Home-Study nga Leksyon
Doktrina ug mga Pakigsaad 124–128 (Unit 27)
Materyal sa Pagpangandam alang sa Home-Study Teacher
Summary sa Daily Home-Study nga mga Leksyon
Ang mosunod nga summary sa mga panghitabo, mga doktrina, ug mga baruganan nga nakat-unan sa mga estudyante samtang gitun-an nila ang Doktrina ug mga Pakigsaad 124–128 (unit 27) dili tuyo nga itudlo isip kabahin sa imong leksyon. Ang leksyon nga imong itudlo magtutok lamang sa pipila niining mga doktrina ug mga baruganan. Sunda ang mga pag-aghat sa Balaang Espiritu samtang magkonsiderar ka sa mga panginahanglan sa imong mga estudyante.
Ang Doktrina ug mga Pakigsaad 124 mao ang unang pagpadayag nga nadawat sa Nauvoo, Illinois, nga namantala sa Doktrina ug mga Pakigsaad. Samtang ang mga estudyante nagtuon sa sugo sa Ginoo sa pagtukod og templo sa Nauvoo, nakat-unan nila nga ang templo mao lamang ang dapit diin atong madawat ang kahingpitan sa mga ordinansa sa priesthood alang sa katubsanan sa mga buhi ug sa mga patay. Nadiskubrihan usab nila nga pinaagi sa pagsunod sa mga sugo sa Ginoo, atong mapamatud-an ang atong kamatinud-anon.
Samtang tapuson sa mga estudyante ang ilang pagtuon sa Doktrina ug mga Pakigsaad 124, ilang nakat-unan nga kon kita mopatalinghug sa tambag sa mga propeta, makaayo kini kanato ug ang Ginoo nagtawag og mga lider sa priesthood sa pagdumala sa buhat sa pagpangalagad ug sa pagtabang nga mahingpit ang mga Santos. Sa Doktrina ug mga Pakigsaad 125 ug 126, nakat-unan sa mga estudyante nga kon kita magkugi sa paghago alang sa Ginoo, nan Siya modawat sa atong matarung nga halad.
Day 3 (Doktrina ug mga Pakigsaad 127; 128:1–11)
Ang Doktrina ug mga Pakigsaad 127 ug 128 gikuha gikan sa mga sulat ni Propeta Joseph Smith ngadto sa mga Santos samtang nagbalhin-balhin siya aron malikayan ang dili pinasubay sa balaod nga pag-aresto kaniya sa mga opisyales sa Missouri. Diha niini nga mga seksyon nadiskubrihan sa mga estudyante nga ang pagsalig sa Langitnong Amahan makatabang kanato sa paglahutay sa kalisdanan ug nga kon tukma ang pagkarekord, ang mga ordinansa sa templo nga atong ipahigayon dinhi sa yuta mabugkos ngadto sa langit.
Atol sa ilang pagtuon sa nahibilin sa Doktrina ug mga Pakigsaad 128, nahibaloan sa mga estudyante ang mosunod nga mga baruganan kalabut sa buhat sa templo: Ang kaluwasan sa atong mga patay kinahanglanon ug mahinungdanon sa atong kaluwasan. Ang bunyag alang sa mga patay makatabang nga magsumpay kanato sa kahangturan ngadto sa atong mga katigulangan. Ang mga yawe, gahum, ug awtoridad sa milabay nga mga dispensasyon gipahiuli sa dispensasyon sa kahingpitan sa panahon. Kon maghimo kita sa buhat sa family history ug modawat sa mga ordinansa sa templo alang sa atong mga katigulangan, naghimo kita og matarung nga halad ngadto sa Ginoo.
Pasiuna
Kini nga leksyon nag-focus sa Doktrina ug mga Pakigsaad 124:1–21. Samtang magtuon ang mga estudyante niining mga bersikulo, makakat-on sila mahitungod ni Joseph ug Hyrum Smith ug sa ilang tahas sa Pagpahiuli sa Simbahan ni Jesukristo.
Mga Sugyot alang sa Pagtudlo
Doktrina ug mga Pakigsaad 124:1–14
Ang Ginoo mipasabut nganong gitawag Niya si Joseph Smith aron sa pagpahiuli sa ebanghelyo ni Jesukristo
Isulat ang pulong nga Lig-on diha sa pisara. Pangutan-a ang mga estudyante kon unsa nga mga kinaiya, sumala sa kalibutanong mga sumbanan, ang kasagaran nga gikonsiderar kon maghulagway og usa ka tawo nga lig-on. Samtang motubag ang mga estudyante, isulat sa pisara ang ilang mga tubag ubos sa Lig-on. Dayon isulat ang pulong nga Huyang diha sa pisara. Pangutana sa mga estudyante kon unsa nga mga kinaiya, sumala sa kalibutanong mga sumbanan, ang kasagaran nga gikonsiderar kon maghulagway og usa ka tawo nga huyang.
-
Sa unsang mga paagi nga ang kalibutan naningkamot sa paghimo sa batan-ong lalaki o batan-ong babaye nga mobati nga huyang sumala sa mga sumbanan niini?
Dapita ang usa ka estudyante sa pagbasa og kusog sa Doktrina ug mga Pakigsaad 35:13. Dayon dapita ang mga estudyante sa pagbasa og hilum sa Doktrina ug mga Pakigsaad 124:1, nga mangita kon unsa ang gihulagway sa Ginoo isip huyang.
-
Sa unsang mga paagi nga tingali si Joseph Smith huyang sa dihang gitawag siya aron sa pagpahiuli sa ebanghelyo?
-
Sumala sa Doktrina ug mga Pakigsaad 35:1, ngano nga ang Ginoo motawag sa huyang nga mga tawo aron motabang sa Iyang buhat? (Samtang motubag ang mga estudyante, i-summarize ang ilang mga tubag pinaagi sa pagsulat og usa ka kamatuoran nga susama sa mosunod diha sa pisara: Ang Ginoo nagpakita sa Iyang kaalam pinaagi sa mahuyang nga mga butang sa yuta.)
-
Sa unsang paagi nga ang Ginoo mipakita sa Iyang kaalam pinaagi ni Propeta Joseph Smith?
Hangyoa ang mga estudyante nga maghingalan og pipila ka mga calling ug mga buluhaton nga lagmit ilang madawat samtang batan-on pa sila. (Ang mga tubag mahimong maglakip sa pagka-home teacher, sakop sa kapangulohan sa klase o korum, misyonaryo, pagpamulong sa sakrament miting, o pag-fellowship sa usa ka tawo diha sa ilang ward o branch.)
-
Sa unsang paagi nga ang paghinumdom sa baruganan nga gisulat diha sa pisara makatabang kanato kon kita nakadawat og mga calling ug mga buluhaton sa pagserbisyo sa Simbahan?
I-summarize ang Doktrina ug mga Pakigsaad 124:2–14 pinaagi sa pagpasabut nga ang Ginoo misugo ni Propeta Joseph Smith sa pagsulat og pamahayag sa ebanghelyo ngadto sa mga magmamando sa yuta.
Doktrina ug mga Pakigsaad 124:15–21
Naghatag ang Ginoo og mga instruksyon ngadto sa mga lider sa Simbahan didto sa Nauvoo
Hangyoa ang mga estudyante sa paghunahuna og usa ka higayon nga ang usa ka tawo mihatag kanila og sinsero nga komplimento. Dapita ang pipila ka mga estudyante sa pagpakigbahin sa ilang mga kasinatian ug nganong kining mga komplimento makahuluganon ngadto kanila.
Ipasabut nga ang Ginoo namulong sa pipila ka mga indibidwal niini nga pinadayag ug midayeg kanila pinaagi sa pagpasabut bahin sa ilang mga kalig-on ug mga kontribusyon. Dayon dapita ang mga estudyante sa pagpangita sa hilum sa Doktrina ug mga Pakigsaad 124:15–20, nga mangita kon unsa ang gisulti sa Ginoo mahitungod niining mga indibidwal. Mahimo nimong isugyot nga ilang markahan ang mga pulong nga makahuluganon ngadto kanila. Human sa igong panahon, dapita ang mga estudyante sa pag-atubang ngadto sa usa ka partner ug ipakigbahin ang ilang nadiskubrihan, lakip na kon hain nga mga pamahayag nga mas nabantayan nila ug ngano man.
Mahimo nimong ipasabut nga sa Doktrina ug mga Pakigsaad 124:19 ang Ginoo namahayag nga tulo ka matinud-anon nga mga lalaki kinsa bag-ohay lang namatay (David W. Patten, Edward Partridge, ug Joseph Smith Sr., ang amahan sa Propeta) gidawat ngadto sa presensya sa Ginoo.
Dapita ang mga estudyante sa pagribyu sa Doktrina ug mga Pakigsaad 124:15, 20, nga mangita kon unsay gisulti sa Ginoo mahitungod ni Hyrum Smith ug ni George Miller.
-
Unsay gisulti sa Ginoo mahitungod nilang Hyrum Smith ug George Miller?
-
Unsa ang bation sa Ginoo niadtong adunay kaligdong? (Ang mga estudyante mahimong mogamit og lain-laing mga pulong, apan kinahanglan silang mahibalo sa mosunod nga kamatuoran: Ang Ginoo nahigugma ug misalig niadtong dunay kaligdong sa kasingkasing.)
-
Unsaon ninyo pag-define sa kaligdong sa kasingkasing?
Dapita ang usa ka estudyante sa pagbasa og kusog sa mosunod nga pamahayag ni Elder Joseph B. Wirthlin sa Korum sa Napulog Duha ka mga Apostoles:
“Para nako, ang kaligdong nagpasabut nga kanunayng maghimo kon unsa ang husto ug maayo, bisan unsa pa man ang hinanaling mga sangputanan. Nagpasabut kini nga magmatarung gikan gayud sa kahiladman sa atong kalag, dili lamang sa atong mga lihok apan, mas importante, diha sa atong mga hunahuna ug sa atong mga kasingkasing. Ang personal nga kaligdong nagpasabut sa maong pagkamasaligan ug dili madala sa kahiwian nga kita dili makahimo sa ingon nga sayop sa usa ka pagsalig o pakigsaad”(“Personal Integrity,” Ensign, Mayo 1990, 30).
-
Base sa pagpasabut ni Elder Wirthlin, ngano kaha nga ang Ginoo nahigugma niadtong dunay kaligdong sa kasingkasing?
Aron matabangan ang mga estudyante nga makasabut kon giunsa ni Hyrum Smith sa pagpakita og kaligdong sa iyang kasingkasing, hangyoa ang usa ka estudyante sa pagbasa og kusog sa mosunod nga pamahayag ni Elder M. Russell Ballard sa Korum sa Napulog Duha ka mga Apostoles:
“Si Hyrum Smith, magulang nga lalaki, higala, ug tigtudlo sa Propeta, nagpakita sa hingpit, dili kaduha-duhaan nga gugma, pagkamatinud-anon, ug pagkamaunungon ngadto sa Ginoo ug sa iyang manghud nga lalaki, si Joseph. Ang ilang panag-igsoonay mahimong dili matupngan. …
“Bahin ni Hyrum, si Joseph miingon, ‘Nag-ampo ko sa akong kasingkasing nga unta ang tanan nakong kaigsoonan sama sa akong pinalanggang igsoon nga si Hyrum, kinsa ingon ka kalma sama sa nati nga karnero, ug may kaligdong sama ni Job, ug sa laktud nga pagkasulti, ang kaaghup ug kamapainubsanon ni Kristo; ug gihigugma nako siya nianang gugma nga mas lig-on pa sa kamatayon, kay walay panahon nga ako nasuko kaniya, ni siya nasuko nako.’ (History of the Church, 2:338.) …
“Si Hyrum dili matarug, bisan sa atubangan sa kamatayon. Human sa usa ka panahon sa hilabihan nga kalisud ug pagpanggukod, siya misulat:
“‘Ako magpasalamat sa Dios nga akong gibati ang usa ka determinasyon nga mamatay, kay sa molimud sa mga butang nga nakita sa akong mga mata, nga nagunitan sa akong mga kamot [ang mga palid diin gihubad ang Basahon ni Mormon], ug nga akong gipamatud-an, bisan asa ako gitambug; ug ako makasiguro hinigugma nakong mga kaigsoonan nga ako gilig-on aron makahatag og usa ka lig-on nga pagpamatuod, bisan sa atubangan sa kamatayon mismo, sama sa gibuhat gayud nako sa akong kinabuhi.’ (Times and Seasons, Dis. 1839, p. 23.)” (“The Family of the Prophet Joseph Smith” Ensign, Nob. 1991, 7).
-
Giunsa sa pagpakita ni Hyrum Smith ang iyang kaligdong?
Dapita ang mga estudyante sa pagpamalandong og usa ka aspeto sa ilang mga kinabuhi diin nakaangkon sila og dugang kaligdong. Awhaga sila nga mohimo og usa ka personal nga tumong sa pagpalambo sa ilang kaligdong niana nga dapit.
Tapusa pinaagi sa pagpakigbahin sa imong pagpamatuod sa mga baruganan nga gitudlo karon.
Sunod nga Unit (Doktrina ug mga Pakigsaad 129–132)
Pangutan-a ang mga estudyante kon nakahibalo ba sila pila ka ang-ang ang naa sa celestial nga gingharian. Ipasabut nga sa umaabut nga semana nga mga pagtuon, ilang madiskubrihan ang pipila ka mga baruganan nga may kalabutan sa celestial nga gingharian ug sa plano sa kaluwasan.