“Pagbansay 3 sa Doktrinal nga Kahanas: Isag-ulo; Pag-angkon og Espirituhanong Kahibalo,” Manwal sa Magtutudlo sa Seminary sa Doktrina ug mga Pakigsaad (2025)
“Pagbansay 3 sa Doktrinal nga Kahanas,” Manwal sa Magtutudlo sa Seminary sa Doktrina ug mga Pakigsaad
Leksiyon 50: Doktrina ug mga Pakigsaad 30–36
Pagbansay 3 sa Doktrinal nga Kahanas
Isag-ulo; Pag-angkon og Espirituhanong Kahibalo
Ang doktrinal nga kahanas makatabang sa mga estudyante sa pagtukod sa pundasyon alang sa ilang mga kinabuhi diha ni Jesukristo ug sa Iyang ebanghelyo. Kini nga leksiyon maghatag sa mga estudyante og mga kahigayonan sa pagbansay nga mahanas sa mga tudling sa doktrinal nga kahanas ug sa doktrina nga gitudlo niini. Makatabang usab kini kanila sa pagkat-on ug paggamit sa balaanong mga baroganan sa pag-angkon og espirituhanong kahibalo.
Mga Posibleng Kalihokan sa Pagkat-on
Pagrebyo sa doktrinal nga kahanas: Isag-ulo
Kon gipaila sa mga estudyante ang pipila ka mga pakisayran sa kasulatan sa doktrinal nga kahanas ug ang mahinungdanon nga mga hugpong sa mga pulong sa kasulatan karong tuiga, mas maayo nga dapiton sila sa pagpraktis sa pagsag-ulo sa mga pakisayran ug sa mahinungdanon nga hugpong sa mga pulong sa kasulatan. Madugangan sa mga estudyante ang ilang kamasaligon sa pagbaton og igong kahibalo sa mga kasulatan ngadto sa paggamit niini sa panahon sa panginahanglan.
Hatagi ang mga estudyante og mga 10 ka minuto sa klase ug dasiga usab sila sa pagpaningkamot sa pagsag-ulo sa gawas sa klase. Ipakita ang tsart nga naglista sa mga pakisayran sa kasulatan sa doktrinal nga kahanas uban sa mahinungdanon nga hugpong sa mga pulong sa kasulatan, nga makita diha sa Mahinungdanon nga Dokumento sa Doktrinal nga Kahanas (2023).
Pagpili og tudling sa doktrinal nga kahanas nga gusto nimong isag-ulo karon. Paghimo og usa ka talagsaon nga paagi sa pagtabang kanimo sa paghinumdom sa pakisayran sa kasulatan ug sa mahinungdanon nga hugpong sa mga pulong sa kasulatan.
Mahimong magtrabaho ang mga estudyante nga mag-inusara o mangita og uban diha sa klase kinsa gustong mosag-ulo sa samang tudling. Human ang mga estudyante nakagahin og pipila ka minuto sa pagsag-ulo, dasiga sila sa pagpakigbahin ngadto sa uban sa bisan unsa nga mga sugyot o mga taktika nga ilang gigamit sa pagsag-ulo.
Sa dili pa mopadayon ngadto sa sunod nga bahin sa leksiyon, ug sa umaabot nga mga klase, mahimo nimong basahon ang pipila ka mahinungdanon nga hugpong sa mga pulong sa kasulatan ngadto sa klase ug hangyoa ang mga estudyante sa pagsulti sa katugbang nga mga pakisayran sa kasulatan gikan sa panumdoman. Ang paggamit sa mga tudling sa doktrinal nga kahanas sa kanunay makatabang sa mga estudyante sa pagpatuhop niini sa ilang malungtaron [long-term] nga panumdoman ug sa paghinumdom niini sa panahon nga kinahanglanon.
Dugang nga mga ideya kon unsaon pagtabang sa mga estudyante nga makasag-ulo makita diha sa apendiks niini nga manwal ubos sa “Mga Kalihokan sa Pagrebyo sa Doktrinal nga Kahanas.”
Pagkat-on ug paggamit sa mga baroganan sa pag-angkon og espirituhanong kahibalo
Ikonsiderar ang pagdapit sa mga estudyante sa pagrebyo sa mga baroganan sa pag-angkon og espirituhanong kahibalo. Ang gisugyot nga mga kalihokan sa pagrebyo gilakip sa apendiks diha sa “Mga Kalihokan sa Pagrebyo sa Doktrinal nga Kahanas.” Ang mga deskripsiyon sa mga baroganan makita diha sa mga parapo 5–12 sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas (2023).
Gamita ang mosunod nga senaryo aron matabangan ang mga estudyante nga mapraktis sa paggamit niini nga mga baroganan sa tinuod nga sitwasyon sa kinabuhi.
Sa dili pa magsugod ang Sunday School, ang imong higala nga si Noelle milingkod tupad kanimo. Mitan-aw siya ngadto sa pisara ug ingon nga nasagmuyo sa iyang nabasa. Ang leksiyon karon nakatutok sa pagsunod sa propeta. Gisultihan ka ni Noelle nga bag-o lang siyang nakabasa bahin sa mga tawo nga napungot sa propeta. Naghunahuna siya kon ngano nga ang propeta wala kaayo makahibalo sa mga panginahanglan sa mga tawo o kon ngano nga ingon og dili siya motubag sa mga sugyot nga gihimo sa mga tawo.
-
Unsaon nimo paggamit ang mga baroganan sa pag-angkon og espirituhanong kahibalo aron makatabang niini nga senaryo?
-
Unsa ang gitudlo sa mga tudling sa doktrinal nga kahanas nga mahimong makatabang?
Usa ka paagi alang sa mga estudyante sa pagpraktis sa paggamit sa mga baroganan sa pag-angkon og kahibalo mao ang paghunahuna kon sa unsang paagi ang mga hunahuna ug mga buhat sa tawo nga anaa sa senaryo mahimong malahi kon sila makasabot niini nga mga baroganan.
Aron matabangan sila sa pagbuhat niini, mahimo nimong bahinon ang mga estudyante ngadto sa gagmay nga mga grupo ug tugoti sila sa pagpili og usa ka baroganan sa pag-angkon og kahibalo. Dapita sila sa pagbasa sa kaubang mga parapo diha sa Mahinungdanon nga Dokumento sa Doktrinal nga Kahanas aron mas makasabot niini nga baroganan. Tabangi ang mga estudyante sa pagpangita sa bisan unsang mga kasulatan nga tingali ilang natun-an sa seminary mahitungod sa mga propeta (sama sa Doktrina ug mga Pakigsaad 1:37–38; 21:4–6; 28:2). Mahimo usab nimong ipakita ang mosunod nga mga instruksiyon ug dapita ang mga estudyante sa pagkompleto niini uban sa ilang mga grupo.
Lihokon inubanan sa hugot nga pagtuo
Paghimo og labing menos duha ka mga buhaton nga mahimo ni Noelle aron sa paglihok inubanan ang hugot nga pagtuo agig tubag sa iyang kabalaka.
Ipasabot kon ngano nga imong irekomendar kana nga mga buhaton o ipakigbahin kon unsa nga mga kasinatian ang imong nasinati.
Paglista og pipila ka mga kamatuoran nga tingali nahibaloan ni Noelle mahitungod sa mga propeta nga makatabang kaniya nga mas mosalig sa Ginoo ug sa Iyang mga sulugoon samtang nagtinguha nga makakat-on pa.
-
Ngano sa imong hunahuna nga importante alang kang Noelle nga magpabiling matinud-anon sa unsay iyang nahibaloan ug gituohan samtang siya nagsulbad sa iyang kasamtangan nga mga pangutana?
Susihon ang mga konsepto ug mga pangutana inubanan sa mahangtorong panglantaw
Isulat ang tahas sa mga propeta diha sa plano sa Langitnong Amahan sa kaluwasan.
Paghimo og tupad nga pagtandi sa katuyoan sa Ginoo alang sa mga propeta ug sa unsay gihunahuna ni Noelle ug sa uban nga ilang tahas.
Tinguhaa ang dugang nga panabot pinaagi sa balaanong gitudlo nga mga tinubdan
Paglista og pipila sa mga negatibong epekto nga mahimo sa dili kasaligan nga mga tinubdan ngadto sa usa ka tawo.
Pangita og usa o daghang mga tudling sa kasulatan diha sa Doktrina ug mga Pakigsaad (o ubang balaanong gitudlo nga mga tinubdan) nga makatabang kang Noelle.
Isulat ang labing menos duha ka mga panalangin nga mahimong madawat ni Noelle kon siya nakasabot kon nganong ang Dios nagtawag og mga propeta.
Hatagi ang mga estudyante og kahigayonan nga ipakigbahin ang pipila sa unsay ilang nabuhat ug nakat-onan. Usa ka paagi nga mahimo nimo kini mao ang pagdapit kanila sa paghanduraw nga si Noelle mipili sa paggamit sa mga baroganan sa pag-angkon og espirituhanong kahibalo aron makatabang sa pagsulbad sa iyang mga kabalaka. Mahimong magsulat ang mga estudyante mahitungod sa unsay mahitabo ni Noelle samtang iyang gipatuman ang usa o daghan pa sa mga baroganan sa pag-angkon og espirituhanong kahibalo.
Mahimo dayon nga ipakigbahin sa mga estudyante ang unsay ilang gisulat ug ipasabot ang pipila ka mga rason kon ngano nga ilang gisulat ang senaryo sa paagi nga ilang gibuhat. Human sa pagpakigbahin sa mga estudyante, mahimo nimo silang dapiton sa pagkonsiderar kon unsay ilang nakat-onan o gibati karon nga makatabang nila sa ilang kaugalingong mga kinabuhi.