Home-Study nga Leksyon

Mga Organisasyon ug mga Programa sa Simbahan, Opisyal nga Pahayag 2, Pagpadali sa Buhat sa Kaluwasan, ang Pamahayag sa Pamilya, ug ang Buhi nga Propeta (Unit 32)

Materyal sa Pagpangandam alang sa Home-Study Teacher

Summary sa mga Leksyon sa Daily Home-Study

Ang mosunod mao ang summary sa mga doktrina ug mga baruganan nga nakat-unan sa mga estudyante samtang sila nagtuon sa unit 32. Kini nga summary dili tuyo nga itudlo isip kabahin sa imong leksyon. Ang leksyon nga imong itudlo alang sa unit 32 magtutok lamang sa pipila niining mga doktrina ug mga baruganan. Sunda ang mga pag-aghat sa Balaang Espiritu samtang magkonsiderar ka sa mga panginahanglan sa imong mga estudyante.

Day 1 (Mga Organisasyon ug mga Programa sa Simbahan)

Dinhi niining leksyon, ang mga estudyante nakakat-on nga ang Simbahan ni Jesukristo sa mga Santos sa Ulahing mga Adlaw nagtabang sa Langitnong Amahan sa pagpahinabo sa kinabuhing dayon sa Iyang mga anak. Nakat-unan usab nila nga ang tanang mga organisasyon ug mga programa sa Simbahan naglihok ubos sa direksyon sa mga lider sa priesthood, kinsa naghupot sa mga yawe sa pagdumala. Nadiskubrihan sa mga estudyante nga samtang moapil kita sa mga organisasyon ug mga programa sa Simbahan, atong madawat ang mga panalangin nga anaa pinaagi niini. Maghimo dayon sila og mga tumong sa pagpalambo sa ilang partisipasyon sa mga auxiliary ug mga programa sa Simbahan.

Day 2 (Opisyal nga Pahayag 2)

Samtang nagkat-on ang mga estudyante bahin sa pagpadayag niadtong 1978 nga mipadangat sa mga panalangin sa priesthood ug sa templo ngadto sa matag takus nga miyembro sa Simbahan, ilang nakat-unan nga ang mga propeta nagtinguha sa giya sa Ginoo sa paggiya sa Simbahan ug nga ang Ginoo naggiya sa Iyang Simbahan pinaagi sa pagpadayag ngadto sa Iyang mga propeta sa Iyang kaugalingong panahon.

Day 3 (Pagpadali sa Buhat sa Kaluwasan)

Gikan niining leksyon, ang mga estudyante nakakat-on nga ang Ginoo mipadali sa Iyang buhat sa kaluwasan. Nakat-unan usab nila nga makaapil sila sa pagpadali sa buhat sa Ginoo pinaagi sa pagpakigbahin sa ebanghelyo, pagtuon sa mga kasulatan, ug paghimo og mga buhat sa templo ug sa family history.

Day 4 (Ang Pamilya: Usa ka Pamahayag ngadto sa Kalibutan)

Dinhi niining leksyon nahibaloan sa mga estudyante ang mga doktrina ug mga baruganan nga may kalabutan sa pamilya sama sa mosunod: ang kaminyoon tali sa usa ka lalaki ug usa ka babaye gi-orden sa Dios; ang paglalang sa mortal nga kinabuhi usa ka sagrado ug importante nga bahin sa plano sa Langitnong Amahan; ug ang mga amahan ug mga inahan obligado sa pagtabang sa usag usa isip managkauban diha sa ilang mga responsibilidad sa pamilya. Nakat-unan usab sa mga estudyante nga manubag kita sa Ginoo kon kita dili motuman sa atong mga responsibilidad diha sa atong mga pamilya.

Pasiuna

Kini nga leksyon makatabang sa mga estudyante nga masabtan ang panalangin sa pagkaginiyahan sa usa ka buhi nga propeta, manalagna ug tigpadayag. Magtuon ang mga estudyante sa bag-ong tambag gikan sa Presidente sa Simbahan, ang pinili nga propeta sa Ginoo.

Mga Sugyot alang sa Pagtudlo

Ang nagpadayon nga pagpadayag pinaagi sa buhi nga propeta

Isulat ang mosunod nga pangutana diha sa pisara: Kinsa ang labing importanting propeta alang ninyo?

Dapita ang klase sa pagpamalandong niining pangutana ug paminaw alang sa tubag samtang imong basahon ang mosunod nga pamahayag ni Presidente Ezra Taft Benson:

“Ang labing importanting propeta, sumala sa atong nahibaloan, mao ang usa nga buhi sa atong panahon” (“Jesus Christ—Gifts and Expectations,” New Era, Mayo 1975, 17).

• Ngano kaha nga ang buhi nga propeta mao man ang labing importanting propeta alang kanato?

Human makatubag ang mga estudyante, padayuna ang pagbasa sa pamahayag ni Presidente Benson:

“Mao kini ang propeta kinsa adunay mga instruksyon karon gikan sa Dios ngari kanato. … Kada henerasyon adunay panginahanglan sa karaang kasulatan, dugangan sa kasamtangang kasulatan gikan sa buhi nga propeta. Busa, ang labing mahinungdanon nga pagbasa ug pagpamalandong nga angay ninyong buhaton mao ang labing ulahing dinasig nga mga pulong gikan sa tigpama-ba sa Ginoo. Mao nga mahinungdanon kaayo nga kamo makagamit ug maampingong mobasa sa iyang mga pulong diha sa mga pahayagan sa Simbahan” (“Jesus Christ—Gifts and Expectations,” 17).

Ipasabut nga atong gipaluyohan ang tanang sakop sa Unang Kapangulohan ug ang Korum sa Napulog Duha ka mga Apostoles isip mga propeta, mga manalagna, ug mga tigpadayag. Hinoon, ang Presidente sa Simbahan mao ang bugtong tawo kinsa dunay katungod sa paggamit sa tanang yawe sa priesthood dinhi sa yuta ug ang bugtong tawo kinsa dunay katungod sa pagdawat ug mamahayag sa mga pinadayag alang sa tibuok Simbahan.

• Sumala sa unsay inyong nakat-unan sa labing bag-ong mga leksyon, kanus-a man nga ang Presidente sa Simbahan namahayag og mga pagpadayag alang sa tibuok Simbahan o mipahibalo sa dagkong mga kausaban sa mga pamalakad sa Simbahan? (Ang mga tubag mahimong maglakip sa higayon nga si Presidente Wilford Woodruff miisyu og Manifesto kalabut sa dinaghan nga kaminyoon [tan-awa sa Opisyal nga Payahag 1], sa dihang si Presidente Joseph F. Smith namahayag sa kanhi wala mahibaloi nga mga kamatuoran mahitungod sa kalibutan sa mga espiritu human niining kinabuhi [tan-awa sa D&P 138], ug sa dihang si Presidente Spencer W. Kimball namahayag nga ang mga panalangin sa priesthood mahimo nang magamit sa tanang takus nga mga miyembro sa Simbahan [tan-awa sa Opisyal nga Pahayag 2].)

Dapita ang usa ka estudyante sa pagbasa og kusog sa mosunod nga pamahayag ni Presidente Dieter F. Uchtdorf. Dapita ang klase sa pagpaminaw alang sa usa ka kamatuoran kalabut sa atong panahon.

“Usa sa mahimayaong mensahe sa Pagpahiuli sa Simbahan ni Jesukristo mao nga ang Dios nagpadayon sa pagpadayag sa Iyang mga anak! Wala Siya motago sa kalangitan apan siya nagpadayag karon sama sa Iyang gibuhat sa karaang panahon. …

“Ang bililhong mga instruksyon sa Dios ngadto sa katawhan makita sa Biblia, Basahon ni Mormon, Doktrina ug mga Pakigsaad, ug Perlas nga Labing Bililhon. Dugang pa, ang Ginoo nagpadayag ngari kanato pinaagi sa Iyang mga sulugoon, nga Iya kining buhaton og usab sa … kinatibuk-ang komperensya.” (“Nganong Nagkinahanglan Kita og mga Propeta?” Liahona, Marso. 2012, 4).

• Unsa nga doktrina kalabut sa pagpadayag ang gitudlo ni Presidente Uchtdorf? (Ang mga estudyante mahimong mogamit og lain-laing mga pulong, apan kinahanglan nilang mahibaloan ang mosunod nga doktrina: Ang Ginoo nagpadayon sa pagpakigsulti kanato karon pinaagi sa Iyang buhi nga propeta. Mahimo nimong isulat kini nga doktrina diha sa pisara.)

• Asa man nato makit-an ang mga pulong sa buhi nga propeta? (Ang mga tubag mahimong maglakip sa kinatibuk-ang komperensya, mga magasin sa Simbahan, LDS.org, ug mormonchannel.org.)

Aron matabangan ang mga estudyante nga makasabut sa kaimportante sa padayon nga pagpakigsulti sa Ginoo pinaagi sa Iyang buhi nga propeta, dapita ang usa ka estudyante sa pagbasa og kusog sa mosunod nga pamahayag ni Presidente John Taylor. Hangyoa ang klase sa pagpaminaw kon nganong importante ang padayon nga pagpadayag pinaagi sa mga propeta.

“Kita nagkinahanglan og buhing kahoy—usa ka buhing tuburan—buhing kahibalo, nga nagagikan sa buhing priesthood sa langit, pinaagi sa buhing priesthood sa yuta. … Ug gikan sa panahon nga si Adan unang nakadawat og komunikasyon gikan sa Dios, … kanunay kining nagkinahanglan og bag-ong mga pagpadayag, nga gipahiangay sa talagsaon nga mga kahimtang diin ang mga simbahan o mga indibidwal gipahimutang. Ang pagpadayag ni Adan wala nagtudlo nga si Noe maghimo og usa ka arka; ingon man ang pagpadayag ni Noe wala magsulti nga biyaan ni Lot ang Sodom; o walay bisan hain niini nga naghisgot sa pagbiya sa mga anak ni Israel gikan sa Ehipto” (sa The Gospel Kingdom, sel. G. Homer Durham [1987], 34; tan-awa usab sa D&P 1:30).

• Sumala ni Presidente Taylor, nganong nagkinahanglan kita og usa ka buhi nga propeta? (Pinaagi sa buhi nga propeta, ang Dios makahatag og piho nga direksyon ngadto sa mga panginahanglan ug mga kahimtang sa usa ka panahon.)

• Sa unsang paagi nga ang pagsabut sa panginahanglan sa padayon nga pagpadayag makaapekto sa paagi sa inyong pagpaminaw o pagbasa sa mga pulong sa buhi nga propeta?

Pagsunod sa tambag sa buhi nga propeta

Aron matabangan ang mga estudyante nga mahisgutan ang tambag sa buhi nga propeta, pagpili og usa o mas daghang pakigpulong sa kinatibuk-ang komperensya nga nahatag sa Presidente sa Simbahan sa miagi nga tuig. Hatagi og kopya sa pakigpulong ang matag estudyante sa klase. Hatagi ang mga estudyante og panahon sa pagpangita sa mga doktrina ug mga baruganan nga kasamtangang gitudlo sa buhi nga propeta.

Human ang mga estudyante nakabasa og igong panahon, hangyoa sila sa paglista sa mga doktrina ug mga baruganan nga gitudlo sa Presidente sa Simbahan. Ikonsiderar ang paghangyo sa usa ka estudyante sa pagsulat sa ilang mga tubag diha sa pisara.

Aron matabangan ang mga estudyante nga makasabut ug mabati ang kaimportante sa mga doktrina ug mga baruganan nga ilang nahibaloan, ipangutana ang pipila o tanan sa mosunod:

• Hain niining mga baruganan o mga doktrina nga sa inyong pamati espesyal kaayo para ninyo? Ngano man?

• Sa unsang mga paagi nga kamo ug ang inyong pamilya naningkamot sa pagsunod sa tambag sa propeta?

• Ngano kaha nga importante nga atong tun-an ug gamiton kon unsa ang kasamtangan nga gitudlo sa Presidente sa Simbahan?

Isulat ang mosunod nga mga pangutana diha sa pisara, ug dapita ang mga estudyante sa pagtubag niini diha sa ilang mga class notebook o mga scripture study journal:

Gikan sa mga pulong sa buhi nga propeta nga bag-o lang ninyong natun-an, unsa nga mga mensahe ang inyong gibati nga gusto sa Ginoo nga inyong madawat?

Unsa ang inyong buhaton tungod sa bag-ong tambag sa propeta?

Dapita ang mga estudyante sa pagbuhat sa unsay ilang nasulat. Ipamatuod nga kon sila mobuhat sa ingon, makaangkon sila og pasalig nga ang Langitnong Amahan mopanalangin kanila. Awhaga ang mga estudyante nga magmakanunayon sa pagtuon ug paggamit sa mga pagtulun-an sa buhi nga mga propeta.

Dapita ang mga estudyante sa pagpakigbahin sa ilang mga pagpamatuod sa buhi nga mga propeta.

Agig panapos niining tuig sa seminary, awhaga ang mga estudyante nga ipadayon ang pagtuon sa mga kasulatan kada adlaw. Kon sila mokuha sa sunod nga kurso sa seminary, mahimo nimong isugyot nga ilang sugdan ang pagtuon sa Daang Tugon. Mahimo nimong dapiton ang usa ka estudyante sa pagpamatuod sa mga panalangin nga iyang nadawat pinaagi sa pagpadayon sa pagbasa sa mga kasulatan sa inadlaw-adlaw bisan kon nahunong na ang sesyon sa seminary .