Leksyon 140: Doktrina ug mga Pakigsaad 129–132

Doktrina ug mga Pakigsaad 131

Ang Bag-o ug Walay Kataposang Pakigsaad sa Kaminyoon

Ang kaminyoon tali sa lalaki ug babaye usa ka mahinugdanong bahin sa plano Langitnong Amahan para sa Iyang mga anak. Pinaagi ni Propeta Joseph Smith, gipadayag sa Ginoo nga dihang maselyohan ang mga bana ug mga asawa pinaagi sa gahom sa pagkapari ug magmatinud-anon sa ilang mga pakigsaad, ang ilang kaminyoon motunhay lapas sa kamatayon. Kini nga leksiyon makatabang sa mga estudyante nga masabtan ang kaimportante sa mahangtorong kaminyoon diha sa plano sa Langitnong Amahan.

Posibleng mga Kalihokan sa Pagkat-on

Pagsabot sa kaminyoon

Ikonsiderar ang pagsulat sa mosunod nga pamahayag sa pisara ug sa pagdapit sa mga estudyante nga hisgotan ang ilang mga hunahuna bahin sa kon unsa ang ginatudlo niini. Pananglitan, pwede nimong bahinon sa gagmayng mga grupo ang mga estudyante ug hisgotan ang mosunod nga mga pangutana.

Si Elder David A. Bednar sa Korum sa Napulog Duha ka Apostoles mipahayag:

Usa sa dakong mga buluhaton sa atong panahon … mao ang pagtabang sa mga tawo nga makasabot sa tinuod nga kahulogan ug katuyoan sa kaminyoon. (David A. Bednar, “The Divine Pattern of Eternal Marriage,” Ensign, Sep. 2020, 41)

• Unsay pagsabot nimo sa “ang tinuod nga kahulogan ug katuyoan sa kaminyoon”?

• Unsa ang pipila sa mga ehemplo sa mga dili eksakto nga pagsabot sa mga tawo bahin sa kaminyoon karon?

Mahimong ipakigbahin sa mga estudyante ang mga dili eksaktong pagsabot sa mga tawo nga sama sa mas gusto sa mga tawo nga dili magminyo o nga ang kaminyoon dili kinahanglang tali sa lalaki ug babaye.

Dapita ang mga estudyante nga maghimog ulohan sa ilang mga journal sa pagtuon nga nag-ulohang Nganong importante para sa Dios ang kaminyoon? Dapita sila nga isulat kon unsaon nila pagtubag ang maong pangutana. Pwede usab silang dapiton nga pamalandongan ang ilang personal nga gibati o pangutana bahin sa kaminyoon.

Dasiga silang magbutang og mga tubag diha sa ilang mga journal sa pagtuon panahon sa tibuok leksiyon. Pamatud-i nga samtang mapainubsanon silang naningkamot nga masabtan kon nganong importante sa Dios ang kaminyoon, mahimong palig-onon sa Espiritu Santo ang ilang pamatuod sa kaminyoon ug tabangan silang tubagon ang mga ilang pangutana o gikabalak-an.

Mahangtoron nga kaminyoon

Ikonsiderar ang pagpakigbahin o pag-summarize sa mosunod nga parapo aron tabangan ang mga estudyante nga masabtan ang konteksto para sa mga pagtulun-an sa Doktrina ug mga Pakigsaad 131:

Sa Mayo 1843, samtang naa sa Ramus, Illinois, giingnan ni Joseph Smith si Benjamin ug Melissa Johnson nga gusto niya silang ipakasal base sa balaod sa Ginoo. Kay minyo na man sila, nangomedya si Benjamin nga magpakasal lang siyag usab kang Melissa kon panguyaban siya niini. Pero seryoso si Joseph. Gitudloan sila sa Propeta sa doktrina sa mahangtoron nga kaminyoon, dayon miselyo sa magtiayon alang sa kahangtoran. Si William Clayton nagserbisyo isip tigsulat ni Joseph niadto nga panahon ug girekord ang iyang mga pagtulun-an, nga makita karon sa Doktrina ug mga Pakigsaad 131 (tan-awa sa “Our Hearts Rejoiced to Hear Him Speak,” sa Revelations in Context [2016], 279–280).

Sa dili pa nimo dapiton ang mga estudyante nga basahon ang mosunod nga mga bersikulo, makatabang tingali nila ang pagkahibalo nga ang kinatas-ang ang-ang sa celestial nga gingharian sagad gitumong isip ang kinabuhing dayon o kahimayaan. Kadtong mga nahimaya magkinabuhi hangtod sa hangtod uban sa Langitnong Amahan ug ni Jesukristo ug mahimong sama Nila. “Ang bag-o ug walay kataposang pakigsaad sa kaminyoon” nagtumong sa mga pakigsaad nga himoon sa mga magtiayon diha sa templo aron sila mahimong maselyo karon ug alang sa tanang kahangtoran.

Basaha ang Doktrina ug mga Pakigsaad 131:1–4, nga mangita kon unsay gitudlo sa Propeta bahin sa kaminyoon.

Ang Doktrina ug mga Pakigsaad 131:1–4 maoy usa ka tudling sa doktrinal nga kahanas. Ikonsiderar ang pagdapit sa mga estudyante sa pagmarka sa mga tudling sa doktrinal nga kahanas aron dali ra nila kining makita.

• Unsay gitudlo kanimo niini nga mga bersikulo bahin sa kaimportante sa kaminyoon diha sa plano sa Langitnong Amahan?

  Isulat ang kamatuoran nga sama sa mosunod diha sa pisara gamit ang mga pulong sa estudyante, kon posible: Aron mahimong sama sa Dios ug magkinabuhi uban Niya pag-usab diha sa celestial nga gingharian, kinahanglan kitang mosulod sa bag-o ug walay kataposang pakigsaad sa kaminyoon. Dapita ang mga estudyante nga idugang kini nga kamatuoran diha sa lista sa ilang mga tubag diha sa ilang journal sa pagtuon.

• Sa imong hunahuna, sa unsang paagi kita giandam sa kaminyoon aron mas mahisama sa Dios?

Ang kaimportante sa kaminyoon diha sa plano sa Dios

Dapita ang mga estudyante sa pagpadayon sa pagkat-on bahin sa kaimportante sa kaminyoon diha sa plano sa Dios. Pwede nilang buhaton ang mosunod nga kalihokan isip indibidwal o uban sa gamayng mga grupo. Kon gikinahanglan, ikonsiderar ang pag-printa og mga pakigpulong gikan sa mga lider sa Simbahan nga pwedeng tun-an sa mga estudyante. Dapita ang mga estudyante sa pagrekord sa ilang nakat-onan diha sa ilang mga journal sa pagtuon.

Isip bahin niini nga kalihokan, pwede usab nimong ipasalida ang bidyo nga “Eternal Marriage, an Apostolic Perspective” (5:26), nga anaa sa Inspiration nga blog sa ChurchofJesusChrist.org.

Pagpili og usa o kapin pa sa mosunod nga mga sugyot aron makita ang dugang mga tubag sa pangutana nga “Nganong importante sa Dios kaminyoon?” Idugang ang mga kamatuoran nga imong nakat-onan diha sa listahan sa mga tubag sa imong journal sa pagtuon.

1. Susiha ang mga kasulatan. Tun-i ang Doktrina ug mga Pakigsaad 49:15–17; 132:19. Pangita og dugang mga tudling nga tun-an pinaagi sa pagtan-aw sa “marriage” sa Topical Guide o “kaminyoon” sa Giya ngadto sa mga Kasulatan.

2. Tun-i ang mga pagtulun-an sa mga lider sa Simbahan. Pangitaa ang “kaminyoon” diha sa Librarya sa Ebanghelyo nga app o sa mga seksiyon sa hilisgotan sa giarkibo nga mga pakigpulong sa kinatibuk-ang mga komperensiya.

3. Padal-i og text ang usa ka sakop sa pamilya o kasaligang hamtong nga mangutana kon unsay ilang tubag sa pangutana nga “Nganong importante sa Dios ang kaminyoon?”

Dihang mahuman og tuon ang mga estudyante, dapita silang isulat sa matag usa diha sa pisara ang mga kamatuoran nga ilang nakat-onan mahitungod kon nganong importante sa Dios ang kaminyoon. Pwede usab nilang iapil ang mga kapanguhaan nga ilang gigamit aron sa pagpangita sa maong kamatuoran. Dapita ang klase nga tan-awon kon unsay gisulat sa ilang mga klasmeyt ug ilhon ang mga kamatuoran nga pwede nilang idugang sa ilang mga journal sa pagtuon. Ikonsiderar ang paghisgot kon unsay nakat-onan sa mga estudyante pinaagi sa pagpangutana sa mosunod:

• Unsay imong nakat-onan nga bag-o para nimo?

• Sa unsang paagi nakatabang nimo kini nga mga pagtulun-an dihang makadungog ka og mga ideya sa kalibotan nga sukwahi sa balaod sa Dios bahin sa kaminyoon?

• Sa unsang paagi ang pagtan-aw sa kaminyoon base sa panglantaw sa Dios makaimpluwensiya sa imong pagbati bahin sa kaminyoon?

Ipasabot ang doktrina sa kaminyoon

Kon para nimo makabenepisyo ang mga estudyante sa pag-summartize sa ilang nakat-onan, ikonsiderar ang pagparespares nila. Dapita sila sa pagtubag sa mosunod nga senaryo ug sa pagtubag sa mga pangutana uban sa ilang pares:

Handurawa nga gihisgotan nimo sa imong higala ang imong mga plano sa umaabot. Dihang miingon ka nga gusto kang maminyo, nangutana ang imong higala, “Importante ba gayod nang kaminyoon?”

• Unsaon nimo pagtubag sa imong higala gamit ang mga pagtulun-an nga imong gitun-an karon?

Dapita ang mga estudyante nga mangandam sa pagdawat sa mga panalangin sa mahangtorong kaminyoon. Pamatud-i nga samtang nagpakita sila og hugot nga pagtuo kang Jesukristo, masinati nila ang mga panalangin nga gitinguha Niyang ihatag kanila.

Pagsag-ulo

Mahimo nimong tabangan ang mga estudyante sa pagsag-ulo sa mga pakisayran sa doktrinal nga kahanas ug sa mahinungdanon nga hugpong sa mga pulong sa kasulatan atol niini nga leksiyon ug irebyo kini sa umaabot nga mga leksiyon. Ang mahinungdanong hugpong sa mga pulong sa kasulatan mao ang “Ang bag-o ug walay kataposan nga pakigsaad sa kaminyoon” Ang mga ideya alang sa mga kalihokan sa pagsag-ulo anaa sa mga materyal sa apendiks ubos sa “Mga Kalihokan sa Pagrebyo sa Doktrinal nga Kahanas.”

Dugang nga mga Kapanguhaan

Asa ko makakat-on og dugang bahin sa mahangtorong kaminyoon?

• “About Temple Sealings,” temples.ChurchofJesusChrist.org

• “The Divine Pattern of Eternal Marriage,” David A. Bednar, Ensign, Sept. 2020, 34–41

Kaminyoon lang ba ang apil sa bag-o ug walay kataposang pakigsaad?

Tan-awa ang Giya ngadto sa mga Kasulatan, “Bag-o ug Walay kataposan nga Pakigsaad,” scriptures.ChurchofJesusChrist.org.

Unsang mga panalangin ang atong madawat kon maminyo kita diha sa templo?

Si Presidente Russell M. Nelson mitudlo:

Kon mahimo pa lang nga makigsulti ko tinagsa-tagsa sa matag young adult, ako mangaliyupo gyod kaninyo sa pagpangita og kompanyon diin kamo maselyo didto sa templo. Tingali maghunahuna mo unsa nga kalainan ang mahimo niini sa inyong kinabuhi. Ako mosaad nga kini mohimo sa tanan nga kalainan! Kon kamo magminyo sa templo ug balik-balik nga moadto, kamo malig-on ug magiyahan sa inyong mga desisyon.

Kon ako mahimo nga makigsulti sa matag bana ug asawa kinsa wala pa maselyo sa templo, ako mangamuyo kaninyo sa paghimo sa gikinahanglan nga mga lakang aron modawat nianang labing mahinungdanon, makapausab sa kinabuhi nga mga ordinansa. Makahimo ba kana og kalainan? Kana kon gusto ninyo nga mouswag sa kahangtoran ug magkauban sa kahangtoran. Ang paghandom nga magkauban sa kahangtoran dili makapahimo niini. Walay laing seremonya o kontrata ang makahimo niini. (Russell M. Nelson, “Ang Templo ug ang Inyong Espirituwal nga Pundasyon,” Liahona, Nob. 2021, 95)

Sa unsang paagi makadawat og mga panalangin sa kinabuhing dayon ang mga wala pa maminyo?

Ang saad sa Dios sa kinabuhing dayon naglakip sa mahangtoron nga kaminyoon, mga anak, ug sa tanan pang mga panalangin sa usa ka mahangtorong pamilya. Kini nga saad alang usab niadtong kinsa dili minyo karon o walay pamilya diha sa Simbahan (tan-awa sa 38.1.4). Bisan og ang eksakto nga panahon ug paagi nga madawat ang mga panalangin sa kahimayaan wala mahibaloi, kini nga mga panalangin gipaneguro ngadto niadtong kinsa naningkamot nga magpuyo isip mga disipulo ni Jesukristo. (Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 2.1)

Doktrina ug mga Pakigsaad 132:19. Unsa ang gipasabot nga gibugkos pinaagi sa Balaan nga Espiritu sa Saad?

Si Elder David A. Bednar sa Korum sa Napulog Duha ka Apostoles mitudlo:

Ang Balaang Espiritu sa Saad mao ang nagpamatuod nga gahom sa Espiritu Santo. Kon giselyohan sa Balaang Espiritu sa Saad, usa ka ordinansa, panaad, o pakigsaad ang nagbugkos sa yuta ug sa langit. (Tan-awa sa Doktrina ug mga Pakigsaad132:7.) Ang pagdawat sa “selyo sa pag-uyon” gikan sa Espiritu Santo mao ang resulta sa pagkamatinud-anon, integridad, ug sa pagkamakanunayon sa pagtahod sa mga pakigsaad sa ebanghelyo “diha [sa] pagpadayon sa panahon” (Moises 7:21). Hinoon, kini nga pagkabugkos mawala pinaagi sa pagkadaotan ug kalapasan. (David A. Bednar, “Kinahanglang Matawo Kamo Pag-usab,” Liahona, Mayo 2007, 22)

Dugang nga mga Kalihokan sa Pagkat-on

Mga petsa sa pag-expire

Kon posible, pagdala og pinutos nga pagkaon nga naay petsa sa pagka-expire.

• Unsay katuyoan sa petsa sa pag-expire?

• Unsay pwedeng mahimo aron mapreserbar ang pagkaon lapas sa petsa sa pag-expire niini?

• Sa unsang paagi ni konektado sa kaminyoon?

Basaha o tan-awa ang mosunod. Tan-awa kon unsay gihimo ni Elder Enrique R. Falabella, kanhi sakop sa Seventy, ug sa iyang asawa aron tangtangon ang petsa sa pag-expire sa ilang kaminyoon.

Sa dihang mipauli ko gikan sa akong misyon, nahimamat nako ang matahom nga batan-ong babaye nga taas og itom nga buhok hangtod sa iyang hawak. Duna siyay nindot nga dakong malulot nga mga mata ug makatakod nga pahiyom. Nadani ko niya sa unang higayon nga nakita nako siya.

Ang akong asawa dunay tumong nga magminyo sa templo, bisan kaniadto ang pinakaduol nga templo biyahion pa og kapin sa mga 4,000 ka milya (6,400 km).

Ang among sibil nga kaminyoon malipayon ug masulub-on, kay naminyo kami nga dunay kinutuban. Ang opisyal misulti sa mga pulong “Ug karon ako modeklarar kaninyo nga bana ug asawa,” apan human dayon niana, siya misulti, “hangtud sa kamatayon kamo magbulag.”

Mao nga nagsakripisyo mi aron makapalit og tiket padulong ra ngadto sa Templo sa Mesa Arizona.

Didto sa templo, samtang nagluhod mi sa altar, ang awtorisado nga sulugoon misulti sa mga pulong nga akong gihandom, nga nagdeklarar namo nga bana ug asawa alang sa karon ug sa tibuok kahangturan. (Enrique R. Falabella, “Ang Panimalay: Ang Eskwelahan sa Kinabuhi,” Liahona, Mayo 2013, 102)

Ang atong balaanong potensyal

Pagdala og usa ka liso ngadto sa klase, o pagpakita og litrato sa liso nga ipatan-aw sa mga estudyante. Sultihi ang mga estudyante unsa nga matang sa liso kini.

• Unsay potensyal nga maabot niini nga liso?

• Unsay kinahanglang mahitabo aron makab-ot ang potensyal sa liso?

Dayon ipakita ang larawan sa usa ka magtiayon atubangan sa templo ug dapita ang mga estudyante nga hisgotan kon sa unsang paagi ang mahangtorong kaminyoon makatabang nato nga matuman ang atong potensyal ingong mga anak sa langitnong mga ginikanan.

Renaissance of marriage [Renaissance sa kaminyoon]

Para sa lain pang ehemplo sa anaa nga mga panalagin pinaagi sa kaminyoon, ikonsiderar ang pagtan-aw kang Presidente Henry B. Eyring sa Unang Kapanguluhan nga nagpakigbahin sa iyang kasinatian ug pagpamatuod sa “Renaissance of Marriage” (2:36), nga anaa sa ChurchofJesusChrist.org.

Paghimog lig-on ug mahangtorong kaminyoon

Gipakigbahin ni Elder F. Burton Howard, nga kanhiay sakop sa Seventy, ang kasinatian sa iyang kaminyoon nga nagpakita sa kaimportante sa pagtamod sa kaminyoon isip balaan. Ikonsiderar ang pagpasalida sa bidyo nga “Eternal Marriage” gikan sa time code 6:42 hangtod 12:00.

Human matan-aw sa mga estudyante ang bidyo, dapita sila sa pagpakigbahin sa nakuha nilang mga panabot bahin sa papel sa mga bana ug sa mga asawa aron sa pagtabang nga mahimong mahangtoron ang kaminyoon. Pwede usab nimo silang dapiton nga hisgotan kon unsay ilang mahimo karon aron makapangandam alang sa lig-on nga kaminyoon sa umaabot.