Lesona 210: Aoaoga a Taitai o le Ekalesia

Mamanu: Aoaoga a Taitai o le Ekalesia

Suesue ma Faaaoga le Aoaoga a Auauna a le Alii

I le gasologa o le tausaga seminare, o le a maua ai e tagata aoga ni avanoa e suesue ai savali mai taitai o le Ekalesia. O lenei mamanu ua tuuina atu ai ia te oe ni manatu e fesoasoani ai i tagata aoga e suesue i savali mai taitai O Le Ekalesia a Iesu Keriso o le Au Paia o Aso e Gata Ai.

Manatua: Mo se faataitaiga o le auala e faaaoga ai lenei mamanu, tagai i le Lesona 211: “Filifiliga mo le Faavavau”.

Gaoioiga E Ono Mafai Ona Aoao Ai

Mo savali taitasi mai taitai o le Ekalesia, e mafai ona e filifilia se tasi pe sili atu o manatu mai le Amata le lesona, Suesue le savali, po o le Faalolotoina o le malamalama i vaega o lenei mamanu po o se mea e talitutusa ma lau lava filifiliga. E mafai foi ona e faaaogaina le vaega o le Faaaoga mea ua e suesueina o le mamanu.

Ina ia suesue, e mafai e tagata aoga ona galulue taitoatasi pe o se vasega, pe e mafai foi ona e faatulagaina i latou i ni vaega toalaiti. Afai e te filifili e faalogo i le leo pe matamata i le vitio o le lauga, faamolemole ia saunia se lomiga ua lolomiina pe faatekinolosi mo tagata aoga e mulimuli ai.

Fesoasoani i tagata aoga e taulai atu i le Tama Faalelagi ma Iesu Keriso i manatu faafaiaoga taitasi e te filifilia.

Amata le Lesona

Mafaufau i se auala e amata ai le lesona e mafai ona fesoasoani e fatufatu ai le fiafia i mafaufau po o loto o tagata aoga e fesoasoani ai ia i latou e saunia mo le aafiaga e aoao ai. O le savali o le a suesue e tagataaoga atonu e i ai ni auala aoga e mafai ona e faaaogaina. O nisi nei o faataitaiga:

• Faasoa atu se fesili faatupu manatu mai le savali ma valaaulia tagata aoga e talanoaina faapuupuu pe tusi a latou tali muamua i a latou api talaaga.

• Faasoa atu se ata po o se lesona faatino na faaaoga o se vaega o la latou savali ma talanoaina faapuupuu pe aisea na faaaoga ai.

• Faasoa atu se tala mai le savali a le failauga. Atonu e sili atu ona lelei le le faasoa atu o le tala atoa i le amataga o le lesona ae atonu e lava e faaosofia ai le fiafia o tagata aoga. Mulimuli ane i le lesona, e mafai ona faaiuina le tala e faapupula ai le faamoemoega o le savali a le failauga.

• E mafai ona e faasoa atu le autu o le lauga ma valaaulia tagata aoga e tusifaamaumau nisi o fesili na latou maua e faatatau i le autu. Fautuaina i latou e saili tali i le taimi o le lesona.

Suesue le savali

E mafai ona e faaaogaina ou manatu po o nisi o manatu nei e fesoasoani ai i tagata aoga e taulai atu a latou suesuega o le lauga. A lava le taimi, atonu e talafeagai le faaaoga o le tele o metotia. Valaaulia tagata aoga e saili faaaliga faaletagata lava ia a o latou iloiloina le savali, tusi uunaiga i a latou api faamaumau mo suesuega. E mafai ona maua manatu faaopoopo i le “Suesueina o Lauga o le Konafesi Aoao” i le ChurchofJesusChrist.org.

Afai e le maua e tagata aoga se kopi faaeletonika o le lauga, e mafai ona e faatulagaina mo tamaiti aoga e suesue se kopi ua lolomiina.

• Saili mo. Mafaufau ma le agaga tatalo i manaoga o lau vasega ma faailoa mai se “Vaavaai mo” e mafai ona faaaoga a o suesue e tagata aoga le lauga. O faataitaiga o “Vaavaai mo” e mafai ona aofia ai mea nei: Upumoni e Faavavau, Valaaulia, ma Faamanuiaga Folafolaina. E mafai foi e tagata aoga ona vaavaai mo tali i fesili po o atugaluga atonu o ia i latou.

  Atonu e talafeagai le tuu atu i tagata aoga e filifili se mea latou te mananao e vaavaai i ai i le lauga. E mafai ona e faasoa atu le autu o le lauga ma tuu atu i tagata aoga se avanoa e tusi ai ni nai fesili e uiga i lena autu i luga o le laupapa. A uma ona suesue, e mafai ona e faailoa mai po o a fesili na lagona e tagata aoga na taliina ma pe na faapefea foi.

• Faanumera ia parakalafa ma faataamilo le lauga. Tusi pe ta numera o parakalafa i se kopi o le lauga. Tuu atu se kopi i tagata aoga taitasi ma valaaulia tagata aoga e filifili se mea e vaavaai i ai. E mafai e tagata aoga ona faitau se parakalafa se tasi pe sili atu, maka ma tusi ni faamatalaga i autafa. E mafai ona pasi atu le pepa i le isi tagata aoga e sosoo ai, ma mulimuli i se mamanu faapena. A uma ona latou suesue i parakalafa uma, toe faafoi le pepa i le uluai tagata aoga ma tuu atu ia i latou e vaai i malamalamaaga na faasoa mai e isi tagata o le vasega.

• Vaaiga faata’ita’i talafeagai. Valaaulia tagata aoga e mafaufau pe mafai faapefea ona faatatau le lauga o loo suesueina i se talavou i aso nei po o ni luitau patino e ono oo i ai se talavou. Saunia ma tuuina atu se vaaiga faataitai i le amataga o le vasega. Pe e mafai foi e tagata aoga ona faia se vaaiga faataitai o se talavou o loo tauivi ma se mea o tupu po o se fesili. E mafai e tagata aoga ona faaopoopo faamatalaga talafeagai i le vaaiga faataitai e fetaui ma manaoga o talavou i la outou nofoaga.

• Ta’ua po o tusitusiga paia e faatatau i ai. E mafai e tagata aoga ona vaavaai mo mau o loo ta’ua i le lauga po o faamatalaga faaiu. E mafai e tagata aoga ona faitau ia fuaiupu ma tusi pe faapefea ona fesoasoani le lauga ia i latou e malamalama atili ai i mau o loo taua po o le auala e fesoasoani ai mau na ta’ua ia i latou e malamalama atili ai i le savali o le lauga. I le Potutusi o le Talalelei, e mafai e tagata aoga ona fesootai i mau o loo ta’ua i le lauga pe maka a latou pepa o i ai mau,

Faaloloto le malamalama

O le faamoemoega o lenei vaega o le fesoasoani lea i tagata aoga e toe manatunatu ma talanoaina le lauga na latou suesueina. E mafai ona e faaaogaina ou manatu, pe mafai foi ona e filifilia se tasi pe sili atu o gaoioiga nei e fesoasoani ai i tagata aoga e auai i le talanoaga. E mafai ona e fai atu ni fesili tulitatao a o faasoa mai e tagata aoga o latou manatu ma lagona a o latou suesue. O nei filifiliga e mafai ona ausia taitoatasi, ma se paga, po o se vaega toalaiti.

• Taulai ia Iesu Keriso. Mauafau e tuu se ata o le Faaola i luga o le laupapa. Valaaulia tagata aoga e tusi upu po o fasifuaitau musuia faataamilo i le ata na latou maua i le lauga. Valaaulia ni nai tagata aoga e faasoa mai mea na latou tusia ma o latou lagona pe mafai faapefea ona fesoasoani le upu po o le fasifuaitau i se tagata ia iloa le uiga, uiga auaumama, ma matafaioi a Iesu Keriso. E mafai e tagata aoga ona faasoa mai pe mafai faapefea e aoaoga ona fesoasoani ia i latou e mulimuli i le Faaola ma faamalosia ai lo latou faiā ma Ia.

• Aoao le tasi i le isi. E mafai ona e valaaulia tagata aoga e faia se tautalaga e tolu i le lima minute po o le lesona o aoao mai ai le savali sa latou suesueina. E mafai ona faaaofia e tagata aoga ni aafiaga patino po o ni mau faasino faaopoopo e lagolago ai le savali. E mafai e tagata aoga ona faataitai le faasoa atu o a latou lauga i se paga, se vaega toalaiti, po o le vasega.

• Tusifaamaumau lagona. Mafaufau e valaaulia tagata aoga e tusi o latou manatu ma lagona a o latou suesueina le lauga. E ono tusifaamaumau e tagata aoga soo se faatinoga na uunaia ai i latou e le Agaga e fai. Pe a talafeagai ai, e mafai ona e fai atu i tagata aoga e faasoa mai mea na latou tusia.

• Fatu se mea. I le faaaogaina o mea na latou aoaoina i le lauga, e mafai ona e tuu atu i tagata aoga se taimi e fatu ai se ata, ata tusi, pepa lautele o i ai se savali, meme, faasalalauga faaagafesootai, po o se mea e talitutusa. E mafai ona avea o se faamanatu po o se mea e musuia ai isi. E mafai e tagata aoga ona faasoa atu i se vaega po o le vasega mea na latou faia.

• Faasoa atu i isi. E mafai ona e fautuaina tagata aoga e faasoa mai se savali mai le lauga i o latou aiga, i uo, po o luga o ala o faasalalauga faaagafesootai (mo se faataitaiga o se faamatalaga, se vitio, po o se meme). A o latou faasoa mai, e mafai e tagata aoga ona faaaofia ai se molimau faigofie ma se valaaulia e aoao atili.

Faaaoga mea na e suesueina

O le faamoemoega o lenei vaega o le tuu atu lea i tagata aoga o se avanoa e faaaoga ai mea sa latou aoaoina ma lagonaina mai le suesueina o le lauga. E mafai ona e faaaogaina se tasi pe sili atu foi o manatu nei po o nisi manatu e faamalie ai manaoga o au tagata aoga. Mo nisi manatu, tagai i le “Uunaia tagata aoao e faasoa mai upumoni o loo latou aoaoina” i Tomai o le Atinaega o Faiaoga: Valaaulia le Maelega i le ChurchofJesusChrist.org.

• Tulitatao ia uunaiga. Fautuaina le vasega e tulitatao ia uunaiga na latou maua a o suesue i le lauga. Atonu na latou lagonaina le faia o ni suiga patino i o latou olaga, ia galulue i se tasi o a latou sini patino, pe faasoa atu le savali i se isi tagata.

• Fai se fuafuaga. E mafai e tagata aoga ona faauma ia uunaiga nei e fesoasoani ai ia i latou e faaaoga mea sa latou aoaoina. O nisi tagata aoga atonu e mananao e faasoa atu a latou fuafuaga i se tagata o le aiga po o se uo e fesoasoani ia i latou e faataunuuina.

• Ona o lenei lauga, o le a ou .

• O le isi laasaga o le a ou faia mo le faamaeaina o la’u fuafuaga o le .

• O le a ou taumafai e faia lenei mea i le (aso).

• O le a ou faamanatu ia te au lava la’u fuafuaga i le .