“Lesona 13—Mataupu Faavae ma Feagaiga 3: ‘Sa Lē Tatau Ona Sili Atu Lou Fefe i Tagata nai lo i le Atua,’” Tusi Lesona a le Faiaoga Seminare o le Mataupu Faavae ma Feagaiga (2025)
“Mataupu Faavae ma Feagaiga 3,” Tusi Lesona a le Faiaoga Seminare o le Mataupu Faavae ma Feagaiga
Lesona 13: Mataupu Faavae ma Feagaiga 3-5
Mataupu Faavae ma Feagaiga 3
“Sa Lē Tatau Ona Sili Atu Lou Fefe i Tagata nai lo i le Atua”
E i ai taimi atonu tatou te lagonaina ai le uunai mai o isi ia le usitai i le Atua. Sa lagonaina foi e Iosefa Samita le uunaiga faapena ina ua talosaga atu Matini Harisi e ave itulau ua faaliliuina o le Tusi a Mamona. Peitai, sa aoaoina e Iosefa e faapea, o taimi nei e tatau ai ona tatou faamaoni i le Atua ae aua le gauai atu i uunaiga a isi. O lenei lesona e mafai ona fesoasoani i tamaiti aoga ia lagonaina se manao faateleina ia sili atu lo latou faatuatua i le Atua nai lo i isi tagata.
Gaoioiga E Ono Mafai Ona Aoao Ai
O uunaiga o le olaga
Amata le vasega i le faaali atu i tamaiti aoga o se mea faitino vaivai e pei o se meataalo utuvavae po o se aluga. Ta’u i tamaiti aoga o lenei aitema e mafai ona avea ma faatusa o i latou. Mo tali taitasi latou te tuuina atu i fesili nei, valaaulia se tamaitiiti aoga e tuu se tusi po o se mea mamafa i luga o le mea faitino vaivai. A o faasolo mafolafola le mea faitino, valaaulia tamaiti aoga e mafaufau loloto pe i ai se taimi latou te lagona ai le taotaomia i lalo faapenei.
-
O a ni uunaiga e lagona e le autalavou i o latou olaga?
-
E fia le tele o nei uunaiga e sau mai i le taumafai e faafiafia isi?
Faaalu se minute e toe manatunatu ai pe o le a le tele o le uunaiga e te lagona e faafiafia ai isi ma aisea.
I lenei lesona, o le a e suesue ai pe na faapefea ona lagoinaina e le Perofeta o Iosefa Samita le uunaiga e faamalie Matini Harisi ma mea na aoao atu e le Faaola ia te ia i lena tulaga. A o e suesue, saili le taitaiga a le Agaga Paia e saili upumoni e mafai ona fesoasoani ia te oe pe a e lagonaina lenei uunaiga .
“Ua leiloloa mea uma”
O manatu nei mo le fesoasoani i tamaiti aoga ia malamalama i le mataupu taua faasolopito o loo i lalo:
-
Tuu atu le anotusi i se tamaitiiti aoga a o lei amataina le vasega, ma valaaulia o ia e fai se aotelega mo tagata uma.
-
Valaaulia tamaiti aoga e faasoa mai mea ua latou iloa e uiga i itulau e 116 na leiloloa mai le ulua’i faaliliuga o le Tusi a Mamona. Faamatala atu faamatalaga e lē faasoaina mai e tamaiti aoga.
-
Faaali atu nisi o anotusi nei ma upu autu o loo misi, ma vaai pe mafai e tamaiti aoga ona faamae’a le faamatalaga. Faatumu mea e le iloa e tamaiti aoga.
-
Faaali le vitio “The Work of God” (ChurchofJesusChrist.org) mai le faailo taimi 2:25 i le 8:45. Pe e mafai foi ona e filifili e faaali lenei vitio pe a e suesueina le Mataupu Faavae ma Feagaiga 10.
13:34
O Matini Harisi o se tagatanuu faaaloalogia o Palamaira ma o se faifaatoaga faamanuiaina o se tasi o nai tagata toalaiti i le eria sa talitonu ia Iosefa Samita. E ui ina toeitiiti faaluaina tausaga o lona matua, ae o Matini o se uo a Iosefa ma na tuuina atu ia te ia se tupe ina ia mafai ai ona ia siitia atu i Haramoni, Penisilevania, e faaliliu le Tusi a Mamona e aunoa ma se faalavelaveina. Sa faitaulaga foi e Matini le malaga ai o ia iina ma avea ma tusiupu.
O le toalua o Matini, o Lusi, sa lei lagolagoina ia le aafia ai o lona to’alua i le faaliliuga o le Tusi a Mamona. Sa fesili atu Matini ia Iosefa pe mafai ona ia faaali atu itulau muamua e 116 o le faaliliuga ia Lusi o se faamaoniga o la laua galuega. Na faalua ona tatalo Iosefa e uiga i ai ma i taimi taitasi na ta’u atu ai ia te ia e aua nei faatagaina Matini e ave ia itulau.
Sa tatalo faatolu Iosefa, ma na tuuina mai e le Alii le faatagaga i ni tuutuuga faatapulaaina. Sa ave e Matini ia itulau i Palamaira e faaali atu i lona faletua.
-
O le a sou manatu aisea na le mulimuli ai Iosefa i tali muamua e lua na ia maua mai le Alii?
E mafai ona e toe faatinoina le gaoioiga mai le amataga o le lesona e faaali atu ai le avega sa ia Iosefa.
O le aso na sosoo ma le aso na alu ese ai Matini, na fanauina ai e Ema Samita le la tama muamua ma Iosefa, o se atalii. O le mea e faanoanoa ai, sa na o ni nai itula na ola ai le pepe, ma sa foliga mai e ono oti foi Ema. O le mea e faafetai ai, na amata ona faasolo manuia le soifua maloloina o Ema ina ua mavae ni vaiaso se lua. E ui ina sa lei manao Iosefa e tuua ona autafa, ae sa uunaia o ia e Ema e malaga i Palamaira ma fesili e uiga i tusitusiga.
Ina ua taunuu atu Iosefa i le fale o ona matua, sa la valaaulia Matini e la te auai faatasi mo le malutaeao. E lei sau Matini mo le sili atu ma le fa itula. Ina ua taunuu o ia ma saofai i lalo, sa ia alaga ma le faanoanoa, “Ua leiloa lo’u agaga!” Na te lei mulimuli i taiala faatapulaaina ma ua leiloloa ia tusitusiga.
“Lo’u Atua e, lo’u Atua e. Ua leiloloa mea uma!” Fai mai Iosefa. “Pe tatau ea ona ou toe foi atu i lo’u toalua ma se tala faapena? A faapefea nei ona ou tu i luma o le Alii?”
Ina ua toe foi atu Iosefa i Haramoni, sa faaali mai Moronae ma aveese papatusi mai ia te ia. (Tagai Au Paia, 1:50–54.)
-
Aisea e te manatu na lagona ai e Iosefa le faapea ua leiloloa mea uma?
E lei leva ona mavae lenei mea na tupu, ae fetalai atu le Alii ia Iosefa Samita, avatu aoa’iga ma tuuina atu ia te ia upu faamafanafana.
Ia sili atu le mata’u i le Atua nai lo le tagata
Faitau le Mataupu Faavae ma Feagaiga 3:1–10. Faailoa mai le mea na mana’o le Alii ia Iosefa e aoao mai lenei mea na tupu.
Fautuaina tamaiti aoga e suesue lemu ma le faaeteete, ma vaavaai mo ni nai lesona.
Valaaulia tagata a’oa’o ia iloa upumoni mo i latou lava: O le fesili lenei ua faamoemoe e fesoasoani ai i tamaiti aoga e faailoa mai upumoni mo i latou lava. Mo se aoaoga faaopoopo i fesili e fesoasoani i tagata aoao ia iloa aoaoga faavae ma mataupu faavae mo i latou lava, tagai i le aoaoga ua faaautuina “Aoao le aoaoga faavae a Iesu Keriso mo oe lava ia,” o loo maua i le aoaoga o Tomai o le Atinaega o Faiaoga: Aoao le Aoaoga Faavae
-
O a nisi o lesona na e mauaina?
O faataitaiga nei o mataupu faavae e ono maua e tamaiti aoga:
-
E le mafai ona taofia galuega a le Atua (tagai Mataupu Faavae ma Feagaiga 3:1). Afai e faailoa mai e tamaiti aoga lenei upumoni, mafaufau e fai atu ia i latou e faasoa mai pe aisea e taua ai le malamalama ma pe na faapefea ona faamafanafanaina ai Iosefa Samita.
-
E alofa mutimutivale le Atua (tagai Mataupu Faavae ma Feagaiga 3:10). O lenei mea e aofia ai pe a tatou faavaivai atu i uunaiga mai isi ina ia lē usitai ia te Ia. Afai e faailoa mai e tamaiti aoga lenei upumoni, mafaufau e fai atu fesili e pei o nei: E mafai faapefea e le manatuaina o le alofa mutimutivale o le Faaola ona fesoasoani i le Perofeta o Iosefa Samita i lenei taimi? E mafai faapefea e le malamalama i Lona alofa mutimutivale ona fesoasoani ia i tatou pe a manaomia ona tatou sui?
-
Pe a sili atu lo tatou fefefe i le Atua nai lo tagata, o le a Ia lagolagoina i tatou i taimi o faalavelave (tagai i le Mataupu Faavae ma Feagaiga 3:7–8). O le vaega o totoe o le lesona o le a taulai atu i lenei mataupu faavae.
Na faamalamalama mai e Elder D. Todd Christofferson o le Korama a Aposetolo e Toasefululua le uiga o le mata’u i le Atua:
E tele vaega i tusitusiga paia ua fautuaina ai tagata e matatau i le Atua. I o tatou aso e masani lava ona tatou faaliliuina le upu mata’u o le “faaaloalo” po o le “migao” po o le “alofa”; o lona uiga, o le mata’u i le Atua o le alofa i le Atua po o le faaaloalo mo Ia ma Lana tulafono. …
… E tatau ona tatou alolofa tele ma migao ia te Ia lea tatou te fefefe ai e faia soo se mea sese i Lana silafaga, po o a lava manatu po o mea mamafa mai isi. (D. Todd Christofferson, “O Se Lagona o le Paia” [faeasaite a le Ofisa o Aoga a le Ekalesia mo le autalavou matutua, Nov. 7, 2004], 6–7, broadcasts.ChurchofJesusChrist.org)
-
I au lava upu, e faapefea ona e aoteleina mea na aoao mai e Elder Christofferson e uiga i le mata’u i le Atua?
Pe a tatou faamaoni, o le a lagolagoina i tatou e le Atua i taimi uma o faafitauli
Atonu e te manao e tusi le E mafai e le Alii ona lagolagoina au i taimi o faigata aua o Ia … i luga o le laupapa.
Tusi le fasifuaitau E mafai e le Alii ona lagolagoina au i taimi o faigata aua o Ia … i lau api talaaga mo suesuega. Faauma lenei faamatalaga e ala i le faia o se tasi po o le sili atu o mea nei:
-
Fai se lisi o le fesoasoani ma le lagolago e mafai e Iesu Keriso ona avatu ia te oe ae le mafai e isi tagata.
-
Fai se lisi o taimi i lou olaga na e filifili ai e faamaoni i le Alii, e tusa lava pe na uunaia oe e isi ia lē usitai ia te Ia, ma sa Ia tuuina mai le lagolago. E mafai foi ona e faaaogaina faataitaiga mai tusituisga paia.
E mafai foi e tamaiti aoga ona lisi nisi o a latou tali i luga o le laupapa. E ono manaomia e tamaiti aoga se fesoasoani i le faailoaina o tala o tusitusiga paia e uiga i le lagolagoina e le Atua o tagata o e na feagai ma ni tetee ae sa tumau pea le faamaoni ia te Ia. E mafai ona e tuuina atu ia i latou ni faataitaiga nei: Ua maua e Apinati le mana mai le Atua e momoli atu ai Lana savali e ui i taufaamata’u mai le Tupu o Noa ma ana faitaulaga (tagai Mosaea 13:1–3); ua laveai e le Alii ia Sataraka, Mesako, ma Apeteniko mai le ogaumu aasa (tagai Tanielu 3:23–25).
-
O le a se mea ua e tusia e uiga i le Faaola e te lagona o le a sili ona fesoasoani e manatua pe a faaosoosoina oe ia faamalie atu isi nai lo le Atua?
O se taunuuga o lenei aoaiga, sa iloa ai e Iosefa o le a lagolagoina o ia e le Atua a o ia filifili e faamaoni. Sa agai i luma Iosefa i le olaga, faatuatua i poloaiga ma le taitaiga a le Atua, e ui ina sa oo o ia i le tiga, sauaga, faafalepuipuiina, e oo lava i le oti (tagai Mataupu Faavae ma Feagaiga 122; 135).
Mafaufau loloto ma tusi i lau api talaaga mo suesuega pe faapefea ona talafeagai mea na e aoaoina i lenei lesona ia te oe. Atonu e te faaaofia ai mea e te manao e manatua pe fai pe a feagai ma le uunaiga e sili atu le fefe i isi nai lo le Atua.
Mafaufau e molimau atu o lesona na aoaoina ai Iosefa Samita mai lenei aafiaga faigata na fesoasoani ia te ia e usiusitai atili ai i le Atua i lona olaga atoa. E mafai ona e molimau atu e uiga i le lagolago na e maua mai le Atua a o e mulimuli i Lana fautuaga e tusa lava pe faigata ona fai.