Leksyon 77

Doktrina ug mga Pakigsaad 75

Pasiuna

Sa usa ka komperensya sa Simbahan nga gihimo niadtong Enero 25, 1832, nadawat ni Propeta Joseph Smith ang duha ka pagpadayag, nga parehong makita diha sa Doktrina ug mga Pakigsaad 75. Ang unang pagpadayag, nga gi-rekord diha sa mga bersikulo 1–22, gihatag ngadto sa usa ka grupo sa mga elder kinsa misumiter sa ilang mga pangalan alang sa misyonaryo nga serbisyo. Gitudloan sa Ginoo kini nga mga elder kalabut sa ilang misyonaryo nga mga katungdanan ug gihatagan sila og mga kompanyon sa misyon. Ang ikaduhang pagpadayag, gi-rekord diha sa mga bersikulo 23–26, gihatag ngadto sa ikaduhang grupo sa mga elder kinsa gustong mahibalo sa kabubut-on sa Ginoo kabahin nila. Gitudloan sa Ginoo kini nga mga elder sa pagsiguro sa ilang mga pamilya nga masangkapan ug sa pagdawat og tawag sa pagsangyaw sa ebanghelyo.

Mga Sugyot alang sa Pagtudlo

Doktrina ug mga Pakigsaad 75:1–5

Namulong ang Ginoo niadtong kinsa nagtinguha sa pagsangyaw sa ebanghelyo

Pipila ka mga adlaw sa dili pa nimo itudlo kini nga leksyon, dapita ang usa ka estudyante kinsa nakadawat og mission call, usa ka estudyante kinsa sa dili madugay mosumiter sa application sa pagserbisyo og misyon, o bag-ohay pa lang nga returned missionary aron motabang sa pagtudlo mahitungod sa pagpakigbahin sa ebanghelyo. Hatagi ang tawo og kopya sa mosunod nga outline sa pagtudlo, ug hangyoa siya sa pagtuon sa Doktrina ug mga Pakigsaad 75:1–4 ug sa pag-andam sa pagtudlo niana nga bahin sa leksyon.

Human sa debosyonal sa klase, ihatag ang panahon ngadto sa estudyante o returned missionary aron motudlo sa unsay iyang giandam.

Gisugyot nga Outline sa Pagtudlo alang sa Doktrina ug mga Pakigsaad 75:1–4

Dapita ang usa ka estudyante sa pagbasa og kusog sa Doktrina ug mga Pakigsaad 75:1–2. Hangyoa ang klase sa pagsunod, nga mangita kon alang kang kinsa ang Ginoo namulong niini nga mga bersikulo.

Pangutana: Ngadto kang kinsa ang Ginoo nakigsulti niini nga mga bersikulo? (Sa mga elder kinsa misumiter sa ilang mga pangalan alang sa misyonaryo nga buhat.)

Sultihi ang klase nga sa tinuod adunay duha ka mga pagpadayag nga gitipon diha sa Doktrina ug mga Pakigsaad 75 ug nga kini gihatag diha sa usa ka komperensya sa Simbahan. Ang unang pagpadayag gihatag ngadto sa usa ka grupo sa mga misyonaryo ug mipasabut kon sa unsa nga paagi sila mahimong mas epektibo sa pagtabang sa uban sa pagsabut sa ilang mga mensahe.

Dapita ang usa ka estudyante sa pagbasa og kusog sa Doktrina ug mga Pakigsaad 75:3–4. Hangyoa ang klase sa pagpangita sa tambag sa Ginoo ngadto sa mga elder kabahin sa ilang calling sa pagsangyaw sa ebanghelyo. Mahimo nimong isugyot nga markahan sa mga estudyante unsay ilang nadiskubrihan diha sa ilang mga kasulatan.

Pangutana: Sumala sa mga bersikulo 3–4, unsay gusto sa Ginoo nga buhaton sa mga elder samtang nagsangyaw sa ebanghelyo?

Dapita ang pipila ka mga estudyante sa pagpasabut unsay gipasabut sa mga pulong “manglakaw ug dili magpabilin,” “ni magtinapulan,” ug “maghago uban sa inyong gahum.”

Human matubag sa mga sakop sa klase, ipasabut nganong naghunahuna ka nga kadtong gitawag sa pagsangyaw sa ebanghelyo kinahanglan gayud nga mahibalo ug motudlo sa mga pagpadayag ug mga sugo nga gihatag sa Ginoo kanato (tan-wa sa bersikulo 4).

Pangutana: Ngano kaha nga importante nga ang mga misyonaryo sa Ginoo moserbisyo Kaniya niini nga mga paagi?

Ipakigbahin sa klase unsay imong gibuhat (o unsay imong nabuhat, kon ikaw nakaserbisyo og misyon) sa pag-andam sa pagsangyaw sa ebanghelyo sa paagi nga gihulagway sa Ginoo diha sa Doktrina ug mga Pakigsaad 75:3–4. Tapusa pinaagi sa pagpakigbahin sa imong mga hunahuna sa unsay mabuhat sa mga estudyante aron makigbahin sa ebanghelyo niini nga paagi niini nga panahon sa ilang mga kinabuhi.

Human ang estudyante o returned missionary nahuman sa pagtudlo, isulat ang mosunod nga dili kompleto nga pamahayag diha sa pisara: Kon kita matinud-anon sa pagsangyaw sa ebanghelyo, ang Ginoo mo …

Hangyoa ang mga estudyante sa pagbasa og hilum sa Doktrina ug mga Pakigsaad 75:5 ug sa pag-ila sa mga saad nga gihatag sa Ginoo niadto nga mga misyonaryo.

• Unsa ang gisaad sa Ginoo niadtong kinsa nagmatinud-anon sa pagsangyaw sa Iyang ebanghelyo?

Mahimo nimong ipasabut nga ang pulong binugkos nagpasabut og pagputol sa mga punoan sa lugas ug dayon bugkuson. Ang pagbaton og “daghang binugkos”nagpasabut og daghang ani.

• Unsa ang pipila ka mga “binugkos”nga madawat sa mga misyonaryong matinud-anong nakigbahin sa ebanghelyo? (Ang mga binugkos mahimong nagpasabut ngadto sa mga tawo kinsa midawat sa ilang mensahe [mga kinabig] ingon man sa mahangturong mga panalangin nga gilista diha sa bersikulo 5.)

Hangyoa ang mga estudyante sa pag-summarize sa mga saad nga gilangkob diha sa Doktrina ug mga Pakigsaad 75:5 pinaagi sa pagkompleto sa pamahayag nga baruganan diha sa pisara. Ang mosunod maoy usa ka paagi nga ang mga estudyante mahimong mohan-ay niini nga baruganan: Kon kita matinud-anon sa pagsangyaw sa ebanghelyo, ang Ginoo mopanalangin kanato uban sa dungog, himaya, ug kinabuhi nga dayon.

• Ngano kaha nga kadtong kinsa matinud-anong nagsangyaw sa ebanghelyo modawat sa ingon ka dako kaayo nga mahangturong mga panalangin?

Doktrina ug mga Pakigsaad 75:6–22

Ang Ginoo nagtawag ug nagtudlo og mga missionary companionship

Ipasabut nga human ang Ginoo mihatag og mga panudlo ug mga saad ngadto sa mga elder kinsa moserbisyo og mga misyon, gigrupo Niya sila ngadto sa mga companionship ug gihatagan ang kada companionship og piho nga mga panudlo.

Ipares-pares ang mga estudyante. Hangyoa ang usa ka estudyante sa pagbasa og hilum sa Doktrina ug mga Pakigsaad 75:6–12 ug ang laing estudyante sa pagbasa sa mga bersikulo 13–14. Hangyoa sila sa pagpangita sa mga tubag sa mosunod nga mga pangutana samtang sila nagbasa:

1. Ngadto kang kinsa ang Ginoo nakigsulti?

2. Unsa nga panalangin ang gisaad sa Ginoo kanila kon sila magmatinud-anon sa pagsangyaw sa ebanghelyo?

Human mabasa sa mga estudyante ang gi-assign nila nga mga bersikulo, dapita sila sa pagpakigbahin sa ilang pares sa mga tubag sa mga pangutana sa taas.

• Unsang dugang nga tambag ang gihatag sa Ginoo ngadto ni William E. McLellin ug Luke Johnson diha sa mga bersikulo 8–11 nga makatabang kanato nga epektibong mosangyaw sa ebanghelyo? (Pag-ampo aron madawat ang Tighupay—ang Espiritu Santo— aron sa pagtudlo kanato ug alang sa kalig-on nga magpabiling matinud-anon.)

• Unsa nga saad ang gisulti pag-usab sa Ginoo ngadto sa kada usa niadtong mga companionship diha sa mga bersikulo 11, 13, ug 14? (Siya maanaa uban kanila. Mahimo nimong isugyot nga markahan sa mga estudyante kining gibalik nga saad.)

Hangyoa ang pipila ka mga estudyante sa pagpahayag og usa ka baruganan nga ilang nakat-unan gikan niini nga mga bersikulo. Bisan og ang mga estudyante mahimong mogamit og lahi nga mga pulong, kinahanglan nga makaila sila sa mosunod nga baruganan: Kon kita matinud-anon sa pagsangyaw sa ebanghelyo, ang Ginoo maanaa uban kanato.

• Unsa nga mga kasinatian nga ikaw o laing tawo nga imong kaila aduna nga nagsiguro kanimo nga ang Ginoo maanaa niadtong kinsa matinud-anong nakigbahin sa Iyang ebanghelyo ngadto sa uban?

Dapita ang mga estudyante sa pagkonsiderar unsay ilang isulti ngadto sa usa ka higala o miyembro sa pamilya kinsa nakigbisog samtang nagserbisyo og full-time nga misyon. Hangyoa sila sa paggamit sa mga baruganan nga ilang nakat-unan diha sa leksyon karon ug sa pagsulat og mubo nga sulat sa pag-awhag niana nga misyonaryo diha sa ilang mga class notebook o mga scripture study journal. Dapita ang mga estudyante sa pagpakigbahin diha sa sulat unsay mabuhat sa mga misyonaryo nga mas matinud-anong magsangyaw sa ebanghelyo ug unsa ang pipila ka mga panalangin nga moabut ngadto niadtong kinsa mobuhat sa mao.

Human ang mga estudyante adunay igo nga panahon sa pagsulat sa ilang mga sulat, hangyoa ang pipila kanila sa pagpakigbahin sa unsay ilang gisulat.

I-summarize ang Doktrina ug mga Pakigsaad 75:15–22 pinaagi sa pagpasabut nga ang Ginoo nagtudlo sa mga misyonaryo sa pagpanalangin sa mga panimalay niadtong kinsa midawat kanila. Mitudlo usab Siya kanila kon unsa ang buhaton kon sila isalikway niadtong kang kinsa sila mipakigbahin sa ebanghelyo. (Mahimo nimong ipasabut nga ang pagtaktak sa abug sa inyong mga tiil isip usa ka pagpamatuod niadtong kinsa misalikway sa mga misyonaryo ug sa ilang mensahe buhaton lamang sa talagsaong mga sitwasyon kon ang Ginoo tataw nga nagmando niini.)

Doktrina ug mga Pakigsaad 75:23–29

Nagpasabut ang Ginoo kon sa unsa nga paagi ang mga pamilya niadtong Iyang gitawag sa pagserbisyo og misyon kinahanglan nga suportahan.

Ipasabut nga ang ikaduhang pagpadayag nga nalangkub diha sa Doktrina ug mga Pakigsaad 75 gihatag ngadto sa laing grupo sa mga elder. Dapita ang usa ka estudyante sa pagbasa og kusog sa Doktrina ug mga Pakigsaad 75:23, ug hangyoa ang klase sa pagpangita unsay gitinguha niini nga mga elder nga mahibaloan.

Ipasabut nga sa unang katuigan sa Simbahan daghang mga lalaki kinsa gitawag sa pagserbisyo og misyon adunay mga asawa ug mga anak kinsa nagsalig diha kanila alang sa suporta. Ang pagdawat sa tawag sa pagserbisyo usa ka dako kaayong sakripisyo alang sa tibuok pamilya. Ang natural nga kabalaka sa daghang mga elder mao unta ang unsay mahitabo sa ilang mga pamilya kon ilang dawaton ang usa ka tawag sa pagsangyaw sa ebanghelyo nga layo sa ilang panimalay.

Dapita ang usa ka estudyante sa pagbasa og kusog sa Doktrina ug mga Pakigsaad 75:24–28. Dapita ang klase sa pagpangita sa mga panudlo sa Ginoo ngadto sa mga elder kinsa gikinahanglan sa pagsangyaw sa ebanghelyo apan adunay mga pamilya nga amumahan.

• Sumala sa bersikulo 24, kon ang usa ka bana o amahan miserbisyo og usa ka full-time nga misyon, kinsa ang kinahanglang mosuporta sa iyang pamilya?

• Diha sa bersikulo 26, unsa ang gitudlo sa Ginoo sa mga elder nga buhaton kon sila makakita og dapit diin ang ilang mga pamilya masuportahan?

• Diha sa bersikulo 28, unsay gisulti sa Ginoo ngadto niadtong kinsang mga kahimtang dili motugot kanila sa pagbiya sa ilang mga pamilya aron sa pagsangyaw sa ebanghelyo?

Dapita ang usa ka estudyante sa pagbasa og kusog sa Doktrina ug mga Pakigsaad 75:29. Hangyoa ang klase sa pagpangita sa tambag nga gihatag sa Ginoo ngadto niining tanan nga mga lalaki. Mahimong makatabang ang pagpasabut nga ang usa ka tapulan mao ang usa ka tawo kinsa dili gustong motrabaho.

• Unsa nga mga pulong diha sa bersikulo 26 nga inyong magamit sa pag-summarize sa tambag sa Ginoo ngadto sa mga elder kinsa nakaserbisyo og mga misyon ug kadtong nagkinahanglan nga magpabilin sa panimalay aron sa pag-amuma sa ilang mga pamilya? (“Himoa, nga ang matag tawo makugihon diha sa tanan nga mga butang.” Siguroa nga ang mga estudyante nakasabut nga kini nga mga pulong masulti ngari kanatong tanan ug nga ang Ginoo nagmando kanato nga magmakugihon sa tanan nga mga butang.)

• Unsay ipasabut sa “makugihon diha sa tanan nga mga butang”? (Mahimong makanunayon, mapadayunon, mabinantayon, ug makugihon.)

Doktrina ug mga Pakigsaad 75:30–36

Nag-assign ang Ginoo og mga elder sa pagserbisyo isip misyonaryo nga mga kompanyon

I-summarize ang Doktrina ug mga Pakigsaad 75:30–36 pinaagi sa pagpasabut nga sa katapusan niini nga pagpadayag, ang Ginoo mi-assign og dugang nga mga missionary companionship.

Tapusa ang leksyon pinaagi sa pagdapit sa mga estudyante sa pagsulat unsay ilang mabuhat karon nga mahimong mas makugihon diha sa ilang pagserbisyo sa Ginoo. Dapita ang usa o duha ka mga estudyante sa pagpakigbahin sa ilang mga hunahuna ug mga pagpamatuod sa mga baruganang gihisgutan sa klase karon.

Komentaryo ug Background nga Impormasyon

Doktrina ug mga Pakigsaad 75:6–12. Ang tubag ni William E. McLellin ngadto sa tawag sa pagsangyaw sa ebanghelyo

Sa Oktubre 29, 1831, nadawat ni William E. McLellin ang tawag sa pagserbisyo og misyon ngadto sa silangan sa Estados Unidos, ug si Samuel H. Smith gitawag isip iyang kompanyon (tan-awa sa D&P 66:5–8). Gidawat ni William McLellin ang tawag; apan, gitapos niya ang iyang misyon og sayo ug mibalik ngadto sa Kirtland, Ohio sa katapusan sa Disyembre 1831.

Ingon nga makita diha sa Doktrina ug mga Pakigsaad 75:6–13, gibadlong sa Ginoo si William E. McLellin tungod sa iyang mga pagbagulbol, gibakwi ang tawag sa pagserbisyo sa silangang mga estados, ug gitawag si Orson Hyde sa pagpuli kaniya isip kompanyon ni Samuel Smith. Hinoon, ang Ginoo maloloy-ong mihatag og lain nga tawag alang kang Brother McLellin sa pagsangyaw sa ebanghelyo didto sa habagatan sa Estados Unidos uban ni Luke Johnson isip iyang kompanyon. Gidawat ni Brother McLellin ang tawag sa pagserbisyo, apan wala siya mipadayon nga matinud-anon. Siya dali nga mirason nga hilabihan kaayo ka masakiton nga mopadayon sa iyang misyon. Human mibiya sa iyang misyon, mibiyahe siya ngadto sa Hiram, Ohio, ug gipangasawa si Emiline Miller.

Human sa pagserbisyo og dugang nga mga misyon ug pagserbisyo sa pipila ka panahon isip usa ka miyembro sa Korum sa Napulog Duha ka mga Apostoles, si William E. McLellin gipahimulag niadtong Mayo 11, 1838, human mikumpisal nga siya mihunong na sa pag-ampo ug sa pagsunod sa mga sugo.

Doktrina ug mga Pakigsaad 75:20–22. “Itaktak ang mga abug gikan sa inyong mga tiil”

Ang lihok sa pagtaktak o paglimpyo sa abug gikan sa tiil sa usa ka tawo usa ka pagpamatuod batok niadtong kinsa midumili sa pagdawat sa ebanghelyo (tan-awa sa D&P 24:15; 60:15; 84:92; 99:4). Si Presidente Joseph Fielding Smith mipasabut:

“Sa dihang ang atong Ginoo mipadala sa iyang mga disipulo sa pagsangyaw sa mensahe sa Ebanghelyo iyang gitudloan sila sa pagtaktak sa abug sa ilang mga tiil isip usa ka pagpamatuod batok niadtong kinsa misupak kanila. Ingon usab … ang Ginoo mitudlo sa mga elder nga sila adunay sama nga pribilehiyo. … Ang paglimpyo sa ilang mga tiil, pinaagi sa paghugas o pagtrapo sa abug, ma-rekord sa langit isip usa ka pagpamatuod batok sa mga dautan. Kini nga lihok, hinoon, dili pagahimoon diha sa atubangan sa mga sad-an, ‘basin pa unya og kamo makapasuko kanila, apan diha sa tago, ug hugasi ang inyong mga tiil, ingon sa usa ka pagpamatuod batok kanila sa adlaw sa paghukom’ [D&P 60:15]. Ang mga misyonaryo sa Simbahan kinsa matinud-anong naghimo sa ilang katungdanan anaa ubos sa obligasyon sa pagbilin sa ilang pagpamatuod sa tanan kinsa ilang gipakigkitaan sa ilang buhat. Kini nga pagpamatuod mobarug isip usa ka saksi batok niadtong kinsa misalikway sa mensahe, diha sa paghukom” (Church History and Modern Revelation, 2 ka mga bol. [1953], 1:223; tan-awa usab ang Komentaryo ug Background nga Impormasyon alang sa D&P 24:15 diha sa leksyon 31).

Ang pagtaktak sa mga tiil sa usa ka tawo nagsilbing usa ka pagpamatuod batok niadtong kinsa sa hingpit misalikway sa gihatagan og awtoridad nga mga sulugoon sa Ginoo. Kini himoon lamang sa talagsaon nga mga sitwasyon kon ang Ginoo tataw nga nagmando niini. Kini usab nga lihok nagsilbi nga saksi sa ilang pagsalikway ug nga kadtong kinsa misangyaw sa ebanghelyo ngadto kanila dili na responsable kanila sa atubangan sa Ginoo.