« មេរៀនទី ១៣—គោលលទ្ធិ និងសេចក្ដីសញ្ញា ៣ ៖ ‹ អ្នកមិនត្រូវខ្លាចមនុស្សជាងព្រះឡើយ › » សៀវភៅសិក្សាព្រះគម្ពីរគោលលទ្ធិ និងសេចក្ដីសញ្ញា សម្រាប់គ្រូបង្រៀនថ្នាក់សិក្ខាសាលា ( ឆ្នាំ ២០២៥ )
« គោលលទ្ធិ និងសេចក្ដីសញ្ញា ៣ » សៀវភៅសិក្សាព្រះគម្ពីរគោលលទ្ធិ និងសេចក្ដីសញ្ញា សម្រាប់គ្រូបង្រៀនថ្នាក់សិក្ខាសាលា
មេរៀនទី ១៣ ៖ គោលលទ្ធិ និងសេចក្តីសញ្ញា ៣–៥
គោលលទ្ធិ និងសេចក្ដីសញ្ញា ៣
« អ្នកមិនត្រូវខ្លាចមនុស្សជាងព្រះឡើយ »
នៅពេលខ្លះ យើងអាចនឹងមានអារម្មណ៍ថាមានសម្ពាធពីអ្នកដទៃមិនឲ្យគោរពប្រតិបត្តិតាមព្រះ ។ យ៉ូសែប ស្ម៊ីធ មានអារម្មណ៍ថាមានសម្ពាធដូចគ្នានៅពេល ម៉ាទិន ហារិស បានសុំយកទំព័រព្រះគម្ពីរមរមនដែលបានបកប្រែហើយនោះ ។ ទោះយ៉ាងណាក៏ដោយ យ៉ូសែប បានដឹងថា ទាំងនេះជាគ្រាដែលយើងត្រូវស្មោះត្រង់ចំពោះព្រះ ហើយមិនត្រូវចុះចាញ់នឹងការបង្ខិតបង្ខំពីអ្នកដទៃឡើយ ។ មេរៀននេះអាចជួយសិស្សឲ្យមានអារម្មណ៍ថាមានបំណងប្រាថ្នាទុកចិត្តលើព្រះកាន់តែខ្លាំងឡើងជាជាងទុកចិត្តលើមនុស្សផ្សេងទៀត ។
សកម្មភាពរៀនសូត្រដែលអាចមាន
សម្ពាធនៃជីវិត
សូមចាប់ផ្តើមបង្រៀនដោយការបង្ហាញសិស្សនូវវត្ថុទន់ៗដែលមានដូចជា តុក្កតាទន់ៗ ឬខ្នើយ ។ សូមប្រាប់សិស្សថា វត្ថុនេះអាចនឹងតំណាងឲ្យពួកគេបាន ។ ចំពោះចម្លើយនីមួយៗដែលពួកគេផ្តល់ចំពោះសំណួរខាងក្រោម សូមអញ្ជើញសិស្សឲ្យដាក់សៀវភៅ ឬរបស់ធ្ងន់មួយពីលើវត្ថុទន់នោះ ។ នៅពេលវត្ថុនោះទៅជាសំប៉ែត សូមអញ្ជើញសិស្សឲ្យជញ្ជឹងគិតថា តើពួកគេធ្លាប់មានអារម្មណ៍ថាមានទម្ងន់ដូចនេះដែរឬអត់ ។
-
តើក្មេងវ័យជំទង់មានអារម្មណ៍ថាមានសម្ពាធអ្វីខ្លះនៅក្នុងជីវិតរបស់ពួកគេ ?
-
តើមានសម្ពាធទាំងនេះចំនួនប៉ុន្មានដែរ ដែលកើតមកពីការព្យាយាមផ្គាប់ចិត្តអ្នកដទៃ ?
សូមឆ្លៀតពេលមួយនាទីដើម្បីជញ្ជឹងគិតអំពីកម្រិតសម្ពាធដែលអ្នកមានអារម្មណ៍ថាត្រូវផ្គាប់ចិត្តអ្នកដទៃ និងមូលហេតុ ។
នៅក្នុងមេរៀននេះ អ្នកនឹងសិក្សាពីរបៀបដែលព្យាការី យ៉ូសែប ស្ម៊ីធ មានសម្ពាធក្នុងការផ្គាប់ចិត្ត ម៉ាទិន ហារិស និងអ្វីដែលព្រះអង្គសង្គ្រោះបានបង្រៀនលោកនៅក្នុងស្ថានភាពនោះ ។ នៅពេលអ្នកសិក្សា សូមស្វែងរកការណែនាំពីព្រះវិញ្ញាណបរិសុទ្ធ ដើម្បីស្វែងរកសេចក្ដីពិតដែលអាចជួយអ្នកបាន នៅពេលដែលអ្នកមានអារម្មណ៍ថាមានសម្ពាធនេះ ។
« គ្រប់យ៉ាងបាត់អស់ហើយ ! »
ខាងក្រោមនេះគឺជាគំនិតនានាដែលនឹងជួយសិស្សឲ្យយល់ពីបរិបទប្រវត្តិសាស្ដ្រដ៏សំខាន់ខាងក្រោម ៖
-
សូមផ្ដល់អត្ថបទនេះទៅឲ្យសិស្សនៅមុនពេលចូលរៀន ហើយអញ្ជើញគាត់ ឬនាងឲ្យសង្ខេបអត្ថបទនេះសម្រាប់មនុស្សគ្រប់គ្នា ។
-
សូមអញ្ជើញសិស្សឲ្យចែកចាយអ្វីដែលពួកគេដឹងអំពីការបាត់ច្បាប់ដើមចំនួន ១១៦ សន្លឹកពីការបកប្រែព្រះគម្ពីរមរមន ។ សូមពន្យល់ព័ត៌មានដែលសិស្សមិនបានចែកចាយ ។
-
សូមបង្ហាញអត្ថបទមួយចំនួនខាងក្រោមដែលមានការបាត់ពាក្យសំខាន់ៗ ហើយមើលថាតើសិស្សអាចបំពេញព័ត៌មាននេះបានដែរឬអត់ ។ សូមបំពេញចូលនូវអ្វីដែលសិស្សមិនដឹង។
-
សូមបង្ហាញវីដេអូ « The Work of God » ( នៅលើគេហទំព័រ ChurchofJesusChrist.org ) ចាប់ពីនាទីទី ២:២៥ ដល់នាទីទី ៨:៤៥ ។ ឬអ្នកអាចជ្រើសរើសបង្ហាញវីដេអូនេះនៅពេលអ្នកសិក្សា គោលលទ្ធិ និងសេចក្ដីសញ្ញា ១០ ។
13:34
ម៉ាទិន ហារិស គឺជាពលរដ្ឋដ៏គួរឲ្យគោរពម្នាក់នៅភូមិប៉ាលម៉ៃរ៉ា និងជាកសិករជោគជ័យដែលជាមនុស្សតែម្នាក់គត់ក្នុងចំណោមមនុស្សពីរបីនាក់នៅក្នុងតំបន់នោះដែលជឿលើ យ៉ូសែប ស្ម៊ីធ ។ ទោះបីជាគាត់មានអាយុខុសគ្នាជិតពីរដងក៏ដោយ ក៏ម៉ាទិន បានធ្វើជាមិត្ភភក្តិរបស់យ៉ូសែប និងឲ្យប្រាក់ទៅលោកដើម្បីឲ្យលោកអាចផ្លាស់លំនៅមកភូមិហាម៉ូនី រដ្ឋផែនសិលវេញ៉ា ដើម្បីបកប្រែព្រះគម្ពីរមរមនដោយគ្មានការរំខានដែរ ។ ម៉ាទិន ក៏បានលះបង់ដើម្បីធ្វើដំណើរទៅទីនោះដោយខ្លួនឯង ហើយបម្រើការងារជាអ្នកសរសេរផងដែរ ។
ភរិយារបស់ ម៉ាទិន ឈ្មោះ លូស៊ី មិនគាំទ្រការចូលរួមពាក់ព័ន្ធរបស់លោកនៅក្នុងការបកប្រែព្រះគម្ពីរមរមនឡើយ ។ ម៉ាទិន បានសួរ យ៉ូសែប ថាតើលោកអាចនឹងបង្ហាញការបកប្រែ ១១៦ សន្លឹកដំបូងទៅ លូស៊ី ដើម្បីធ្វើជាភស្តុតាងនៃការងាររបស់ពួកគាត់បានឬអត់ ។ យ៉ូសែប បានអធិស្ឋានអំពីរឿងនេះពីរដង ហើយរៀងរាល់លើកមានការប្រាប់កុំឲ្យម៉ាទិនយកទំព័រទាំងនោះទៅឡើយ ។
យ៉ូសែប បានអធិស្ឋានជាលើកទីបី ហើយព្រះអម្ចាស់បានអនុញ្ញាតដោយភ្ជាប់ជាមួយលក្ខខណ្ឌយ៉ាងតឹងរ៉ឹង ។ ម៉ាទិន បានយកសន្លឹកទាំងនោះទៅភូមិប៉ាលម៉ៃរ៉ាដើម្បីបង្ហាញដល់ភរិយារបស់គាត់ ។
-
ហេតុអ្វីបានជាអ្នកគិតថា យ៉ូសែប មិនបានធ្វើតាមការឆ្លើយតបពីរលើកដំបូងដែលលោកបានទទួលពីព្រះអម្ចាស់ ?
អ្នកអាចនឹងធ្វើសកម្មភាពនេះឡើងវិញតាំងពីដើមមេរៀនដើម្បីបង្ហាញពីសម្ពាធដែល យ៉ូសែបបានទទួល ។
នៅថ្ងៃបន្ទាប់ពី ម៉ាទិន បានចេញទៅ អិមម៉ា ស្ម៊ីធ សម្រាលបានកូនប្រុសម្នាក់ និងជាកូនដំបូងរបស់គាត់ និង យ៉ូសែប ។ គួរឲ្យសោកស្ដាយណាស់ ទារករស់បានតែពីរបីម៉ោងប៉ុណ្ណោះ ហើយ អិមម៉ា ក៏ស្ទើរតែស្លាប់ដែរ ។ ជាសំណាងល្អ សុខភាព អិមម៉ា បានចាប់ផ្តើមប្រសើរឡើងវិញបន្ទាប់ពីពីរបីសប្តាហ៍ក្រោយមក ។ ទោះបីជា យ៉ូសែប មិនចង់ចាកចេញពីនាងក៏ដោយ ក៏អិមម៉ា បានជំរុញលោកឲ្យធ្វើដំណើរទៅភូមិប៉ាលម៉ៃរ៉ា ហើយសាកសួរអំពីសំណៅសរសេរដៃនោះដែរ ។
នៅពេល យ៉ូសែប បានមកដល់ផ្ទះឪពុកម្ដាយលោក ពួកគាត់បានអញ្ជើញម៉ាទិន ឲ្យចូលរួមទទួលទានអាហារពេលព្រឹកជាមួយពួកគាត់ ។ ម៉ាទិន បានមកយឺតជាងបួនម៉ោង ។ នៅទីបំផុតគាត់បានមកដល់ ហើយអង្គុយចុះ គាត់បានបន្លឺឡើងយ៉ាងសោកសៅថា ៖ « ខ្ញុំបានបាត់ព្រលឹងខ្ញុំហើយ ! » ។ គាត់មិនបានធ្វើតាមសេចក្ដីណែនាំដ៏តឹងរឹង ហើយក៏បានបាត់សំណៅសរសេរដៃនោះទៅ ។
« ឱព្រះអើយ ព្រះរបស់ទូលបង្គំអើយ ។ គ្រប់យ៉ាងបាត់អស់ហើយ ! » យ៉ូសែបបានមានប្រសាសន៍ ។ « តើខ្ញុំត្រូវតែត្រឡប់ទៅវិញយករឿងបែបនេះប្រាប់ភរិយារបស់ខ្ញុំដែរឬទេ ? ហើយតើខ្ញុំនឹងមានមុខឯណាទៅជួបព្រះអម្ចាស់ ? »
បន្ទាប់ពី យ៉ូសែប បានត្រឡប់ទៅភូមិហាម៉ូនីវិញ មរ៉ូណៃបានបង្ហាញកាយ ហើយបានយកផ្ទាំងទាំងឡាយពីលោកទៅ ។ ( សូមមើល Saints ១:៥០–៥៤ ) ។
-
ហេតុអ្វីបានជាអ្នកគិតថា យ៉ូសែប មានអារម្មណ៍ថាគ្រប់យ៉ាងបានបាត់អស់ហើយ ?
មិនយូរប៉ុន្មានបន្ទាប់ពីមានបទពិសោធន៍នេះ ព្រះអម្ចាស់មានព្រះបន្ទូលទៅកាន់យ៉ូសែប ស្ម៊ីធ ដោយស្ដីបន្ទោសដល់លោក ហើយមានព្រះបន្ទូលលួងលោមដល់លោក ។
ខ្លាចព្រះជាងមនុស្ស
សូមអាន គោលលទ្ធិ និងសេចក្ដីសញ្ញា ៣:១–១០ ។ សូមស្វែងយល់ពីអ្វីដែលព្រះអម្ចាស់សព្វព្រះទ័យឲ្យ យ៉ូសែប ស្វែងយល់ពីបទពិសោធន៍នេះ ។
សូមលើកទឹកចិត្តសិស្សឲ្យសិក្សាយឺតៗ និងដោយយកចិត្តទុកដាក់ ដោយរកមើលមេរៀនជាច្រើន ។
អញ្ជើញសិស្សឲ្យស្វែងរកសេចក្ដីពិតសម្រាប់ខ្លួនគេ ៖ សំណួរខាងក្រោមមានគោលបំណងជួយសិស្សឲ្យស្គាល់សេចក្ដីពិតសម្រាប់ខ្លួនគេ ។ ចំពោះការបំពាក់បំប៉នបន្ថែមអំពីសំណួរដែលជួយឲ្យសិស្សស្វែងយល់ពីគោលលទ្ធិ និងគោលការណ៍ទាំងឡាយដោយខ្លួនពួកគេ សូមមើលការបំពាក់បំប៉នដែលមានចំណងជើងថា « រៀនគោលលទ្ធិរបស់ព្រះយេស៊ូវគ្រីស្ទសម្រាប់ខ្លួនឯង » ដែលមាននៅក្នុង ជំនាញការអភិវឌ្ឍគ្រូបង្រៀន ៖ បង្រៀនគោលលទ្ធិ ។
-
តើមានមេរៀនអ្វីខ្លះដែលអ្នកបានរកឃើញ ?
ខាងក្រោមនេះគឺជាឧទាហរណ៍នៃគោលការណ៍ដែលសិស្សអាចនឹងរកឃើញ ៖
-
កិច្ចការរបស់ព្រះពុំអាចធ្វើឲ្យស្មុគស្មាញបានឡើយ ( សូមមើល គោលលទ្ធិ និងសេចក្ដីសញ្ញា ៣:១ ) ។ បើសិស្សរកឃើញសេចក្ដីពិតនេះ សូមពិចារណាសុំឲ្យពួកគេចែកចាយមូលហេតុដែលការណ៍នេះមានសារៈសំខាន់ដើម្បីយល់ និងរបៀបដែលវាអាចនឹងធ្វើឲ្យ យ៉ូសែប ស្ម៊ីធ ទទួលបានការលួងលោមចិត្ត ។
-
ព្រះប្រកបដោយសេចក្ដីមេត្តាករុណា ( សូមមើល គោលលទ្ធិ និងសេចក្ដីសញ្ញា ៣:១០ ) ។ ការណ៍នេះរួមមានទាំងពេលដែលយើងបានរងសម្ពាធពីអ្នកដទៃដែលមិនឲ្យយើងគោរពប្រតិបត្តិតាមទ្រង់ ។ បើសិស្សរកឃើញសេចក្ដីពិតនេះ សូមពិចារណាសួរសំណួរដូចតទៅនេះ ៖ តើការចងចាំពីសេចក្ដីមេត្តាករុណារបស់ព្រះអង្គសង្គ្រោះអាចនឹងជួយព្យាការី យ៉ូសែប ស្ម៊ីធ នៅពេលនេះដោយរបៀបណា ? តើការយល់ដឹងអំពីសេចក្ដីមេត្តាករុណារបស់ទ្រង់អាចនឹងជួយយើង នៅពេលដែលយើងត្រូវការផ្លាស់ប្តូរដោយរបៀបណា ?
-
នៅពេលយើងខ្លាចព្រះជាងមនុស្ស នោះទ្រង់នឹងគាំទ្រយើងនៅគ្រាដែលមានទុក្ខលំបាក ( សូមមើល គោលលទ្ធិ និងសេចក្ដីសញ្ញា ៣:៧–៨ ) ។ ផ្នែកសេសសល់នៃមេរៀននេះនឹងផ្តោតទៅលើគោលការណ៍នេះ ។
អែលឌើរ ឌី ថត គ្រីស្តូហ្វឺសិន ក្នុងកូរ៉ុមនៃពួកសាវកដប់ពីរនាក់បានពន្យល់ពីអត្ថន័យនៃការកោតខ្លាចដល់ព្រះ ៖
មានកន្លែងជាច្រើនក្នុងព្រះគម្ពីរដែលទូន្មានមនុស្សលោកឲ្យកោតខ្លាចដល់ព្រះ ។ នៅសម័យយើងនេះ ជាទូទៅយើងបកស្រាយពាក្យថា ការខ្លាច ទៅជា « ការគោរព » ឬ « គារវភាព » ឬ « សេចក្ដីស្រឡាញ់ » ទៅវិញ រីឯការខ្លាចព្រះមានន័យសំដៅដល់សេចក្ដីស្រឡាញ់នៃព្រះ ឬការគោរពចំពោះទ្រង់ និងក្រឹត្យវិន័យរបស់ទ្រង់ ។ …
… ដូច្នេះហើយយើងត្រូវស្រឡាញ់ និងមានគារវភាពចំពោះទ្រង់យ៉ាងខ្លាំង រហូតដល់យើងខ្លាចធ្វើអ្វីខុសចំពោះទ្រង់ មិនថាវាគឺជាយោបល់ ឬសម្ពាធពីអ្នកដទៃយ៉ាងណានោះទេ ។ ( ឌី ថត គ្រីស្តូហ្វឺសិន « A Sense of the Sacred » [ ការប្រជុំពិសេសនៃប្រព័ន្ធអប់រំសាសនាចក្រសម្រាប់យុវមជ្ឈិមវ័យ នៅថ្ងៃទី ៧ ខែ វិច្ឆិកា ឆ្នាំ ២០០៤ ] ទំព័រ ៦–៧ នៅលើគេហទំព័រ broadcasts.ChurchofJesusChrist.org )
-
តាមពាក្យសម្ដីរបស់អ្នកផ្ទាល់ តើអ្នកនឹងសង្ខេបអ្វីដែលអែលឌើរ គ្រីស្តូហ្វឺសិន បានបង្រៀនអំពីការខ្លាចព្រះដោយរបៀបណា ?
នៅពេលយើងមានចិត្តស្មោះត្រង់ ព្រះនឹងគាំទ្រដល់យើងរាល់ពេលជួបនឹងបញ្ហា
អ្នកអាចនឹងចង់សរសេរ ព្រះអម្ចាស់អាចជួយខ្ញុំក្នុងពេលជួបបញ្ហា ដោយសារទ្រង់ … នៅលើក្ដារខៀន ។
សូមសរសេរឃ្លា ព្រះអម្ចាស់អាចជួយខ្ញុំក្នុងពេលជួបបញ្ហា ដោយសារទ្រង់ … នៅក្នុងសៀវភៅកំណត់ហេតុការសិក្សារបស់អ្នក ។ សូមបំពេញសេចក្តីថ្លែងការណ៍នេះដោយការធ្វើរឿងមួយ ឬច្រើនដូចខាងក្រោម ៖
-
សូមធ្វើបញ្ជីពីជំនួយ និងការគាំទ្រដែលព្រះយេស៊ូវគ្រីស្ទអាចប្រទានដល់អ្នកដែលមនុស្សផ្សេងទៀតមិនអាចធ្វើបានឡើយ ។
-
សូមធ្វើបញ្ជីនៃពេលវេលាក្នុងជីវិតអ្នក នៅពេលដែលអ្នកបានជ្រើសរើសមានភាពស្មោះត្រង់លើព្រះអម្ចាស់ សូម្បីតែនៅពេលអ្នកដទៃកំពុងដាក់សម្ពាធឲ្យអ្នកមិនគោរពទ្រង់ ហើយទ្រង់បានប្រទានការគាំទ្រ ។ អ្នកក៏អាចប្រើឧទាហរណ៍ពីព្រះគម្ពីរផងដែរ ។
សិស្សក៏អាចរាយចម្លើយមួយចំនួនរបស់ពួកគេនៅលើក្ដារខៀនបានផងដែរ ។ សិស្សអាចត្រូវការជំនួយក្នុងការស្វែងយល់ពីដំណើររឿងព្រះគម្ពីរ អំពីការគាំទ្ររបស់ព្រះចំពោះបុគ្គលម្នាក់ៗដែលប្រឈមមុខនឹងការប្រឆាំង ប៉ុន្តែនៅតែស្មោះត្រង់ចំពោះទ្រង់ ។ អ្នកអាចផ្តល់ឲ្យពួកគេនូវឧទាហរណ៍ខាងក្រោម ៖ អ័ប៊ីណាដៃទទួលបានព្រះចេស្ដាពីព្រះដើម្បីចែកចាយសារលិខិតរបស់ទ្រង់ ទោះបីជាមានការគំរាមកំហែងពីស្តេចណូអេ និងសង្ឃរបស់ទ្រង់ក្ដី ( សូមមើល ម៉ូសាយ ១៣:១–៣ ) ។ ព្រះអម្ចាស់សង្រ្គោះ សាដ្រាក់ មែសាក់ និង អ័បេឌ-នេកោ ចេញពីគុកភ្លើង ( សូមមើល ដានីយ៉ែល ៣:២៣–២៥ ) ។
-
តើអ្នកបានសរសេរអ្វីខ្លះអំពីព្រះអង្គសង្គ្រោះ ដែលអ្នកមានអារម្មណ៍ថាមានប្រយោជន៍បំផុតក្នុងការចងចាំនៅពេលអ្នកត្រូវបានល្បួងឲ្យផ្គាប់ចិត្តអ្នកដទៃជាងព្រះ ?
ជាលទ្ធផលនៃការដាក់ទណ្ឌកម្មនេះ យ៉ូសែបបានដឹងថា ព្រះនឹងគាំទ្រដល់លោក នៅពេលដែលលោកជ្រើសរើសធ្វើជាមនុស្សស្មោះត្រង់ ។ យ៉ូសែប បានបន្ដឆ្ពោះទៅមុខក្នុងជីវិត ដោយទុកចិត្តលើព្រះបញ្ញត្តិ និងការណែនាំរបស់ព្រះ ទោះបីជាលោកបានដកពិសោធន៍ការឈឺចាប់ ការបៀតបៀន ជាប់គុក និងសូម្បីតែការស្លាប់ក៏ដោយ ( សូមមើល គោលលទ្ធិ និងសេចក្ដីសញ្ញា ១២២; ១៣៥ ) ។
សូមជញ្ជឹងគិត ហើយសរសេរនៅក្នុងសៀវភៅកំណត់ហេតុការសិក្សារបស់អ្នកអំពីរបៀបដែលអ្វីដែលអ្នកបានរៀននៅក្នុងមេរៀននេះទាក់ទងនឹងរូបអ្នក ។ អ្នកអាចនឹងបញ្ចូលអ្វីដែលអ្នកចង់ចងចាំ ឬធ្វើនៅពេលប្រឈមនឹងសម្ពាធឲ្យមានការខ្លាចអ្នកដទៃជាងព្រះ ។
សូមពិចារណាថ្លែងទីបន្ទាល់ថា មេរៀនដែល យ៉ូសែប ស៊្មីធ បានរៀនពីបទពិសោធន៍ដ៏លំបាកនេះ បានជួយលោកឲ្យកាន់តែគោរពប្រតិបត្តិដល់ព្រះពេញមួយជីវិតរបស់លោក ។ អ្នកអាចថ្លែងទីបន្ទាល់អំពីការគាំទ្រដែលអ្នកបានទទួលពីព្រះ ខណៈពេលដែលអ្នកបានធ្វើតាមព្រះឱវាទរបស់ទ្រង់ ទោះជាវាលំបាកធ្វើយ៉ាងណាក៏ដោយ ។