“3: O Lo’u Faavae: O ō Tatou Tino o se Meaalofa mai le Atua,” Mauaina o le Malosi i le Alii :Faafoisia Faalelagona (2020)
“3: O Lo’u Faavae: O o Tatou Tino o se Meaalofa mai le Atua,” Mauaina o le Malosi i le Alii: Faafoisia Faalelagona
O Lo’u Faavae : O ō Tatou Tino o se Meaalofa mai le Atua—Taimi Aofai: 20 Minute
Mafaufau loloto:
O a ni faamanuiaga ua e maua mai le mauaina o se tino?
Maimoa:
“O Le Foafoaga Silisili a le Atua,” o loo maua i le https://churchofjesuschrist.org/study/video/self-reliance-videos [2:51]. (E lē maua le vitiō? Faitau le tusiga mo le “O Le Foafoaga Silisili a le Atua.”)
O Le Foafoaga Silisili a le Atua
Afai e lē mafai ona e matamata i le vitiō, faitau le tusiga lenei.
Peresitene Russell M. Nelson:
Soo se tasi e suesue i galuega a le tino o le tagata e mautinoa lava e “vaaia le Atua o femaliua’i i lona mamalu ma lona mana” [Mataupu Faavae ma Feagaiga 88:47].
E tofu le mata ma se tioata e otometi. O neura ma musele e pulea mata e lua e maua ai se ata se tasi e tafa-tolu. O taliga taitasi e fesootai i masini ua mamanu e faaliliu galu o leo i ni leo e lagonaina.
O lou fatu o se pamu ofoofogia. E fa faitotoa maaleale e tatala ma tapunia i le silia ma le 100,000 taimi i le aso. Mafaufau i le faatulagaga o le tino mo le puipuiga. Na te iloaina le tiga. Na te faatupuina autau puipui. O le tino e faafouina ona sela ua lē toe aogā ma faasoasoa le maualuga o ona elemene tāua.
O le tele o uiga maoae o lou tino e faamaonia ai lau lava ‟amio atua” [2 Peteru 1:4]. Sa taua e le Aposetolo o Paulo o se “malumalu o le Atua” [1 Korinito 3:16]. E faapefea lea mea? Aua o lou tino o le malumalu mo lou agaga. Ma o le auala e te faaaoga ai lou tino e aafia ai lou agaga. O le Atua o le Tama o o tatou agaga. O tatou o Sona faamoemoega paia. Ma ina ua Ia foafoaina i tatou faaletino, sa foafoaina i tatou i le faatusa o le Atua.
O le atiina ae o le agaga o se taunuuga faavavau. A tatou iloa lo tatou natura paia, ona tatou pulea lea o tatou manaʻoga. O le a taulai atu o tatou mata i vaaiga, taliga i leo, ma mafaufau i manatu e aogā i lo tatou foafoaga faaletino o se malumalu o lo tatou Tama i le Lagi. Mo nei meaalofa faaletino, ia faafetaia le Atua!
Talanoa:
E faapefea e le mauaina o se tino faaletino ona saunia i tatou ia avea faapei o lo tatou Tama Faalelagi?
Faitau:
O faamatalaga nei mai i taitai o le Ekalesia:
“Talu ai o se tino faaletino e matua totonugalemu i le fuafuaga o le fiafia a le Tama ma lo tatou atina’ega faaleagaga, ua saili ai Lusifelo e faalavelaveina lo tatou alualu i luma e ala lea i le faaosoosoina o i tatou e faaaoga ma le faaletatau o tatou tino” (David A. Bednar, “Mataala i le Tatalo e le Aunoa,” Liahona, Nov. 2019, 34).
“O lou saogalemu faaleagaga e taoto atoa lea i le aua lava ne’i faia le laasaga muamua faatosina e alu ai i le mea e lē tatau ona e alu ai ma le faia o le mea e lē tatau ona e faia. … [I le avea ai ma tagata soifua e tofu i tatou uma ma manaoga fiaai [faaletino] e manaomia mo lo tatou ola.] O nei manaoga fiaai e matuā tāua lava mo le faafualoaina o le ola. O le a la le mea a le fili e fai? … Na te osofaia i tatou e ala i o tatou manaoga fiaai. Na te faaosoosoina i tatou e ‘ai mea e lē tatau ona tatou aai ai, e inu mea e lē tatau ona tatou inuina, ma alolofa e lē tatau ona tatou alolofa ai!’ (Russell M. Nelson, i le “Advice from the Prophet of the Church to Millennials Living in a Hectic World,” Feb. 18, 2018, newsroom.ChurchofJesusChrist.org).
Talanoa:
E mafai faapefea e le faaaogaina sese o ō tatou tino ona aafia ai lo tatou faafoisia faalelagona?
Faitau:
O isi fuaitau o mau:
“O le agaga o le a toefuataia i le tino, ma le tino i le agaga; ioe, ma o le a toefuataia vae ma lima ma sooga uma i lona tino; ioe, e oo i se lauulu o le ulu o le a le leiloa; ae o le a toefuataia mea uma i o latou autino tatau ai ma atoatoa” (Alema 40:23).
“Ma o le a afio atu o ia, ma mafatia i tiga ma puapuaga ma faaosoosoga o ituaiga eseese uma; ma o le a oo ia te ia nei mea, ina ia mafai ona faataunuuina o le upu ua fai mai, o le a ia ave i ona luga tiga ma maʼi o ona tagata. … Ma o le a ia ave i ona luga le oti, ina ia mafai ona ia tatalaina fusi o le oti ia ua noatia ai ona tagata; ma o le a ia ave i ona luga o latou vaivaiga, ina ia mafai ona faatumuina ona loto i le alofa mutimutivale, e tusa ai ma la le tino, ina ia mafai ona ia silafia e tusa ai ma la le tino, le ala e fesoasoani ai i ona tagata, e tusa ma o latou vaivaiga” (Alema 7:12).
Talanoa:
E mafai faapefea e Iesu Keriso ona faamalosia i tatou ia onosaia lelei pe faatoilalo soo se tapulaa faaletino atonu o ia i tatou?
Tautino:
O le a ou filifilia se auala se tasi o le a ou taulimaina lelei ai lou tino e pei o se malumalu.