Leksiyon 54: Doktrina ug mga Pakigsaad 37–40

Sukda ang Imong Nakat-onan 3

Doktrina ug mga Pakigsaad 20–40

Ang pagpamalandong ug ang pagsukod sa atong espirituhanong pagkat-on makatabang kanato nga mas maduol sa Manluluwas. Kini nga leksiyon makatabang sa mga estudyante sa paghinumdom ug sa pagsusi kon sa unsang paagi ang ilang mga kasinatian sa pagtuon sa Doktrina ug mga Pakigsaad nakatabang kanila sa paglambo sa espirituhanong paagi.

Mga Posibleng Kalihokan sa Pagkat-on

Pisikal ug espirituhanon nga paglambo

Ikonsiderar ang pagpakita og tapad nga pagtandi sa mga hulagway nga nagpakita sa paglambo.

Aron masukod ang pagtubo, pagkausab, ug pag-uswag, ang mga tawo kanunay nga mogamit og mga hulagway aron makahimo og tapad nga pagtandi.

• Sa unsang paagi nga ang mga hulagway sa atong kaugalingon makatabang kanato sa pag-ila sa mga paagi nga kita tingali nausab o nitubo?

• Unsa ang uban pang mga paagi nga atong mailhan ang atong pagtubo?

Aron matabangan ang mga estudyante sa pagpamalandong ug paghisgot sa espirituhanong pagtubo, mahimo nimo ipakita ang hulagway ni Jesus ug sa usa ka bata, sama sa anaa sa sinugdanan niini nga leksiyon.

Hunahunaa kon unsay imong isulti sa usa ka bata mahitungod sa iyang potensiyal nga molambo ug mahimong mas mahisama ni Jesukristo.

• Unsa ang pipila ka mga paagi nga ang usa ka tawo makaila kon sa unsang paagi siya nagkahimong mas sama sa Manluluwas? (Tan-awa sa Lucas 2:52; tan-awa usab sa Alma 5:14.)

Dapita ang mga estudyante sa pagtinguha og tabang gikan sa Espiritu Santo samtang mamalandong sila sa ilang paglambo. Hangyoa sila sa pagsulat diha sa ilang mga journal mahitungod sa pipila ka mga paagi nga sa ilang paminaw sila nagkahimong mas sama ni Jesukristo. Mahimo nimong dasigon ang mga estudyante sa paghunahuna og mga hiyas sa Manluluwas nga ilang nakat-onan sa ilang pagtuon sa Doktrina ug mga Pakigsaad. Dasiga ang mga estudyante sa pagtan-aw sa mubo nga mga sulat diha sa ilang journal o mga kasulatan nga ilang gimarkahan mahitungod sa Manluluwas sa miaging pipila ka semana. Hangyoa sila sa pagpamalandong kon hain sa mga hiyas ni Jesukristo ang ilang mas nakita sa ilang mga kaugalingon (bisan kon kini sa gagmay lang nga mga paagi).

Ang ubang mga estudyante mahimong dili makamatikod sa ilang paglambo. Pahinumdomi ang mga estudyante nga ang paglambo sa kasagaran lisod mabantayan, hilabi na sa ilang kaugalingon, apan wala kana magpasabot nga wala sila molambo. Niini nga leksiyon, adunay mga kahigayonan ang mga estudyante sa pagpasabot sa katuyoan sa sakramento, pagpamalandong sa ilang mga tinguha sa pagsunod sa propeta, ug pagrebyo sa ilang mga plano sa pagpakigbahin sa ebanghelyo. Ang pagtuon sa imong klase sa Doktrina ug mga Pakigsaad 20–40 tingali naghatag og gibug-aton sa mga kamatuoran gawas niadtong anaa sa mosunod nga mga kalihokan. Kon mao, mahimo nimong ipahiangay ang mga kalihokan aron malakip kadto nga mga kamatuoran.

Ipasabot ang katuyoan sa sakramento

Hatagi ang mga estudyante og kahigayonan sa pagpasabot sa katuyoan sa sakramento. Aron maandam sila, mahimo nimo silang dapiton sa pagrebyo sa unsay ilang nakat-onan mahitungod sa sakramento diha sa Doktrina ug mga Pakigsaad (tan-awa sa Doktrina ug mga Pakigsaad 20:75–79; 27:1–2). Mahimo usab nila nga i-rebyo ang mubo nga mga sulat nga mahimong ilang narekord diha sa ilang mga journal sa pagtuon.

Mahimo nimong ipaila ang usa ka senaryo sama sa mosunod ug hangyoa ang mga estudyante sa pagpasabot sa katuyoan sa sakramento gamit ang usa sa mosunod nga mga pamaagi sa pagtubag: pagdrama-drama, paghimo og infographic o presentasyon, o pagsulat diha sa journal.

Gidapit ni Isaac ang usa ka higala sa pag-uban kaniya sa simbahan inig ka Dominggo. Tungod kay ang iyang higala wala pa sukad makatambong og miting sa sakramento, gusto ni Isaac nga ipasabot ang pipila ka importante nga mga detalye sa dili pa ang kana nga adlaw.

• Unsa nga mga detalye sa imong hunahuna ang kinahanglan nga ipakigbahin ni Isaac mahitungod sa ordinansa sa sakramento?

Mahimo nimong ipakita ang mosunod nga mga pag-aghat aron matabangan ang mga estudyante sa pag-andam sa ilang mga hunahuna ug pagtugot kanila sa paghatag og pagpamatuod.

Pagpili og duha o tulo ka mga detalye mahitungod sa ordinansa sa sakramento nga mahimo nimong tutokan. Paggamit og usa o sobra sa usa ka mga kasulatan aron sa pagtabang kanimo sa pagpasabot ug sa pagpamatuod.

• Mga pag-ampo nga gihalad sa pagpanalangin sa pan ug tubig

• Unsa ang atong gisaad sa Langitnong Amahan

• Unsa ang gisaad sa Langitnong Amahan kanato

• Ang mga kinaiya nga atong gipakita sa higayon nga moambit sa sakramento

• Ang nakasentro nga pagtutok kang Jesukristo

• Ang imong personal nga mga kasinatian

Human motubag ang mga estudyante sa senaryo, mahimo nimo silang dapiton sa pagpamalandong ug sa pagpakigbahin kon sa unsang paagi ang ordinansa sa sakramento makatabang kanila nga makita kon giunsa nila pagkahimong mas sama ni Jesukristo.

Pagbati og dugang nga tinguha sa pagsunod sa buhi nga propeta

Sa bag-ohay lang nga mga leksiyon, tingali ang mga estudyante nakabaton og mga kahigayonan sa pagtuon sa kamahinungdanon sa pagsunod sa propeta sa atong panahon. Kini nga kalihokan sa pagkat-on maghatag og kahigayonan sa mga estudyante sa pagpamalandong kon sa unsang paagi naapektohan ang ilang tinguha sa pagsunod sa buhing propeta atol sa ilang pagtuon sa Doktrina ug mga Pakigsaad.

Mahimo nimong pahinumdoman ang mga estudyante sa mosunod nga pagsukod sa kaugalingon diha sa miaging leksiyon (tan-awa ang leksiyon sa Doktrina ug mga Pakigsaad 21).

Sa nakalabay nga leksiyon, gidapit ka sa paghunahuna mahitungod sa tambag gikan sa mga propeta ug apostoles nga mahimong mahagiton alang kanimo nga sundon. Sulayi ug hinumdomi kon unsa kadto. Mahimo nimong tan-awon sa imong journal sa pagtuon aron makita kon unsa ang imong narekord.

Hatagi ang mga estudyante og pipila ka minuto sa pagtan-aw diha sa ilang journal sa pagtuon kon nakahimo ba sila og mubo nga mga sulat dinhi niini.

• Unsa ang pipila ka mga kasulatan nga atong bag-ohay lang nga natun-an nga naghatag og gibug-aton sa kamahinungdanon sa pagsunod sa propeta?

  Ang pipila sa mga kasulatan nga mahimong hisgotan sa mga estudyante tingali maglakip sa Joseph Smith—Kasaysayan 1:21–35; Doktrina ug mga Pakigsaad 1:38–39; 21:4–6. Hatagi ang mga estudyante og kahigayonan sa pagpakigbahin sa unsay ilang nakaplagan. Ang pagtugot sa mga estudyante sa pagbuhat niini diha sa ginagmay nga mga grupo makapahimong posible sa daghang mga estudyante sa pagpakigbahin kon unsa ang mahinungdanon ngadto kanila.

  Ikonsiderar ang pagdapit sa mga estudyante sa pagrekord sa ilang mga tubag sa usa o daghan pa sa mosunod nga mga pangutana. Tugoti ang mga estudyante sa pagpili sa ilang kaugalingong mga paagi ug mga metodo sa pagrekord niini nga mga pagbati. Human sa igong panahon, dapita ang pipila ka mga estudyante nga buot mopakigbahin sa ilang mga hunahuna. Bisan og ang mga kasamtangan nga pagbati sa mga estudyante mahitungod sa pagsunod sa propeta tingali dili positibo, mahimo nimo silang dasigon sa pagbuhat bisan sa ilang labing gamay nga mga tinguha ug pangayoa ang panalangin sa Ginoo pinaagi sa pagsunod sa Iyang mga propeta.

• Unsa ang imong kasamtangan nga gibati mahitungod sa pagsunod sa pinili nga propeta sa Ginoo? Unsa sa imong hunahuna ang labing nakaapekto sa imong mga pagbati mahitungod sa pagsunod sa mga propeta sa Ginoo?

• Sa unsang paagiha sa imong hunahuna nga ang pagsunod sa propeta makatabang kanimo nga mahimong mas mahisama ni Jesukristo?

Pagpakigbahin sa ebanghelyo ni Jesukristo ngadto sa uban

Tabangi ang mga estudyante sa paghunahuna mahitungod sa unsay ilang nakat-onan gikan sa ilang pagtuon sa Doktrina ug mga Pakigsaad mahitungod sa pagpakigbahin sa ebanghelyo ni Jesukristo. Mahimo nimong dapiton ang mga estudyante sa pagtan-aw sa piho nga mga seksiyon o mga bersikulo nga ilang gitutokan sa dihang sila nagtuon. Kini mahimong maglakip sa Doktrina ug mga Pakigsaad 18 ug sa mga seksiyon 30–36.

Dihay kahigayonan ang mga estudyante sa paghimo og plano sa pagpakigbahin sa ebanghelyo ngadto sa usa ka tawo sa dihang sila nagtuon sa “Doktrina ug mga Pakigsaad 30–36, Bahin 2.” Ikonsiderar ang pag-follow up niini nga plano pinaagi sa pagpangutana sama sa mosunod (mahimo usab nga hisgotan sa mga estudyante kini nga mga pangutana diha sa gagmay nga mga grupo):

• Unsa ang imong bag-ohay lang nga nahimo aron ipakigbahin ang ebanghelyo ngadto sa usa ka tawo? Paminaw nimo, kumusta man kadto?

• Unsa nga mga babag ang imong giatubang samtang naningkamot ka sa pagpakigbahin sa ebanghelyo ni Jesukristo sa natural ug normal nga mga paagi?

• Unsa ang imong nakat-onan mahitungod sa pagpakigbahin sa ebanghelyo ni Jesukristo?

Hisgoti isip usa ka klase ang imong mga paningkamot sa pagpakigbahin sa ebanghelyo sa Manluluwas. Mahimong hisgotan sa mga estudyante ang mga butang nga maayong nahitabo o kalisod nga ilang nasinati. Kini nga panaghisgotan makahatag og kahigayonan sa mga estudyante sa pagtabang sa usag usa sa pagpakigbahin sa ebanghelyo ni Jesukristo. Mahimo usab nimong tabangan ang mga estudyante sa pagkonsiderar kon sa unsang paagi sila milambo samtang sila naningkamot sa pagpakigsulti sa uban mahitungod sa Manluluwas ug sa Iyang ebanghelyo.