Leksiyon 65: Doktrina ug mga Pakigsaad 49–50

Doktrina ug mga Pakigsaad 50, Bahin 1

Paglikay sa Panglimbong

Sa ilang kaikag nga makasinati og espirituhanong mga gasa, ang pipila ka unang mga kinabig sa Kirtland, Ohio, nalimbongan sa paghunahuna nga ang pipila ka talagsaong mga pagpakita gikan sa Espiritu Santo bisan kon dili. Ang Ginoo mitanyag og giya aron sa pagtabang kanila sa pag-ila kon unsa ang gikan Kaniya ug unsa ang dili. Kini nga leksiyon gituyo aron matabangan ang mga estudyante nga makasabot kon sa unsang paagi ang Ginoo makatabang kanila sa pag-ila sa kamatuoran ug sa paglikay sa pagpanglimbong.

Mga Posibleng Kalihokan sa Pagkat-on

Ang Iring nga Dunay Badlis

Ikonsiderar ang pagpakigbahin sa mosunod nga istorya. Mahimo nimong ipakita ang usa ka litrato sa usa ka skunk samtang imo kining gibuhat.

Si Elder Gary E. Stevenson sa Korum sa Napulog Duha ka Apostoles mipakigbahin sa mosunod sugilanon:

[Ang akong] Apohan sa Tuhod nga Uyoan nga si Grover … nagpuyo sa layo, sa usa ka balay nga gawas sa lalawigan, layo sa siyudad. Si Tiyo Grover nagkatigulang nag maayo. Naghunahuna mi nga ang among mga anak nga lalaki makahimamat niya sa dili pa siya mamatay. Maong, usa ka hapon, mibiyahe mi og layo ngadto sa iyang kasarangan nga balay. Nanglingkod ming tanan aron mag-istorya ug mipaila kaniya ngadto sa among mga anak nga lalaki. Sa wala madugay sa panagsultihanay, ang among duha ka gagmay nga batang lalaki, tingali mga singko ug sais anyos, gusto nga moadto sa gawas ug magdula.

Si Tiyo Grover, nakadungog sa hangyo, mipaduol sa iyang nawong ngadto sa ilaha. … Miingon siya ngadto kanila, sa seryoso nga tingog, “Pagbantay—adunay daghang skunk sa gawas.” Pagkadungog niini, si Lesa ug ako nakuratan; nabalaka mi nga sila mapasiritan sa skunk! Sa wala madugay ang mga batang lalaki migawas aron magdula samtang nagpadayon mi sa panag-istorya.

Dayon, sa dihang nanakay na mi sa sakyanan aron mopauli, nangutana ko sa mga bata, “Nakakita ba mo og skunk?” Usa nila mitubag, “Wala, wala mi nakit-an nga skunk, apan nakakita mi og itom nga iring nga dunay badlis nga puti sa iyang luyo!” (Gary E. Stevenson, “Ayaw Paglingla Kanako,” Liahona, Nob. 2019, 93)

• Ngano sa imong hunahuna nga ang mga bata wala makaila sa skunk?

• Unsa ang peligro sa dili pagka-ila sa tinuod nga kinaiya sa usa ka butang?

• Sa unsang paagi kini nga sugilanon may koneksiyon sa gusto ni Satanas nga atong tuohan mahitungod kaniya?

  Ikonsiderar ang pagdapit sa mga estudyante sa pagpakigtinabangay uban sa usa ka pares sa pagsulat og kahulogan alang sa pulong nga panglimbong. Human nga makabaton sila og igong panahon, mahimo nimong hangyoon ang pipila kanila sa pagpakigbahin sa ilang mga kahulogan diha sa klase. Kon makatabang, ikonsiderar ang pagpakigbahin sa kahulugan nga makita diha sa Giya ngadto sa mga Kasulatan: “Diha sa mga kasulatan, ang paglimbong mao ang paghimo sa usa ka tawo nga motuo sa usa ka butang nga dili tinuod” (Giya ngadto sa mga Kasulatan, “Gilimbongan, Limbong, Paglimbong,” scriptures.ChurchofJesusChrist.org).

  Mahimong ilista ang mga tubag sa mga estudyante diha sa pisara sa mosunod nga mga pangutana.

• Unsa ang pipila ka mga paagi nga si Satanas mosulay sa paglingla sa mga tin-edyer karon?

• Ngano kaha nga ang mga pagpanglimbong ni Satanas mosalir og maayo usahay?

Dapita ang mga estudyante nga magtinguha og inspirasyon gikan sa Espiritu Santo aron matabangan sila nga maila ug malikayan ang panglimbong.

Panglimbong tali sa nag-unang mga Santos

Sa dihang miabot si Propeta Joseph Smith sa Kirtland, Ohio, sa sayong bahin sa Pebrero 1831, nakaobserbar siya nga “pipila ka kahibudngan nga mga ideya ug mini nga mga espiritu ang hinay-hinay nga gisunod” sa mga Santos (sa History, 1838–1856 [Manuscript History of the Church], vol. A-1, 93, josephsmithpapers.org).

Si John Whitmer mitala sa mosunod mahitungod niini nga yugto sa panahon.

Ang uban dunay mga panan-awon ug dili makasulti kon unsay ilang nakita, ang uban naghunahuna sa ilang kaugalingon nga kunohay anaa kanila ang espada ni Laban, ug mowara-wara niini [sama sa usa ka sundalo nga nagsakay sa kabayo], ang uban molihok sama sa usa ka Indian nga nag-aksyon nga nagpanit sa ulo sa usa ka tawo, ang uban mopadailos o mopasaguyod … [diha] sa salog, nga sama kapaspas sa bitin. … Sa ingon ang yawa mibuta sa mga mata sa pipila ka maayo ug matinud-anon nga mga disipulo. (John Whitmer, History, 1831–circa 1847, 26, josephsmithpapers.org)

Ang mga kabalaka mahitungod niini nga mga aksiyon nagtukmod ni Joseph Smith sa pagpangutana sa Ginoo ug pagdawat sa Doktrina ug mga Pakigsaad 50. Sa mga bersikulo 1–9, ang Ginoo mipasidaan sa mga anciano sa Simbahan mahitungod sa mini nga mga espiritu ug gani sa mga miyembro kinsa naglimbong sa uban.

Basaha ang Doktrina ug mga Pakigsaad 50:1–3, mangita sa usa sa mga pasidaan sa Ginoo.

• Ngano kaha sa imong hunahuna nga mogamit si Satanas og panglimbong sa pagpahilayo kanato gikan ni Jesukristo?

Tabangi ang mga estudyante nga makasabot nga bisan og si Satanas maalamon kaayo sa pagpanglimbong, si Jesukristo mahigugmaong mitanyag og tambag diha sa mga bersikulo 10–35 aron matabangan ang Iyang mga sumusunod nga makaila sa kamatuoran ug makalikay sa panglimbong.

Mahimong ipakita o isulat diha sa pisara ang mosunod nga dili kompleto nga gipabaga nga pamahayag. Mahimo nimong organisahon ang mga estudyante ngadto sa gagmay nga mga grupo ug hatagan ang matag grupo og usa sa mosunod nga mga hut-ong sa kasulatan. Mahimo dayong mangandam ang mga estudyante sa pagpakigbahin sa unsay ilang nakat-onan gikan sa mosunod nga kalihokan.

Basaha ang mosunod nga mga bersikulo, mangita kon unsaon nimo pagkompleto ang mosunod nga kamatuoran: Ang Ginoo motabang kanato nga malikayan ang pagpanglimbong samtang kita …

• Doktrina ug mga Pakigsaad 50:17–22

• Doktrina ug mga Pakigsaad 50:23–25

• Doktrina ug mga Pakigsaad 50:31, 34–35

Human sa igo nga panahon, dapita ang mga estudyante sa paglista sa ilang mga nakaplagan ubos sa dili kompleto nga hugpong sa mga pulong diha sa pisara. Ang mga tubag mahimong maglakip sa mosunod: … magtinguha sa pagtudlo ug pagkat-on pinaagi sa Espiritu sa Kamatuoran, … magtinguha sa pagdawat sa Iyang kahayag, … mag-ampo aron masayod kon ang usa ka espiritu gikan ba o dili gikan sa Dios. Sa dili pa hisgotan ang mosunod nga mga pangutana isip usa ka klase, mahimong makatabang alang sa mga estudyante ang pagtubag niini diha sa ilang mga journal sa pagtuon. Ang pagsulat una sa ilang mga hunahuna makatabang sa mga estudyante nga mobati nga mas masaligon ug andam nga mopakigbahin. Mahimong adunay dugang nga mga pangutana ang mga estudyante mahitungod niini nga mga kamatuoran. Paggahin ug panahon sa pagsusi sa ilang mga pangutana. Mahimong makahatag ang ilang mga klasmeyt og bililhong mga panabot dugang sa unsay imong mapakigbahin.

Aron matabangan ang mga estudyante sa pag-ako sa responsibilidad alang sa ilang pagkat-on, tan-awa ang pagbansay nga giulohan nga “Sukli ang hilig sa pagtubag sa matag komentaryo ug pangutana ug dapita ang klase sa pagtubag.” Kini makita sa Pagpalambo sa mga Kahanas sa Magtutudlo: Dapita ang Makugihon nga Pagkat-on.

• Unsa man ang buot ipasabot niini nga pagtulun-an?

• Sa unsang paagi kini nga pagtulun-an makatabang kanimo nga makadawat og tabang sa Ginoo aron malikayan ang mga pagpanglimbong ni Satanas?

Samtang imong hisgotan ang miaging pangutana, mahimong makatabang ang pagdirekta sa mga estudyante ngadto sa lista diha sa pisara sa mga paagi nga si Satanas misulay sa paglimbong sa mga tin-edyer. Mahimong mamatikdan sa mga estudyante kon sa unsang paagi nga ang pagtulun-an sa Manluluwas nga ilang gipili makatabang kanila sa pagtubag sa usa o labaw pa sa mga pagpanglimbong nga nalista.

Usa ka klaro nga paagi sa paglikay sa panglimbong

Ang Ginoo mitapos uban sa usa ka mahigugmaong pasalig nga tungod Kaniya, dili kita kinahanglan nga mahadlok. Basaha ang Doktrina ug mga Pakigsaad 50:40–44, mangita sa unsay imong nakat-onan mahitungod sa Manluluwas.

• Unsa may mipatigbabaw kanimo gikan niini nga mga bersikulo mahitungod sa Manluluwas?

• Sa unsang paagi nga ang pagkahibalo niini mahitungod Kaniya makatabang kanato sa usa ka kalibotan nga puno sa pagpanglimbong?

• Giunsa nimo sa pagkahibalo o pagtuo niini nga mga kamatuoran mahitungod ni Jesukristo?

Gitudlo ni Presidente Russell M. Nelson ang mosunod mahitungod sa unsa nga paagi nga kita makadapit sa tabang sa Ginoo aron malikayan ang pagpanglimbong:

Ang kalibotanon nga mga impluwensiya ug mga pag-aghat miasdang ug daghan kaayo. Apan daghan kaayo sa mga impluwensiya ang malinglahon, matintalon, ug makapalayo kanato sa dalan sa pakigsaad. Aron malikayan ang dili kapugngan nga kasakit nga mosunod, ako mohangyo kaninyo karon nga suklan ang kalibotanong pagtintal pinaagi sa paggahin og panahon alang sa Ginoo diha sa inyong kinabuhi—matag adlaw.

Kon ang kadaghanan sa impormasyon nga inyong madawat gikan sa social o ubang media, ang inyong abilidad sa pagkadungog sa mga paghunghong sa Espiritu mag-anam og kawala. Kon kamo wala magtinguha sa Ginoo pinaagi sa inadlaw-adlaw nga pag-ampo ug pagtuon sa ebanghelyo, inyong gitugotan ang inyong kaugalingon nga madutlan sa mga pilosopiya nga tingali makapadani apan dili tinuod. Bisan ang matinud-anon nga mga Santos mahimong maligas tungod sa kanunay nga pagtugtog sa banda sa Babelonia.

Akong mga kaigsoonan, ako mohangyo kaninyo sa paggahin og panahon alang sa Ginoo! Himoang lig-on ang inyong kaugalingong espirituwal nga pundasyon ug makasugakod sa pagsulay sa taas nga panahon pinaagi sa pagbuhat niadtong mga butang nga magtugot sa Espiritu Santo nga magauban kaninyo kanunay. (Russell M. Nelson, “Paggahin og Panahon alang sa Ginoo,” Liahona, Nob. 2021, 120)

• Unsa ang dugang nga mga panabot ang imong nakaplagan nga makatabang kanimo nga malikayan ang pagpanglimbong?

Ikonsiderar ang paghatag sa mga estudyante og panahon sa pagpakigbahin og butang nga ilang nakat-onan o gibati nga nadasig nga buhaton aron malikayan ang pagpanglimbong. Dapita sila sa pagpadayon sa pagpangita og mga paagi sa pag-ila sa balaang kamatuoran ug sa paglikay sa pagpanglimbong. Mahimo nimong ipakigbahin ang imong pagsalig sa tinguha ug abilidad sa Ginoo sa pagtabang sa mga estudyante nga mabuhat kini.

Dugang nga mga Kapanguhaan

Nganong kinahanglan man kitang mag-amping sa panglimbong ni Satanas?

Si Elder Gary E. Stevenson sa Korum sa Napulog Duha ka Apostoles mitudlo:

Si Satanas, ang amahan sa mga bakak ug ang bantogang tiglingla, moimpluwensya kanato sa pagkwestyon sa mga butang kon unsa gayod kini ug mopabaliwala sa mahangtorong mga kamatuoran o mousab niini ngadto sa butang nga mas makapahimuot. “Siya nagpasiugda og gubat batok sa mga santos sa Dios” [Doktrina ug mga Pakigsaad 76:29] ug migahin og milenyum sa pagplano ug pagbansay sa abilidad sa pagdani sa mga anak sa Dios nga motuo nga ang maayo dautan ug ang dautan maayo. (Gary E. Stevenson, “Ayaw Paglingla Kanako,” Liahona, Nob. 2019, 94)

Si Elder David A. Bednar sa Korum sa Napulog Duha ka Apostoles miingon:

Ang peligrosong mga ideya ug mga buhat sa espirituhanong paagi sa kanunay mahimong daw makabibihag, madanihon, o makalingaw. Mao nga, sa atong kontemporaryong kalibotan, matag usa kanato kinahanglan nga magbantay sa makailad nga daotan nga nagpakaaron-ingnong maayo. …

Si Satanas “mao ang kaaway sa pagkamatarong ug niadto kinsa nagtinguha sa pagbuhat sa kabubut-on sa Dios” [Giya ngadto sa mga Kasulatan, “Yawa,” scriptures.ChurchofJesusChrist.org]. Tibuok adlaw, kada adlaw, ang iya lang nga tumong ug bugtong tumong mao ang paghimo sa anak nga mga lalaki ug mga babaye sa Dios nga mauyamot sama ngadto kaniya.

Ang plano sa Amahan sa kalipay gidesinyo sa paggiya sa Iyang mga anak, sa pagtabang nila nga makasinati og malungtaron nga kalipay, ug sa pagpabalik nila nga luwas ngadto Kaniya uban sa nabanhaw, nahimayang mga lawas. Nagtrabaho ang yawa aron sa paghimo sa anak nga mga lalaki ug mga babaye sa Ginoo nga maglibog ug magmagul-anon ug sa pagpugong sa ilang mahangtorong pag-uswag. Walay hunong sa pagtrabaho ang kaaway aron sa pag-atake sa mga elemento sa plano sa Amahan nga iyang gikasilagan. (David A. Bednar, “Magmabinantayon ngadto sa Pag-ampo Kanunay,” Liahona, Nob. 2019, 33–34)

Unsa ang atong mahimo aron sa pagpanalipod sa atong mga kaugalingon gikan sa panglimbong?

Si Elder Gary E. Stevenson sa Korum sa Napulog Duha ka Apostoles mitudlo:

Ang pagkamasulundon sa mga sugo nga gihatag ngadto sa atong propeta mao ang mahinungdanon dili lamang sa paglikay sa impluwensiya sa tiglingla apan sa pagsinati usab sa mahangtorong kalipay. Kining balaan nga pormula yano ra: pagkamatarong, o pagkamasulundon sa mga sugo, makahatag sa mga panalangin, ug ang mga panalangin makahatag og kalipay o hingpit nga kalipay sa atong kinabuhi. (Gary E. Stevenson, “Ayaw Paglingla Kanako,” Liahona, Nob. 2019, 95)

Si Presidente Russell M. Nelson mipahayag:

Ako mousab sa akong hangyo alang ninyo nga inyong buhaton bisan unsa ang makapadugang sa inyong espirituhanong kapasidad sa pagdawat og personal nga pagpadayag.

Ang pagbuhat sa ingon makatabang ninyo unsaon sa pagpadayon sa inyong kinabuhi, unsay buhaton sa panahon sa krisis, ug unsaon sa pag-ila ug paglikay sa mga tintasyon ug mga pagpanglimbong sa kaaway. (Russell M. Nelson, “Paminaw Kaniya,” Liahona, Mayo 2020, 90)

Si Presidente Henry B. Eyring mitudlo:

Ang pakig-uban sa Espiritu Santo naghimo sa maayo nga mas madanihon ug makapaminus sa kusog nga tintasyon. Kini igo na nga rason aron maningkamot kita nga mahimong takos aron ang Espiritu magauban kanato sa kanunay.

Sama nga ang Espiritu [Santo] naglig-on kanato batok sa dautan, Siya usab naghatag nato sa gahom sa pag-ila tali sa kamatuoran gikan sa mga bakak. Ang kamatuoran nga labing importante mapamatud-an lamang pinaagi sa pagpadayag gikan sa Dios. Ang atong tawhanong pangatarongan ug ang paggamit sa atong pisikal nga pamalatian [senses] dili gayod igo. Kita nagpuyo sa panahon nga bisan ang makinaadmanon maglisod sa pag-ila sa kamatuoran gikan sa inantigo nga pagpanglingla. (Henry B. Eyring, “Ang Espiritu Santo isip Inyong Kauban,” Liahona, Nob. 2015, 104-105)

Ngano nga ang pipila sa mga Santos sa Kirtland niining panahona dali ra kaayo nga nalingla?

Samtang ang bag-ong mga Santos mitipon sa Simbahan sa Kirtland, sila mahinamon nga makasinati sa mga gasa sa Espiritu sama sa gihulagway diha sa Bag-ong Tugon. Ang uban mipaila og kahibudngan, kusog, ug makapalibog nga mga kalihokan ngadto sa ilang mga tulumanon sa pagsimba. Kini nga mga kalihokan nakapaukyab sa mga emosyon sa mga tawo, apan wala kini makapalig-on. Ang mga Santos mga linghod sa ilang pagsabot sa mga pagpakita sa Espiritu. Naghisgot sa mini nga mga espiritu, si Propeta Joseph Smith miingon: “Uban sa gamay nga pagmatngon, ug pipila ka kaalam, ako dayong gitabangan ang mga kaigsoonan sa pagbuntog niini. … Ang mini nga mga espiritu dali nga namatikdan ug nasalikway pinaagi sa kahayag sa pagpadayag” (sa History, 1838–1856 [Manuscript History of the Church], vol. A-1, 93, josephsmithpapers.org).

Dugang nga mga Kalihokan sa Pagkat-on

Lain nga paagi sa pagsugod sa leksiyon

Mahimo kang magdala og duha ka itlog sa klase, ang usa wala pa naluto ug ang usa linung-ag. Ipasabot ngadto sa mga estudyante nga ang wala pa maluto nga itlog nagrepresentar sa kamatuoran ug ang linung-ag nga itlog nagrepresentar sa pagpangilad. Pangutan-a ang mga estudyante kon nahibalo ba sila kon unsa kini pinaagi lang sa pagtan-aw kanila. Kini nagrepresentar sa unsa nga paagi nga usahay kini mahimong lisod nga sa pagsulti sa kalainan tali sa kamatuoran ug kasaypanan. Ipakita sa mga estudyante nga adunay usa ka paagi aron mahibaloan kong unsang itlog ang dili luto ug hain ang giluto. Kon imong patuyokon ang mga itlog sa ilang mga kilid, ang dili luto nga itlog magtuyok ra sa usa o duha ka segundo. Ang linung-ag nga itlog, sa laing bahin, magtuyok sulod sa pipila ka segundo. Sa susama, gipanalanginan kita sa pagsabot kon unsaon pagtino kon unsa ang tinuod ug unsa ang dili tinuod. (Tan-awa sa David Dickson, “Linung-ag nga Itlog nga Pagpangilad,” Alang sa Kalig-on sa mga Kabatan-onan, Okt. 2022, 24–25.)

Doktrina ug mga Pakigsaad 50:22–23. “Kana nga dili makahatag og kaayohan [edify] dili gikan sa Dios”

Aron matabangan ang mga estudyante nga makasabot unsay buot ipasabot sa paglig-on, ikonsiderar ang pagpahunahuna kanila sa pulong nga, edipisyo, o bilding. Tabangi ang mga estudyante nga makasabot nga ang pagpalig-on nagpasabot nga mabayaw o matukod. Makatabang usab ang pagsabot sa usa ka pulong pinaagi sa pagkahibalo kon unsay wala ipasabot niini. Sama pananglit, mahimo nimong ilista diha sa pisara ang mga pulong nga makapataas,, makapalig-on, ug makapauswag isagol sa ubang mga paagi nga ang mga tawo mosulay sa pag-impluwensiya, sama sa impresyon, kakurat, ug pagmaniobra. Mahimo dayon nimong ipapili sa mga estudyante ang mga pulong nga ilang gihunahuna nga nagtumong sa pagpalig-on. Tabangi ang mga estudyante nga makasabot nga ang mga pagtulun-an sa Manluluwas makapalig-on, samtang ang mga komunikasyon ni Satanas dili.

Doktrina ug mga Pakigsaad 50:24. “Kana nga gikan sa Dios mao ang kahayag”

Aron matabangan ang mga estudyante nga mas makasabot sa kahayag nga gigamit diha sa Doktrina ug mga Pakigsaad 50:24, mahimo nimong i-direkta sila ngadto sa Moroni 7:12–15 o 1 Juan 1:5. Ikonsiderar ang pagdapit sa mga estudyante sa pagbadlis og usa ka linya gikan sa tunga sa usa ka piraso nga papel. Ipapangalan kanila ang usa ka kilid “Kana nga nagdala og kahayag” ug ang pikas nga kilid “Kana nga nagakuha sa kahayag.” Mahimong mogahin ang mga estudyante og pipila ka panahon sa pagdugang og pipila ka mga butang sa matag lista.