1817–1820

An Joseph Smith Aewin Nemesepwi

Ew ponu ngeni ew iotek mi tekisoson

Non ewe neni ikewe an Joseph Smith famini ra nom ie, a chommong mwichefen ra afanafan ussun Jises Kraist. Meinisin ra sokofesen non ar afanafana ekkewe mettoch ussun I. Joseph ese kon fat ika ion a pung. I a sinei pwe a mochen ewe Chon Amanau, nge ese sinei menni mwichefen epwe fiti.

Uruon—Joseph Smith 1:5–6; Souneng, 1:9

Joseph a ekieki ussun ei ren fansoun nakatam. I a mochen an epwe musono seni an kewe tipis. I a feinno fiti chommong mwichefen, nge i a chok tiperuoru.

Uruon—Joseph Smith 1:8–10; Souneng, 1:9–12

Ew ran, Joseph a aneani James 1:5 non ewe Paipel. A apasa ika sia mochen mirit, sia tongeni tingor ngeni Kot. Joseph a sinei non netipan pwe iei met a auchea epwe fori.

Uruon—Joseph Smith 1:11–13

Ew soran ew ningochun ran atun an a pichiu chon ira (spring) non 1820, Joseph a feinong nein ewe ira arapakan ngeni imwan ewe. I a mochen epwe nom non ew neni ikewe i a tongeni epwe anamon an epwe iotek ngeni Samach won Nang.

Uruon—Joseph Smith 1:14–15

Joseph a fotopuku me poputa ne iotek. Nupwen a fori ei, i a mefi ew pochokun mi enieput a chounono i. I a mefi rochopwak a rokopwnieno. Usun nge ite emon a sotuni ne oukano i seni an epwe kapas ngeni Kot. Joseph a aea unusen an pochokun an epwe tingor ngeni Kot an epwe amanaua i.

Uruon—Joseph Smith 1:27–62

Mwitir chok, Joseph a kuna ew ningeochun saram mi saramaram a feitiw seni nang. Ewe rochopwak a morono, iwe i a mefi kinamwe. Non ewe saram, Joseph a kuna Samach won Nang me Jises Kraist ra uta non ewe asapwan. Samach won Nang a apasa iten Joseph. Mwirin a itini Jises me apasa, “Iei I Nei Achengicheng. Rongorong ngeni I!”

Uruon—Joseph Smith 1:16–17

Jises a ureni Joseph pwe an kewe tipis ra musono. Joseph a eisini Jises ika menni mwichefen epwe fiti. Jises a ureni pwe esap fiti ew me neir.

Uruon—Joseph Smith 1:18–19; Souneng, 1:16

Jises a apasa pwe auchean ennet ussun An kapas allim a fen poutuno. I a apasa pwe I epwe tinano kewe chon nang ar repwe afanafana ekkei ennet ngeni Joseph, an epwe aporousa ngeni ewe fonufan.

Souneng, 1:16–17

Mwirin an ewe nemesepwi a kouno, Joseph a urono ren tong me pwapwa. I ese chiwen tiperuoru I a sinei pwe Kot mi tongei i. Inamo ika ekkoch aramas ra oputa i ren an ura pwe i a fen kuna Samach won Nang me Jises Kraist, Joseph a sinei pwe mi ennet.

Uruon—Joseph Smith 1:20–26; Souneng, 1:16