Doktrina ug mga Pakigsaad 65–71 (Unit 15)

Materyal sa Pagpangandam alang sa Home-Study Teacher

Summary sa Daily Home-Study nga mga Leksyon

Ang mosunod nga summary sa mga panghitabo, mga doktrina, ug mga baruganan nga nakat-unan sa mga estudyante samtang gitun-an nila ang Doktrina ug mga Pakigsaad 65–71 (unit 15) dili tuyo nga itudlo isip kabahin sa imong leksyon. Ang leksyon nga imong itudlo magtutok lamang sa pipila niining mga doktrina ug mga baruganan. Sunda ang mga pag-aghat sa Balaang Espiritu samtang magkonsiderar ka sa mga panginahanglan sa imong mga estudyante.

Day 1 (Doktrina ug mga Pakigsaad 65–66)

Samtang gitun-an kini nga leksyon, nakat-unan sa mga estudyante nga ang ebanghelyo ni Jesukristo moabut ngadto sa mga kinatumyan sa yuta. Ilang nadiskubrihan nga kita adunay usa ka responsibilidad sa pag-andam sa atong mga kaugalingon ug sa uban alang sa Ikaduhang Pag-anhi ni Jesukristo.

Day 2 (Doktrina ug mga Pakigsaad 67)

Niini nga leksyon, nahibaloan sa mga estudyante ang mosunod nga mga baruganan: Ang Ginoo modungog sa atong mga pag-ampo ug nasayud sa atong mga kasingkasing; kon atong tugutan ang kahadlok diha sa atong mga kasingkasing, nan kita mahimong mawad-an sa mga panalangin. Nakat-unan usab nila nga kon atong tangtangon ang kasina ug kahadlok diha sa atong kaugalingon, mopaubos sa atong kaugalingon, ug magpadayon sa pagpailub, makahimo kita sa pagpuyo sa presensya sa Ginoo.

Day 3 (Doktrina ug mga Pakigsaad 68)

Isip kabahin niini nga leksyon, nakat-unan sa mga estudyante nga kon ang mga sulugoon sa Ginoo aghaton sa Espiritu Santo, ang ilang mga pulong modala sa mga katawhan ngadto sa kaluwasan. Nakat-unan usab sa mga estudyante nga ang mga bishop kinahanglan gayud nga aprubado sa Unang Kapangulohan ug gi-orden pinaagi sa tukma nga awtoridad. Agig dugang, nadiskubrihan sa mga estudyante nga ang Ginoo misugo sa mga ginikanan sa pagtudlo sa ilang mga anak aron makasabut sa doktrina sa paghinulsol, hugot nga pagtuo diha kang Kristo, bunyag, ug sa gasa sa Espiritu Santo.

Day 4 (Doktrina ug mga Pakigsaad 69–71)

Gikan sa tambag sa Ginoo ngadto ni John Whitmer, nakat-unan sa mga estudyante nga ang Ginoo naglaum nga matipigan ang mga kasaysayan alang sa kaayohan sa Simbahan ug sa bag-o nga henerasyon. Nadiskubrihan usab sa mga estudyante nga kita manubag sa Ginoo sa mga katungdanan nga Iyang gisalig ngari kanato. Sa katapusan, nakat-unan sa mga estudyante nga kon ang mga tawo mosaway sa Simbahan, makatubag kita pinaagi sa pagpakigbahin sa mga kamatuoran gikan sa mga kasulatan ug sa pagsunod sa giya sa Espiritu.

Pasiuna

Kini nga leksyon nag-focus sa mga pulong sa Ginoo ngadto ni William E. McLellin diha sa Doktrina ug mga Pakigsaad 66. Pinaagi sa ilang pagtuon niining seksyon, makat-unan sa mga estudyante ang kaimportante sa paghinulsol sa tanan nilang mga sala, sa pagtangtang gikan sa ilang kinabuhi sa mga butang nga nakababag sa ilang espiritwal nga pag-uswag, ug sa pagpabilin nga matinud-anon hangtud sa katapusan .

Mga Sugyot alang sa Pagtudlo

Doktrina ug mga Pakigsaad 66

Ang Ginoo nagsugo ni William E. McLellin sa pagsangyaw sa ebanghelyo, mobiya sa tanang dili matarung, ug matinud-anong magpadayon hangtud sa katapusan

Sa dili pa magklase, kopyaha ang mosunod nga diagram diha sa pisara.

Sa pagsugod sa klase, dapita ang mga estudyante sa pagsusi sa diagram diha sa pisara. Hangyoa sila sa pagpamalandong og hilum kon asa man nila ibutang ang ilang kaugalingon diha sa diagram. Isugyot usab nga ilang ikonsiderar kon asa nga direksyon sila mopaingon—mas magpaduol sa Dios o mas magpalayo gikan Kaniya. Dayon dapita ang usa ka estudyante sa pagbasa og kusog sa mosunod nga pamahayag ni Presidente Henry B. Eyring sa Unang Kapangulohan. Hangyoa ang klase sa pagpaminaw sa mga paagi nga kita makapaduol ngadto sa Dios.

“Kon gusto kamo nga magpaduol sa usa ka tawo kinsa inyong gipangga, apan kamo nahimulag sa maong tawo, nasayud kamo kon unsaon kini pagbuhat. Mangita kamo og paagi nga ika-istorya sila, maminaw kamo kanila, ug makadiskubre kamo og mga paagi sa pagbuhat sa mga butang alang sa usag usa. Kon mas kanunay kana nga mahitabo, mas magpadayon kini og dugay, mahimong mas halawom ang kalig-on sa pagbati. Kon dako ang panahon nga molabay nga walay panag-istorya, pagpaminaw, ug pagbuhat, ang bugkos magkahuyang.

“Ang Dios hingpit ug makagagahum sa tanan, ug kamo ug ako mga mortal. Apan siya ang atong Amahan, siya nahigugma kanato, ug siya nagtanyag og samang oportunidad sa pagpaduol ngadto kaniya sama sa usa ka mahigugmaon nga higala. Ug buhaton ninyo kini sa sama gayud nga paagi: pagkig-istorya, pagpaminaw, ug pagbuhat” (“To Draw Closer to God,” Ensign, Mayo 1991, 66).

Sumala ni Presidente Eyring, sa unsang paagi nga kita makapaduol ngadto sa Dios?
Unsa ang gipasabut sa pakig-istorya, pagpaminaw, ug pagbuhat samtang kita magtinguha nga magpaduol ngadto sa Dios?

Ipasabut nga sa unang mga adlaw sa Simbahan, usa ka tawo nga ginganlan og William E. McLellin mipaduol ngadto sa Dios sa dihang nakat-unan niya ang mahitungod sa gipahiuli nga ebanghelyo. Siya nabunyagan niadtong Agosto 20, 1831. Wala madugay human niana, naordinahan siya nga usa ka elder, ug siya miuban ni Hyrum Smith sulod sa pipila ka mga semana isip usa ka misyonaryo. Niadtong Oktubre 1831, mibiyahe siya ngadto sa Ohio alang sa usa ka komperensya sa Simbahan. Samtang anaa didto, nahimamat niya si Propeta Joseph Smith. Pagka-Oktubre 29, si Brother McLellin hilum nga nag-ampo, naghangyo sa Ginoo sa pagbutyag sa mga tubag sa lima ka piho nga mga pangutana pinaagi sa Propeta. Sa walay pagsulti ni Joseph Smith sa mga pangutana, si Brother McLellin mihangyo og usa ka pagpadayag. Samtang gidiktar sa Propeta ang pagpadayag nga makita sa Doktrina ug mga Pakigsaad 66, nasuta ni Brother McLellin nga ang matag usa sa iyang mga pangutana natubag. Ang Ginoo mihatag kaniya og mga instruksyon ug mga pasidaan sa pagtabang kaniya nga magpabilin nga matinud-anon ug sa katapusan makadawat og kinabuhing dayon.

Dapita ang usa ka estudyante sa pagbasa og kusog sa Doktrina ug mga Pakigsaad 66:1–2. Hangyoa ang klase sa pagsunod, nga mangita sa mga rason nga ang Ginoo mipanalangin ni William McLellin sa panahon niining pagpadayag.

Nganong si Brother McLellin nakadawat man sa mga panalangin gikan sa Ginoo? (Tungod kay siya mibiya sa iyang mga sala, midawat sa mga kamatuoran sa Ginoo, ug midawat sa kahingpitan sa ebanghelyo.)

Dapita ang mga estudyante sa pagbasa og hilum sa Doktrina ug mga Pakigsaad 66:3, nga mangita sa unsay gisulti sa Ginoo nga kinahanglan pa nga buhaton ni Brother McLellin aron ikahimuot Niya. Hangyoa ang mga estudyante sa pagreport sa unsay ilang makat-unan.

Unsa kaha ang gipasabut sa “limpyo, apan dili tanan”? (Mahimong kinahanglan nimong tabangan ang mga estudyante nga masabtan nga bisan si Brother McLellin nakahimo og dakong pag-uswag ug napanalanginan tungod sa iyang mga paningkamot, kinahanglan gihapon siya nga maghinulsol sa pipila ka mga sala.)
Unsa ang atong makat-unan gikan sa tambag sa Ginoo diha sa bersikulo 3? (Kinahanglang mahibaloan sa mga estudyante ang mosunod nga sugo: Kita gisugo sa paghinulsol sa tanan natong mga sala.)
Ngano kaha nga importante nga mahinulsulan ang tanan natong mga sala, ug dili lang ang pipila niini?
Unsa ang atong makat-unan gikan niining bersikulo mahitungod sa paagi nga ang Ginoo motabang kanato sa atong paghinulsol? (Ang tubag sa mga estudyante mahimong magkalain-lain, apan kinahanglan nilang ipadayag ang mosunod nga baruganan: Ang Ginoo mopakita kanato sa mga butang nga kinahanglan natong hinulsulan.)

Dapita ang usa ka estudyante sa pagbasa og kusog sa mosunod nga pamahayag ni Presidente Henry B. Eyring. Hangyoa ang klase sa pagpaminaw sa usa ka paagi nga kita makapangayo sa Ginoo og tabang sa atong paghinulsol.

“Usa sa mga pangutana nga kinahanglan gayud natong ipangutana sa atong Langitnong Amahan diha sa pribado nga pag-ampo mao kini: ‘Unsa man ang akong nabuhat karon, o wala nabuhat, nga wala Nimo ikahimuot? Kon masayud lang ko, maghinulsol ko sa tibuok nakong kasingkasing sa walay paglangay.’ Kanang mapainubsanon nga pag-ampo matubag” (“Do Not Delay,” Ensign, Nob. 1999, 34).

Awhaga ang mga estudyante sa paghunahuna mahitungod sa mga panalangin nga ilang nadawat samtang sila mibiya gikan sa sala ug midawat sa ebanghelyo. Dapita sila sa pagtinguha nga masayud sa mga butang nga kinahanglan nilang hinulsulan aron sila makadawat gani sa mas dagkong mga panalangin.

Ipares-pares ang mga estudyante. Hangyoa ang parisan nga magdungan og basa sa Doktrina ug mga Pakigsaad 66:5–9, mangita sa unsay gusto sa Ginoo nga buhaton ni Brother McLellin. Hangyoa ang mga estudyante sa pag-report kon unsay ilang makit-an. Hangyoa ang mga estudyante sa pag-report kon unsay ilang makit-an.

Sumala sa mga bersikulo 8–9, unsa nga mga panalangin ang madawat ni Brother McLellin kon siya magmatinud-anong mobuhat sa kabubut-on sa Ginoo?
Unsa ang atong makat-unan gikan niini nga mga bersikulo mahitungod sa mga panalangin nga atong madawat kon kita mosunod sa kabubut-on sa Ginoo alang kanato? (Kinahanglang mahibaloan sa mga estudyante ang mosunod nga baruganan: Kon kita matinud-anon sa pagbuhat sa kabubut-on sa Ginoo, Siya magauban kanato ug mopanalangin kanato aron atong matuman kon unsa ang Iyang gipangayo gikan kanato.)

Ipasabut nga agig dugang sa paghatag ni William McLellin og mga instruksyon mahitungod sa unsay buhaton, ang Ginoo mihatag kaniya og usa ka pasidaan. Hangyoa ang usa ka estudyante sa pagbasa og kusog sa nag-unang duha ka sentence sa Doctrina ug mga Pakigsaad 66:10. Sa dili pa siya mobasa, ipasabut nga ang unang sentence naglakip sa pulong nga masamok. Ipasabut nga dunay butang nga makasamok nato kon kini mobabag sa atong agianan o mohimo sa usa ka buluhaton nga lisud kaayong matuman.

Ang Ginoo misugo ni Brother McLellin nga “biya-i ang tanan nga dili matarung.” Sa unsang paagi nga ang pagkadili matarung, o sala, makasamok sa iyang misyonaryo nga buhat?
Sa unsang paagi nga ang pagkadili matarung makasamok kanato sa espirituhanon nga paagi?

Basaha og kusog ang ikatulo nga sentence sa Doktrina ug mga Pakigsaad 66:10, ug dapita ang klase nga mangita sa piho nga pasidaan nga gihatag sa Ginoo ngadto ni William McLellin.

Sumala sa bersikulo 10, unsa nga tintasyon nga gipanlimbasugan ni Brother McLellin?
Unsay atong makat-unan gikan sa bersikulo 10 mahitungod sa kahibalo sa Ginoo mahitungod sa matag usa kanato? (Tabangi ang mga estudyante nga makita nga ang Ginoo nasayud sa atong piho nga mga hagit ug mga tintasyon, sama nga Siya nasayud sa mga hagit ug mga tintasyon ni Brother McLellin.)
Ngano kaha nga importanting masabtan nga ang Ginoo nasayud sa atong piho nga mga hagit ug mga tintasyon?

Dapita ang usa ka estudyante sa pagbasa og kusog sa Doktrina ug mga Pakigsaad 66:11–13. Hangyoa ang klase sa pagsunod, nga mangita sa dugang nga tambag nga gihatag sa Ginoo ngadto ni William McLellin.

Sumala sa bersikulo 12, unsay kinahanglan natong buhaton aron makadawat og kinabuhing dayon? (Tabangi ang mga estudyante sa pag-ila nga kon magpadayon kitang magmatinud-anon hangtud sa katapusan, makadawat kita og kinabuhing dayon.)
Unsa ang kahulugan niini nganha kaninyo nga magpadayong matinud-anon hangtud sa katapusan?

Ipasabut nga sa dihang kini nga pagpadayag gihatag, si William McLellin adunay nadawat nga pagpamatuod sa gipahiuli nga ebanghelyo. Human nahatag ang pagpadayag, siya mipamatuod sa propetikanhon nga tawag ni Joseph Smith. Si Brother McLellin matinud-anong miserbisyo sulod sa pipila ka mga tuig ug natawag sa pagserbisyo isip usa sa unang mga sakop sa Korum sa Napulog Duha ka mga Apostoles niining dispensasyon. Hinoon, wala siya magpadayon nga matinud-anon hangtud sa katapusan. Gani, siya nakigbatok ni Propeta Joseph Smith, ug siya gi-excommunicate niadtong 1838.

Giyahi ang pagtagad sa mga estudyante ngadto sa diagram sa pisara, ug isugyot nga sa makausa pa ilang ikonsiderar kon asa nila ibutang ang ilang kaugalingon diha niana nga diagram. Dapita sila sa pagpamalandong sa mosunod nga pangutana:

Unsa ang inyong buhaton aron molihok nga mas maduol ngadto sa Dios ug magpadayon nga matinud-anon hangtud sa katapusan?

Pagpamatuod bahin sa mga doktrina ug mga baruganan nga inyong nahisgutan, ug awhaga ang mga estudyante sa pagbuhat niining mga kamatuoran.

Sunod nga Unit (Doktrina ug mga Pakigsaad 72–76)

Hangyoa ang mga estudyante sa paghunahuna kon unsa kahay bation kon makakita sa daklit sa impyerno (kawanangan sa kangitngit) ug sa uban nga pag-antus sa dili diosnon ug dayon makadawat og panan-awon sa celestial, terrestrial, ug telestial nga mga gingharian sa himaya. Ipasabut nga tungod sa ilang buhat sa dinasig nga paghubad sa Biblia, nabuksan ang mga panan-aw ni Propeta Joseph Smith ug ni Sidney Rigdon aron makita ang usa ka panan-awon sa tulo ka ang-ang sa himaya, nga narekord sa Doktrina ug mga Pakigsaad 76.