Faaopoopoga

Gaoioiga o le Iloiloga o le Atamai i Aoaoga Faavae

Manatu mo le Toe Iloiloina o Mataupu Faavae o le Mauaina o le Malamalama Faaleagaga

I lesona taitasi o le Faataitaiga o le Atamai i Aoaoga Faavae, e mafai ona fesoasoani le tuuina atu i tagata aoga o se avanoa e toe faamanatu ai mataupu faavae o le mauaina o le malamalama faaleagaga. O le a fesoasoani lenei mea ia i latou e saunia lelei ai e faaaoga nei mataupu faavae i tulaga faataitai i le vasega ma tulaga moni o le olaga.

O nisi nei o faataitaiga o auala e mafai ona e fesoasoani ai i au tagata aoga e toe faamanatu mataupu faavae o le mauaina o le malamalama faaleagaga:

Tauloto mataupu faavae mai le manatuaina. Talosaga i tagata aoga pe mafai ona latou fai faafia ia mataupu faavae e tolu o le mauaina o le malamalama faaleagaga. E mafai e tagata aoga ona tusi taitoatasi ia mataupu faavae i a latou api faamaumau mo suesuega, pe mafai foi e tagata eseese o le vasega ona tauloto leotele ia mataupu faavae. A manaomia e tagata aoga se fesoasoani, e mafai ona latou tagai i le parakalafa 4 i le vaega o le “Mauaina o le Malamalama Faaleagaga” i le Pepa Autu o le Atamai i Aoaoga Faavae (2023). E mafai foi ona e tuuina atu ni faa-ataataga, e pei o se gaoioiga e faatumu ai le avanoa po o le tuuina atu o le mataitusi muamua o upu taitasi i mataupu faavae eseese.

Faatusatusa fuaiupu ma le mataupu faavae sa’o. Lisi ia mataupu faavae e tolu o le mauaina o le malamalama faaleagaga i luga o le laupapa. Ona faitau lea pe faaali atu ni fuaiupu po o ni fasifuaitau eseese mai parakalafa 5–12 o le vaega “Mauaina o le Malamalama Faaleagaga” i le Pepa Autu o le Atamai i Aoaoga Faavae. Valaaulia tagata aoga e faasoa mai po o fea o mataupu faavae o le mauaina o le malamalama faaleagaga e sili ona fesootai i ai le fuaiupu.

Faamalamalama le uiga. Valaaulia tagata aoga eseese e faamatala mataupu faavae o le mauaina o le malamalama faaleagaga i a latou lava upu. E mafai ona faia lenei mea e ala i le fesili atu i tagata aoga eseese e uiga i mataupu faavae eseese, pe mafai foi ona e vaevaeina tagata aoga i ni vaega e toatolu ma tofi se tasi o mataupu faavae i tagata aoga taitasi. A manaomia, e mafai ona latou toe faamanatu nei mataupu faavae i le parakalafa 5–12 i le vaega o le “Mauaina o le Malamalama Faaleagaga” i le Pepa Autu o le Atamai i Aoaoga Faavae ae le i fesiligia e faamalamalama.

Otooto i ni upu se 10 pe itiiti ifo. Valaaulia tagata aoga e fatu se aotelega mo mataupu faavae taitasi o le mauaina o le malamalama faaleagaga e 10 upu pe itiiti ifo. Valaaulia tagata aoga eseese e faasoa mai a latou aotelega ma faamatala mai pe aisea na latou filifilia ai upu na latou faia.

Fai se ata po o se aikona. Valaaulia tagata aoga e fai se faatusa, ata, po o se aikona mo mataupu faavae taitasi o le mauaina o le malamalama faaleagaga. O lo latou foafoaga e tatau ona faatusa i mea o loo aoaoina e mataupu faavae. A maea ona faia e tagata aoga, valaaulia i latou e faaali atu mea na latou faia i isi ma faamatala mai pe aisea na latou faaaofia ai mea na latou faia.

Toe faamanatu a o talanoaina le tulaga faataitai. Ina ua mae’a ona faasoa atu se vaaiga faataitai moni, valaaulia tagata a’oga e suesue le parakalafa 5-12 i le vaega “Mauaina o le Malamalama Faaleagaga” o le Pepa Autu o le Atamai i Aoaoga Faavae. E mafai e tagata aoga ona vaavaai ma faasoa mai aoaoga mai nei parakalafa e mafai ona fesoasoani i le tagata mai le vaaiga (1) faatino i le faatuatua, (2) iloilo manatu faavae ma fesili faatasi ma se vaaiga e faavavau, ma le (3) saili le malamalama atili e ala i puna mamana ua filifilia mai le Atua.

Fefaasoaai aafiaga. E mafai ona talosagaina tagata aoga e faasoa mai ni aafiaga na latou maua i le faaaogaina o mataupu faavae o le mauaina o le malamalama faaleagaga. E mafai ona latou faamatala mai pe na faapefea ona fesoasoani na mataupu faavae ia i latou i a latou lava fesili po o tulaga po o le auala na mafai ai ona latou faaaogaina mataupu faavae e fesoasoani ai i isi.

Filifili se fasifuaitau se tasi. Tofi tagata aoga taitasi e taulai atu i se tasi o mataupu faavae o le mauaina o le malamalama faaleagaga. Tuu atu ia i latou se taimi e filifili ai se fasifuaitau se tasi mai parakalafa taitasi i la latou vaega ua atofaina latou te lagona e sili ona faatusa i mea o loo aoaoina i lena parakalafa. Ona valaaulia lea o tagata aoga e feoai solo i le potu ma su’e se tasi na tofia i ai le mataupu faavae lava e tasi ma i latou ma faatusatusa fuaitau na latou filifilia. Ona mafai lea e tagata aoga ona su’e tagata aoga o e na tofia i isi mataupu faavae e lua ma faasoa mai fuaitau na latou filifilia.

Manatu mo le Toe Faamanatuina o Fuaitau o le Atamai i Aoaoga Faavae

Faaalu se taimi i le tausaga atoa e toe faamanatu ai e le aunoa fuaitau o le atamai i aoaoga faavae o loo suesueina e tagata aoga. E mafai ona fesoasoani lenei mea e faateleina ai le tomai o au tagata aoga e manatua ai mau faasino ma fasifuaitau autu o mau. E mafai foi ona fesoasoani ia i latou ia malamalama lelei, faamalamalama, ma faaaoga aoaoga faavae o loo aoaoina i fuaitau o le atamai i aoaoga faavae. O le lisi o fuaitau o le atamai i aoaoga faavae ma fasifuaitau autu o mau e mafai ona maua i le Pepa Autu o le Atamai i Aoaoga Faavae.

O nisi nei o gaoioiga e mafai ona faaaoga pe fetuunai e fesoasoani ai i au tagata aoga e toe faamanatu i fuaitau o le atamai i aoaoga faavae i ni auala eseese.

Tauloto

Kata o manatuaga. Valaaulia tagata aoga e fai ni kata e manatua ai ma mau faasino o loo tusia i le tasi itu o se fasi pepa ma le fasifuaitau autu o mau o loo tusia i le isi itu. E mafai e tagata aoga ona faia ni kata mo ni fuaitau o le atamai i aoaoga faavae se tele i luga o se fasi pepa se tasi ona tipi ese lea o kata e manatua ai. Ona mafai lea ona latou galulue na o i latou pe faatasi foi ma se paga e faataitai le taulotoina o mau faasino ma fasifuaitau autu o mau. O nei iloiloga e faaaoga ai kata e manatua ai e mafai ona faia mai lea taimi i lea taimi i le aluga o le tausaga.

Polokalama o le Atamai i Aoaoga Faavae. Faaaoga gaoioiga o le taulotoina i luga o le polokalama o le Atamai i Aoaoga Faavae. Afai e mafai, e mafai ona e faafesootaia lau masini feaveai i se masini faatino po o se televise e faaali ai le anotusi o le polokalama ina ia mafai ai e tagata aoga ona faamaeaina gaoioiga o le taulotoina o se vasega. E mafai foi ona e valaaulia tagata aoga o loo i ai ni masini feaveai e faaaoga le polokalama e faaalu ai le taimi e fai ai gaoioiga tauloto i totonu o le vasega po o fafo atu o le vasega.

Tauloto a le vasega. A uma ona e faia se mau faasino, e mafai e le vasega ona toe fai faatasi le fasifuaitau autu o mau. E mafai foi ona e faia se fasifuaitau autu o mau ma valaaulia le vasega e toe fai faatasi le mau faasino e faatatau i ai.

Ata e faatatau i ai. Saili ni ata po o ni ata tusi e faatatau i aoaoga o fuaitau o le atamai i aoaoga faavae. Faaali atu i tagata aoga nei ata a o latou faataitai le taulotoina o mau faasino ma fasifuaitau autu o mau. E mafai foi ona valaaulia tagata aoga e su’e pe fai a latou lava ata e fesoasoani ia i latou e tauloto ai fuaitau. Afai o ata lava ia e tasi e faaaoga e le vasega atoa pe a taulotoina fuaitau ua tuuina mai, e mafai ona e tuuina i luga i nisi taimi na ata i le taimi o vasega i le lumanai e vaai pe mafai lava e tagata aoga ona manatua fuaitau ma mau faasino.

Faamatala. Faaali atu upu o mau faasino ma fasifuaitau autu o mau i se faasologa faasolosolo ma valaaulia tagata aoga e faamatala i latou.

Mataitusi muamua. Faaali atu na o le mataitusi muamua o upu taitasi mo mau faasino ma fasifuaitau autu o mau ma valaaulia tagata aoga e taumafai e ta’u sa’o le mau faasino ma le fuaitau autu. Tapeese le tele ma le tele o mataitusi muamua a o faateleina le tomai o tagata aoga e tauloto ai le mau faasino ma le fuaitau autu.

Faatumu le avanoa. Faaali atu le mau faasino ma le fasifuaitau autu o mau ma nisi o upu o loo misi. Valaaulia tagata aoga e tauloto le mau faasino ma le fuaitau autu a o faatumuina avanoa. Tapeese le tele ma le tele o upu a o faateleina le tomai o tagata aoga e tauloto ai le mau faasino ma le fuaitau autu.

Faafetaui. Faaali atu ni mau faasino se tele ma fasifuaitau autu o mau i koluma e lua. I le koluma muamua, lisi ia mau faasino i le faasologa faasolosolo. I le koluma lona lua, lisi fasifuaitau autu o mau i se faasologa e lei fuafuaina. Ona valaaulia lea o tagata aoga e faatusatusa ia mau faasino sa’o ma fasifuaitau autu o mau.

Malamalama ma faamatala

Mau Fesootai. Valaaulia tagata aoga e sue ni mau faasino se tele e faatatau i se fuaitau o le atamai i aoaoga faavae. Ona mafai lea ona latou aoaoina a latou uo i le vasega e uiga i mea sa latou aoaoina, e aofia ai le auala e fesootai ai tusitusiga paia faaopoopo sa latou suesueina i le fuaitau o le atamai i aoaoga faavae. Atonu e te fautuaina nisi o mau faasino latou te maua e sau mai fuaitau o le atamai i aoaoga faavae i isi tusi o tusitusiga paia.

Fesoota’i ia Iesu Keriso. Tofi tagata aoga i se fuaitau o le atamai i aoaoga faavae e suesue ai, ma fai atu ia i latou e mafaufau i ni auala eseese e fesootai ai le fuaitau ia Iesu Keriso. E mafai ona latou mafaufau ma talanoaina po o le a se mea e fesoasoani i ai la latou fuaitau ua atofaina ia i latou ia malamalama lelei ai e uiga ia Iesu Keriso, Lana aoaoga faavae, po o le ata o le faaolataga. E mafai foi ona latou vaavaai mo faataitaiga o le auala na aoao atu ai pe faataitaia ai e le Faaola le upumoni o loo maua i le fuaitau.

Faamalamalamaga faigofie. Valaaulia tagata aoga e saunia e faamatala le aoaoga faavae o loo aoaoina i fuaitau o le atamai i aoaoga faavae i se tasi e le masani i na aoaoga. E mafai ona latou vaai faalemafaufau o loo latou faamalamalamaina nei aoaoga i se tamaitiiti po o se tasi e le o se tagata o le Ekalesia. Valaaulia i latou e tusi a latou faamalamalamaga i la latou api faamaumau mo suesuega ona faasoa atu lea i se tagata o le vasega.

Lea Fuaitau i luga o Lea Fuaitau. Faaali atu i tagata aoga ni faataitaiga o nisi o itulau o le Fuaitau i luga o Lea Fuaitau mai le mekasini Mo Le Malosi o le Autalavou lea e iloiloina ai upu po o fasifuaitau taua mai fuaitau o mau. O se tasi o faataitaiga o se itulau faapena o le “Lea Fuaitau i luga o Lea Fuaitau: O Se Leoleo” (Mo Le Malosi o le Autalavou, Oke. 2022, 32). Valaaulia tagata aoga e fatu a latou lava lomiga o se Fuaitau i luga o Lea Fuaitau. Fai atu ia i latou e filifili ni nai upu autu mai se fuaitau o le atamai i aoaoga faavae ma faaaofia ai tusitusiga paia fesootai, faamatalaga mai taitai o le Ekalesia, ma faauigaga e fesoasoani e faaloloto ai le malamalama e uiga i na upu autu.

Fai fesili. Valaaulia tagata aoga e filifili se fuaitau o le atamai i aoaoga faavae latou te fia malamalama atili i ai. Valaaulia i latou e faitau le fuaitau ma lisi ni fesili se lua pe tolu o i ai e uiga i lena fuaitau. O nei fesili e mafai ona fesootai i upu po o fasifuaitau latou te mananao e malamalama lelei i ai pe aisea foi e taua ai le malamalama i le fuaitau. A uma ona lisiina e tagata aoga a latou fesili, valaaulia i latou e faaaoga punaoa e pei o le polokalama o le Potutusi o le Talalelei, Taiala i Tusitusiga Paia, po o isi meafaigaluega mo suesuega e saili ai tali i a latou fesili. Valaaulia tagata aoga e faasoa mai mea na latou aoaoina.

Faatusa vaaia. E mafai e tagata aoga ona faia se ata tusi, se ata tuufaatasi, se meme, ata o upu, se upu ao, po o se isi faatusa vaaia e fesoasoani e faaalia ai mea o loo aoaoina i se fuaitau o le atamai i aoaoga faavae. Ona mafai lea e tagata aoga ona faaali atu lo latou foafoaga i isi ma faamatala pe faapefea ona fesootai i le fuaitau o le atamai i aoaoga faavae sa latou taulai atu i ai.

Faaaoga

Ata Faataitai. Faasoa atu ni tulaga eseese e faatatau i tulaga, luitau, po o fesili faaleagaga e ono i ai i talavou. Valaaulia tagata aoga e faasoa mai se fuaitau o le atamai i aoaoga faavae se tasi pe sili atu o aoaoga faavae latou te lagona e mafai ona faatatau i le tulaga ma faamatala pe faapefea ona latou manatu e mafai ona fesoasoani nei fuaitau.

Fefaasoaai aafiaga. E mafai e tagata aoga ona filifili se tasi o fuaitau o le atamai i aoaoga faavae na latou faaaogaina talu ai nei i o latou olaga pe latou te mananao foi e faaaoga atoatoa i o latou olaga. E mafai ona valaaulia tagata aoga e faasoa mai pe na faapefea ona aafia i latou i nei aoaoga.

Suesue fuaitau ma tulaga patino i le mafaufau. Valaaulia tagata aoga e mafaufau i se tulaga, fesili, po o se faai’uga o loo feagai ai ma latou. Valaaulia i latou e sue ni fuaitau o le atamai i aoaoga faavae o le a fesoasoani i o latou tulaga ma faasoa mai mea na latou iloa e aoga.

Fesoasoani i se talavou. Valaaulia tagata aoga e tusi se ata laau o se talavou ma tusi i lalo lo latou igoa, tausaga, ma tulaga faaleaiga ma soo se fesili, faafitauli, po o luitau o loo latou feagai i le taimi nei. Ona mafai lea e tagata aoga ona faailoa mai fuaitau o le atamai i aoaoga faavae latou te lagona o le a fesoasoani i lenei talavou. E mafai ona latou faamatala atu le aoaoga faavae i la latou fuaitau filifilia ma faia ni fautuaga mo ni faatinoga e ono faia e lenei talavou.

Saunia se faigalotu po o se lauga. Tuu atu i tagata aoga ni avanoa e faaaoga ai fuaitau o le atamai i aoaoga faavae e saunia ai se savali o le faigalotu po o se lauga puupuu. Atonu e te mafaufau e faatulaga tagata aoga taitasi e faasoa mai a latou faigalotu po o lauga i le amataga o le vasega i le semesa atoa. Fesoasoani ia i latou e saunia e aotele le talaaga ma faamatala upumoni o loo aoaoina i fuaitau. Valaaulia tagata aoga e faasoa mai ni aafiaga anoa po o ni faataitaiga o le faaaogaina o upumoni mai fuaitau na latou filifilia ma molimau atu i upumoni o loo aoaoina i fuaitau.