“Chapit 56: Yo Touye Pwofèt la: Jen 1844,” Istwa ki nan Doktrin ak Alyans (2002), 201–5
“Chapit 56,” Istwa ki nan Doktrin ak Alyans, 201–5
Chapit 56
Yo Touye Pwofèt la
(Jen 1844)
Kèk moun te di se Joseph Smith ki te lakòz pwoblèm Nauvoo yo. Yo te met Joseph nan prizon. Jij la te di Joseph Smith pa t fè anyen ki mal. Li te kite Joseph ale.
Popilas yo te fache anpil kont jij la. Yo te di yo tap touye jij la. Sen Nauvoo yo te pè. Yo te mande gouvènè eta a pou l ede yo. Men li pa t vle. Li te voye sòlda dèyè Joseph Smith.
Joseph Smith te konnen yo ta kapab mete l nan prizon ankò. Joseph te pè pou yo pa t mete frè l la, Hyrum, nan prizon tou. Joseph te di Hyrum pou l pran fanmi l epi ale nan yon lòt vil. Men Hyrum pa t vle kite Joseph.
Joseph Smith te di limenm ak Hyrum ta dwe kite Nauvoo. Si yo te fè sa, popilas yo pa tap fè Sen yo anyen. Konsa, Joseph ak Hyrum te travèse rivyè a.
Gen moun ki te di Joseph Smith te pran rak paske l te pè. Madanm Joseph Smith, Emma, te voye kèk zanmi mande l pou l tounen. Joseph Smith te panse yo tap touye l si l te tounen Nauvoo. Men li te fè sa zanmi l yo te vle l fè a.
Joseph ak Hyrum te retounen Nauvoo. Yo te arete yo. Sòlda yo te mennen yo ansanm avèk Willard Richards ak John Taylor nan yon vil ki rele Carthage. Yo te mete yo nan prizon Carthage la.
Jou apre a se te 27 jen 1844. Kèk nan zanmi Joseph Smith yo te rann li vizit nan prizon an. Yo te li ekriti sakre yo. John Taylor te chante youn nan chante Joseph te pi renmen yo e ki te pale apwopo Jezi.
Brid sou kou, yo te tande yon bri deyò a. Gen yon popilas ki t ap tire sou prizon an. Te gen plis pase san mesye nan popilas la. Yo te pentire figi yo pou moun pa t rekonnèt yo.
Kèk moun nan popilas la te kouri pase devan gad yo e yo te ouvri pòt prizon an ak yon pousad. Yo te kouri monte eskalye yo. Yo te tire sou chanm lan. Yo te tire sou John Taylor, men yo pa t touye l. Yo te touye Hyrum. Joseph Smith te wè Hyrum te mouri. Li te di, “O, frè mwen, Hyrum!”
Joseph te kouri al nan fenèt la. Popilas la te tire l. Li rele, “O Senyè, Bondye m nan.” Li te tonbe pa lòtbò fenèt la. Pwofèt Bondye a te mouri.
Yo te mennen kò Joseph ak kò frè li Hyrum nan Nauvoo. Sen yo te tris anpil. Lidè ak pwofèt yo a te mouri. Li te bay vi l pou levanjil Jezikri a.
D&A 135
Pwofèt Joseph Smith te fè anpil travay enpòtan. Li te tradui Liv Mòmon an. Li te kòmanse vrè Legliz Jezikri a. Li te bati yon vil kote Sen yo ta ka viv. Bondye te renmen Joseph Smith. Sen yo te renmen l. Joseph Smith te fè plis bagay pou ede nou pase okenn lòt moun, eksepte Jezikri.