gipahayag nga kalapasan. Importante sa kapasayloan mao ang pagkaandam nga isulti ang tanan ngadto sa Ginoo ug, kon gikinahanglan, sa Iyang maghuhukom nga priesthood sa tanan nga inyong nabuhat” (“Finding Forgiveness,” Ensign, Mayo 1995, 76).

Gitudlo ni Presidente Spencer W. Kimball ang mahitungod sa importansya sa sinseridad ug hingpit nga pagkamatinuoron kon mokumpisal sa atong mga sala:

“Walay usa nga mapasaylo gayud sa bisan unsa nga kalapasan hangtud adunay paghinulsol, ug ang usa ka tawo wala naghinulsol hangtud siya mopadayag sa iyang kalag ug modawat sa iyang mga intensyon ug mga kahuyang nga walay mga kapasanginlan o mga paghatag og katarungan” (Love versus Lust, Brigham Young University Speeches of the Year [Ene. 5, 1965], 10).

Doktrina ug mga Pakigsaad 58:43. Nganong kinahanglan gayud nga ang pipila sa mga sala ikumpisal ngadto sa usa ka may awtoridad nga lider sa priesthood?

Isip presidente sa Aaronic Priesthood diha sa ward, ang usa ka bishop o branch president naghupot sa mga yawe sa paghinulsol alang sa mga tawo sa iyang ward. Ang mga bishop ug mga branch president naggamit sa mao nga mga yawe sa pagdeterminar sa kahimtang sa usa ka tawo diha sa Simbahan ug sa pagtabang sa tawo sa proseso sa paghinulsol. Si Elder Richard G. Scott sa Korum sa Napulog Duha ka mga Apostoles naghatag og dugang nga mga panabut ngadto sa katuyoan sa pagkumpisal og seryosong mga sala ngadto sa may awtoridad nga mga lider sa priesthood:

“Ang seryosong kalapasan sama sa imoralidad nagkinahanglan sa panabang sa usa ka tawo kinsa naghupot og mga yawe sa pagka may awtoridad, sama sa usa ka bishop o stake president, sa hilum nagtabang sa proseso sa paghinulsol aron masiguro nga kini kompleto ug tarung nga pagkahimo” (“The Power of Righteousness,” Ensign, Nob. 1998, 69–70).

Doktrina ug mga Pakigsaad 58:43. “Mokumpisal kanila ug mobiya kanila”

Si Elder Neil L. Andersen sa Korum sa Napulog Duha Ka mga Apostoles mitudlo kon unsa ang gipasabut sa paghinulsol sa atong mga sala:

“Ang pagsalikway sa mga sala nagpasabut sa dili na pagbalik. Ang pagsalikway nagkinahanglan og panahon. Aron sa pagtabang kanato, ang Ginoo usahay motugot sa salin sa atong mga sayop nga magpabilin sa atong panumduman. Kini usa ka mahinungdanon nga bahin sa atong mortal nga pagkat-on.

“Samtang kita matinuoron nga mokumpisal sa atong mga sala, mopahiuli kutob sa atong mahimo ngadto sa nasakitan, ug mosalikway sa atong mga sala pinaagi sa pagsunod sa mga sugo, kita anaa sa proseso sa pagdawat sa kapasayloan. Uban sa panahon, kita mobati sa kasakit sa atong kasubo nga nag-anam og kawala, motang-tang ‘sa mga kasaypanan gikan sa atong mga kasingkasing’ [Alma 24:10] ug magbaton og ‘kalinaw sa tanlag.’ [Mosiah 4:3.]

“Alang niadtong kinsa tinuod nga mahinulsulon apan daw wala mobati og kahupayan: padayon sa pagsunod sa mga sugo. Ako mosaad kaninyo, ang kahupayan moabut sa gitakda nga panahon sa Ginoo. Ang pagpaayo nagkinahanglan usab og panahon” (“Paghinulsol … Aron Ako Moayo Kaninyo,” Liahona, Nob. 2009, 97).