Leksiyon 53: Doktrina ug mga Pakigsaad 37–40

Doktrina ug mga Pakigsaad 39–40

“Usa ka Panalangin nga Hilabihan ka Mahinungdanon nga Ikaw Wala pa Sukad Makahibalo”

Si James Covel nagtrabaho isip usa ka Methodist nga ministro sa dapit sa New York sulod sa 40 ka tuig. Sa dihang nakadungog siya sa mensahe sa Pagpahiuli, misaad siya nga mosunod sa bisan unsang sugo nga gihatag kaniya pinaagi ni Propeta Joseph Smith. Ang Manluluwas misugo kang James nga magpabunyag ug mopundok uban sa mga Santos sa Ohio ug misaad kaniya og dakong gahom kon siya mohimo ug motuman sa sagradong mga pakigsaad. Kini nga leksiyon makatabang sa mga estudyante nga mobati og tinguha sa paghimo ug pagtuman sa mga pakigsaad uban ni Jesukristo aron makaangkon og mas dakong katungod sa Iyang gahom.

Mga Posibleng Kalihokan sa Pagkat-on

Paghimo ug pagtuman sa mga pakigsaad uban sa Dios

Ikonsiderar ang pagpakita sa mga estudyante og butang sama sa suga, nga makakab-ot lamang sa hingpit nga potensiyal niini kon ituslok sa tinubdan sa kuryente. Pangutan-a ang mga estudyante kon unsay mahimo sa usa ka suga nga mag-inusara ra itandi kon kini gituslok sa kuryente. Dapita ang mga estudyante sa paghisgot kon sa unsang paagi kini makarepresentar sa atong mga pakigsaad sa Dios.

Basaha ang “Pakigsaad” diha sa Giya ngadto sa mga Kasulatan ug sa mosunod nga pamahayag gikan ni Presidente Russell M. Nelson, mangita og kahulogan sa mga pakigsaad.

Ang pakigsaad … usa ka sagradong saad uban ang Dios. Siya ang naghan-ay sa mga kondisyon. Ang kada tawo mahimong mopili sa pagdawat sa mga kondisyon. Kon ang usa ka tawo modawat sa mga kondisyon sa pakigsaad ug mosunod sa balaod sa Dios, iyang madawat ang mga panalangin sa pakigsaad. (Russell M. Nelson, “Mga Pakigsaad,” Liahona, Nob. 2011, 86)

• Unsaon nimo sa paghulagway o sa pagpasabot ang usa ka pakigsaad?

• Unsa nga mga pakigsaad ang imong gihimo uban sa Ginoo?

• Sa unsang paagi kini nga mga pakigsaad nakaimpluwensiya sa imong kinabuhi?

Si Jesukristo nagdapit kanato sa paghimo og mga pakigsaad uban Kaniya

Si James Covel usa ka Methodist nga ministro. Sa dihang nahibaloan niya ang mahitungod ni Propeta Joseph Smith, si Covel misaad sa Ginoo “nga siya mosunod sa bisan unsa nga sugo nga ihatag ngadto kaniya sa Ginoo pinaagi ni Joseph ang Propeta” (Doktrina ug mga Pakigsaad 39, ulohan sa seksiyon).

Basaha ang Doktrina ug mga Pakigsaad 39:1–9 ug pangitaa kon unsay imong makat-onan mahitungod ni Jesukristo nga makadasig sa usa ka tawo sa pagsulod og usa ka pakigsaad nga relasyon uban Kaniya.

• Unsay imong nakaplagan mahitungod sa Manluluwas?

• Unsa ang gidapit sa Manluluwas nga atong buhaton aron makadawat sa Iyang gahom?

Aron matabangan ang mga estudyante sa pag-ila og baroganan, mahimo nilang kompletohon diha sa pisara o sa ilang mga journal sa pagtuon ang mosunod nga pamahayag: “Kon kita __________, atong madawat ang ___________.”

Mahimong makaila ang mga estudyante og baroganan nga susama niini: Kon kita mohimo ug motuman sa sagradong mga pakigsaad uban sa Dios, atong madawat ang Iyang gahom.

Kon mogamit sa leksiyon nga nagkinahanglan og butang, ituslok ang suga aron ipakita nga ang paghimo og mga pakigsaad makatabang kanato nga makadawat sa gahom sa Manluluwas. Ikonsiderar ang pagpangutana sa mga estudyante kon sa unsang paagi kini makapakita sa baroganan nga ilang nailhan.

Basaha ang Doktrina ug mga Pakigsaad 39:10–15 ug pangitaa kon unsay gidapit sa Ginoo nga buhaton ni James Covel aron makasulod og pakigsaad uban Kaniya.

• Unsa ang gisaad ni Jesukristo kang James Covel kon siya mihimo niini nga pakigsaad?

• Sa unsang paagi nga ang tambag sa Ginoo ngadto ni James Covel magamit kanato karon?

• Sa unsang paagi nimo nakita ang gahom sa Manluluwas sa imong kinabuhi o sa kinabuhi sa usa ka tawo nga imong nailhan?

Kahadlok, pagpanggukod, ug mga kabalaka sa kalibotan

Si James Covel adunay dakong pamilya, mga higala, ug suod nga komunidad sa New York. Ang Manluluwas misugo kaniya nga magpabunyag ug mobalhin uban sa mga Santos ngadto sa Ohio. Ang pagpasakop sa Simbahan usa unta ka sakripisyo alang kang James Covel.

Basaha ang ulohan sa seksiyon alang sa Doktrina ug mga Pakigsaad 40 ingon man sa mga bersikulo 1–3, ug pangitaa ang desisyon nga gihimo ni James Covel.

Mahimong usa kini ka maayong kahigayonan sa pagpraktis sa paggamit sa mga baroganan sa pag-angkon og espirituhanong kahibalo. Mahimo nimong hisgotan kon sa unsang paagi si James Covel milihok unta inubanan sa hugot nga pagtuo. Usab, ikonsiderar ang paghisgot kon sa unsang paagi unta niya makita ang iyang mga pagpili ug ang tambag sa Ginoo gikan sa mahangtorong panglantaw.

• Sa unsang paagi nga ang “kahadlok sa pagpanggukod” (bersikulo 2) makapahimo sa usa ka tawo sa pagsalikway o sa paglapas sa ilang mga pakigsaad sa Dios?

• Unsa ang pipila sa “mga kabalaka sa kalibotan” (bersikulo 2) nga nagdala sa mga tawo sa pagsalikway sa mga pakigsaad uban sa Dios karon?

Basaha ang mosunod nga pamahayag gikan ni Presidente Russell M. Nelson o tan-awa ang bidyo nga “Buntoga ang Kalibotan ug Pangita og Kapahulayan” (18:31), anaa sa https://www.churchofjesuschrist.org/study?lang=ceb, gikan sa time code 4:21 hangtod sa 5:39. Samtang magbasa ka o magtan-aw, pangitaa ang gahom nga gisaad niadtong mohimo ug motuman sa mga pakigsaad uban sa Dios:

Ang paghimo ug pagtuman og mga pakigsaad sa tinuod makahimo sa kinabuhi nga sayon! Ang matag tawo nga mohimo og mga pakigsaad diha sa mga bunyaganan ug diha sa mga templo—ug motuman niini—nakapadugang og agianan ngadto sa gahom ni Jesukristo. Palihog palandonga kanang talagsaon nga kamatuoran!

Ang ganti sa pagtuman sa mga pakigsaad sa Dios mao ang langitnong gahom—gahom nga mas makapalig-on nato sa pagpakigbatok sa atong mga pagsulay, mga tintasyon, ug mga kasakit. Kini nga gahom makapasayon sa atong dalan. Kadtong kinsa nagsunod sa mas taas nga mga balaod ni Jesukristo adunay agianan ngadto sa Iyang mas dako nga gahom. Sa ingon, ang tigtuman sa pakigsaad adunay katungod sa espesyal nga matang sa kapahulayan nga moabot ngadto nila sa ilang tibuok relasyon sa pakigsaad uban sa Dios. (Russell M. Nelson, “Buntoga ang Kalibotan ug Pangita og Kapahulayan,” Liahona, Nob. 2022, 96)

• Unsa ang mipatigbabaw diha kanimo gikan sa pamahayag ni Presidente Nelson?

Hatagi ang mga estudyante og kahigayonan sa pagpamalandong sa ilang tinguha sa paghimo ug sa pagtuman sa mga pakigsaad uban sa Manluluwas aron makadawat sa Iyang gahom. Ang mga estudyante mahimong mosulat diha sa ilang mga journal o sa mga piraso sa papel. Mahimo usab nilang hisgotan ang ilang nakat-onan o gibati ngadto sa gagmay nga mga grupo o isip usa ka klase.

Sa pagtapos sa leksiyon, mahimo nimong ipakigbahin kon sa unsang paagi nimo nakita ang gahom sa Manluluwas diha sa imong kinabuhi samtang naghimo ka og mga pakigsaad uban sa Dios. Dasiga ang mga estudyante sa pagpadayon sa pagpaningkamot sa paghimo ug sa pagtuman sa ilang mga pakigsaad ug sa pagsalig sa saad sa Ginoo sa pagpanalangin kanila sa ilang mga paningkamot.

Dugang nga mga Kapanguhaan

Sa unsa nga paagi ang usa ka pakigsaad nga relasyon uban sa Dios makapanalangin kanako?

Si Presidente Russell M. Nelson mitudlo:

Ang tanan niadtong kinsa mihimo og usa ka pakigsaad sa Dios adunay agianan ngadto sa usa ka espesyal nga matang sa gugma ug kaluoy. …

Sa higayon nga kamo ug ako mohimo og usa ka pakigsaad uban sa Dios, ang atong relasyon uban Kaniya mamahimong ingon ka suod kay sa wala pa ang atong pakigsaad. Karon kita mag-uban nga gihugpong. Tungod sa atong pakigsaad sa Dios, Siya dili gayod kapoyon sa Iyang mga paningkamot sa pagtabang kanato, ug kita dili gayod makabsan sa Iyang maloluy-on nga pailob ngari kanato. Ang matag usa kanato adunay usa ka espesyal nga dapit diha sa kasingkasing sa Dios. Siya adunay taas nga pangandoy alang kanato. …

Nakita ba ninyo ang kamahinungdanon niini? Kadtong kinsa motuman sa ilang mga pakigsaad uban sa Dios mamahimong usa ka kalag nga makabatok sa sala! Kadtong kinsa motuman sa ilang mga pakigsaad makabaton og kalig-on sa pagbatok sa makanunayon nga impluwensiya sa kalibotan. (Russell M. Nelson, “Ang Walay Kataposan nga Pakigsaad,” Liahona, Okt. 2022, 5–6, 8)

Si Elder David A. Bednar sa Korum sa Napulog Duha ka Apostoles mipasabot:

Ang mga saad ug mga panalangin sa pakigsaad dili mahimong posible kon wala ang atong Manluluwas, si Jesukristo. Siya nagdapit kanato sa pagtan-aw ngadto Kaniya [tan-awa sa Doktrina ug mga Pakigsaad 6:36], moduol ngadto Kaniya [tan-awa sa 3 Nephi 12:20; Moroni 10:32–33], magkat-on diha Kaniya [tan-awa sa Mateo 11:29; Doktrina ug mga Pakigsaad 19:23], ug bugkoson ang atong kaugalingon ngadto Kaniya [tan-awa sa Doktrina ug mga Pakigsaad 43:9] pinaagi sa mga pakigsaad ug mga ordinansa sa Iyang gipahiuli nga ebanghelyo.

Ang mga pakigsaad ug ang mga ordinansa mao ang mga sukaranan nga atong gamiton sa pagtukod sa atong kinabuhi diha sa “tukoranan sa atong Manunubos” [Helaman 5:12] ug sa Iyang Pag-ula. Tungod gayod kay ang matinud-anong pagtahod sa sagradong mga pakigsaad nagbugkos kanato ngadto sa Manluluwas, Siya nahimong labing mahinungdanong tinubdan sa espirituwal nga direksiyon ug kalig-on sa atong mga kinabuhi. (David A. Bednar, “Nabugkos ngadto sa Manluluwas pinaagi sa mga Pakigsaad,” Alang sa Kalig-on sa mga Kabatan-onan, Peb. 2022, 5)

Unsaon nako pagpalawom ug pagpalig-on sa akong pasalig ngadto sa Manluluwas?

Si Elder Neil L. Andersen sa Korum sa Napulog Duha ka Apostoles mitudlo:

Una, atong isubsob ang atong kaugalingon sa mas hingpit nga paagi diha sa kinabuhi ni Jesus, sa Iyang mga pagtulon-an, Iyang kaharianon, Iyang gahom, ug Iyang sakripisyo sa pag-ula. Ang Manluluwas miingon, “Paghunahuna ngari kanako sa matag hunahuna” [Doktrina ug mga Pakigsaad 6:36]. Si Apostol Juan mipahinumdom nato, “Kita nagahigugma kaniya, tungod kay siya mao man ang unang nahigugma kanato” [1 Juan 4:19]. Kon kita mas makasinati sa Iyang gugma, kita mas mahigugma pa Kaniya ug, natural lang, mas mosunod sa Iyang ehemplo sa paghigugma ug pag-atiman niadtong anaa sa atong palibot. Sa matag matarong nga lihok paingon Kaniya, kita mas klarong makakita Kaniya [tan-awa sa David B. Haight, “Temples and Work Therein,” Ensign, Nob. 1990, 61]. Kita mosimba Kaniya, ug kita maningkamot sa atong ginagmay nga mga paagi sa pagsundog Kaniya [tan-awa sa Mosiah 5:13].

Sunod, kon kita mas makaila ug mohigugma sa Manluluwas, kita mas magtinguha pa nga mosaad Kaniya sa atong pagdapig ug pagsalig. Kita naghimo og mga pakigsaad uban Kaniya. Kita nagsugod sa atong mga saad atol sa bunyag, ug kita nagmatuod niini nga mga saad ug uban pa kon kita maghinulsol matag adlaw, mangayo og pasaylo, ug mahinamong magpaabot sa pagdawat sa sakramento matag semana. Kita nagsaad nga “sa kanunay mohinumdom Kaniya ug maghupot sa Iyang mga sugo” [Doktrina ug mga Pakigsaad 20:77].

Kon kita andam na, kita mohangop sa mga ordinansa ug mga pakigsaad sa templo. Mibati sa impluwensiya sa kahangtoran diha sa atong sagrado, hilom nga mga gutlo sa balay sa Ginoo, kita malipayong mohimo og mga pakigsaad uban sa Dios ug molig-on sa atong determinasyon sa pagtuman niini.

Ang paghimo ug pagtuman sa mga pakigsaad nagtugot sa gugma sa Manluluwas nga mas motuhop sa atong kasingkasing. (Neil L. Andersen, “Magpaduol ngadto sa Manluluwas,” Liahona, Nob. 2022, 74)

Asa ako makakat-on og dugang pa mahitungod ni James Covel?

Jed Woodworth, “James Covel and the ‘Cares of the World,’” sa Revelations in Context, anaa sa Church History section sa Gospel Library

“James Covel,” makita sa Historical Resources diha sa Church History section sa Gospel Library

Dugang nga mga Kalihokan sa Pagkat-on

Usa ka alternatibo nga pagsugod sa leksiyon

Isulat ang pulong nga “Paghuman” diha sa pisara.

• Unsa kaha ang kasagaran nga sugdan sa mga tin-edyer apan maglisod sa paghuman?

• Unsa ang gilisoran sa paghuman sa mga tawo?

Dapita ang mga estudyante sa pagpamalandong kon sila ba adunay nasugdan nga ilang gitinguha nga unta mahuman apan wala mahuman. Sa paghunahuna mahitungod sa pagkadisipulo ni Jesukristo, mahimo nimong hangyoon ang mga estudyante sa pagkonsiderar kon ngano nga ang uban magsugod sa dalan sa pakigsaad apan mopili nga dili magpadayon. Mahimo kang mopakigbahin nga diha sa Doktrina ug mga Pakigsaad 39–40, ang mga estudyante magtuon sa asoy sa usa ka tawo nga wala mopadayon sa iyang gisugdan. Samtang magtuon sila, mahimong mangita ang mga estudyante sa mga baroganan nga gipaningkamotan sa Ginoo nga itudlo niini nga tawo nga makatabang kanato nga mahimong mga tighuman.

Ang sambingay sa magpupugas (tan-awa sa Doktrina ug mga Pakigsaad 40:2)

Ang kasinatian ni James Covel usa ka maayong ehemplo sa sambingay sa Manluluwas sa magpupugas (tan-awa sa Mateo 13:18–23). Mahimo nimong irebyo ang sambingay ug hisgoti kon sa unsang paagi naghulagway si James Covel sa liso nga “dapit sa mga tunokon nga sagbot”(bersikulo 22). Ang Manluluwas mitudlo kanato sa pagtanom sa pulong sa Dios sa ilawom sa “maayong yuta” (bersikulo 23). Ang mga pangutana sa panaghisgotan mahimong maglakip sa:

• Unsa ang hitsura sa tunokon nga yuta sa atong panahon?

• Unsa nga “mga kabalaka sa kalibotan” (Doktrina ug mga Pakigsaad 40:2) ang makaapeko sa atong espirituhanon nga paglambo?

• Unsa ang atong mahimo aron sa pagtanom sa pulong sa Dios sa kinahiladman sa atong mga kasingkasing?

Damgo ni Lehi

Ikonsiderar ang pagdapit sa mga estudyante sa pagtuon sa mga grupo sa mga katawhan diha sa damgo ni Lehi (tan-awa sa 1 Nephi 8:19–34). Hisgoti kon sa unsang paagi nga ang istorya ni James Covel usa ka panig-ingnan sa mga tawo nga nakita ni Lehi sa 1 Nephi 8:24–28. Mahimo nimong dapiton ang mga estudyante sa pagpakigbahin kon unsay atong mahimo sa paglihok inubanan sa hugot nga pagtuo kon mag-atubang sa mga tintasyon sa kalibotan. Mahimong basahon sa mga estudyante ang 1 Nephi 8:33–34 ug hisgoti kon unsay gibuhat niadtong kinsa wala maulaw sa bunga aron sa paglihok inubanan sa hugot nga pagtuo.

Isulat pag-usab ang istorya ni James Covel

Human matun-an sa klase ang mga seksiyon 39 ug 40, dapita sila sa paghanduraw nga sila adunay kahigayonan sa pagsulat pag-usab sa istorya ni James Covel. Mahimo nimo silang hangyoon sa paghanduraw nga si James mihimo og lahi nga desisyon human makadawat sa tambag sa Manluluwas diha sa seksiyon 39. Mahimo nimong dapiton ang mga estudyante sa paghisgot kon unsa kaha unta ang kinabuhi ni James Covel kon lahi pa ang iyang gipili.

• Unsa kaha unta nga mga panalangin ang iyang nadawat?

• Unsa kaha unta nga mga kahigayonan ang gihatag ngadto kaniya?

Si Presidente Nelson mipasabot sa sagradong mga pakigsaad

Ang bidyo nga “Elder Nelson Talks about Covenants” (4:45) gikan sa time code 0:00 hangtod sa 1:12 mahimong gamiton sa sinugdanan sa leksiyon aron matabangan ang mga estudyante nga masabtan kon unsa ang mga pakigsaad. Kini nga bidyo anaa sa https://www.churchofjesuschrist.org/study?lang=ceb.