Ono la Kwanza la Joseph Smith

Jibu la sala ya unyenyekevu

Joseph Smith akiwasikiliza watu wanaohubiri kuhusu imani zao mbalimbali za kidini.

Mahali ambapo familia ya Joseph Smith waliishi, kulikuwa na makanisa mengi ambayo yalifundisha kuhusu Yesu Kristo. Wote walifundisha mambo tofauti kumhusu Yeye. Joseph hakuwa na uhakika nani alikuwa sahihi. Alijua kwamba alimhitaji Mwokozi, lakini hakujua ni kanisa lipi ajiunge nalo.

Joseph Smith—Historia ya 1:5–6; Saints, 1:9

Joseph Smith akifanyia kazi shamba lake.

Joseph aliwaza kuhusu hili kwa muda mrefu. Alitaka kusamehewa dhambi zake. Alitembelea makanisa mengi, lakini bado alihisi kukanganyikiwa.

Joseph Smith—Historia ya 1:8–10; Saints, 1:9–12

Joseph Smith akisoma Biblia kando ya mwanga wa mshumaa.

Siku moja, Joseph alisoma Yakobo 1:5 katika Biblia. Ilisema kama tunahitaji hekima, tunaweza kumwomba Mungu. Joseph alijua moyoni mwake kwamba hiki ndicho alichohitaji kufanya.

Joseph Smith—Historia ya 1:11–13

Joseph Smith akitembea kuingia msituni karibu na nyumba yake ili kusali.

Asubuhi ya siku nzuri ya majira ya kuchipua mnamo 1820, Joseph alikwenda msituni karibu na nyumbani kwake. Alitaka kuwa mahali ambapo angeweza kuwa peke yake ili kuomba kwa Baba wa Mbinguni.

Joseph Smith—Historia ya 1:14–15

Joseph alipiga magoti na kuanza kusali. Alipokuwa akifanya hivyo, alihisi nguvu za uovu zikimshika. Alihisi giza likimzunguka. Ilionekana kama mtu alikuwa akijaribu kumzuia asizungumze na Mungu. Joseph alitumia nguvu zake zote kumwomba Mungu amwokoe.

Joseph Smith — Historia ya 1:15–16

Baba wa Mbinguni na Yesu Kristo walimtokea Joseph Smith. Anapiga magoti mbele yao.

Ghafla, Joseph aliona mwanga mkali wa kupendeza ukishuka kutoka mbinguni. Giza liliondoka, na akahisi amani. Katika mwanga Joseph aliwaona Baba wa Mbinguni na Yesu Kristo wakiwa wamesimama juu angani. Baba wa Mbinguni aliliita jina la Joseph. Kisha alimwonyesha Yesu na kusema, “Huyu ni Mwanangu Mpendwa. Msikilize Yeye!”

Joseph Smith—Historia ya 1:16–17.

Yesu anamwambia Joseph Smith kwamba dhambi zake zimesamehewa.

Yesu alimwambia Joseph kwamba dhambi zake zilikuwa zimesamehewa. Joseph alimwuliza Yesu ni kanisa gani ajiunge nalo. Yesu alisema kwamba asijiunge na lolote kati yao.

Joseph Smith—Historia ya 1:18–19; Saints, 1:16

Joseph Smith, akiwa amepiga magoti katika kijisitu cha miti, akimsikiliza Mwokozi.

Yesu alisema kwamba kweli muhimu kuhusu injili Yake zilikuwa zimepotea. Alisema angewatuma malaika kufundisha kweli hizi kwa Joseph, ili azishiriki kwa ulimwengu.

Saints, 1:16–17.

Joseph Smith akitembea kutoka msituni kuelekea nyumbani.

Baada ya ono kumalizika, Joseph alijawa na upendo na shangwe. Hakuwa amekanganyikiwa tena. Alijua kwamba Mungu alimpenda. Japokuwa baadhi ya watu walimchukia kwa kusema kwamba alikuwa amewaona Baba wa Mbinguni na Yesu Kristo, Joseph alijua ilikuwa ni kweli.

Joseph Smith—Historia ya 1:20–26; Saints, 1:16