Lesona 201: Sauniuniga mo Faifeautalai

Filifili e Auauna Atu i se Misiona

Faamanuiaga o le Galuega Faafaifeautalai

O se tasi o auala e faamanuia ai e le Tama Faalelagi Ana fanau o le galuega faafaifeautalai. Na te faamanuiaina faifeautalai a o latou auauna atu ma aoao atu tagata i o latou nuu ma le salafa o le lalolagi. Na te faamanuiaina foi i latou o e taliaina le savali o le talalelei ma maua le auaunaga e ofoina atu e faifeautalai. O lenei lesona e mafai ona fesoasoani i tagata aoga ia lagonaina se naunautaiga e auauna atu i le Alii e avea ma Ana faifeautalai.

Gaoioiga E Ono Mafai Ona Aoao Ai

O lo tatou tiutetauave e auauna atu o ni faifeautalai

Mafaufau e faamalamalama atu faapea, i le taimi o lenei lesona e uiga i le galuega faafaifeautalai, o le a galulue ai tagata aoga ma se soa. O se tasi o auala e fatu ai ni mafutaga o le saunia lea o se ato e i ai ni faataitaiga o tofiga faamisiona ua tusia i luga o fasi pepa. E mafai ona aofia ai nofoaga e mafai ona tofia ai faifeautalai e aoao atu ai, e pei o Kuatemala po o Hanikeri. E mafai foi ona aofia ai tofiga talafeagai o le misiona o auaunaga, e pei o tagata faigaluega o sauniga o le malumalu po o se faletupe o meaai i le lotoifale. Ia mautinoa o loo i ai ni kopi se lua o galuega taitasi o loo i totonu o le ato. Valaaulia tagata aoga taitasi e ave se fasi pepa mai le ato ona nonofo lea ma le tagata o le vasega na seiina le tofiga lava lea e tasi.

Tuu atu i soa taitasi se kopi o le faamatalaga lenei ma faaali atu faatonuga e tolu o loo mulimuli mai.

Na toe faamautu mai e Peresitene Russell M. Nelson le valaauga a le Alii e auauna atu o ni faifeautalai:

O le asō ou te toefaamautu atu ai ua toe poloaiina e le Alii ia alii talavou agavaa uma lava, ma malolosi ia sauniuni mo ma auauna atu i se misiona. Mo alii talavou o le Au Paia o Aso e Gata Ai, o le galuega faafaifeautalai o se tiutetauave faaleperisitua. Na faapolopoloina outou alii talavou mo lenei taimi o loo tupu ai le faapotopotoina o Isaraelu na folafolaina. Pe a outou auauna atu i misiona, ua outou faia se matafaioi taua tele i le faapotopotoina o Isaraelu!

Mo outou tuafafine talavou ma malolosi, o se misiona o se avanoa mamana foi, ae tuu i le faitalia. Matou te alolofa i faifeautalai tamaitai ma talisapaia i latou ma le loto atoa. O le mea ua outou saofagā ai i lenei galuega e maoae! Tatalo ia iloa pe finagalo le Alii ia te oe e auauna atu i se misiona, ma o le a tali mai le Agaga Paia i lou loto ma le mafaufau. (Russell M. Nelson, “Tala’i Atu le Talalelei o le Filemu,” Liahona, Me 2022, 6)

1. Faitau le faamatalaga i lau soa.

2. Faatalanoa se mea ua faagaeetia ai oe mai lenei faamatalaga.

3. Sauni e faasoa ou malamalamaaga ma le vasega.

Valaaulia ni nai soa e faasoa mai a latou faamatalaga i le vasega. Afai e i ai ni fesili a tagata aoga e uiga i le faamatalaga, mafaufau e fesoasoani ia i latou e saili tali pe faatonu i latou e talanoaina a latou fesili ma le Alii, o latou matua, po o taitai o le Ekalesia. Ia mautinoa ua malamalama tagata aoga i faamoemoega o le Alii mo alii ma tamaitai talavou e faatatau i le galuega faafaifeautalai.

Mafaufauga patino

Faaali atu le faamatalaga ma fesili nei ma valaaulia tagata aoga e toe mafaufau i o latou lagona patino e uiga i le galuega faafaifeautalai. O le tuuina atu i tagata aoga o se taimi e mafaufau loloto ai ma tali atu i fesili e mafai ona valaaulia ai le Agaga Paia ma saunia ai o latou mafaufau ma loto ina ia musuia a o latou suesue.

Na aoao mai Peresitene Russell M. Nelson:

Uo talavou pele, e taua outou taitoatasi i le Alii. Sa Ia faapolopoloina outou seia oo i le taimi nei e fesoasoani ai e faapotopoto ia Isaraelu. O lau faaiuga e auauna atu i se misiona, pe o se misiona tala’i po o se misiona o auaunaga, o le a faamanuiaina ai oe ma le toatele o isi. (Russell M. Nelson, “Talai Atu o le Talalelei o le Filemu,” Liahona, Me 2022, 6–7)

Mafaufau loloto ma tusi au tali i fesili nei i lau api faamaumau mo suesuega:

• O le fea o vaega o nei faamatalaga e sili ona ‘anoa ia te oe? Aisea?

• O le a se mea na aoao mai e Peresitene Nelson e mafai ona aafia ai lou manao e auauna atu i se misiona?

Valaaulia ni nai volenitia e faasoa mai a latou tali. A o faasoa mai e tagata aoga, atonu e faailoa mai e nisi le upumoni lenei i a latou lava upu: O le a faamanuiaina i tatou e le Alii ma le toatele o isi a o tatou filifili e auauna atu o ni Ana faifeautalai. Mafaufau e tusi le upumoni lenei i luga o le laupapa. Faamalosiau i tagata aoga e saili le fesoasoani mai le Agaga Paia ia iloa ai pe faapefea ona finagalo le Tama Faalelagi ia latou faaaogaina lenei upumoni i o latou olaga.

Afai e te lagona e mafai ona faamanuiaina tagata aoga mai le aoao atili e uiga i misiona o auaunaga, mafaufau e faaaoga ia anomea o loo maua i le “Gaoioiga Faaopoopo e Aoao Ai.”

Faamanuiaga o le galuega faafaifeautalai

O le gaoioiga lenei e mafai ona fesoasoani i tagata aoga ia malamalama lelei ai i faamanuiaga e mafai ona tuuina mai e le Alii ia i latou ma isi a o latou filifili e auauna atu i se misiona.

I le avea ai ma se soa, suesue i tusitusiga paia, lauga o le konafesi aoao, viiga, po o le Potutusi o le Talalelei, ma vaavaai mo mea nei:

1. Faamanuiaga e mafai ona tuuina mai e le Alii i isi e ala i a tatou taumafaiga faafaifeautalai.

2. Faamanuiaga e mafai ona tuuina mai e le Alii ia i tatou mo le auauna atu i se misiona.

Afai e te lagona e mafai e tagata aoga ona faaaoga nisi taitaiga patino, mafaufau e tuuina atu i soa taitasi le pepa e tufa atu ua faaulutalaina “Faamanuiaga o le Galuega Faafaifeautalai.”

Faamanuiaga o le Galuega Faafaifeautalai

Suesue i fuaitau o mau ma faamatalaga nei. A o e suesue, vaavaai mo mea nei:

1. Faamanuiaga e mafai ona tuuina mai e le Alii i isi e ala i a tatou taumafaiga faafaifeautalai.

2. Faamanuiaga e mafai ona tuuina mai e le Alii ia i tatou mo le auauna atu i se misiona.

• Mataupu Faavae ma Feagaiga 4:1–4

• Mataupu Faavae ma Feagaiga 15:6

• Mataupu Faavae ma Feagaiga 18:14–16

• Mataupu Faavae ma Feagaiga 31:3–8

• Mataupu Faavae ma Feagaiga 50:22

Na aoao mai Peresitene Russell M. Nelson:

Uso e ma tuafafine, e leai se isi taimi ua matua sili ona manaomia ai le talalelei a Iesu Keriso i lo le taimi nei. O fefinauaiga ua solia ai mea uma na tu atu ai le Faaola ma aoao atu. Ou te alofa i le Alii o Iesu Keriso ma molimau atu o Lana talalelei e na o le pau lea o le vaifofo tumau mo le filemu. O Lana talalelei o se talalelei o le filemu [tagai i le Mataupu Faavae ma Feagaiga 27:16]. …

O faifeautalaiuma latou te aoao ma molimau atu e uiga i le Faaola. O le pogisa faaleagaga i le lalolagi ua matua manaomia atili ai le malamalama o Iesu Keriso i lo se isi lava taimi muamua. E manaomia e tagata uma le avanoa e iloa ai e uiga i le talalelei toefuataiina a Iesu Keriso. E manaomia e tagata uma ona iloa po o fea e mafai ona latou maua ai le faamoemoe ma le filemu lea e “[silisili lava] i mea uma e manatu i ai” [Filipi 4:7]. (Russell M. Nelson, “Talai Atu o le Talalelei o le Filemu,” Liahona, Me 2022, 6–7)

Na aoao mai Elder Marcus B. Nash o le Au Fitugafulu:

O le faasoa atu o le talalelei e faamumū ai le olioli ma le faamoemoe i agaga o lē na te foai atu ma lē na te taliaina. E moni, “e matua tele lou olioli” [Mataupu Faavae ma Feagaiga 18:15] a o e faasoa atu le talalelei! O le faasoaina atu o le talalelei o le olioli lea i luga o le olioli, faamoemoe i luga o lea faamoemoe. …

O le filifili ia ‘aua ne’i tuu i luga le malamalama o le talalelei tatou te tuu ai lava i tatou i le paolo, lea tatou te aafiagofie ai i faaosoosoga. O le mea taua, e moni le faafeagai: o le filifili e tuu i luga le malamalama o le talalelei e aumaia faalatalata atili ai i tatou i lena malamalama ma le puipuiga na te saunia e tetee atu i faaosoosoga. Oka se faamanuiaga ina a maoae i le lalolagi i lenei vaitaimi! (Marcus B. Nash, “Ia Tuu i Luga Lo Outou Malamalama,” Liahona, Nov. 2021, 71–72)

A maea ona suesue tagata aoga, valaaulia soa taitasi e tusi faataamilo i le upumoni i luga o le laupapa ia le itiiti ifo ma le tasi se faamanuiaga o le galuega faafaifeautalai. A uma ona lisiina ni faamanuiaga se tele, mafaufau e fai atu ni fesili e pei o fesili nei e tuu atu ai i tamaiti aoga se avanoa e faasoa atu ai pe molimau atu ai i mea na latou aoaoina:

• O a faamanuiaga o loo i luga o le laupapa ua e mauaina po o isi foi e te iloa e ala i le galuega faafaifeautalai?

• O le a se tusitusiga paia po o se faamatalaga se tasi na e faitauina na fesoasoani e faateleina ai lou manao e auauna atu i le Alii o se faifeautalai?

• E faapefea i lou manatu ona uunaia e le galuega faafaifeautalai lou faiā ma le Alii? Aisea?

Mafaufau e faasoa atu ni aafiaga na e maua po o lau molimau i le galuega faafaifeautalai. Atonu foi e te manao e faaali atu le vitio “Value of a Full-Time Mission” (5:22), o loo maua i ChurchofJesusChrist.org, ma valaaulia tagata aoga e vaavaai mo mafuaaga e filifili ai se tasi e auauna atu i se misiona.

Mafaufau e toe faasino tagata aoga i le saunoaga a Peresitene Nelson mai le amataga o le lesona. Valaaulia alii talavou e tatalo pea ina ia faateleina e le Alii lo latou manao ma le tomai e auauna atu ai i se misiona sauatoa. Valaaulia tamaitai talavou e tatalo ia iloa pe finagalo le Alii ia latou auauna atu i se misiona sauatoa.

Punaoa Faaopoopo

E mafai faapefea e le Atua ona faamanuiaina au mo le auauna atu i se misiona?

Na faasoa mai Elder Marcos A. Aidukaitis o le Fitugafulu:

Faatasi ai ma le tele o faamanuiaga silisili ua Ia tuuina mai ia te a’u mo le auauna atu ia te Ia o se faifeautalai faamisiona, o se faatuatua sili atu ia Iesu Keriso mo Lana Togiola ma se malamalama malosi atu ma se molimau i Ana aoaoga, ina ia ou le tosina gofie atu i “matagi uma lava o mataupu” (Efeso 4:14). Sa mouese atu lo’u fefe e aoao atu. Ua faateleina lo’u gafatia e faafetaia’ia ai luitau ma se faamoemoega lelei. O le matauina o tagata taitoatasi ma aiga sa ou feiloai i ai pe na aoaoina o se faifeautalai, sa ou aoao ai e moni aoaoga a le Atua ina ua Ia fetalai mai o le agasala e lē aumaia le fiafia moni ma o le usiusitai i poloaiga a le Atua e fesoasoani ia i tatou e manuia ai faaletino ma faaleagaga (tagai i le Mosaea 2:41; Alema 41:10). Ma sa ou aoaoina mo a’u lava ia o le Atua o le Atua o vavega (tagai i le Mamona 9).

O nei mea uma sa fesoasoani i la’u sauniuniga mo le olaga faatagata matua, e aofia ai le mafai ona faaipoipo ma tulaga faamatua, auaunaga i le Ekalesia, ma le olaga faalegaluega ma i le nuu. …

Na mamanuina atoa e la’u misiona lo’u olaga. Sa ou aoaoina na aoga taumafaiga e faalagolago i le Atua, faalagolago i Lona poto ma le alofa mutimutivale ma i Ana folafolaga. Aua o le mea moni lava, o Ia o lo tatou Tama, ma e aunoa ma se masalosalo, e finagalo o Ia mo le mea sili mo i tatou. (Marcos A. Aidukaitis, “Sii A’e Lou Loto ma Olioli,” Liahona, Me 2022, 42–43)

Aisea e avea ai le auauna atu i se misiona o se tiutetauave taua?

Na aoao mai Elder David A. Bednar o le Korama a Aposetolo e Toasefululua:

O le folafola atu o le talalelei e le o se matafaioi faaleperisitua mo na o sina taimi. E le na o se gaoioiga lea tatou te punouai i ai mo se taimi faatapulaaina po o se tofiga e tatau ona tatou faamaeaina i le avea ai ma tagata o le Ekalesia a Iesu Keriso o le Au Paia o Aso e Gata Ai. Ae, o le galuega faafaifeautalai o se faaaliga lea o lo tatou tofi ma lo tatou faasinomaga faaleagaga. Na muai faauuina i tatou i le muai olaga ma fananau mai i le olaga faaletino ina ia faataunuuina le feagaiga ma le folafolaga na faia e le Atua ia Aperaamo. Ua tatou i ai iinei i le lalolagi i lenei taimi e faalauteleina le perisitua ma talai atu le talalelei. O i tatou na, ma o le mafuaaga lena ua tatou i ai iinei—i le taimi nei ma aso uma lava. (David A. Bednar, “Avea ma se Faifeautalai,” Liahona, Nov. 2005, 47)

Gaoioiga Faaopoopo e Aoao Ai

Valaau o le Misiona

Valaaulia tagata aoga e faasoa mai pe na latou vaai i se tasi o tatalaina se valaauga faamisiona.

• Na faape’i lena aafiaga?

• O le a se mea e te manatua mai le tusi o le valaauga o le misiona e ese mai le mea na tofia ai le tagata ma le gagana o le a latou tautatala ai?

Faailoa atu o nisi taimi atonu tatou te le amanaiaina ai faamanuiaga folafolaina o loo lisiina i se valaauga faamisiona. Tuu atu i tagata aoga se kopi o se tusi o le valaauga o le misiona lata mai nei . Valaaulia i latou e vaavaai mo faamanuiaga ua folafola mai e le Alii e ala mai i Lana perofeta ia i latou o e ua valaauina e auauna atu.

Auauna atu i misiona

Faamalamalama atu o alii ma tamaitai talavou agavaa o e e le mafai ona o ni mafuaaga faaletino, faalemafaufau, lagona, po o isi mafuaaga e auauna atu ai i se misiona talai e mafai ona valaauina i se misiona o auaunaga . O faifeautalai auauna atu e ono auauna atu i le Alii i tofitofiga eseese, e aofia ai faalapotopotoga o auaunaga alofa, e ala i faatinoga a le Ekalesia, ma avanoa e atofa mai e siteki. Ina ia vaai i se faataitaiga, mafaufau e matamata i le “Auaunaga Faamisiona: Tala a Elder” (5:19), o loo maua i le ChurchofJesusChrist.org.

Valaaulia tagata aoga e faitau le faamatalaga lenei mai taiala ua saunia mo faifeautalai o auaunaga, ma vaavaai mo ni malamalamaaga e uiga i misiona o auaunaga:

Ua saunia e le Au Peresitene Sili se faamoemoega faafaifeautalai mo auaunaga e taiala ai oe i lou valaauga paia e auauna atu:

• “O lo tatou faamoemoega o le fesoasoani lea i isi ia o mai ia Keriso e ala i le auauna atu ia i latou e pei o le Faaola. Tatou te auauna atu ma le lotomalie i faalapotopotoga o auaunaga alofa, gaoioiga a le Ekalesia, ma i totonu o alalafaga. O le a tatou auauna atu i Lona suafa i le tagata e toatasi, e pei ona sa Ia faia, i le faailoa atu o Lona alofa agalelei.”

Ia manatua o le auala e te auauna atu ai i le Faaola e sili atu ona taua nai lo o le nofoaga e te auauna atu i ai po o mea e te faia. Na tautino mai e Peresitene Russell M. Nelson, “E ala i auaunaga i le olaga atoa i lenei Ekalesia, ua ou iloa ai e le afaina lava po o fea e auauna ai se tasi. O le mea e sili ona taua i le Alii o le auala e auauna atu ai se tasi” (“Auauna Atu i le Mana ma le Pule a le Atua,” Liahona, Me 2018, 68). O lau auaunaga e mo le Matai, ma ua valaaulia oe e auauna atu e pei o Ia! (Tulaga Faatonuina Faafaifeautalai mo Soo o Iesu Keriso—Misiona mo Auaunaga, 1.3)

• O le a se mea na faagaeetia ai oe?

• O a ni malamalamaaga na e maua e uiga i le fai ma sui o Iesu Keriso o se faifeautalai?

• E mafai faapefea e lenei faamatalaga ona faalautele la tatou vaaiga mamao i le galuega faafaifeautalai?

Mo nisi faamatalaga, e mafai ona e valaaulia tagata aoga e saili faamatalaga auiliili o loo maua i le ChurchofJesusChrist.org/service-missionary po o i le polokalama o le Potutusi o le Talalelei.