Leksyon 140: Doktrina ug mga Pakigsaad 132:1–2, 34–66

Leksyon 140

Doktrina ug mga Pakigsaad 132:1–2, 34–66

Pasiuna

Samtang nagtrabaho si Propeta Joseph Smith sa dinasig nga mga kausaban sa Biblia niadtong 1831, nangayo siya sa Ginoo alang sa panabut bahin sa karaang mga patriarch nga dunay sobra sa usa ka asawa. Nianang higayuna ang Propeta nagsugod sa pagdawat og pagpadayag agig tubag sa iyang mga pangutana. Sa misunod nga katuigan, ang Ginoo misugo sa Propeta ug sa ubang mga Santos sa Ulahing mga Adlaw sa pagtuman sa baruganan sa dinaghan nga kaminyoon. Niadtong Hulyo 1843, samtang ang punoang buhatan sa Simbahan didto pa sa Nauvoo, Illinois, ang Propeta mirekord sa pagpadayag nga iyang nadawat. Ang Doktrina ug mga Pakigsaad 132 naghisgot sa mga pagtulun-an sa Ginoo kalabut sa dinaghan nga kaminyoon, lakip na ang tambag ngadto nila ni Joseph ug Emma Smith.

Mga Sugyot alang sa Pagtudlo

Doktrina ug mga Pakigsaad 132:1–2, 34–48

Ang Ginoo mipadayag sa baruganan bahin sa dinaghan nga kaminyoon

Sugdi pinaagi sa pagpasabut nga samtang nagtrabaho si Joseph Smith sa dinasig nga mga kausaban sa Daang Tugon niadtong 1831, nakabasa siya bahin sa karaang mga propeta nga nagbuhat og dinaghan nga kaminyoon (nga gitawag usab og daghan og asawa [polygamy]). Ubos niini nga kahimtang, ang usa ka lalaki maminyo og sobra sa usa ka asawa. Ang Propeta nagtuon sa mga kasulatan, namalandong sa unsay iyang nakat-unan, ug sa katapusan midala sa iyang mga pangutana bahin sa dinaghan nga kaminyoon ngadto sa Langitnong Amahan pinaagi sa pag-ampo.

Isulat ang Genesis 16:1–3 diha sa pisara. Ipasabut nga kining mga bersikulo naghulagway sa mga aksyon nila ni Sarai ug Abram, nga nailhan sa kaulahian isip Sara ug Abraham. Dapita ang usa ka estudyante sa pagbasa og kusog niini nga mga bersikulo. Hangyoa ang klase sa pagsunod ug sa paghunahuna bahin sa bisan unsang pangutana nga tingali aduna sila bahin niining panghitabo sa kinabuhi nila ni Abram ug Sarai.

Dapita ang mga estudyante sa pagbasa og hilum sa Doktrina ug mga Pakigsaad 132:1, nga mangita kon unsay gipangutana ni Propeta Joseph Smith samtang nagtuon siya sa mga tudling diha sa Daang Tugon kalabut sa pagbuhat sa dinaghan nga kaminyoon. Hangyoa ang mga estudyante sa pag-report kon unsay ilang makit-an. (Mahimo nimong ipasabut nga ang pulong nga puyo-puyo usa ka termino nga gigamit sa paghulagway sa kababayen-an sa Daang Tugon kinsa, sa panahon ug sa kultura diin sila nagpuyo, naminyo sa legal nga paagi ngadto sa usa ka lalaki apan dunay mas ubos nga kahimtang sa katilingban kay sa usa ka asawa. Ang mga puyo-puyo dili kabahin sa pagbuhat sa dinaghan nga kaminyoon sa atong dispensasyon.)

Isulat sa pisara ang mosunod nga pangutana: Nganong mosugo man ang Ginoo sa matarung nga mga lalaki ug babaye sa pagsunod sa baruganan sa dinaghan nga kaminyoon sa usa ka pihong panahon?

Ipasabut nga sa ilang pagtuon sa Doktrina ug mga Pakigsaad 132, makakita ang mga estudyante og mga tubag sa pangutana diha sa pisara ug sa ubang mga pangutana nga mahimong aduna sila kalabut sa dinaghan nga kaminyoon. Dapita sila sa pagsulat sa mga doktrina ug mga baruganan nga ilang madiskubrihan atol sa ilang pagtuon karon.

Dapita ang pipila ka estudyante nga magpuli-puli sa pagbasa og kusog sa Doktrina ug mga Pakigsaad 132:34–36. Hangyoa ang klase sa pagsunod, nga mangita kon nganong sila si Abraham ug Sara nagsugod sa pagbuhat sa dinaghan nga kaminyoon.

Sumala sa bersikulo 34, nganong gihatagan man ni Sara si Abaraham og laing asawa? Unsay gitudlo niini ngari kanato bahin sa baruganan sa dinaghan nga kaminyoon? (Samtang motubag ang mga estudyante, isulat sa pisara ang mosunod nga baruganan: Ang dinaghan nga kaminyoon aprubado lamang sa Ginoo kon Iya kining isugo.)
Unsa may natuman nga nakatabang ang pagkamasulundon nila ni Sara ug Abraham? (Ang mga saad sa Ginoo ngadto ni Abraham, lakip na ang saad nga si Abraham makabaton og kaliwatan sama kadaghan sa mga bitoon [tan-awa sa Genesis 15:5].)

Aron matabangan ang mga estudyante nga mas makasabut sa baruganan nga imong gisulat sa pisara, isugyot nga ilang isluat ang Jacob 2:27, 30 diha sa ilang mga kasulatan duol sa Doktrina ug mga Pakigsaad 132:34. Dapita ang usa ka estudyante sa pagbasa og kusog niini nga mga bersikulo. Ipasabut nga ang pagbaton og usa ra ka asawa [monogamy] (kaminyoon tali sa usa ka lalaki ug usa ka babaye) mao ang sumbanan sa Dios alang sa kaminyoon gawas kon mosugo Siya sa lain.

Dapita ang usa ka estudyante sa pagbasa og kusog sa Doktrina ug mga Pakigsaad 132:37–38. Hangyoa ang klase sa pagsunod, nga mangita sa mga pulong nga naghulagway sa mga kahimtang sa dihang ang Ginoo misugo sa pagbuhat sa dinaghan nga kaminyoon. Hangyoa ang mga estudyante sa pag-report kon unsay ilang makit-an.

I-summarize ang Doktrina ug mga Pakigsaad 132:39, 41–43 pinaagi sa pagpasabut nga gipamatud-an sa Ginoo nga kon ang mga tawo magbuhat sa baruganan sa dinaghan nga kaminyoon sumala sa Iyang sugo, dili sila sad-an sa sala sa pagpanapaw. Hinoon, kon dunay magbuhat og dinaghan nga kaminyoon ubos sa bisan unsa nga kahimtang nga wala gisugo sa Ginoo, sad-an sila sa pagpanapaw. (Hinumdumi nga ang pulong nga pagalaglagon sa bersikulo 41 nagpasabut nga kadtong mosupak sa ilang sagradong mga pakigsaad mahibulag gikan sa Dios ug gikan sa Iyang mga katawhan sa pakigsaad [itandi sa Mga Buhat 3:22–23; 1 Nephi 22:20].)

Dapita ang mga estudyante sa pagbasa og hilum sa Doktrina ug mga Pakigsaad 132:40 ug sa pagpangita kon unsay gisulti sa Ginoo nga Iyang buhaton.

Sumala sa bersikulo 40, unsa may buhaton sa Ginoo? (Ipahiuli ang tanan nga mga butang. Ipasabut nga ang “tanan nga mga butang” nagpasabut sa mga balaod ug mga ordinansa sa ebanghelyo nga gipadayag sa miaging mga dispensasyon. Isulat ang mosunod nga baruganan diha sa pisara: Ang sugo nga tumanon ang balaod sa dinaghan nga kaminyoon sa ulahing mga adlaw kabahin sa pagpahiuli sa tanan nga mga butang. [Tan-awa usab sa Mga Buhat 3:20–21.])

Dapita ang usa ka estudyante sa pagbasa og kusog sa Doktrina ug mga Pakigsaad 132:45, 48. Hangyoa ang klase sa pagsunod, nga mangita kon unsay gihatag sa Ginoo kang Joseph Smith aron mapahinabo ang pagpahiuli sa tanan nga mga butang.

Unsay gihatag sa Ginoo kang Joseph Smith aron mapahinabo ang pagpahiuli sa tanan nga mga butang? (Ang mga yawe ug gahum sa priesthood.)
Unsa man ang atong nakat-unan gikan sa mga bersikulo 45 ug 48 bahin sa dinaghan nga kaminyoon? (Samtang motubag ang mga estudyante, isulat sa pisara ang mosunod nga baruganan: Ang dinaghan nga kaminyoon mahimong awtorisado lamang pinaagi sa mga yawe sa priesthood nga gihatag ngadto sa Presidente sa Simbahan.)

Ipasabut nga sa sayong bahin niini nga dispensasyon, isip kabahin sa pagpahiuli sa tanan nga mga butang, gisugo sa Ginoo ang pipila sa nag-unang mga Santos sa pagbuhat sa dinaghan nga kaminyoon pinaagi sa mga yawe sa priesthood nga gihuptan ni Propeta Joseph Smith ug sa nagsunod nga mga Presidente sa Simbahan—Brigham Young, John Taylor, ug Wilford Woodruff. Niadtong 1890, si Presidente Woodruff, nga nagsunod pinaagi niadtong sama nga mga yawe sa priesthood, nakadawat nga ang pagbuhat sa dinaghan nga kaminyoon kinahanglang tapuson (tan-awa sa Opisyal nga Pahayag 1).

Doktrina ug mga Pakigsaad 132:49–66

Ang Ginoo mitambag nila ni Joseph ug Emma Smith kalabut sa dinaghan nga kaminyoon

Ipasabut nga si Propeta Joseph Smith nagduha-duha pagsugod sa pagbuhat sa dinaghan nga kaminyoon. Namahayag siya nga wala niya sugdi ang pagbuhat niini hangtud nga gipasidan-an siya nga pagalaglagon siya kon dili siya motuman (tan-awa sa “Plural Marriage,” Historical Record, Mayo 1887, 222). Tungod sa kakulang sa makasaysayanong pagdokumento, wala kita masayud bahin sa unang mga pagsulay ni Joseph Smith sa pagsunod sa sugo. Hinoon, pagka-1841 gisugdan sa Propeta pagsunod ang sugo ug sa pagtudlo niini ngadto sa pipila ka miyembro sa Simbahan, ug sulod sa nagsunod nga tulo ka tuig nakigminyo siya og dugang nga mga asawa sumala sa sugo sa Ginoo. Ang pagkamasulundon ni Propeta Joseph Smith ngadto sa sugo sa Ginoo sa pagbuhat sa dinaghan nga kaminyoon usa ka pagsulay sa pagtuo alang kaniya ug sa iyang asawa nga si Emma, kinsa pinangga kaayo niya.

Dapita ang usa ka estudyante sa pagbasa og kusog sa Doktrina ug mga Pakigsaad 132:49–50. Hangyoa ang klase sa pagpangita sa mga panalangin nga gisaad sa Ginoo kang Joseph Smith.

Unsa nga mga panalangin ang gisaad sa Ginoo kang Joseph Smith?
Sumala sa bersikulo 50, nganong gisaad man sa Ginoo kining mga panalangin ngadto ni Joseph Smith?

Dapita ang usa ka estudyante sa pagbasa og kusog sa Doktrina ug mga Pakigsaad 132:52. Hangyoa ang klase sa pagsunod, nga mangita sa tambag nga gihatag sa Ginoo kang Emma Smith.

Sumala sa bersikulo 52, unsa may gitambag nga dawaton ni Emma? (Ang “modawat niadtong tanan nga gihatag ngadto sa akong sulugoon nga si Joseph” nagpasabut niadtong kinsa na-sealed ngadto ni Joseph Smith.)

Ipasabut nga agig dugang sa pagsugo kang Emma nga modawat niadtong kinsa na-sealed ngadto sa iyang bana, ang Ginoo misugo kaniya nga motuman sa Iyang balaod ug mopasaylo kang Joseph sa iyang mga kalapasan. Dapita ang mga estudyante sa pagbasa og hilum sa Doktrina ug mga Pakigsaad 132:56 aron makat-on kon unsay gisaad sa Ginoo kang Emma Smith.

Unsay gisaad sa Ginoo kang Emma kon motuman siya sa Iyang mga gisugo?

Ipasabut nga niadtong 1841, si Joseph Smith misugod sa pagtudlo sa ubang matinud-anong kalalakin-an ug kababayen-an sa baruganan bahin sa dinaghan nga kaminyoon. Nanlimbasug usab sila sa sinugdanan sa pagsabut ug pagdawat niini nga baruganan. Pananglitan, sa unang pagkahibalo ni Brigham Young bahin sa sugo nga mosulod sa dinaghan nga kaminyoon, miingon siya nga iyang gibati nga mas maayo pa nga mamatay siya kay sa magbaton og daghang asawa (tan-awa sa Susa Young Gates ug Leah D. Widtsoe, The Life Story of Brigham Young [1930], 321). Bisan kon kining matinud-anong mga miyembro sa Simbahan nagpanagana ug nasagmuyo bahin sa sugo pirmero, nakadawat sila og indibidwal nga mga panghimatuod pinaagi sa Espiritu Santo ug midawat sa baruganan sa dinaghan nga kaminyoon. Si Vilate Kimball, ang unang asawa ni Elder Heber C. Kimball, nakadawat ug mihangup sa doktrina sa dinaghan nga kaminyoon ug “wala magduha-duha nga ang mando bahin sa dinaghan nga kaminyoon iya sa Dios, kay ang Ginoo mipadayag niini ngadto kaniya agig tubag sa pag-ampo” (Helen Mar Kimball, sa Orson F. Whitney, Life of Heber C. Kimball [1967], 325; tan-awa usab sa mga pahina 326–28).

Ang pagbuhat sa dinaghan nga kaminyoon nagdala og dugang nga mga hagit. Tungod kay ang pagbuhat niini gihilum ra pirmero, ang mga tabi-tabi nagsugod sa pagkatap bahin sa mga lider sa Simbahan nga nakigminyo og dugang nga mga asawa. Kining mga tabi-tabi hilabihan nga nakatuis sa kamatuoran, mipanamastamas sa pangalan sa Propeta ug sa ubang mga lider sa Simbahan, ug nakatampo sa nagkagrabe nga pagpanggukod batok sa mga Santos.

Basaha og kusog ang Doktrina ug mga Pakigsaad 132:63, nga magsugod sa mga pulong nga “kay sila gihatag ngadto kaniya.” Sa dili pa nimo basahon, ipasabut nga kining bersikulo makatabang kanato nga masabtan ang usa ka rason nganong ang Ginoo misugo kang Joseph Smith ug sa uban sa pagbuhat sa dinaghan nga kaminyoon. Hangyoa ang klase sa pagsunod, nga mangita nianang piho nga katuyoan.

Unsa nga sugo ang gipasabut sa Ginoo diha sa bersikulo 63? (Ang sugo nga modaghan ug mopuno sa yuta.) Unsay buot ipasabut sa modaghan ug mopuno sa yuta? (Ang pagbaton og mga anak.)

Ipasabut ang mosunod nga mga pulong diha sa bersikulo 63: “kay niini magpadayon ang buhat sa akong Amahan.”

Sa unsang paagi nga ang pagbaton og mga anak makatugot sa mga ginikanan nga mahimong kabahin sa nagpadayon nga buhat sa Langitnong Amahan?

Isip kabahin niini nga panaghisgutan, mahimo nimong basahon ang mosunod nga pamahayag ni Elder Neil L. Andersen sa Korum sa Napulog Duha ka mga Apostoles:

“Kon ang usa ka bata matawo sa usa ka bana ug asawa, nagtuman sila og bahin sa plano sa atong Langitnong Amahan sa pagdala og mga anak dinhi sa yuta. Ang Ginoo miingon, ‘Mao kini ang akong buhat ug ang akong himaya—ang pagpahinabo sa pagka-imortal ug sa kinabuhi nga dayon sa tawo’ [Moises 1:39]. Sa dili pa ang imortalidad, kinahanglan nga dunay mortalidad” (“Mga Bata,” Liahona, Nob. 2011, 28).

Base sa unsay imong nakat-unan gikan sa bersikulo 63, unsa ang usa ka rason nganong usahay ang Ginoo moestablisar sa pagbuhat sa dinaghan nga kaminyoon? (Human makatubag ang mga estudyante, isulat sa pisara ang mosunod nga baruganan: Ang Ginoo usahay moestablisar sa dinaghan nga kaminyoon aron makahatag og dugang nga mga oportunidad alang sa Iyang mga anak sa pagpasanay og matarung nga mga anak ngadto Kaniya. Mahimo nimong i-refer og balik sa Jacob 2:30.)

I-refer ngadto sa pangutana nga imong gisulat diha sa pisara: Nganong mosugo man ang Ginoo sa matarung nga mga lalaki ug babaye sa pagsunod sa baruganan sa dinaghan nga kaminyoon sa usa ka pihong panahon? Mahimo nimong dapiton ang mga estudyante sa pag-summarize alang sa klase sa unsay ilang nakat-unan gikan sa ilang pagtuon sa Doktrina ug mga Pakigsaad 132 ug Jacob 2:27, 30 nga makatabang kanila sa pagtubag niini nga pangutana.

Tapusa pinaagi sa pagpakigbahin sa imong pagpamatuod bahin ni Propeta Joseph Smith ug nga siya nakadawat ug mituman sa pagpadayag gikan sa Dios.

Komentaryo ug Background nga Impormasyon

Doktrina ug mga Pakigsaad 132. Unsaon sa pagtuon ang bahin sa dinaghan nga kaminyoon

Daghang dili kasaligan nga impormasyon kalabut sa dinaghan nga kaminyoon nga anaa sa Internet ug sa daghang naimprinta nga mga tinubdan. Pagmatngon ug pagmaalamon sa maong impormasyon. Ang ubang mga tagsulat kinsa nagsulat bahin sa Simbahan ug sa kasaysayan niini nagpresentar og impormasyon nga wala sa konteksto o naglakip og parsyal nga mga kamatuoran nga mahimong makapahisalaag. Ang katuyoan sa pipila niining mga sinulat mao ang pagguba sa pagtuo.

Si Elder Neil L. Andersen sa Korum sa Napulog Duha ka mga Apostoles mipasidaan:

“Kanunay adunay pipila kinsa gustong modaut sa Simbahan ug moguba sa hugot nga pagtuo. Karon mogamit sila sa Internet.

“Pipila sa mga impormasyon kabahin sa Simbahan, bisan unsa pa ka mahaylohon, dili gayud tinuod” (“Pagsulay sa Inyong Hugot nga Pagtuo,” Liahona, Nob. 2012, 41).

Sa pagtuon bahin sa dinaghan nga kaminyoon, importante nga mahinumduman ang sumbanan nga gisunod ni Propeta Joseph Smith sa iyang pagkat-on sa ebanghelyo. Siya nagtuon, namalandong, ug nag-ampo aron makaangkon og kahibalo.

Ang masaligan nga makasaysayanong pag-research kalabut sa pagbuhat sa dinaghan nga kaminyoon makita diha sa josephsmithpapers.org ug byustudies.byu.edu.

Doktrina ug mga Pakigsaad 132:1. “Ang baruganan ug doktrina” bahin sa dinaghan nga kaminyoon

Ang mosunod nga mga istorya makatabang sa pagklaro sa mga pagbati ni Propeta Joseph Smith ug sa ubang mga miyembro sa Simbahan sa dihang unang gipahibalo ang bahin sa dinaghan nga kaminyoon.

Si Eliza R. Snow, kinsa na-sealed ngadto ni Propeta Joseph Smith, mirekord sa mga detalye bahin sa pagtudlo ni Propeta Joseph sa baruganan sa dinaghan nga kaminyoon ngadto sa iyang igsoon nga si Lorenzo Snow. Iyang nahinumduman ang tumang kaguol ug kasakit nga dala sa baruganan ngadto ni Joseph Smith ug nga mipadayaon lamang siya sa pag-establisar sa baruganan tungod sa balaanong pagpadayag:

“Si Propeta Joseph dayag nga mipakigbahin sa iyang gibati [ngadto ni Lorenzo Snow], ug mihulagway sa hilabihan kalisud nga iyang nasinati sa pagbuntog sa lain niyang gibati, ang natural nga resulta kon giunsa siya pagpadako ug unsay madawat sa katilingban, kalabut sa pag-establisar sa dinaghan nga kaminyoon. Nahibalo siya sa tingog sa Dios—nahibalo siya nga ang sugo sa Labawng Makagagahum ngadto kaniya mao ang pagpadayon—ang pagpakita og ehemplo, ug pag-establisar sa Celestial nga dinaghan nga kaminyoon. Nahibalo siya nga dili lang kay duna siyay kaugalingon niyang mga pagpihig [prejudice] ug kaugalingon niyang opinyon nga panlimbasugan ug buntugon, ug nahibalo usab siya nga ang mga ideya ug mga gibati kalabut sa dinaghan nga kaminyoon sa tibuok Kristiyanismo nagasupak kaniya; apan ang Dios, kinsa labaw sa tanan, mihatag sa sugo, ug kinahanglan gayud Siya nga sundon. Apan ang Propeta nagpanagana ug milangay sa pagtuman niini sa pipila ka higayon, hangtud nga usa ka anghel sa Dios mibarug sa iyang kilid nga dunay gipagawas nga espada, ug misulti kaniya nga, gawas kon buhaton niya ug i-establisar ang dinaghan nga kaminyoon, ang iyang Priesthood pagakuhaon gikan kaniya ug kinahanglan siyang pagalaglagon! Kini nga pagpamatuod wala lamang niya gipamatuod ngadto sa akong igsoon, apan ngadto usab sa uban—usa ka pagpamatuod nga dili malimud [malalis]” (Biography and Family Record of Lorenzo Snow [1884], 69–70).

Si Presidente Brigham Young mipasabut:

“Kon duna pay tawo nga nangutana nako kon unsay akong pilion sa dihang gipadayag ni Joseph kana nga doktrina, basta ang akong pagpili dili makapaminos sa akong himaya, moingon unta ko, ‘Tuguti ko nga makabaton og usa lang ka asawa.’ …

“… Wala ko magtinguha nga mobiya sa bisan unsang katungdanan ni mapakyas sa pagbuhat sa unsay gisugo kanako, apan una kadtong higayon sa akong kinabuhi nga nagtinguha ko nga mas maayo pang mamatay, ug naglisud gyud ko sa pagbuntog sa maong mga pagbati sulod sa dugayng panahon. Ug sa dihang nakakita ko og lubong mibati ko og kasina sa namatay sa kahimtang niini, ug nagmahay nga dili ako ang naa sa sulod sa lungon. …

“… Apan ang mga Santos nga nagsunod sa ilang relihiyon pagahimayaon, kay dili gayud sila molimud sa bisan unsang pagpadayag nga gihatag o ihatag pa sa Ginoo, bisan tuod, sa dihang dunay usa ka doktrina nga miabut kanila nga wala nila masabti sa hingpit, makita sila nga moingon, ‘ang Ginoo mipadala niini kanako, ug nag-ampo ko nga siya moluwas ug mopreserbar kanako gikan sa paglimud og bisan unsa nga nagagikan kaniya, ug mohatag kanako og pailub nga maghulat hangtud ako mismo makasabut niini’” (sa “Provo Conference,” Deseret News, Nob. 14, 1855, 282).

Si Vilate Kimball, ang unang asawa ni Presidente Heber C. Kimball, nakadawat og pagpamatuod bahin sa dinaghan nga kaminyoon. Ang iyang anak nga si Helen miistorya:

“‘Ang akong inahan kanunayng misulti nako nga dili siya mahimong magduha-duha sa dinaghan nga kaminyoon nga iya sa Dios, kay ang Ginoo mipadayag niini ngadto kaniya agig tubag sa pag-ampo.

“‘Didto sa Nauvoo, sa wala madugay human siya nakabalik gikan sa England, ang akong amahan, kauban sa lain niyang kaigsoonan, gitudloan sa doktrina sa dinaghan nga kaminyoon. …

“‘Ang akong amahan hingpit nga nakaamgo sa sitwasyon, ug ang gugma ug balaang pagtahud nga iyang gihatag alang sa Propeta hilabihan kadako nga palabihon pa niyang motugyan sa iyang kinabuhi kay sa mobudhi kaniya. Usa kini sa labing dakong pagsulay sa iyang pagtuo nga iyang nasinati sukad. …

“‘Ang akong inahan [si Vilate Kimball] nakabantay og kausaban sa iyang kinaiya ug panagway, ug sa dihang nangutana siya sa hinungdan, misulay siya sa paglikay sa iyang mga pangutana. Sa katapusan misaad siya nga iyang sultihan si mama sa dili madugay, kon maghulat lamang siya. Kini nga kalisud nakapabug-at gayud sa iyang hunahuna nga nahimo kining dayag tungod sa iyang mabalak-on ug luya nga panagway, ug sa katapusan ang iyang kaguol dili na maantus nga imposible nang makontrolar ang iyang mga pagbati. Nasakit siya sa pisikal, apan ang iyang mental nga kaguol hilabihan kagrabe sa pagtugot nga makatulog siya, ug maglakaw-lakaw siya sa salog hangtud hapit na mabuntag, ug usahay ang kahasol sa iyang hunahuna hilabihan gayud kagrabe nga iyang akubon og maayo ang iyang mga kamot ug magdanguyngoy sama sa usa ka bata, ug mangamuyo sa Ginoo nga magmaloloy-on ug mopadayag ni mama niini nga baruganan. …

“‘Ang tumang kaguol sa ilang kasingkasing dili mahulagway, ug sa dihang nabantayan ni mama nga walay pulos ang pagpangamuyo pa kaniya, miadto siya sa iyang kwarto ug miduko atubangan sa Ginoo ug mipagawas sa iyang gibati diha sa pag-ampo ngadto Kaniya kinsa miingon: “Kon hain kaninyo ang nagkulang sa kaalam, papangayoa siya sa Dios, nga naghatag sa tanan nga katawhan sa walay pagdumili, ug walay pagkasuko.” …

“‘Sa iyang atubangan gipakita ang han-ay sa celestial nga kaminyoon, sa tanang katahum ug himaya niini, uban sa dakong kahimayaan ug dungog nga ikahatag niini ngadto kaniya nianang imortal ug celestial nga kahimtang, kon iya kining dawaton ug mobarug sa iyang dapit sa kiliran sa iyang bana. Nakita usab niya ang babaye nga iyang gipangasawa, ug namalandong uban sa hingpit nga kalipay sa dako ug walay kinutubang gugma ug panaghiusa nga ipahinabo niini nga han-ay, ingon man usab sa paglambo sa mga gingharian sa iyang bana, ug sa gahum ug himaya nga molungtad sa kahangturan, mga kalibutan nga walay katapusan.

“‘Uban sa panagway nga napuno sa hingpit nga kalipay, kay napuno siya sa Espiritu sa Dios, mibalik siya ngadto sa akong amahan, nga nag-ingon: “Heber, unsay wala nimo gisulti kanako gipakita sa Ginoo kanako.” Iya kong gisultihan nga wala pa gayud siya makakita sukad og usa ka lalaki nga ingon gayud ka malipayon sama ni papa sa dihang iyang gihulagway ngadto kaniya ang panan-awon ug misulti kaniya nga natagbaw siya ug nasayud nga nagagikan kini sa Dios.

“‘Nakigsaad siya nga mobarug sa iyang kiliran ug motahud sa baruganan, usa ka pakigsaad nga matinud-anon niyang gituman, ug bisan kon ang iyang mga pagsulay kasagaran bug-at ug sakit pas-anon, nasayud siya nga gisulayan usab si papa, ug ang kaligdong ni mama lig-on hangtud sa katapusan. Gihatagan niya si papa og daghang asawa, ug kanunay nilang nakita diha sa akong mama ang usa ka matinud-anong higala’” (sa Orson F. Whitney, Life of Heber C. Kimball [1967], 325–28).

Si Presidente John Taylor miingon bahin sa higayon sa dihang ang baruganan sa dinaghan nga kaminyoon gipahibalo:

“Kanunay gyud kong midawat ug misunod sa klaro nga mga konsepto sa hiyas, ug mibati ko isip usa ka minyo nga lalaki nga kini alang kanako, sa gawas niini nga baruganan, usa kini ka mangil-ad nga butang nga buhaton. … Usa kadto ka butang nga siguradong makapaukyab sa mga pagbati gikan sa kinahiladmang bahin sa kalag sa tawo. Kanunay gyud kong higpit nga nagsunod sa mga baruganan sa kaputli. … Sa ingon, uban sa mga pagbati nga akong gihatagan og pagtagad, walay butang gawas sa kahibalo bahin sa Dios, ug sa mga pagpadayag bahin sa Dios, ug sa kamatuoran bahin niini, ang makapaagni kanako sa paghangup sa ingon nga baruganan sama niini” (sa B. H. Roberts, The Life of John Taylor, Third President of the Church of Jesus Christ of Latter-day Saints [1963], 100).

Doktrina ug mga Pakigsaad 132:18–20. Ang mahangturong kinaiyahan sa kaminyoon

Si Elder Dallin H. Oaks sa Korum sa Napulog Duha ka mga Apostoles, kinsa nagminyo og usab human namatay ang una niyang asawa, mipasabut sa usa ka interbyu nga sa hilisgutan bahin sa mahangturong kinaiyahan sa kaminyoon, nasayud kita og pipila ka butang ug wala masayud sa ubang butang:

“Dunay daghang tawo nga nagpuyo niini nga yuta nga naminyo og sobra sa usa ka tawo. Usahay kadtong mga kaminyoon natapos sa kamatayon; usahay natapos kini sa diborsyo. Unsay kahulugan sa sunod nga kinabuhi ngadto kanila kalabut sa usa ka pakigsaad nga kausa ilang gihimo ug uban pa? Wala ko kahibalo kon kadtong mga tawo duna bay tubag alang niana nga pangutana. Tingali dili kini makapabalaka nila tungod kay wala sila motuo nga ang mga tawo magpakabuhi isip minyo nga mga managtiayon sa sunod nga kinabuhi. Ug kon wala sila maghimo ug magsunod pinaagi sa mga pakigsaad aron sa pagbuhat niana, [kalabut sa ilang kaugalingon] husto sila! Apan alang sa mga tawo nga dunay pagtuo, sama kanako, kanang relasyon sa kaminyoon mahimong alang sa kahangturan, dayon kinahanglan gayud kamong moingon, ‘Unsa kaha ang kinabuhi sa sunod nga kinabuhi, kon minyo kamo sa sobra sa usa ka asawa alang sa kahangturan?’ Kinahanglan kong mosulti nga wala ko kahibalo. Apan nasayud ko nga nakahimo ko niadtong mga pakigsaad, ug mituo ko nga kon matinuoron ko sa mga pakigsad nga ang panalangin nga gilauman dinhi mahatag sa sunod nga kinabuhi” (sa “Elder Oaks Interview Transcript from PBS Documentary,” Hulyo 20, 2007, mormonnewsroom.org).

Doktrina ug mga Pakigsaad 132:38–39. Si David ug si Uria

Ang Ginoo namahayag nga si David nakasala sa pagkuha kang Bathsheba, ang asawa ni Uria. Si David sa wala madugay miplano sa kamatayon ni Uria aron matago ang iyang sala. Isip resulta, si David napukan gikan sa iyang kahimayaan. Ang paglakip sa ehemplo ni David diha sa Doktrina ug mga Pakigsaad 132:38–39 naghatag og gibug-aton sa higpit nga mga balaod nga nagdumala sa pagbuhat sa dinaghan nga kaminyoon. Bisan sa mga panahon sa dihang giestablisar sa Ginoo kini nga buhat ug misugo sa Iyang katawhan sa pagsunod niini, kinahanglan silang mobuhat sa ingon sumala sa Iyang mga sugo ug sa direksyon nga Iyang gihatag sa Iyang mga sulugoon kinsa naghupot sa gikinahanglan nga mga yawe sa priesthood.

Doktrina ug mga Pakigsaad 132:51–56. Unsa man ang gisugo kang Emma Smith nga dili siya moambit?

“Walay indikasyon nga gihatag dinhi o bisan asa kon unsay gisugo sa Ginoo kang Propeta Joseph nga itanyag sa iyang asawa, apan ang konteksto daw nagsugyot nga usa kini ka espesyal nga pagsulay sa pagtuo susama sa pagsulay sa pagtuo ni Abraham sa dihang ang Ginoo misugo kaniya nga isakripisyo si Isaac. Sobra pa niana, walay pulos ang pagpangagpas” (Doctrine and Covenants Student Manual, 2nd ed. [manwal sa Church Educational System, 2001], 334).